នៅ ស្រីពៅ Archives - Kampuchea Thmey Daily

ធ្លាក់ស្ទើរដល់កម្រិតសូន្យ នៅ ស្រីពៅ ងើបឡើងវិញដ៏ជោគជ័យ

chean virakbot — Wed, 23 Oct 2024 00:56:29 +0000

កីឡាការិនីពហុជំនាញ នៅ ស្រីពៅ ទទួលបានជោគជ័យគួរឲ្យកត់សំគាល់ក្នុងរយៈពេលចុងក្រោយនេះ បន្ទាប់ពីស្ទើរអស់សង្ឃឹមក្នុងអាជីពប្រដាល់។

ក្រោយមិនទទួលបានជោគជ័យក្នុងព្រឹត្តិការណ៍កីឡាស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ នៅ ស្រីពៅ បានបាត់មុខពីអាជីពប្រដាល់ ដោយបានទៅធ្វើការនៅរោងភាពយន្តមួយកន្លែងក្នុងរាជធានីភ្នំពេញ។ មូលហេតុសំខាន់ដែលរូបនាងទៅធ្វើការក្រៅពីអាជីពកីឡា ដោយសារមិនត្រូវបានរៀបចំឲ្យប្រកួត ដូច្នេះខ្វះចំណូលបង្ខំចិត្តទៅធ្វើការងារផ្សេងដើម្បីរកប្រាក់ចំណូលចូលគ្រួសារ នៅខណៈពេលកីឡាករ កីឡាការិនីល្បីៗមួយចំនួនជាប់ប្រកួតស្ទើររកពេលសម្រាកគ្មាន។

កាលពីថ្ងៃទី៥ ខែកុម្ភៈ ឆ្នាំ២០២៤ កីឡាការិនីដែលវ៉ៃសកល គុនចម្រុះ ឃីកបុកស៊ីង និងគុនខ្មែរបានប្រាប់ថា ៖«ដូចដឹងស្រាប់ហើយ ខ្ញុំខំប្រឹងហាត់ពីមុន អត់មានទីផ្សារប្រកួត។ ណាមួយ ខ្ញុំអត់មានក្របខណ្ឌដូចគេ។ គេមានក្របខណ្ឌ ទោះគេអត់បានប្រកួត ក៏គេមានលុយចាយ តែខ្ញុំវិញអត់បានប្រកួត គឺអត់លុយចាយ»។

បន្ទាប់មកនៅខែមីនា ឆ្នាំ២០២៤ លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរបច្ចុប្បន្ន ដែលពេលនោះជាអនុប្រធាន បានស្នើឲ្យ នៅ ស្រីពៅ វិលត្រឡប់ចូលសង្វៀនវិញ និងធានាឲ្យរៀបចំឲ្យរូបនាងបានឡើងប្រកួតទៀងទាត់។ ស្របពេលជាមួយគ្នានោះ ឧកញ៉ា ស្រី ចាន់ថន ក៏បានទទួលរូបនាងឲ្យចូលហ្វឹកហាត់នៅក្លិបរបស់លោក។ ពេលនោះហើយដែល នៅ ស្រីពៅ បានចូលហ្វឹកហាត់ប្រដាល់ទៀងទាត់វិញ ប៉ុន្តែមិនទាន់បានប្រកួតភ្លាមៗទេ ដោយត្រូវហ្វឹកហាត់ពង្រឹងសមត្ថភាពឲ្យល្អជាមុនសិន។

ទីបំផុតរយៈពេលត្រឹមតែប្រមាណ៧ខែក្រោយមក នៅ ស្រីពៅ សម្រេចបានសមិទ្ធផលតាមបំណងប្រាថ្នារបស់ខ្លួន។ រូបនាងបានឈ្នះមេដាយមាសក្នុងការប្រកួតកីឡាឃីកបុកស៊ីង ជើងឯកអាស៊ី កាលពីថ្ងៃទី១៣ ខែតុលា ឆ្នាំ២០២៤ ស្របតាមបំណងប្រាថ្នារបស់ខ្លួនដែលចង់បានមេដាយមាសជូនលោកឪពុក និងស្វាមីគឺកីឡាករ សុខ រិទ្ធ។

