នៅថ្ងៃទី០២ ខែកក្កដា ឆ្នាំ២០២៦ អនុវត្តតាម អនុសាសន៍ ដ៏ខ្ពង់ខ្ពស់ របស់ លោក អភិសន្តិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកសន្តិបណ្ឌិត និង ថ្នាក់ ដឹកនាំ ក្រសួងមហាផ្ទៃ លោក ឧត្តមសេនីយ៍ឯក សុខ វាសនា អគ្គនាយក អន្តោ ប្រវេសន៍ បានណែនាំឱ្យនាយកដ្ឋានស៊ើបអង្កេត និង អនុវត្ត នីតិវិធី ធ្វើការ បណ្តេញ ជន ជាតិវៀតណាម សរុបចំនួន ៤៥នាក់ ស្រី០៣នាក់ ពាក់ ព័ន្ធករណីឆបោកតាមប្រព័ន្ធបច្ចេកវិទ្យា (Online Scams) ករណី ជួញដូរ ប្រើប្រាស់ដោយខុសច្បាប់នូវសារធាតុញៀន គ្មានលិខិតឆ្លងដែន, និងករណី លួចស្នាក់នៅដោយខុសច្បាប់ ត្រូវបានបណ្ដេញចេញ តាមប៉ុស្តិ៍នគរបាលច្រកទ្វារអន្តរជាតិព្រៃវល្លិ៍ (ខេត្តស្វាយរៀង)។

ការបណ្ដេញចេញជនជាតិបរទេសខាងលើនេះ គឺជាការអនុវត្តតាមវិធានការច្បាប់យ៉ាងម៉ឺងម៉ាត់របស់ សម្ដេចមហាបរវធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងការទទួលដឹកនាំតម្រង់ទិសយ៉ាងមុតមាំបំផុតរបស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្រ្តីក្រសួងមហាផ្ទៃ ក្នុងកិច្ចខិតខំប្រឹងប្រែងបោសសំអាត និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យាដែលកើតមានក្នុងព្រះរាជាណាចក្រកម្ពុជាទាំងអស់ ដើម្បីធានាការពារសុវត្ថិភាពជូនប្រជាពលរដ្ឋទាំងក្នុងតំបន់ និងសកលលោក ដោយគ្មានការលើកលែងនោះឡើយ ជាពិសេសចំពោះមេខ្លោងដែលនៅពីក្រោយ ក៏ដូចជាការជួយសង្គ្រោះដល់ជនរងគ្រោះដែលត្រូវមេខ្លោងបោកបញ្ឆោតឱ្យមកធ្វើការក្នុងសកម្មភាពឆបោកតាមប្រព័ន្ធបច្ចេកវិទ្យាណាមួយហើយត្រូវបានមានសេរីភាព និងអាចវិលត្រឡប់ទៅប្រទេសរបស់ខ្លួនវិញ៕

The post ជនជាតិវៀតណាម ៤៥នាក់ពាក់ ព័ន្ធករណីឆបោកតាមប្រព័ន្ធបច្ចេកវិទ្យា ត្រូវបានបណ្ដេញចេញពីព្រះរាជាណាចក្រកម្ពុជា appeared first on Kampuchea Thmey Daily.

តាមរយៈគំនិតផ្តួចផ្តើមនេះ ប្រជាពលរដ្ឋអាចផ្ទៀងផ្ទាត់អត្តសញ្ញាណស៊ីមកាតក្នុងកម្មវិធី SIM Verifier Mini App ដែលមាននៅក្នុងថ្នាលសេវាឌីជីថលរួម DG SuperApp ដែលបានតភ្ជាប់ប្រព័ន្ធស្វ័យប្រវត្តិកម្មរបស់គ្រឹះស្ថានធនាគារនិងហិរញ្ញវត្ថុ។ គំនិតផ្តួចផ្តើមនេះក៏នឹងរួមចំណែក ក្នុងការជំរុញការធ្វើបរិវត្តកម្ម និងនវានុវត្តន៍ឌីជីថលនៅក្នុងវិស័យទូរគមនាគមន៍ និងវិស័យ​ធនាគារ ដែលជាគន្លឹះគាំទ្រដល់សេដ្ឋកិច្ចនិងសង្គមឌីជីថលនៅកម្ពុជាផងដែរ។

