កាលពីថ្ងៃទី២១ ខែមិថុនា​ គណនីហ្វេសប៊ុកឈ្មោះ លោកតាធំភ្នំគូលែន ដែលមានម្ចាស់ឈ្មោះថា ណុប សក្កដា បានបង្ហោះវីដេអូរយៈពេលប្រមាណជិត៥នាទី ដែលធ្វើសកម្មភាពយកកាំភ្លើងខ្លីបាញ់ក្បាលពោះខ្លួន​ឯងបង្អួតពីមន្តអាគម ហើយត្រូវអ្នកលេងបណ្ដាញសង្គមរិះគន់ព្រោងព្រាត។

ក្រោយរងការរិះគន់ នៅពេលរសៀលថ្ងៃទី២៤ ខែមិថុនា​  គណហ្វេសប៊ុកភ្នំគូលែន បានចេញលិខិតសុំទោសជាសាធារណៈ ដែលអះអាងខ្លួនជាគ្រូអាគមដែលមានឈ្មោះថា  គ្រូសច្ចៈវិរោន ណុប សក្កដា ហៅគ្រូផេះគ្រូអង្កាម អាយុ ៥៥ឆ្នាំ កាន់អត្តសញ្ញាណ ប័ណ្ណលេខ 020930176 (01) មានអាសយដ្ឋានស្ថិតនៅ ភូមិត្រពាំងស្នោរ សង្កាត់ពញាពន់ ខណ្ឌព្រែកព្នៅ រាជធានីភ្នំពេញ។

ក្នុងលិខិតសុំទោស គ្រូអាគម សរសេរទទួលកំហុសថា  កាលពីព្រឹកថ្ងៃទី២១ ខែមិថុនា ឆ្នាំ២០២៤  ខ្លួនបានបង្ហោះផ្សព្វផ្សាយអំពីសកម្មភាពការប្រើប្រាស់អាវុធយកមកបាញ់ខ្លួនឯងផ្ទាល់។ បុគ្គលរូបនេះ អះអាងថាទង្វើនេះ  ព្រោះខ្លួនចង់បញ្ជាក់ អំពីក្បួនវេទមន្តសិល្បៈអស់ខ្មែរថាពិតជាអស្ចារ្យ ដើម្បីឲ្យបរទេសក៏ដូចជាប្រទេសជិតខាងបានឃើញ។

បន្ថែមពីនេះ លោក ណុប សក្កដា សារភាពថាទង្វើដែលខ្លួនប្រព្រឹត្តជាទង្វើល្ងិតល្ងង់ដែលមិនបានសិក្សា និងស្វែងយល់គ្រប់ជ្រុងជ្រោយអំពីច្បាប់រដ្ឋនៅក្នុងព្រះរាជាណាចក្រកម្ពុជា ។

គ្រូអាគមរូបនេះ អះអាងថា ក្រោយដឹងកំហុស រូបគេសម្រេចចិត្តលុបវីដេអូនេះចេញពីបណ្ដាញសង្គម  ហើយ សុំទោសជាសាធារណៈ។ ក្រៅពីសុំទោស រូបគេ ក៏សូមការយោគយល់  និងបន្ទាបខ្លួនថាជាមនុស្សល្អិតល្ងង់ មិនស្គាល់អំពីច្បាប់ទម្លាប់។​

ទោះបុគ្គលរូបនេះសុំទោសជាសាធារណៈក៏ដោយ ក៏ស្នងការនគរបាលរាជធានីភ្នំពេញ លោក ជួន ណារិន្ទ នៅល្ងាចថ្ងៃទី២៤ ខែមិថុនា នេះ បញ្ជាឱ្យអធិការនគរបាលខណ្ឌព្រែកព្នៅ នាំខ្លួនមកសាកសួរ។

ក្នុងពេលសមត្ថកិច្ចសាកសួរ បុគ្គល ណុប សក្កដា បានសារភាពថា កាំភ្លើងខ្លីម៉ាកlock ដែលខ្លួនធ្វើសកម្មភាពបាញ់ខ្លួនឯងចំនួន៤គ្រាប់ ថតវីដេអូបង្ហោះនោះគឺខ្លួនរើសបាន។ បុគ្គលរូបនេះ បំភ្លឺថា ការដែលខ្លួនយកកាំភ្លើងបាញ់ក្បាលពោះខ្លួនឯង គឺក្នុងបំណងអួតអ្នកភូមិពីមហិទ្ធិប្ញទ្ធិខ្លាំងពូកែបាញ់មិនមុត ក្នុងពិធីឡើងអាស្រមបារមីនៅផ្ទះរបស់គាត់កាលពីខែមេសាឆ្នាំ២០២២ ។  បុគ្គលរូបនេះ សារភាពថា ក្រោយធ្វើការបាញ់រួច រូបគេបានកាំភ្លើងនោះយកទៅបោះចោលនៅក្នុងជ្រោះមួយកន្លែង នៅក្នុងខេត្តក្រចេះ។

បន្ទាប់ពីនគរបាលខណ្ឌព្រែកព្នៅសាកសួររួច អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឲ្យឃាត់ខ្លួនជនសង្ស័យ ដើម្បីអនុវត្តតាមផ្លូវច្បាប់៕

អត្ថបទ៖ សុភា

The post តំណាងអយ្យការចោទបុរសយកកាំភ្លើងបាញ់ពោះខ្លួនឯង ពីបទប្រេីប្រាស់អាវុធដោយគ្មានការអនុញ្ញាត appeared first on Kampuchea Thmey Daily.