ហ្វីជី ប្រាប់ពិភពលោកថា បម្រែបម្រួលអាកាសធាតុ គឺជាការគំរាមកំហែងធំជាង សង្គ្រាម

Sok Sovann — Mon, 13 Jun 2022 00:12:21 +0000

កោះ ហ្វីជី បានប្រាប់កិច្ចប្រជុំកំពូលសន្តិសុខអាស៊ីថា បម្រែបម្រួលអាកាសធាតុ គឺជាការគំរាមកំហែងដ៏ធំសម្រាប់តំបន់ប៉ាស៊ីហ្វិក ជាជាងភាពតានតឹងផ្នែកយោធាទៅទៀត។

រដ្ឋមន្ត្រីការពារជាតិហ្វីជី លោក Inia Seruiratu បាននិយាយថា “កាំភ្លើងយន្ត យន្តហោះចម្បាំង មិនមែនជាកង្វល់សន្តិសុខចម្បងរបស់យើងទេ។ ការគំរាមកំហែងដ៏ធំបំផុតតែមួយគត់ចំពោះអត្ថិភាពរបស់យើង គឺការប្រែប្រួលអាកាសធាតុ”។

លោកបានថ្លែងសុន្ទរកថាបែបនេះ ក្នុងកិច្ចប្រជុំកំពូលនៅប្រទេសសិង្ហបុរី ដែលផ្តោតលើភាពតានតឹងរវាងចិន-អាមេរិក និងសង្រ្គាមអ៊ុយក្រែន។

រដ្ឋមន្ត្រីការពារជាតិហ្វីជី លោក Inia Seruiratu

លោក Seruiratu បានប្រាប់វេទិកា Shangri-La Dialogue ថា “បញ្ហាអាកាសធាតុ គំរាមកំហែងដល់ក្តីសង្ឃឹម និងក្តីសុបិននៃភាពរុងរឿងរបស់យើង”។

ព្យុះស៊ីក្លូនតែងតែវាយប្រហារកោះហ្វីជី និងបណ្តាប្រទេសប៉ាស៊ីហ្វិកទាបដទៃទៀត។ ទឹកជំនន់នៅ ហ្វីជី ដែលបង្កឡើងដោយព្យុះស៊ីក្លូនត្រូពិក បានបណ្តាលឲ្យជម្លៀសមនុស្សរាប់ពាន់នាក់ក្នុងរយៈពេលប៉ុន្មានឆ្នាំថ្មីៗនេះ និងបំផ្លិចបំផ្លាញសេដ្ឋកិច្ច។

រដ្ឋប៉ាស៊ីហ្វិកមួយនេះ ថែមទាំងបានជំរុញឲ្យប្រទេសឧស្សាហកម្មជឿនលឿន ឲ្យធ្វើអ្វីៗបន្ថែមទៀតដើម្បីប្រយុទ្ធប្រឆាំងនឹងការប្រែប្រួលអាកាសធាតុ ផងដែរ។

ពិភពលោកឥឡូវនេះ គឺមានអាកាសធាតុប្រហែល ១.២អង្សា ក្តៅជាងនៅសតវត្សរ៍ទី១៩ ដោយសារតែមនុស្សដុតឥន្ធនៈហ្វូស៊ីល ដែលបញ្ចេញឧស្ម័នផ្ទះកញ្ចក់ ភាគច្រើនជាកាបូនឌីអុកស៊ីត (CO2)៕

ប្រែសម្រួល៖ Vann Vann

ប្រភព៖ BBC

ចុចអាន៖ ប្រជាជាតិកោះប៉ាស៊ីហ្វិក ប្រកាសភាពអាសន្នអាកាសធាតុ

The post ហ្វីជី ប្រាប់ពិភពលោកថា បម្រែបម្រួលអាកាសធាតុ គឺជាការគំរាមកំហែងធំជាង សង្គ្រាម appeared first on Kampuchea Thmey Daily.

ប្រទេសហ្វីជី អ្នកអត់ចាក់វ៉ាក់សាំងប្រឈមអស់ការងារ បិទក្រុមហ៊ុន ពិន័យជាប្រាក់

chean virakbot — Sat, 10 Jul 2021 01:40:20 +0000

រដ្ឋាភិបាលហ្វីជីបានប្រកាសពីគម្រោងចាក់វ៉ាក់សាំងបង្ការកូវីដ-១៩ក្នុងលក្ខខណ្ឌការងារចាំបាច់សម្រាប់មន្ត្រីរាជការ និងបុគ្គលិកឯកជន ហើយប្រឈមបាត់បង់ការងារ ប្រសិនបើមិនគោរពតាម។

នាយករដ្ឋមន្ត្រីហ្វីជី លោក Frank Bainimarama បានថ្លែងសុន្ទរកថាតាមទូរទស្សន៍នៅយប់ថ្ងៃព្រហស្បតិ៍ថា និយោជក និងនិយោជិកក្នុងវិស័យឯកជនត្រូវតែចាក់វ៉ាក់សាំងយ៉ាងហោចណាស់១ដូសនៅត្រឹមថ្ងៃទី១ ខែសីហា។