ថ្លែងក្នុងពិធីបើក ទេសាភិបាល ធនាគារជាតិនៃកម្ពុជា លោកស្រី ជា សិរី គូសបញ្ជាក់ថា៖​​«ការបើកយុទ្ធនាការផ្ទៀងផ្ទាត់អត្តសញ្ញាណអ្នកប្រើប្រាស់ស៊ីមកាតជាមួយនឹងគណនីធនាគារ/គណនីទូទាត់សងប្រាក់របស់អ្នកប្រើប្រាស់នាថ្ងៃនេះ ធ្វើឡើងដើម្បីបើកទំព័រជាផ្លូវការ និងផ្សព្វផ្សាយ​ជា​​សា​ធារ​ណៈដល់​អ្នកប្រើប្រាស់ ឱ្យបានជ្រួតជ្រា​ប​អំពី​យន្តការផ្ទៀងផ្ទាត់ខាងលើ ​ព្រមទាំងជំរុញ​និងលើកទឹកចិត្តឱ្យ​មាន​ការ​ចូលរួមអនុវត្តយន្តការខាង​លើ​ឱ្យបាន​កាន់​តែ​ទូលំទូលាយ។​ ការបញ្ជាក់ភាពត្រឹមត្រូវនៃលេខទូរសព្ទ និងស៊ីមកាតរបស់អ្នកប្រើប្រាស់ ពិតជាមានសារៈសំខាន់ខ្លាំងណាស់ក្នុងការការពារសុវត្ថិភាពទិន្នន័យផ្ទាល់ខ្លួន ដូចជា កូដ OTP និងគណនីរបស់អ្នកប្រើប្រាស់ ព្រមទាំងជួយទប់ស្កាត់បទល្មើសឆបោកតាមប្រព័ន្ធបច្ចេកវិទ្យាក្នុងសង្គមផងដែរ»។

រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត សំណូមពរឱ្យក្រុមការងារបច្ចេកទេស ប្រតិបត្តិករទូរសព្ទចល័ត និងមន្ទីរប្រៃសណីយ៍និងទូរគមនាគមន៍ខេត្ត សហការគ្នាជំរុញយុទ្ធនាការនេះឱ្យបានទូលំទូលាយ និងត្រៀមដោះស្រាយរាល់បញ្ហាដែលអាចកើតមាន ព្រមទាំងរៀបចំសេវាផ្ទៀងផ្ទាត់អត្តសញ្ញាណស៊ីមកាតដោយផ្ទាល់ដល់ទីកន្លែង ដូចជានៅតាមក្រសួង ស្ថាប័ន គ្រឹះស្ថានឧត្តមសិក្សារដ្ឋនិងឯកជន រោងចក្រ សហគ្រាស និងទីប្រជុំជនជាដើម ដើម្បីអនុវត្តយុទ្ធនាការនេះឱ្យបានដោយជោគជ័យ។

ធនាគារជាតិនៃកម្ពុជា និងក្រសួងប្រៃសណីយ៍និងទូរគមនាគមន៍ អះអាងថា នឹងបន្តសហការអភិវឌ្ឍ និងតភ្ជាប់ប្រព័ន្ធបច្ចេកវិទ្យាឌីជីថលផ្សេងៗបន្ថែមទៀត ដើម្បីជំរុញល្បឿននៃការធ្វើបរិវត្តកម្មឌីជីថលក្នុងវិស័យធនាគារ និងវិស័យប្រៃសណីយ៍និងទូរគមនាគមន៍ឱ្យបានកាន់តែលឿន ស្របតាមគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា៕

The post កម្ពុជាបើកយុទ្ធនាការផ្ទៀងផ្ទាត់អត្តសញ្ញាណអ្នកប្រើប្រាស់ស៊ីមកាតជាមួយគណនីធនាគារ គណនីទូទាត់សងប្រាក់ ដើម្បីកាត់ផ្តាច់ឫសគល់បទល្មើសឆបោកតាមអនឡាញ appeared first on Kampuchea Thmey Daily.

