ប្រជាជាតិកោះប៉ាស៊ីហ្វិក ប្រកាសភាពអាសន្នអាកាសធាតុ

សភារបស់ប្រទេសវ៉ានូអាទូ បានប្រកាសភាពអាសន្នអាកាសធាតុ ដោយនាយករដ្ឋមន្ត្រីនៃប្រជាជាតិកោះប៉ាស៊ីហ្វិកមួយនេះ បានបញ្ចេញខ្ទង់ចំណាយជាទឹកប្រាក់ចំនួន ១.២ពាន់លានដុល្លារអាមេរិក ដើម្បីការពារប្រទេសរបស់គាត់ ពីផលប៉ះពាល់នៃការប្រែប្រួលអាកាសធាតុ។

ថ្លែងទៅកាន់សភាក្នុងទីក្រុង Port Vila កាលពីថ្ងៃសុក្រទី២៧ខែឧសភា លោកនាយករដ្ឋមន្ត្រី Bob Loughman បាននិយាយថា ការកើនឡើងកម្រិតទឹកសមុទ្រ និងអាកាសធាតុដ៏អាក្រក់ កំពុងបង្កផលប៉ះពាល់ដល់កោះប៉ាស៊ីហ្វិក។ លោកបានលើកឡើងពីព្យុះស៊ីក្លូនត្រូពិចដ៏បំផ្លិចបំផ្លាញចំនួនពីរ និងគ្រោះរាំងស្ងួតដ៏ធ្ងន់ធ្ងរក្នុងរយៈពេលមួយទសវត្សរ៍ចុងក្រោយនេះ។

លោក Loughman បន្តថា “ផែនដីក្តៅពេកហើយ និងមិនមានសុវត្ថិភាពទេ។ យើង​កំពុង​ស្ថិត​ក្នុង​គ្រោះ​ថ្នាក់​នាពេលបច្ចុប្បន្ននេះ មិន​មែននាពេល​អនាគត​ទេ”។

សភាវ៉ានូអាទូ បានគាំទ្រជាឯកច្ឆ័ន្ទចំពោះវិធានការនេះ ហើយរឿងនេះកើតឡើង បន្ទាប់ពីមានការប្រកាសស្រដៀងគ្នាដោយប្រទេសរាប់សិបផ្សេងទៀត រួមទាំងចក្រភពអង់គ្លេស កាណាដា និងហ្វីជី ដែលជាអ្នកជិតខាងនៅប៉ាស៊ីហ្វិកខាងត្បូងផងដែរ។

យោងតាមលោក Longman, “ការប្រើប្រាស់ពាក្យគ្រាអាសន្នបែបនេះ គឺជាមធ្យោបាយមួយដើម្បីបង្ហាញពីតម្រូវការ ឈានរកកំណែទម្រង់ហួសពីធម្មតា”។

សេចក្តីប្រកាសនេះ គឺជាការជំរុញផ្នែកការទូតអាកាសធាតុ មុនការបោះឆ្នោតរបស់អង្គការសហប្រជាជាតិ លើសំណើរបស់រដ្ឋាភិបាលវ៉ានូអាទូ សុំឲ្យតុលាការយុត្តិធម៌អន្តរជាតិ ធ្វើសកម្មភាព ដើម្បីការពារប្រទេសដែលងាយរងគ្រោះពីការប្រែប្រួលអាកាសធាតុ។

កាលពីឆ្នាំមុន ប្រជាជាតិមានប្រជាជនប្រហែល ៣០០ ០០០នាក់មួយនេះ បាននិយាយថា ខ្លួននឹងស្វែងរកយោបល់ផ្លូវច្បាប់ ពីអាជ្ញាធរតុលាការកំពូលមួយរបស់ពិភពលោក ដើម្បីថ្លឹងថ្លែងលើវិបត្តិអាកាសធាតុ៕

ប្រែសម្រួល៖ Vann Vann

ប្រភព៖ Bangkok

ចុចអាន៖ ១៧ ប្រទេសដែលមានករណីឆ្លង តែគ្មានអ្នកស្លាប់សូម្បីម្នាក់ដោយសារកូវីដ