ផាត សូដា Archives - Kampuchea Thmey Daily

លោក ផាត សុដា ក្លឹបថ្មីដែលគ្រោងធ្វើនេះជំហានដំបូងចាក់ដីធ្វើរបងសិន ព្រោះមិនទាន់មានថវិកាសាងសង់ទេ

Sina Noun — Tue, 30 Sep 2025 08:09:18 +0000

លោក ផាត សូដា ថាក្លឹបថ្មីដែលគ្រោងធ្វើនេះជំហានដំបូងគឺបានត្រឹមចាក់ដី និងធ្វើរបងសិនមិនទាន់មានលទ្ធភាពសាងសង់នៅឡើយទេចាំមើលសន្សំថវិកាបន្តទៀតសិន។

លោក ផាត សូដា នៅទីតាំងក្លឹបថ្មី

គ្រូរបស់ រិទ្ធី បូរិន បានឲ្យដឹងថា វីដេអូដែលបង្ហោះកន្លងទៅ និងមានបណ្ដាអេដមីនផ្សព្វផ្សាយនោះគឺជាសកម្មភាពចាក់ដី និងធ្វើរបង ដាក់លូ នោះទេមិនមែនជាការចាប់ផ្ដើមសាងសង់ក្លឹបថ្មីឡើយ។

លោក ផាត សូដា បន្តទៀតថា ដោយសារតែមិនទាន់មានថវិកា និងកំពុងសន្សំជាបណ្ដើរៗ ដូច្នេះជំហានដំបូងនេះបានត្រឹមតែចាក់ដីបែបនេះសិន។ ក្លឹបថ្មីដែលលោកចង់សាងសង់ឡើងនេះគឺចង់ធ្វើបែបស្ដង់ដារដែលមានបន្ទប់ស្នាក់នៅត្រឹមត្រូវល្អមិនប៉ះពាល់ដល់សុខភាពសិស្សៗ។ ព្រោះកន្លែងក្លឹបចាស់បច្ចុប្បន្ននេះជួលគេផង និងមានតែកន្លែងហ្វឹកហាត់ចំណែកកន្លែងស្នាក់នៅតូច និងមិនសូវសមរម្យនោះឡើយ។

លោក ផាត សូដា

គ្រូរបស់ រិទ្ធី គីងកុង រូបនេះបញ្ជាក់ទៀតថា ជំហានបន្ទាប់ក៏មិនទាន់ដឹងថាចាប់សាងសង់ក្លឹបថ្មីនេះនៅពេលណាដែរ ព្រោះមិនទាន់មានថវិកានៅឡើយ។ មានតែសន្សំម្ដងបន្តិចៗគ្រប់ពេលណាចាប់ផ្ដើមធ្វើនៅពេលនោះហើយ។ យ៉ាងណាលោកនៅតែបន្តជម្នះឧបសគ្គមួយនេះឲ្យបាន។

សិស្សគុនលោក ផាត សូដា

បញ្ជាក់ដែរថា ក្លឹបចាស់របស់លោក ផាត សូដា គឺនៅទីតាំងភូមិថ្នល់បន្ទាយ សង្កាត់ពន្សាំង ខណ្ឌព្រែកព្រៅ រាជធានីភ្នំពេញ។ ក្លឹបនេះដែរគឺលោកជួលគេដើម្បីបង្ហាត់សិស្សៗប៉ុណ្ណោះ។ ចំណែកក្លឹបថ្មីនេះលោកគ្រោងធ្វើបែបស្ដង់ដាដែលមានបន្ទប់ស្នាក់នៅ ៥បន្ទប់ក្រោម ៥បន្ទប់លើ ហូបចុក និងកន្លែងហាត់ល្អត្រឹមត្រូវមួយ។ ការសាងសង់គ្រោងចំណាយអស់ខ្ទង់ ១៥,០០០-២០,០០០ដុល្លារអាមេរិក។ ទីតាំងក្លឹបថ្មីនេះគឺនៅ ខណ្ឌព្រែកព្រៅ រាជធានីភ្នំពេញ ក្បែរៗក្លឹបចាស់ដែរនោះទេ៕

សិស្សគុនលោក ផាត សូដា

អត្ថបទដោយ៖ នួន ស៊ីណា

The post លោក ផាត សុដា ក្លឹបថ្មីដែលគ្រោងធ្វើនេះជំហានដំបូងចាក់ដីធ្វើរបងសិន ព្រោះមិនទាន់មានថវិកាសាងសង់ទេ appeared first on Kampuchea Thmey Daily.