ប្រតិបត្តិការនេះ ធ្វើឡើងក្រោមបទបញ្ជាដ៏ម៉ឺងម៉ាត់របស់ លោក ប៉ែន កុសល្យ អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត ដោយមានការសម្របសម្រួលផ្ទាល់ពីតំណាងអយ្យការអមសាលាដំបូងខេត្ត។កម្លាំងចម្រុះដែលបានចូលរួមធ្វើប្រតិបត្តិការ រួមមាន ស្នងការដ្ឋាននគរបាលខេត្ត, កងរាជអាវុធហត្ថខេត្ត, នាយកដ្ឋាននគរបាលព្រហ្មទណ្ឌ និងអាជ្ញាធរមូលដ្ឋាន។

ជាលទ្ធផល នៅក្នុងការចុះត្រួតពិនិត្យទីតាំងបន្ទប់ជួលចំនួន ០៣កន្លែង ស្ថិតក្នុងភូមិត្រពាំងផ្លុងទី២ ឃុំត្រពាំងផ្លុង ស្រុកពញាក្រែក (រួមមានបន្ទប់សរុប ៨៨បន្ទប់, ទូកុងទឺន័រ ០៩ទូ, អាហារដ្ឋាន ០១ និងផ្ទះបាយ ០២) អាជ្ញាធរបានរកឃើញជនបរទេសស្នាក់នៅចំនួន ២៣នាក់ (ក្នុងនោះមានស្រី ០៣នាក់)។

បច្ចុប្បន្ន ជនបរទេសទាំង ២៣នាក់ ត្រូវបានបញ្ជូនទៅកាន់អធិការដ្ឋាននគរបាលស្រុកពញាក្រែក ភ្លាមៗដើម្បីធ្វើការសាកសួរ និងអនុវត្តនីតិវិធី។ ជាមួយគ្នានោះ ក្រុមការងារបានធ្វើការអប់រំ ណែនាំ និងធ្វើកិច្ចសន្យាស្របតាមអនុក្រឹត្យលេខ០៣ របស់រាជរដ្ឋាភិបាល និងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា (Online Scams)។

កម្លាំងគណៈបញ្ជាការឯកភាពរដ្ឋបាលខេត្ត កំពុងបន្តសកម្មភាពស្រាវជ្រាវ និងត្រួតពិនិត្យយ៉ាងក្តៅគគុកលើទីតាំងសង្ស័យនានា គ្របដណ្តប់ទូទាំង ៧ ក្រុង-ស្រុក ក្នុងខេត្តត្បូងឃ្មុំ ដើម្បីបោសសំអាតបទល្មើសបច្ចេកវិទ្យា (Online Scams), បទល្មើសគ្រឿងញៀន, ក្មេងទំនើង និងល្បែងស៊ីសង ឱ្យអស់ពីទឹកដីខេត្តត្បូងឃ្មុំ មិនឱ្យកើតមានឡើងជាដាច់ខាត៕

អត្ថបទ ​និងរូបភាព​៖​ឡេក​ ចាន់ពេជ្រ

The post ជនបរទេស ២៣នាក់ ត្រូវបានឃាត់ខ្លួន ក្នុងការចុះបង្ក្រាបបទល្មើសបច្ចេកវិទ្យា និងការស្នាក់នៅខុសច្បាប់ នាខេត្តត្បូងឃ្មុំ appeared first on Kampuchea Thmey Daily.

ប្រតិបត្តិការបង្ក្រាបនេះ ត្រូវបានអនុវត្តកាលពីថ្ងៃទី២២ ខែឧសភា ឆ្នាំ២០២៦ ដោយគណៈបញ្ជាការឯកភាពរដ្ឋបាលខេត្តកោះកុង សហការជាមួយកម្លាំងចម្រុះ នៅអគារជើងភ្នំអាវស៊ីវង្ស (អគារលឿង) ស្ថិតក្នុងភូមិពាមកាយ ឃុំកោះស្តេច ស្រុកគិរីសាគរ ខេត្តកោះកុង។ ក្នុងប្រតិបត្តិការនេះ អាជ្ញាធរបានដកហូតវត្ថុតាងជាច្រើន រួមមាន ម៉ូនីទ័រ ៣៥៥គ្រឿង ទូរស័ព្ទដៃ ៧,៧១០គ្រឿង CPU ៣៣គ្រឿង ឧបករណ៍ WiFi ១១៧គ្រឿង ឧបករណ៍បណ្តាញ ៦៤គ្រឿង កុំព្យូទ័រយួរដៃ ១១គ្រឿង រថយន្ត ៨គ្រឿង និងសម្ភារៈផ្សេងៗទៀត។ជាមួយគ្នានេះ អាជ្ញាធរបានបញ្ជូនជនសង្ស័យចំនួន ១២នាក់ ជាជនជាតិចិន មកអយ្យការអមសាលាដំបូងខេត្ត ដើម្បីចាត់ការតាមនីតិវិធីច្បាប់។