៦ថ្ងៃក្រោយមក នៅ ស្រីពៅ បានឈ្នះមេដាយមាសក្នុងការប្រកួតកីឡាយុទ្ធគុនចម្រុះខ្មែរបុរាណ ពានរង្វាន់សម្តេចបវរធិបតី លើកទី១ ឆ្នាំ២០២៤ថែមទៀត។ ប្រាក់រង្វាន់ដែលទទួលបានពីការឈ្នះមេដាយមាសកីឡាឃីកបុកស៊ីងអាស៊ី និងមេដាយមាស ពីយុទ្ធគុនចម្រុះខ្មែរបុរាណ ព្រមទាំងភាពជោគជ័យរបស់ស្វាមីគឺគ្រោងសាងសង់ផ្ទះផ្ទាល់ខ្លួន ខណៈសព្វថ្ងៃពួកគាត់កំពុងរស់នៅជាមួយម្តាយ។

នៅ ស្រីពៅ ជាកីឡាការិនីពហុជំនាញដែលមានកំណត់ត្រាល្អជាងគេក្នុងអាជីពប្រដាល់។ ទី១.រូបនាងបានឈ្នះមេដាយមាសកីឡាឃីកបុកស៊ីងអាស៊ី, ទី២.ឈ្នះខ្សែក្រវាត់គុនខ្មែរអន្តរជាតិ ទី៣.មានកំណត់ត្រាល្អក្នុងការប្រកួតគុនចម្រុះ (MMA) លើឆាកអន្តរជាតិ ទី៤.ជាកីឡាការិនីប្រដាល់សកលជម្រើសជាតិដែលបានឈ្នះមេដាយសំរិទ្ធកីឡាស៊ីហ្គេម ឆ្នាំ២០២១ និងទី៥.ចុងក្រោយបំផុតឈ្នះមេដាយមាសកីឡាយុទ្ធគុនចម្រុះខ្មែរបុរាណ ពានរង្វាន់សម្តេចធិបតី៕

អត្ថបទ៖ វីរបុត្រ

The post ធ្លាក់ស្ទើរដល់កម្រិតសូន្យ នៅ ស្រីពៅ ងើបឡើងវិញដ៏ជោគជ័យ appeared first on Kampuchea Thmey Daily.

អតីតកម្មការិនីកាត់ដេរ នៅ ស្រីពៅ មានកំណត់ត្រាល្អ៤ប្រភេទកីឡាផ្សេងគ្នា

chean virakbot — Tue, 15 Oct 2024 08:03:54 +0000

កីឡាការិនីប្រដាល់កម្ពុជា នៅ ស្រីពៅ បានក្លាយជាកីឡាការិនីម្នាក់គត់ដែលមានកំណត់ត្រាល្អក្នុងអាជីពកីឡា៤ផ្សេងគ្នាគឺកីឡាគុនខ្មែរ កីឡាប្រដាល់សកល កីឡាគុនចម្រុះ និងកីឡាឃីកបុកស៊ីង។

ទី១. កីឡាឃីកបុកស៊ីង

សមិទ្ធផលខ្ពស់បំផុតរបស់ នៅ ស្រីពៅ បានកើតមានឡើងកាលពីថ្ងៃទី១៣ ខែតុលា ឆ្នាំ២០២៤ បន្ទាប់ពីបានឈ្នះកីឡាការិនីឥណ្ឌា Neelakandan Neena ក្នុងវគ្គផ្តាច់ព្រ័ត្រ លើវិញ្ញាសាទម្ងន់ក្រោម៥៥គីឡូក្រាម ក្នុងព្រឹត្តិការណ៍ប្រកួតកីឡាឃីកបុកស៊ីង ជើងឯកអាស៊ី។ នេះជាកំណត់ត្រាថ្មីចុងក្រោយបំផុតសម្រាប់កីឡាការិនីរូបនាង។