មកដឹងពីជីវិតកម្សត់របស់លោកគ្រូ ផាត សូដា ធ្លាប់យកបាយវត្តចិញ្ចឹមឪពុកពិការតាំងពីខ្លួននៅតូចៗ

Sina Noun — Mon, 21 Jul 2025 07:40:33 +0000

គ្រូប្រដាល់កំពុងល្បីឈ្មោះខាងបណ្ដុះក្មេងៗលោក ផាត សូដា ថាកាលនៅពីក្មេងក្រលំបាកណាស់ ម្ដាយស្លាប់ចោលរីឯឪពុកពិការជើងធ្វើអ្វីមិនកើត ដូច្នេះលោកត្រូវនៅវត្តតាំងពីតូច និងយកបាយវត្តទៅចិញ្ចឹមឪពុករហូតដល់ស្លាប់។

លោក ផាត សុដា និង រិទ្ធី គីងកុង

លោក ផាត សុដា បានឱ្យដឹងថា ខ្សែជីវិតកាលនៅពីតូចៗគឺពិបាកវេទនាណាស់ ម្ដាយស្លាប់ចោលតាំងពីនៅតូចទាំងដែលខ្លួនមិនដឹងថាមុខម្ដាយយ៉ាងម៉េចផង។ ចំណែកលោកឪពុកជាអតីតកងទ័ពមួយរូប និងពិការជើងធ្វើអ្វីមិនកើតបាន។ចំណែកបងប្អូនបួសជាសង្ឃ និងរស់នៅឯវត្តឆ្ងាយៗពីគ្នា។

លោក ផាត សូដា កាលនៅបួស

គ្រូបង្វឹករបស់ សូដា សូសែន ខាងលើនេះបន្ថែមទៀតថា កាលពីតូចទីលំរស់នៅមិនច្បាស់លាស់ឡើយ ពោលម្ដងនៅជាមួយពូ ម្ដងនៅជាមួយមីង ឬរស់នៅជាមួយបងប្អូនផ្សេងៗទៀត។ បន្ទាប់មកលោកក៏រស់នៅវត្តប៉ាយ៉ាបជាមួយលោកសង្ឃរហូតមក។

កាលនោះខ្លួនដើរបិនបាតជាមួយព្រះសង្ឃជារាល់ថ្ងៃ និងឆ្ងាយៗជានិច្ច។ អ្វីដែលចាំមិនភ្លេចនោះគឺបាយម្ហូបដែលសល់ពីលោកឆាន់ហើយគឺខ្លួនតែងតែដើរយកទៅជូនឪពុកពិការបានហូប។ ដោយពេលខ្លះខ្លួនឯងត្រូវហូបបាយជាមួយទឹកស៊ីអ៊ីវប៉ុណ្ណោះ ដើម្បីសល់ម្ហូបទុកជូនឪពុ។ អ្នកស្រុកភូមិឃើញ និងដឹងរឿងនេះគ្រប់គ្នា ព្រោះលោកតែងយកបាយដែលសល់ពីព្រះសង្ឃឆាន់រួចនេះជារៀងរាល់ថ្ងៃរហូតដល់ឪពុកទទួលមរណៈភាពទៅទើបខ្លួនចូលបួសជាសង្ឃងតែម្ដងទៅ។

ឪពុក-ម្ដាយលោក ផាត សូដា

បញ្ជាក់ដែរថា លោក ផាត សូដា ជាអ្នករស់នៅឯភូមិប៉ាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀង។ រូបលោកជាក្មេងកំព្រាម្ដាយតាំងពីតូចមកម្ល៉េះ និងបន្ទាប់មកបានឪពុកបានស្លាប់តាមក្រោយទៀតអំឡុងលោកអាយុខ្ទង់ ១៣ឆ្នាំ។ លោកបច្ចុប្បន្នជាគ្រូបង្វឹកក្លឹបប្រដាល់គុនខ្មែរស៊ុបពើហ្វៃ និងបានបណ្ដុះកីឡាករ និងយុវជនថ្នាលល្បីឈ្មោះជាច្រើនដូចជា សូដា សូសែន គឿម សុវណ្ណឃីម រិទ្ធី បូរិន រិទ្ធី គីងកុង និងកីឡាករជាច្រើននាក់ទៀត៕

លោក ផាត សូដា និងសិស្ស

អត្ថបទដោយ៖ នួន ស៊ីណា

The post មកដឹងពីជីវិតកម្សត់របស់លោកគ្រូ ផាត សូដា ធ្លាប់យកបាយវត្តចិញ្ចឹមឪពុកពិការតាំងពីខ្លួននៅតូចៗ appeared first on Kampuchea Thmey Daily.

ផាត សូដា​ Archives - Kampuchea Thmey Daily

ផាត សូដា Archives - Kampuchea Thmey Daily