បន្ទាប់ពីពិនិត្យសំណុំរឿង សាកសួរ និងផ្អែកលើភស្តុតាងពាក់ព័ន្ធ តំណាងអយ្យការបានសម្រេចចោទប្រកាន់ជនសង្ស័យ ១២នាក់ ពីបទ «ឆបោកតាមប្រព័ន្ធបច្ចេកវិទ្យាដោយមានការរៀបចំជាក្រុមមានការចាត់តាំង» តាមមាត្រា ៥ កថាខណ្ឌ៣ នៃច្បាប់ប្រឆាំងឆបោកតាមប្រព័ន្ធបច្ចេកវិទ្យា។

នៅពេលដូចគ្នា មានជនសង្ស័យម្នាក់ផ្សេងទៀត ជាជនជាតិចិន ដែលកំពុងគេចខ្លួន ត្រូវបានចោទប្រកាន់ពីបទ «រៀបចំ ឬដឹកនាំមជ្ឈមណ្ឌលឆបោកតាមប្រព័ន្ធបច្ចេកវិទ្យា» តាមមាត្រា ៦ កថាខណ្ឌ១ នៃច្បាប់ដូចគ្នា។

សំណុំរឿងនេះ ត្រូវបានបញ្ជូនទៅចៅក្រមស៊ើបសួរ នៃសាលាដំបូងខេត្តកោះកុង តាមដីកាសន្និដ្ឋានបញ្ជូនឱ្យស៊ើបសួរ លេខ ១៥២ អ.យ/២៦ ចុះថ្ងៃទី១ ខែមិថុនា ឆ្នាំ២០២៦ ដើម្បីបន្តនីតិវិធីតាមច្បាប់៕

The post អយ្យការខេត្តកោះកុង ចោទប្រកាន់ជនសង្ស័យ ១២នាក់ ពាក់ព័ន្ធឆបោកអនឡាញ appeared first on Kampuchea Thmey Daily.

ពិធីបើកវគ្គបណ្តុះបណ្តាលនេះ ត្រូវបានធ្វើឡើងក្រោមអធិបតីភាពរបស់ ឯកឧត្តមសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រី អនុប្រធានប្រចាំការនៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) និងជាប្រធានលេខាធិការដ្ឋាន គ.ប.ឆ.ប. ព្រមទាំងមានការអញ្ជើញចូលរួមពីតំណាងស្ថាប័នជាតិ និងអន្តរជាតិសំខាន់ៗ រួមមាន៖តំណាងក្រសួងយុត្តិធម៌ , តំណាងបណ្ឌិត្យសភាភូមិន្ទយុត្តិធម៌កម្ពុជា និងតំណាងសាលាដំបូងរាជធានី-ខេត្តគោលដៅ, តំណាងនាយកដ្ឋានប្រឆាំងបទល្មើសបច្ចេកវិទ្យា និងនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការដ្ឋាននគរបាលជាតិ,តំណាងនាយកដ្ឋានគាំពារជនរងគ្រោះ នៃក្រសួងសង្គមកិច្ច អតីតយុទ្ធជន និងយុវនីតិសម្បទា,មន្ត្រីជំនាញមកពីការិយាល័យអង្គការសហប្រជាជាតិទទួលបន្ទុកគ្រឿងញៀននិងបទល្មើស (UNODC), ក្រសួងយុត្តិធម៌នៃសាធារណរដ្ឋកូរ៉េ និងសហភាពអឺរ៉ុប (EU) ។

នៅក្នុងឱកាសនោះ លោកសន្តិបណ្ឌិត ឆៃ ស៊ីណារិទ្ធ បានចាត់ទុកថា វគ្គបណ្តុះបណ្តាលនេះនឹងរួមចំណែកផ្តល់ចំណេះដឹង និងបទពិសោធន៍ថ្មីបន្ថែមទៀត ក្នុងក្របខណ្ឌនីតិវិធីទាក់ទងនឹងការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ ការដោះស្រាយភស្តុតាងឌីជីថល ក្នុងការស៊ើបអង្កេតឆ្លងកាត់ព្រំដែន ព្រមទាំងការកំណត់អត្តសញ្ញាណ ការពារ និងគាំទ្រដល់ជនរងគ្រោះនៃអំពើជួញដូរមនុស្ស។