មុនពេលឈ្នះមេដាយមាសឃីកបុកស៊ីងអាស៊ី នៅ ស្រីពៅ ធ្លាប់ឈ្នះកីឡាការិនីចិន សម្រាប់ការប្រកួតមិត្តភាពលើកីឡាឃីកបុកស៊ីងនៅខេត្តសៀមរាប។

ទី២. កីឡាគុនខ្មែរ

កីឡាប្រដាល់គុនខ្មែរអាចចាត់ទុកជាប្រភេទកីឡាដើមបំផុតសម្រាប់ នៅ ស្រីពៅ នៅពេលបានចូលហ្វឹកហាត់ដំបូងជាមួយព្រឹទ្ធាចារ្យគ្រូតា ញូវ ម៉ាក់ និងលោកគ្រូ ម៉ាក់ សាខន នៅក្លិបតាឡីដំរីមានឬទ្ធិ ក្នុងខណ្ឌដង្កោ រាជធានីភ្នំពេញ។ ក្នុងអាជីពគុនខ្មែរ កីឡាការិនីរូបនេះបាន ឈ្នះខ្សែក្រវាត់គុនខ្មែរអន្តរជាតិ Kun Khmer World Champion។

សម្រាប់អាជីពគុនខ្មែរនេះដែរ នៅ ស្រីពៅ បានបង្កើតកំណត់ត្រាល្អក្នុងការចេញទៅប្រកួតនៅប្រទេសមីយ៉ាន់ម៉ាកាលពី២០១៨។ កីឡាការិនីរូបនេះបានប្រកួត២ដងនៅប្រទេសមីយ៉ាន់ម៉ា ដោយទទួលបានជ័យជម្នះ២ដង និងបានក្លាយជាកីឡាការិនីឆ្នើមប្រចាំឆ្នាំរបស់សង្វៀន Lethwei។

ទី៣. កីឡាគុនចម្រុះ (MMA)

នៅពេលកំពុងលើផ្លូវដ៏ល្អក្នុងអាជីពប្រដាល់គុនខ្មែរ នៅ ស្រីពៅ ទទួលបានឱកាសចេញទៅប្រកួតកីឡាគុនចម្រុះនៅស្ថាប័នប្រដាល់លំដាប់អាស៊ី ONE Championship។ ការប្រកួតដំបូងនៅសង្វៀននេះ កីឡាការិនីកម្ពុជាបានយកឈ្នះកីឡាការិនីថៃ Rika និងប្រកួតជាបន្តបន្ទាប់ទៀតនៅលើឆាកអន្តរជាតិ។

ទី៤. កីឡាប្រដាល់សកល

អ្នកគាំទ្រមួយចំនួនប្រហែលជាមិនដឹងទេថា នៅ ស្រីពៅ បានជាប់ជម្រើសជាតិកម្ពុជាមុនគេគឺផ្នែកកីឡាប្រដាល់សកល។ កីឡាការិនីរូបនេះបានចេញទៅប្រកួតលើឆាកអន្តរជាតិជាច្រើនចន្លោះឆ្នាំ២០១៨-១៩ ទាំងការប្រកួតប្រដាល់ក្នុងកីឡាស៊ីហ្គេម ជើងឯកអាស៊ាន និងក្នុងតំបន់អាស៊ាន។

នៅ ស្រីពៅ បានឈ្នះមេដាយមាសក្នុងការប្រដាល់សកល ជ្រើសរើសជើងឯកថ្នាក់ជាតិ ស្ទើររាល់ឆ្នាំចន្លោះពីឆ្នាំ២០១៧ ដល់២០១៩។ នៅឆ្នាំ២០១៩ នាងបានឈ្នះមេដាយសំរិទ្ធ កីឡាស៊ីហ្គេម នៅប្រទេសហ្វីលីពីនផ្នែកប្រដាល់សកលនេះ។