លោកមានប្រសាសន៍ថា ៖«ប្រសិនបើគ្មានបញ្ហាទេ បើអ្នកជានាយកប្រតិបត្តិក្រុមហ៊ុន ពាណិជ្ជកម្ម ឬបុគ្គលិកដែលមានប្រាក់ខែ អ្នកត្រូវតែចាក់វ៉ាក់សាំងដើម្បីបន្តធ្វើការ បើពុំនោះទេអាជីវកម្មប្រឈមនឹងការបិទ»។

«អត់ចាក់វ៉ាក់សាំង អត់ការងារ–នោះជាអ្វីដែលវិទ្យាសាស្ត្រប្រាប់យើងគឺសុវត្ថិភាពបំផុត និងថា ជាគោលការណ៍របស់រដ្ឋាភិបាល និងត្រូវអនុវត្តតាមច្បាប់»។ លោកនាយករដ្ឋមន្ត្រីបានសង្កត់ធ្ងន់។

មន្ត្រីរាជការនឹងត្រូវឲ្យឈប់សម្រាកពីកន្លែងការងារ ប្រសិនបើពួកគេមិនទៅចាក់វ៉ាក់សាំងឲ្យបានមុនថ្ងៃទី១៥ ខែសីហា ហើយពួកគេត្រូវចាក់វ៉ាក់សាំងពេញលេញត្រឹមថ្ងៃទី១ ខែវិច្ឆិកា។ បើពុំនោះទេនឹងត្រូវបណ្តេញចេញពីការងារ។

លក្ខខណ្ឌចាក់វ៉ាក់សាំងនេះរាប់បញ្ចូលទាំងការពិន័យជាប្រាក់ចាប់ពី២០ដុល្លារដល់៤០០០ដុល្លារអាមេរិក ប្រសិនបើរំលោភលើបទល្មើសជាង២០ដែលបានចែងនៅក្នុងច្បាប់សុខភាពសាធារណៈ។

លោក Bainimarama មានប្រសាសន៍ថា ៖«ដំណឹងល្អគឺថា វ៉ាក់សាំងបង្ការកូវីដ-១៩ដំណើរការ ហើយយើងនឹងចែកចាយឲ្យបានឆាប់រហ័ស។ វ៉ាក់សាំង AstraZeneca ដែលចាក់នៅហ្វីជីគឺដំណើរការល្អណាស់។ វាបង្ហាញពីប្រសិទ្ធភាពការពារ៩២%មិនឲ្យឈឺចូលមន្ទីរពេទ្យពីវីរុសបំប្លែងខ្លួនឆ្លងលឿន Delta»។

លោកបន្តថា ៖«វីរុសផ្សេងទៀតដែលបណ្តាលឲ្យគ្រោះថ្នាក់ដល់អាយុជីវិតដែលកំពុងរាលដាលទូទាំងពិភពលោក ដូចជាវីរុសបំប្លែងខ្លួន Lambda គ្រោះថ្នាក់ខ្លាំងនៅអូស្ត្រាលី។ យើងមិនអាចចំណាយពេលខ្ជះខ្ជាយរឿងចាក់វ៉ាក់សាំង ហើយយកជីវិតមនុស្សជាទីស្រឡាញ់ត្រឡប់មកវិញបានទេ។ វិធានការសាមញ្ញទាំងនោះជួយទប់ស្កាត់ការរាលដាលឆ្លង និងការពារមិនឲ្យឈឺធ្ងន់ មិនឲ្យស្លាប់»។

ប្រទេសហ្វីជីក្នុងរយៈពេល២៤ម៉ោងចុងក្រោយគិតត្រឹមថ្ងៃសុក្រម្សិលមិញនេះមានអ្នកឆ្លងថ្មី៨៦០នាក់ និងស្លាប់៣នាក់។ សរុបអ្នកស្លាប់ឡើងដល់៥១នាក់ចាប់តាំងពីកូវីដ-១៩ផ្ទុះកាលពីខែមេសា ឆ្នាំនេះ។

ក្នុងចំណោមមនុស្ស៤៩នាក់ មាន៤១នាក់មិនទាន់ចាក់វ៉ាក់សាំង និង៨នាក់ហោចណាស់ចាក់បានមួយដូស៕

ប្រែសម្រួល៖ វីរបុត្រ
ប្រភព៖ theguardian

The post ប្រទេសហ្វីជី អ្នកអត់ចាក់វ៉ាក់សាំងប្រឈមអស់ការងារ បិទក្រុមហ៊ុន ពិន័យជាប្រាក់ appeared first on Kampuchea Thmey Daily.

ប្រទេសហ្វីជី Archives - Kampuchea Thmey Daily

ហ្វីជី ប្រាប់ពិភពលោកថា បម្រែបម្រួលអាកាសធាតុ គឺជាការគំរាមកំហែងធំជាង សង្គ្រាម

ប្រទេស​ហ្វីជី​ អ្នក​អត់​​ចាក់​វ៉ាក់សាំង​ប្រឈម​អស់​ការងារ​ បិទក្រុម​ហ៊ុន​ ពិន័យជាប្រាក់

ប្រទេសហ្វីជី អ្នកអត់ចាក់វ៉ាក់សាំងប្រឈមអស់ការងារ បិទក្រុមហ៊ុន ពិន័យជាប្រាក់