ផែចំណត និង​រណប​ទាំង ៧ មាន ៦ កំពុង​ដាក់​ឲ្យ​ដំណើរការ និង ១ កំពុង​ដំណើរការ​សាងសង់។

ផែ​កុង​តឺណ័រ LM 17 (ខេត្តកណ្តាល)

ចំណតផែកុងតឺន័រ LM១៧ ស្ថិតនៅតាមដងទន្លេមេគង្គក្រោមក្នុងស្រុកកៀនស្វាយ ខេត្តកណ្តាល មាន​ចម្ងាយប្រមាណ ៣០ គីឡូម៉ែត្រពីរាជធានីភ្នំពេញ។ ចំណត​ផែនេះ​ ជាទីតាំងយុទ្ធសាស្ត្រ ផ្តល់ចំណតផែដើម្បីតភ្ជាប់ទំនិញពីកម្ពុជាទៅអន្តរជាតិតាមដងទន្លេមេគង្គឆ្ពោះទៅប្រទេសវៀតណាម និងចូលក្នុងប្រទេសកម្ពុជាវិញ។

ចំណត​ផែ​ពហុ​បំណង LM26 (ខេត្តព្រៃវែង)

ចំណតផែរណបពហុបំណង LM២៦ ស្ថិតនៅតាមដងទន្លេមេគង្គក្រោម ក្នុងឃុំកោះរកា ស្រុកពាមជរ​ ខេត្តព្រៃវែង ជាទីតាំងតំបន់យុទ្ធសាស្ត្រនៅជិតព្រំដែនកម្ពុជា-វៀតណាម។ ចំណតផែរណបពហុបំណង LM២៦ ជាមជ្ឈមណ្ឌលសម្រាប់ការនាំចេញទំនិញកសិផល និងកសិឧស្សាហកម្ម ដូចជាស្រូវ និងដំឡូងមី ទៅទីផ្សារប្រទេសជិតខាង។ បន្ថែមពីលើនេះ ចំណតផែរណបពហុបំណង LM២៦ ជាចំណុចនាំចូលដ៏សំខាន់សម្រាប់ធ្យូងថ្ម ដែលមានសារៈសំខាន់សម្រាប់តំបន់សេដ្ឋកិច្ចពិសេសក្បែរៗនោះ។

ចំណត​ផែ​អ្នក​ដំណើរ និង​ទេសចរណ៍ TS1 (ភ្នំពេញ)

ចំណតផែអ្នកដំណើរ និងទេសចរ TS១ ស្ថិតនៅតាមដងទន្លេសាបក្នុងខណ្ឌដូនពេញ រាជធានីភ្នំពេញ។ ចំណតផែអ្នកដំណើរ និងទេសចរ TS១ ដើរតួនាទីជាច្រកទេសចរណ៍សម្រាប់អ្នកទេសចរគយគន់ទេសភាពមាត់ទន្លេក្នុងទីក្រុង។ ចំណតនេះ ជាគោលដៅដ៏ពេញនិយមសម្រាប់ភ្ញៀវទេសចរជាតិ និងអន្តរជាតិដែលចង់ធ្វើដំណើរកម្សាន្តតាមដងទន្លេ។

ចំណត​ផែ​​ពហុ​បំណង TS 3 (ភ្នំពេញ)

ចំណតផែពហុបំណង TS៣ ជាទីស្នាក់ការកណ្តាលនៃកំពង់ផែស្វយ័តភ្នំពេញ​ ដែលស្ថិតតាមបណ្តោយទន្លេសាបក្នុងខណ្ឌដូនពេញ រាជធានីភ្នំពេញ។​ ចំណតផែនេះ ជាចំណតផែប្រវត្ថិសាស្រ្ត និងធ្លាប់ទទួលការ​លើកដាក់ទំនិញគ្រប់ប្រភេទចេញចូលក្នុងរាជធានីភ្នំពេញ។ នាពេលបច្ចុប្បន្ន ចំណតផែពហុបំណង TS៣ ក៏បានប្រែក្លាយជាចំណតផែសម្រាប់នាវាទេសចរណ៍ដ៏មមាញឹក។

ចំណត​ផែ​ពហុ​បំណង TS 11 (ភ្នំពេញ)

ចំណតផែរណបពហុបំណងTS១១ ស្ថិតនៅតាមដងទន្លេសាបក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ដែលជាទីតាំងយុទ្ធសាស្ត្រដើម្បីគាំទ្រដល់កំណើន និងការអភិវឌ្ឍយ៉ាងឆាប់រហ័សក្នុងការដឹកជញ្ជូនទំនិញចេញចូលក្នុងទីក្រុង ដូចជា សម្ភារសំណង់ និងវាយណភ័ណ្ឌជាដើម។

ចំណត​ផែ​រណប​ពហុ​បំណង UM2 (ខេត្តត្បូង​ឃ្មុំ)

ចំណតផែរណបពហុបំណង UM២ ជាផែរណបរបស់កំពង់ផែស្វយ័តភ្នំពេញ ស្ថិតនៅតាមដងទន្លេមេគង្គលើក្នុងស្រុកត្បូងឃ្មុំ ខេត្តត្បូងឃ្មុំ ជាប់ខេត្តកំពង់ចាម។ ចំណតផែនេះ ជាទីតាំងយុទ្ធសាស្រ្តនៃការដឹកជញ្ជូន ដែលបានតភ្ជាប់ផលិតផល​កសិកម្ម និងកសិឧស្សាហកម្មរបស់ខេត្តភាគខាងជើង និងឦសាននៃប្រទេសកម្ពុជាទៅកាន់តំបន់ភាគខាងត្បូងនៃប្រទេសកម្ពុជា និងនាំចេញទៅប្រទេសវៀតណាម។