វគ្គបណ្ដុះបណ្ដាលនេះ មិនត្រឹមតែជាការកសាងសមត្ថភាពបច្ចេកទេសប៉ុណ្ណោះទេ ប៉ុន្តែថែមទាំងជាការបង្ហាញពីការប្ដេជ្ញាចិត្តរួមគ្នារបស់យើង ក្នុងការប្រកាសពង្រឹងនីតិរដ្ឋ ការពារសិទ្ធិមនុស្ស គាំពារជនរងគ្រោះ និងធានាឱ្យបានថា ជនល្មើសមិនអាចគេចផុតពីការទទួលខុសត្រូវចំពោះមុខច្បាប់បានឡើយ។

លោកសន្តិបណ្ឌិតបន្តថា  បច្ចុប្បន្នបទល្មើសបច្ចេកវិទ្យាមានទម្រង់កាន់តែស្មុគស្មាញ ដោយសារឧក្រិដ្ឋជនបានប្រើប្រាស់ប្រព័ន្ធអ៊ីនធឺណិត និងបច្ចេកវិទ្យាទំនើបៗធ្វើជាឧបករណ៍បោកប្រាស់ និងអូសទាញជនរងគ្រោះ។ កត្តានេះ ទាមទារឱ្យសមត្ថកិច្ចជំនាញត្រូវយល់ដឹងកាន់តែច្បាស់អំពីយន្តការច្បាប់ និងការសម្របសម្រួលកិច្ចសហប្រតិបត្តិការអន្តរជាតិ ដើម្បីបោសសម្អាតអំពើឆបោកទាំងនេះឱ្យអស់ពីកម្ពុជា។

លោកទេសរដ្ឋមន្ត្រីបញ្ជាក់ថា «ស្ទើរគ្រប់ប្រទេសទាំងអស់ទទួលស្គាល់ថា បញ្ហានេះជាបញ្ហាឆ្លងដែន ដែលគ្មានប្រទេសណាមួយអាចដោះស្រាយតែម្នាក់ឯងបានឡើយ។ ក្នុងនាមជាប្រទេសតូច បើកចំហ និងកំពុងអភិវឌ្ឍ កម្ពុជាបានក្លាយជាគោលដៅដែលបណ្ដាញឧក្រិដ្ឋជនបរទេស ព្យាយាមមកប្រើប្រាស់ទឹកដីកម្ពុជាធ្វើជាមូលដ្ឋានប្រតិបត្តិការ។ ប៉ុន្តែ ខ្ញុំសូមគូសបញ្ជាក់ថា រាជរដ្ឋាភិបាលកម្ពុជាមិនអនុញ្ញាតឱ្យកម្ពុជា ក្លាយជាជម្រកសុវត្ថិភាពរបស់ឧក្រិដ្ឋជនអន្តរជាតិឡើយ។»

រាជរដ្ឋាភិបាលកម្ពុជា ទាំងក្នុងអាណត្តិមុន និងបច្ចុប្បន្ន បានប្រកាសចាត់ទុកការប្រយុទ្ធប្រឆាំងឧក្រិដ្ឋកម្មឆ្លងដែន ជាពិសេសការបោកប្រាស់តាមប្រព័ន្ធបច្ចេកវិទ្យា (Online Scams) និងការជួញដូរមនុស្ស ជាកិច្ចការអាទិភាពខ្ពស់បំផុត ដោយបាននិងកំពុងដាក់ចេញនូវវិធានការឆ្លើយតបយ៉ាងម៉ឺងម៉ាត់ ម៉ត់ចត់ និងខ្លាំងក្លាជាបន្តបន្ទាប់ ដើម្បីការពារសន្តិសុខ សណ្ដាប់ធ្នាប់សាធារណៈ សេដ្ឋកិច្ច ព្រមទាំងសេចក្ដីថ្លៃថ្នូររបស់ប្រជាពលរដ្ឋទាំងនៅក្នុងប្រទេស និងលើសកលលោកទាំងមូល។

