ក្នុងពិធីបិទសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ របស់រដ្ឋបាលខេត្តព្រៃវែង នៅថ្ងៃទី២២ ខែមីនា ឆ្នាំ២០២២ សម្តេចក្រឡាហោម បានណែនាំដល់មន្ត្រីមូលដ្ឋានកុំតាំងខ្លួនជាអ្នកធំជាចៅហ្វាយនាយរបស់ប្រជាពលរដ្ឋ សូមចាត់ទុកប្រជាពលរដ្ឋ ជាចៅហ្វាយនាយ ព្រោះតែយើងបំពេញការងារ ទទួលបានប្រាក់បៀវត្សពីរដ្ឋ ដែលប្រាក់បៀវត្សរបស់រដ្ឋនោះ គឺបានមកពីព្រជាពលរដ្ឋ។

សម្តេចក្រឡាហោម ស ខេង បានមានប្រសាសន៍លើកឡើងពីរបៀបរបបធ្វើការងារផងដែរ ដោយមន្ត្រីគ្រប់រូបត្រូវខិតខំប្រឹងប្រែងធ្វើការងារតាមលិខិតបទដ្ឋានគតិយុត្តដែលបានចែងមក ព្រមទាំងត្រូវធ្វើសន្ទសន៍នៃកិច្ចប្រជុំប្រចាំឆ្នាំ ដោយត្រូវរៀបចំកំណត់ពេលវេលានៃការប្រជុំពិភាក្សាឱ្យបានជាប់លាប់។

ទន្ទឹមនឹងនេះសម្តេចក្រឡាហោម បានណែនាំថា៖ “មន្ត្រីគ្រប់រូបត្រូវរត់រកការងារធ្វើ មិនមែនឱ្យការងាររត់រកយើងនោះទេ ពេលខ្លះមានការងាររត់រកយើងដូចជាករណីកូវីដ-១៩ គ្រោះមហន្តរាយដែលកើតឡើងដោយមិនបានព្រៀងទុកតម្រូវឱ្យយើងប្រឹងប្រែងទប់ស្កាត់ ប៉ុន្តែបញ្ហាមួយចំនួនទៀត យើងត្រូវផ្តួចផ្តើមគំនិតឡើងធ្វើការដោះស្រាយ ដូចជាករណីជីកប្រឡាយ ធ្វើផ្លូវជាដើម”។

លើសពីនេះទៀត សម្ដេចក្រឡាហោម ស ខេង បានមានប្រសាសន៍ណែនាំមន្ត្រីគ្រប់ជាន់ថ្នាក់ ត្រូវតែផ្សារភ្ជាប់ជាមួយប្រជាពលរដ្ឋ ត្រូវតែដឹងសុខទុក្ខប្រជាពលរដ្ឋជាប់ជាប្រចាំ ដោយត្រូវធ្វើការតាមដានព័ត៌មានឱ្យបានគ្រប់ជ្រុងជ្រោយ ព្រមទាំងខិតខំស្វែងរកនូវវិធីសាស្ត្រដើម្បីឆ្លើយតប និងដោះស្រាយរាល់ការលំបាករបស់ប្រជាពលរដ្ឋ កន្លែងណាមានគ្រឿងញៀន កន្លែងមានចោរលួច ចោរប្លន់ កន្លែងមានខ្យល់ព្យុះ កន្លែងមានពលរដ្ឋមានជីវភាពខ្វះខាត ត្រូវតែក្តាប់ព័ត៌មានឱ្យបានជាប់ ផ្សារភ្ជាប់ជាមួយពលរដ្ឋឱ្យជិតស្និត ហើយចុះទៅតាមមូលដ្ឋានផ្ទាល់ដើម្បីដឹងសុខទុក្ខរបស់ពួកគាត់៕

អត្ថបទ៖ សំអឿន

The post សម្តេច ស ខេង ណែនាំដល់អាជ្ញាធរមូលដ្ឋានទទួលប្រាក់ខែពីរដ្ឋ ត្រូវបម្រើពលរដ្ឋឱ្យអស់ថ្លៃ appeared first on Kampuchea Thmey Daily.