លោក ផេង ដារ៉ែន អនុប្រធានមន្ទីរសាធារណការ និងដឹកជញ្ជូនខេត្តកំពង់ចាម  នៅថ្ងៃទី២០ ខែមីនា ឆ្នាំ២០២៤ បានដឹកនាំក្រុមការងារជំនាញ សហការជាមួយកម្លាំងអធិការដ្ឋាននគរបាលស្រុកបាធាយ  និងស្រុកជេីងព្រៃ ចុះត្រួតពិនិត្យ និងណែនាំដល់ម្ចាស់យានដ្ឋានជួសជុល កែច្នៃដំឡើងយានយន្ត និងឧបករណ៍បំពងសំឡេងខុសលក្ខណៈបច្ចេកទេស។ លោកបានបញ្ជាក់ថា  ដោយមានការណែនាំ និងការចង្អុលបង្ហាញ ពី លោក អ៊ុន ចាន់ដា អភិបាលខេត្តកំពង់ចាម បានចាត់ឱ្យក្រុមការងារមន្ទីរសាធារណការ និងដឹកជញ្ជូនខេត្តកំពង់ចាម សហការជាមួយកម្លាំងនគរបាលស្រុក ចុះត្រួតពិនិត្យ ណែនាំ យានដ្ឋានជួសជុល កែច្នៃដំឡើងយានយន្ត ឱ្យបញ្ឈប់សកម្មភាពបំពាក់ឧបករណ៍បំពងសម្លេង និងកែច្នៃខុសលក្ខណៈបច្ចេកទេស ដែលបង្កការរំខាន និងប៉ះពាល់ដល់សណ្ដាប់ធ្នាប់តាមដងផ្លូវ ក៏ដូចជាគ្រោះថ្នាក់ចរាចរណ៍ ដែលអាចកើតឡើងជាយថាហេតុ។

លោក ផេង ដារ៉ែន បន្តថា ការចុះត្រួតពិនិត្យយានដ្ឋានជួសជុល កែច្នៃដំឡើង និងដេប៉ូលក់គ្រឿងបន្លាស់បរិក្ខារសម្រាប់យានយន្តនេះ បានធ្វេីការចុះអនុវត្តចំនួន១៩កន្លែង រួមមាន៖ ស្រុកបាធាយ មានយានដ្ឋាន កែច្នៃដំឡើងចំនួន១២កន្លែង និងដេប៉ូលក់គ្រឿងបរិក្ខារអគ្គិសនីសម្រាប់រថយន្តចំនួន មួយកន្លែង និងស្រុកជើងព្រៃមានយានដ្ឋាន កែច្នៃដំឡើងចំនួន៦កន្លែង។

ជាមួយគ្នានេះដែរ ក្រុមការងារក៏បានអំពាវនាវ និងផ្សព្វផ្សាយដល់ម្ចាស់យានដ្ឋានក៏ដូចជាម្ចាស់យសនយន្តទាំងអស់ត្រូវចូលរួមសហការជាមួយអាជ្ញាធរ  និងគោរពតាមច្បាប់បទដ្ឋានបច្ចេកទេសឲ្យបានត្រឹមត្រូវ  ដេីម្បីធ្វេីយ៉ាងណាកាត់បន្ថយគ្រោះថ្នាក់តាមដងផ្លូវដែលបង្កដោយរថយន្តខុសបច្ចេកទេស៕

ដោយ៖ ឡេក  ចាន់ពេជ្រ

The post មន្ត្រីជំនាញខេត្តកំពង់ចាម ចុះណែនាំដល់ម្ចាស់យានដ្ឋានជួសជុល និងកែច្នៃឧបករណ៍បំពងសំឡេងខុសបច្ចេកទេស appeared first on Kampuchea Thmey Daily.