ជាមួយគ្នានេះ លោកបានវាយតម្លៃខ្ពស់ចំពោះ អង្គការUNODC,  ក្រសួងយុត្តិធម៌នៃសាធារណរដ្ឋកូរ៉េ និងសហភាពអឺរ៉ុប ដែលបានសហការឧបត្ថម្ភគាំទ្រផ្នែកថវិកា និងបច្ចេកទេស ក្នុងការផ្តួចផ្តើមឱ្យមានវគ្គបណ្តុះបណ្តាលនេះឡើងសំដៅរួមចំណែកកសាងសមត្ថភាពកម្ពុជា ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន។ កិច្ចសហការនេះឆ្លុះបញ្ចាំងពីការទទួលខុសត្រូវរួម និងការប្តេជ្ញាចិត្តរួមរបស់យើង ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន ដែលកំពុងគំរាមកំហែងដល់សន្តិសុខ និងសុវត្ថិភាពរបស់ប្រជាពលរដ្ឋ នៅទូទាំងសកលលោក៕

The post កម្ពុជា និងដៃគូអន្តរជាតិ ពង្រឹងសមត្ថភាពមន្ត្រីអនុវត្តច្បាប់លើការបង្ក្រាបបទល្មើសបច្ចេកវិទ្យានិងឧក្រិដ្ឋកម្មឆ្លងដែន appeared first on Kampuchea Thmey Daily.

ប្រតិបត្តិការនេះ ធ្វើឡើងដោយអនុវត្តតាមបទបញ្ជាដ៏ម៉ឺងម៉ាត់របស់ លោកនាយឧត្តមសេនីយ៍ ស ថេត អគ្គស្នងការនគរបាលជាតិ និងដឹកនាំដោយ លោក ឧត្តមសេនីយ៍ឯក មួង សុធា អគ្គស្នងការរងនគរបាលជាតិ, លោកឧត្តមសេនីយ៍ឯក យឹម លាង អគ្គស្នងការរងនគរបាលជាតិ, លោកឧត្តមសេនីយ៍ឯក សៀង សេន អគ្គស្នងការរងនគរបាលជាតិ ក្រោមការសម្របសម្រួលពីតំណាងអយ្យការអមសាលាដំបូងខេត្តបន្ទាយមានជ័យ។

ក្នុងរង្វង់ប្រតិបត្តិការនៅព្រឹកនេះ កម្លាំងជំនាញរបស់អគ្គស្នងការដ្ឋាននគរបាលជាតិ បានចុះបង្ក្រាបនៅទីតាំងផ្ទះវីឡាចំនួន២កន្លែង ក្នុងភូមិទួលប្រាសាទ សង្កាត់ប៉ោយប៉ែត ក្រុងប៉ោយប៉ែត ដោយក្រសោបបានជនជាតិបរទេសជាច្រើនរយនាក់ និងដកហូតបានកាំភ្លើងខ្លី រថយន្ដ ព្រមទាំងសម្ភារមួយចំនួនទៀត។

សូមបញ្ជាក់ថា ចាប់តាំងពីខែពាក់កណ្តាលខែមេសា២០២៦មក សមត្ថកិច្ចពីអគ្គស្នងការនិងរដ្ឋបាលខេត្តបន្ទាយមានជ័យ បានចុះប្រតិបត្តិការបង្រ្កាបបទល្មើសអនឡាញនៅក្រុងប៉ោយប៉ែតជាបន្តបន្ទាប់ជាច្រើននាក់៕

ដោយ ៖ អេម ពៅ

The post សមត្ថកិច្ច ចុះបង្ក្រាបបទល្មើស(Online Scams)២ទីតាំង ឃាត់ខ្ខ្លួនជនបរទេសជាង២០០នាក់ appeared first on Kampuchea Thmey Daily.