សូមបញ្ជាក់ថា នៅ ស្រីពៅ បានចាប់ផ្តើមហ្វឹកហាត់ប្រដាល់គុនខ្មែរដំបូងកាលពីឆ្នាំ២០១៤ ក្នុងវ័យ១៦ឆ្នាំ បន្ទាប់ពីបង្ខំចិត្តឈប់រៀនត្រឹមថ្នាក់ទី៩ដោយសារជីវភាពគ្រួសារខ្វះខាត។ នៅពេលចាប់ផ្តើមហ្វឹកហាត់ប្រដាល់គុនខ្មែរដំបូងមិនសូវច្បាស់លាស់ កីឡាការិនីរូបនេះក៏បានទៅធ្វើការនៅរោងចក្រកាត់ដេរបានរយៈពេលជាងមួយឆ្នាំទើបវិលត្រឡប់ចូលហ្វឹកហាត់ប្រដាល់វិញ។

ក្រោយមក នៅ ស្រីពៅ ចាប់ផ្តើមហ្វឹកហាត់ប្រដាល់សកលរហូតជាប់ជម្រើសជាតិកម្ពុជានៅឆ្នាំ២០១៧ មុនពេលប្តូរទៅអាជីពគុនខ្មែរវិញ ហើយបន្ថែមអាជីពគុនចម្រុះ មុនពេលបង្កើនប្រដាល់ឃីកបុកស៊ីងថែមទៀត។

កីឡាការិនីពហុជំនាញ នៅ ស្រីពៅ បានរៀបការជាមួយកីឡាករប្រដាល់គុនខ្មែរ-ឃីកបុកស៊ី សុខ រិទ្ធ កាលពីខែមករា ឆ្នាំ២០២៤។ ស្វាមីជាកីឡាករប្រដាល់គុនខ្មែរ និងឃីកបុកស៊ីងដ៏ជោគជ័យម្នាក់ដែលបានឈ្នះមេដាយមាសកីឡាឃីកបុកស៊ីង អាស៊ី ឆ្នាំ២០២២ និងឆ្នាំ២០២៤ ព្រមទាំងបានឈ្នះមេដាយមាស កីឡាស៊ីហ្គេម ឆ្នាំ២០២៣៕

អត្ថបទ៖ វីរបុត្រ

The post អតីតកម្មការិនីកាត់ដេរ នៅ ស្រីពៅ មានកំណត់ត្រាល្អ៤ប្រភេទកីឡាផ្សេងគ្នា appeared first on Kampuchea Thmey Daily.

ស្វាគមន៍ នៅ ស្រីពៅ នឹងដាក់ពាក្យឈប់ធ្វើការនៅរោងកុនវិលចូលប្រដាល់វិញ

chean virakbot — Tue, 05 Mar 2024 03:31:36 +0000

កីឡាការិនីពហុជំនាញ នៅ ស្រីពៅ នឹងដាក់ពាក្យលាឈប់ពីការងារនៅរោងកុនមួយកន្លែងដើម្បីវិលត្រឡប់ចូលអាជីពប្រដាល់វិញ បន្ទាប់ពីមានការធានាពីលោក ខូវ ឆាយ អនុប្រធានទី១សហព័ន្ធកីឡាប្រដាល់គុនខ្មែរ។

ពីរថ្ងៃចុងក្រោយនេះមានការចាប់អារម្មណ៍ខ្លាំងចំពោះកីឡាការិនី នៅ ស្រីពៅ បន្ទាប់ពីនាងបានបង្ហាញអារម្មណ៍ពិតពាក់ព័ន្ធនឹងអាជីពប្រដាល់គ្មានទីផ្សាររហូតធ្វើឲ្យនាងបានឈប់ពីប្រដាល់កាលពីមួយឆ្នាំមុនដើម្បីធ្វើការនៅរោងកុនមួយកន្លែង។

ការមិនបានឡើងប្រកួតដោយសារគ្មានអ្នកចាប់គូឲ្យជាមូលហេតុចម្បងដែលជំរុញឲ្យនាងឈប់ពីប្រដាល់។ នៅព្រឹកថ្ងៃទី៥ ខែកុម្ភៈនេះ កីឡាការិនីដែលវ៉ៃសកល គុនចម្រុះ ឃីកបុកស៊ីង និងគុនខ្មែរបានប្រាប់ថា ៖«ដូចដឹងស្រាប់ហើយ ខ្ញុំខំប្រឹងហាត់ពីមុន អត់មានទីផ្សារប្រកួត។ ណាមួយ ខ្ញុំអត់មានក្របខណ្ឌដូចគេ។ គេមានក្របខណ្ឌ ទោះគេអត់បានប្រកួត ក៏គេមានលុយផ្គត់ផ្គង់ដែរ តែខ្ញុំវិញអត់បានប្រកួត គឺអត់លុយចាយ»។

កាលពីល្ងាចមិញនេះ លោក ខូវ ឆាយ អនុប្រធានទី១សហព័ន្ធកីឡាប្រដាល់គុនខ្មែរបានធានារៀបចំឲ្យ នៅ ស្រីពៅ ទទួលបានឱកាសឡើងប្រកួតទៀងទាត់វិញ ប្រសិនបើកីឡាការិនីរូបនេះវិលត្រឡប់ចូលសង្វៀនវិញ។

លោកអនុប្រធានគុនខ្មែរបានរៀបរាប់ថា ៖«ខ្ញុំគាំទ្រឲ្យ ស្រីពៅ ត្រឡប់មកហ្វឹកហាត់ និងឡើងសង្វៀនប្រកួតវិញ។ ខ្ញុំធានាថា នឹងសម្របសម្រួលក្នុងការចាប់គូឲ្យស្រីពៅបានឡើងប្រកួតទៀងទាត់។ សហព័ន្ធកំពុងត្រៀមពិភាក្សាជាមួយស្ថានីយ៍ទូរទស្សន៍ និងដៃគូអភិវឌ្ឍទាំងអស់ ដើម្បីកំណត់គោលការណ៍ឲ្យស្ថានីយ៍ទូរទស្សន៍ទាំងអស់ ត្រូវរៀបចំឲ្យមានគូយុវជនថ្នាល និងគូកីឡាការិនីយ៉ាងតិច១គូ សម្រាប់កម្មវិធីប្រកួតកីឡាប្រដាល់គុនខ្មែរទាំងអស់ប្រចាំសប្តាហ៍»។

ឃើញដំណឹងដ៏ល្អនេះ នៅ ស្រីពៅ បានប្រាប់សារព័ត៌មាន«កម្ពុជាថ្មី»ថា ៖«ខ្ញុំនឹងវិលចូលសង្វៀនវិញ តែខ្ញុំដាក់ពាក្យឈប់ពីកន្លែងធ្វើការសិន»។

នៅ ស្រីពៅ ជាកីឡាការិនីប្រដាល់ម្នាក់ដែលបានធ្វើឲ្យល្បីសុះសាយលើឆាកអន្តរជាតិនៅពេលបានយកឈ្នះកីឡាការិនីថៃ Rika Ishige កាលពីឆ្នាំ២០១៩ នៅសង្វៀន ONE Championship ។ បន្ទាប់មកនាងបានប្រកួតចាញ់ពិន្ទុកីឡាការិនីឥណ្ឌូណេស៊ Priscilla និងចាញ់កីឡាការិនីឥណ្ឌា Ritu Phogat។

អតីតកម្មការិនីរោងចក្រកាត់ដេរដែលមានជំនាញប្រដាល់សកល គុនខ្មែរ ឃីកបុកស៊ីង និងគុនចម្រុះបានផ្ទុះល្បីខ្លាំងនៅពេលប្រកួត Lethwei នៅប្រទេសមីយ៉ាន់ម៉ាចន្លោះឆ្នាំ២០១៧-២០១៨ នៅប្រទេសមីយ៉ាន់ម៉ាដោយបានប្រកួត២ដងគឺឈ្នះទាំង២ដង ហើយត្រូវបានជ្រើសរើសជាកីឡាការិនីឆ្នើមប្រចាំឆ្នាំ២០១៨។