ប្រតិបត្តិការនេះ ធ្វើឡើងក្រោយទទួលបានបណ្តឹងតាមរយៈលេខទូរសព្ទHotline និងដោយមានការសម្របសម្រួលនីតិវិធីពីសំណាក់ លោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។ ជាលទ្ធផល សមត្ថកិច្ចបានរកឃើញបទល្មើសចំនួន ៣ ករណី រួមមាន៖

ករណីទី១:  សមត្ថកិច្ចបានសង្គ្រោះបុរសជនជាតិជប៉ុនម្នាក់ ដែលត្រូវបានគេអូសទាញមកពីខេត្តបន្ទាយមានជ័យ ក្នុងគោលបំណងជួញដូរបន្តទៅគោលដៅផ្សេង។

ករណីទី២:  ឃាត់ខ្លួនបុរសជនជាតិចិន ៤ នាក់ និងដកហូតសម្ភារៈបច្ចេកទេសជាច្រើន រួមមាន៖ ទូរស័ព្ទដៃ ១២៧ គ្រឿង, CPU ២ គ្រឿង, Monitor ២ គ្រឿង និងកុំព្យូទ័រ All In One ៤ គ្រឿង។ តាមរយៈការធ្វើកោសល្យវិច័យ បង្ហាញថាពួកគេបានបង្កើត “ស្ទូឌីយោក្លែងក្លាយ” និងក្លែងអត្តសញ្ញាណ ដើម្បីធ្វើសកម្មភាពឆបោកតាម Online។

ករណីទី៣: រកឃើញជនបរទេសស្នាក់នៅដោយគ្មានលិខិតស្នាមត្រឹមត្រូវសរុបចំនួន ១២ នាក់ (ប្រុស) ដែលមានសញ្ជាតិចិន និងវៀតណាម។

បច្ចុប្បន្ន វត្ថុតាង និងជនសង្ស័យ ត្រូវបានបញ្ជូនទៅកាន់ស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីច្បាប់ និងចាត់វិធានការតាមជំហានបន្ទាប់។

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់បទបញ្ជាយ៉ាងម៉ឺងម៉ាត់បំផុតឱ្យសមត្ថកិច្ច និងកងកម្លាំងពាក់ព័ន្ធទាំងអស់ បន្តបង្ក្រាបបទល្មើសនេះដោយគ្មានបង្អង់ដៃឡើយ។ សម្តេចធិបតី បានបញ្ជាក់ថា ច្បាប់មានហើយ ដូច្នេះត្រូវតែអនុវត្តឱ្យបានម៉ត់ចត់ និងឱ្យមានប្រសិទ្ធភាពដោយមិនបន្ធូរដៃ និងដោយគ្មាន ការលើកលែងឡើយ ពោលគឺមិនបញ្ឈប់ត្រឹមពិធីបុណ្យចូលឆ្នាំខ្មែរប្រពៃណីជាតិនេះ ដូចដែលមានមតិមួយចំនួន បានលើកឡើងនោះឡើយ។

សូមរម្លឹកថា ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ត្រូវបានអនុម័តកាលពីថ្ងៃទី៦ ខែមេសា និងបានកំពុងអនុវត្តន៍ចាប់តាំងពីថ្ងៃទី០៧ ខែមេសា ឆ្នាំ២០២៦ មក។

ជាមួយច្បាប់នេះ បទល្មើស ព្រហ្មទណ្ឌថ្មី ចំនួន៥ ត្រូវបាន បង្កើតឡើង ដើម្បីធានាដល់ប្រសិទ្ធភាពក្នុងការ អនុវត្ត គឺរួមមានៈ ១- បទឆបោកតាមប្រព័ន្ធបច្ចេកវិទ្យា ២- បទរៀបចំ ឬដឹកនាំមជ្ឈមណ្ឌល ឆបោកតាមប្រព័ន្ធបច្ចេកវិទ្យា ៣- បទជ្រើសរើស ឬបណ្តុះបណ្តាល អ្នកដទៃឱ្យចូលរួមប្រព្រឹត្តអំពើឆបោកតាម ប្រព័ន្ធបច្ចេកវិទ្យា ៤- បទប្រមូលក្នុងចេតនាទុច្ចរិតនូវឯកសារសម្គាល់អត្តសញ្ញាណ ឬឯកសារ ព័ត៌មានផ្ទាល់ខ្លួននានារបស់អ្នកដទៃ និង៥- ការ បង្កើត ទម្រង់ពិសេសនៃបទល្មើសសម្អាតប្រាក់។ បទល្មើសទាំងនេះបានកំណត់ដាក់ទោស ជនល្មើស ត្រូវប្រឈមនឹងការ ជាប់ ពន្ធនាគារ ខ្ពស់ បំផុតរហូត ដល់ ១ ជីវិត និង ពិន័យជាប្រាក់ ដល់ ទៅ ១ ០០០ លានរៀល ថែមទាំងការរឹបអូសទ្រព្យសម្បត្តិរបស់ជនល្មើស ផងដែរ ៕

ប្រភព៖លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)

The post បង្ក្រាបកន្លែង Online Scam នៅបឹងកេងកង សង្គ្រោះជនជាតិជប៉ុន និងឃាត់ខ្លួនជនបរទេស ១៦នាក់ appeared first on Kampuchea Thmey Daily.