សមិទ្ធផលសំខាន់របស់នាងគឺឈ្នះខ្សែក្រវាត់គុនខ្មែរអន្តរជាតិ Kun Khmer World Champion ឈ្នះមេដាយមាសប្រដាល់សកលថ្នាក់ជាតិជាច្រើនលើក និងឈ្នះមេដាយសំរិទ្ធស៊ីហ្គេម។ កាលពីខែមករា ឆ្នាំ២០២៤ កីឡាការិនីរូបនេះបានរៀបការជាមួយកីឡាករ សុខ រិទ្ធ ជាម្ចាស់មេដាយមាសឃីកបុកស៊ីងជើងឯកអាស៊ីឆ្នាំ២០២២ និងបានឈ្នះមេដាយមាសកីឡាស៊ីហ្គេមឆ្នាំ២០២៣៕

អត្ថបទ៖ វីរបុត្រ

The post ស្វាគមន៍ នៅ ស្រីពៅ នឹងដាក់ពាក្យឈប់ធ្វើការនៅរោងកុនវិលចូលប្រដាល់វិញ appeared first on Kampuchea Thmey Daily.

ម្ចាស់ខ្សែក្រវាត់គុនខ្មែរ នៅ ស្រីពៅ ចូលរោងការនឹងម្ចាស់មេដាយមាសអាស៊ី សុខ រិទ្ធ

chean virakbot — Wed, 03 Jan 2024 03:09:40 +0000

កីឡាការិនីពហុជំនាញ នៅ ស្រីពៅ និងកីឡាករប្រដាល់គុនខ្មែរ-ឃីកបុកស៊ី សុខ រិទ្ធ បានសម្រេចដឹកដៃគ្នាចូលរោងមង្គលជ័យនៅថ្ងៃសុក្រ ទី៥ ខែមករា ឆ្នាំ២០២៤ បន្ទាប់ពីអ្នកទាំងពីរបានយល់ចិត្តគ្នាប៉ុន្មានឆ្នាំចុងក្រោយ។

កីឡាករ សុខ រិទ្ធ ទទួលបានជោគជ័យគួរឲ្យកត់សំគាល់ក្នុងអាជីពរបស់ខ្លួន បន្ទាប់ពីវិលត្រឡប់មកប្រទេសកម្ពុជាវិញកាលពីឆ្នាំ២០២២ ក្រោយបានចំណាយពេលច្រើនឆ្នាំនៅប្រទេសថៃជាមួយឪពុកម្តាយដែលធ្វើការនៅទីនោះ។ រូបគេបានឈ្នះមេដាយមាសក្នុងការប្រកួតឃីកបុកស៊ីងជើងឯកអាស៊ីឆ្នាំ២០២២ នៅប្រទេសថៃ និងបានឈ្នះមេដាយមាសកីឡាស៊ីហ្គេម លើកទី៣២ ដែលកម្ពុជាធ្វើម្ចាស់ផ្ទះ។

ពាក់ព័ន្ធនឹងអាជីពប្រដាល់ សុខ រិទ្ធ ធ្លាប់បានប្រាប់«កម្ពុជាថ្មី»ថា៖«ខ្ញុំស្រឡាញ់ប្រដាល់តាំងពីក្មេង ព្រោះខ្ញុំរៀនអត់ពូកែ។ កាលនៅរៀន គ្រាន់តែចូលសាលា ខ្ញុំមានអារម្មណ៍ឈឺក្បាល។ ខ្ញុំស្រឡាញ់ប្រដាល់តាំងពីជំនាន់លោកគ្រូ អេ ភូថង, លោកគ្រូ វ៉ន វីវា មើលពួកគាត់វ៉ៃតាមទូរទស្សន៍សខ្មៅ»។

ចុងឆ្នាំ២០២៣ សុខ រិទ្ធ ស្ទើរតែមិនជឿថា គុនខ្មែរទទួលបានគាំទ្រខ្លាំងពីមហាជន និងមានអ្នកជួយជ្រោមជ្រែងរៀបចំកម្មវិធីធំៗច្រើន។