មនុស្សប្រុសស្រីទាំង២១នាក់ ដែលត្រូវបានឃាត់ខ្លួននេះ  មានជនជាតិចិនចំនួន១៦នាក់ ឥណ្ឌា ១នាក់  ប៉ាគីស្ថាន ២នាក់ ក្នុងនោះស្ត្រី ១នាក់ និង នេប៉ាល់ចំនួន២នាក់។  ក្នុងនោះដែរ សមត្ថកិច្ចក៏បានដកហូតវត្ថុតាងរួមមានកុំព្យូទ័រ All in One កុំព្យូទ័រយួរដៃ និងទូរសព្ទដៃមួយចំនួនផងដែរ។

ប្រតិបត្តិការនេះ ត្រូវបានធ្វើឡើងតាមបទបញ្ជារបស់អគ្គស្នងការដ្ឋាននគរបាលជាតិ ដោយក្រុមការងារចម្រុះនៃការិយាល័យព្រហ្មទណ្ឌកម្រិតធ្ងន់ និងការិយាល័យប្រឆាំងបទល្មើសបច្ចេកវិទ្យា ដឹកនាំដោយឧត្តមសេនីយ៍ទោ ប៊ុន សុសិក្ខា និងឧត្តមសេនីយ៍ទោ ញ៉ុង រស់មេត្តា ស្នងការរង ដោយមានការសម្របសម្រួលនីតិវិធីពីលោក ឆាយ ហុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងលេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)។

បច្ចុប្បន្នសមត្ថកិច្ចជំនាញកំពុងសហការជាមួយភាគីពាក់ព័ន្ធ ដើម្បីបន្តស្រាវជ្រាវបន្ថែមទៀត ដើម្បីឈានទៅចាត់វិធានការ ផ្លូវច្បាប់ចំពោះមេខ្លោង នៃការឆបោកតាមប្រព័ន្ធបច្ចេកវិទ្យានេះ ខណៈជនសង្ស័យ និងវត្ថុតាងត្រូវបានប្រគល់ជូនស្នងការដ្ឋាននគរបាលរាជធានីភ្នំពេញនិងសមត្ថកិច្ចពាក់ព័ន្ធ ដើម្បីអនុវត្តតាមនីតិវិធីច្បាប់។ ចំណែកឯ ទីតាំងខាងលើត្រូវបានបិទបណ្តោះអាសន្ន ។

សូមបញ្ជាក់ថា សម្តេចមហាបវរធិបតីហ៊ុនម៉ាណែត នាយករដ្ឋមន្ត្រីកម្ពុជាបានបញ្ជាក់នាពេលកន្លងមកយ៉ាងច្បាស់ថា កម្ពុជាមិនមែនជាកន្លែងសម្រាប់ឧក្រិដ្ឋជនបច្ចេកវិទ្យាប្រើប្រាស់ក្នុងការប្រព្រឹត្តការឆបោក ឬបទល្មើសឆ្លងដែនឡើយ។ រាល់បុគ្គល ឬអង្គភាពទាំងឡាយណាដែលនៅពីក្រោយសកម្មភាពឆបោកទាំងនេះ នឹងត្រូវប្រឈមមុខនឹងទោសទណ្ឌខ្ពស់បំផុតដោយគ្មានការយោគយល់ ឬការអន្តរាគមន៍ណាមួយឡើយ។ វិធានការដែលបាន និងកំពុងអនុវត្តទាំងនេះ នឹងអាចធ្វើអាចឱ្យកម្ពុជាឈានទៅលុបបំបាត់ការឆបោកតាមប្រព័ន្ធបច្ចេកវិទ្យានៅពេលខាងមុខ៕

ប្រភព៖ លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)

The post ឃាត់ខ្លួនជនសង្ស័យ ២១នាក់ក្នុងប្រតិបត្តិការបង្ក្រាបសំបុក Online Scam appeared first on Kampuchea Thmey Daily.