សុខ រិទ្ធ បានបន្ថែមថា ៖«តាំងពីខ្ញុំចាប់អាជីពជាអ្នកប្រដាល់មកខ្ញុំមិនដែលគិតថា គុនខ្មែរទទួលបានការគ្រាំទ្រយ៉ាងខ្លាំងបែបនេះទេ។ ខ្ញុំទើបតែឃើញ២ឆ្នាំចុងក្រោយនេះទេ មានបងប្អូនគាំទ្រគុនខ្មែរច្រើន។ ខ្ញុំគិតថា រយៈពេល២ទៅឆៅ៣ឆ្នាំទៀត គុនខ្មែរកាន់តែរីកចម្រើនជាងនេះទៀត បើបងប្អូននៅតែបន្តការគាំទ្របែបនេះរហូត»។

ដោយឡែក នៅ ស្រីពៅ ជាកីឡាការិនីមានជំនាញច្រើនគឺប្រដាល់សកល គុនខ្មែរ ឃីកបុកស៊ីង និងគុនចម្រុះ។ កីឡាការិនីរូបនេះ បានផ្ទុះល្បីខ្លាំងនៅពេលបានចេញទៅប្រកួត Lethwei នៅប្រទេសមីយ៉ាន់ម៉ា និងប្រកួតនៅ ONE Championship។

ចន្លោះឆ្នាំ២០១៧-២០១៨ នៅ ស្រីពៅ បានចេញទៅប្រកួតសង្វៀន World Lethwei Championship នៅប្រទេសមីយ៉ាន់ម៉ាដោយបានប្រកួត២ដងគឺឈ្នះទាំង២ដង ហើយត្រូវបានជ្រើសរើសជាកីឡាការិនីឆ្នើមប្រចាំឆ្នាំ២០១៨របស់សង្វៀនមួយនេះ។

បន្ទាប់មក ស្រីពៅ បានចូលប្រឡូកសង្វៀនគុនចម្រុះ ONE Championship ដោយប្រកួតលើកទី១ឈ្នះកីឡាការិនីថៃ Rika នៅប្រទេសថៃ។ សមិទ្ធផលសំខាន់របស់នាងគឺឈ្នះខ្សែក្រវាត់គុនខ្មែរអន្តរជាតិ Kun Khmer World Champion និងឈ្នះមេដាយមាសប្រដាល់សកលថ្នាក់ជាតិជាច្រើន៕

អត្ថបទ៖ វីរបុត្រ

The post ម្ចាស់ខ្សែក្រវាត់គុនខ្មែរ នៅ ស្រីពៅ ចូលរោងការនឹងម្ចាស់មេដាយមាសអាស៊ី សុខ រិទ្ធ appeared first on Kampuchea Thmey Daily.

នៅ ស្រីពៅ Archives - Kampuchea Thmey Daily

ធ្លាក់​ស្ទើរ​ដល់​កម្រិត​សូន្យ នៅ ស្រីពៅ ងើប​ឡើង​វិញ​ដ៏ជោគជ័យ

អតីត​កម្មការិនី​កាត់ដេរ នៅ ស្រីពៅ មានកំណត់ត្រា​ល្អ​៤ប្រភេទកីឡាផ្សេងគ្នា

ស្វាគមន៍ នៅ ស្រីពៅ នឹងដាក់ពាក្យឈប់ធ្វើការនៅរោងកុនវិលចូលប្រដាល់វិញ

ម្ចាស់ខ្សែក្រវាត់គុនខ្មែរ នៅ ស្រីពៅ ចូលរោងការ​នឹងម្ចាស់មេដាយមាសអាស៊ី សុខ រិទ្ធ

ធ្លាក់ស្ទើរដល់កម្រិតសូន្យ នៅ ស្រីពៅ ងើបឡើងវិញដ៏ជោគជ័យ

អតីតកម្មការិនីកាត់ដេរ នៅ ស្រីពៅ មានកំណត់ត្រាល្អ៤ប្រភេទកីឡាផ្សេងគ្នា

ម្ចាស់ខ្សែក្រវាត់គុនខ្មែរ នៅ ស្រីពៅ ចូលរោងការនឹងម្ចាស់មេដាយមាសអាស៊ី សុខ រិទ្ធ