ចំណត​ផែ​រណប​ពហុ​បំណង UM1 (ខេត្តកណ្តាល)

ចំណតផែរណបពហុបំណង UM1 ក៏​ទើប​ប្រកាស​ចាប់ផ្តើម​​បើកការដ្ឋាន​សាងសង់កាលពីព្រឹកថ្ងៃទី៧ ខែកុម្ភៈ ឆ្នាំ​២០២៥ កន្លងមកនេះ ដែលមានទីតាំង​ស្ថិត​នៅ​ឃុំព្រែកអញ្ចាញ ស្រុកមុខកំពូល ខេត្តកណ្តាល តាម​បណ្តោយ​ផ្លូវជាតិលេខ ៦។

ចំណតផែរណបពហុបំណង UM១ គឺចំណតផែដែលស្ថិតនៅក្រោមផែនការអភិវឌ្ឍរបស់​កំពង់ផែស្វយ័តភ្នំពេញ ដែល​មានទីតាំងនៅតាមដងទន្លេមេគង្គលើក្នុងភូមិសាស្រ្តក្នុងភូមិកណ្តាល ឃុំព្រែកអញ្ចាញ ស្រុកមុខកំពូល ខេត្តកណ្តាល។ ចំណតផែនេះ នឹងក្លាយជាទីតាំងជាយុទ្ធសាស្ត្រដើម្បីបម្រើឱ្យវិស័យឧស្សាហ៍កម្មចម្រុះ ដោយ​ជុំវិញដោយរោងចក្រ និងតំបន់អចលនទ្រព្យដ៏សម្បូរបែប ហើយដែល​ត្រូវបានរៀបចំយ៉ាងល្អសម្រាប់ផ្គត់ផ្គង់សម្ភារសំណង់ និងកាត់ដេរ។

ជាមួយ​គ្នានេះ កំពង់ផែស្វយ័តភ្នំពេញ ក៏មាន​គម្រោង​ពង្រីក​ផែរណបចំនួន ៧ បន្ថែម​ទៀត ដែល​ក្នុង​នោះ​នៅ​ខេត្ត​កំពង់ឆ្នាំងមាន​​ចំនួន ២ កន្លែង ខេត្ត​កណ្តាលចំនួន ២ កន្លែង ខេត្ត សៀមរាបចំនួន ១ កន្លែង ខេត្ត​កំពង់ចាម​ចំនួន ១ កន្លែង និង​​ខេត្ត​ក្រចេះ​ចំនួន ១ កន្លែង៕

The post ​ផែ​រណប​​តាម​ដងទន្លេ​ចំនួន ៧ ជំរុញ​ដឹកជញ្ជូន​តាម​ផ្លូវទឹក ​​កាត់បន្ថយ​ថ្លៃ​​ដើម​ទំនិញ appeared first on Kampuchea Thmey Daily.

ពិធី​សម្ពោធ​ចំណតផែរណបពហុបំណង TS១១, M២ និង LM២៦ របស់កំពង់ផែស្វយ័តភ្នំពេញ (ក.ស.ភ.) នៅព្រឹកមិញ​នេះ​ ក្រោម​វត្តមាន​លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ​ប្រធានក្រុមប្រឹក្សាភិបាល​​ខេត្តត្បូងឃ្មុំ អភិបាល​នៃគណៈអភិបាលខេត្តត្បូងឃ្មុំ និង​ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានអគ្គនាយក​ពង់ផែស្វយ័តភ្នំពេញ។

ថ្លែងក្នុងឱកាសនេះ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន​បានលើកឡើងថា សមិទ្ធផលដែលសម្រេចបាននេះឆ្លើយតបទៅនឹងចក្ខុវិស័យរបស់ក្រសួង កម្មវិធីនយោបាយ និងយុទ្ធសាស្ត្ររបស់រាជរដ្ឋាភិបាល ជាពិសេសស្របទៅនឹងទិសដៅក្នុងការពង្រីកនិងអភិវឌ្ឍហេដ្ឋារចនាសម្ព័ន្ធកំពង់ផែនៅកម្ពុជា។

លោក ប៉េង ពោធិ៍នា បាន​បន្ត​ថា ដើម្បីចូលរួមសម្រេចឱ្យបានស្របតាមចក្ខុវិស័យ មាគ៌ានយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិទី ៧ ក្រសួងសាធារណការ និងដឹកជញ្ជូន បានដាក់ចេញនូវផែនការអាទិភាពក្នុងការពង្រឹងនិងលើកកម្ពស់ការអភិវឌ្ឍវិស័យកំពង់ផែនៅកម្ពុជា រួមទាំងការធ្វើកំណែទម្រង់ ដើម្បីធ្វើយ៉ាងណាឱ្យតម្លៃឡូជីស្ទីកមានភាពប្រកួតប្រជែង និងការផ្តល់សេវាមានភាពឆាប់រហ័ស តម្លាភាព និងប្រសិទ្ធភាពផងដែរ។

ថ្មីៗនេះប្រមុខរាជរដ្ឋាភិបាលបានណែនាំ​ឲ្យ​ក្រសួងសាធារណការ និងដឹកជញ្ជូនសហការជាមួយក្រសួងសេដ្ឋកិច្ច និងហិរញ្ញវត្ថុ ពិនិត្យនិងសិក្សារៀបចំផែនការមេនិងក្របខណ្ឌអភិវឌ្ឍន៍គ្រប់គ្រងអាជីវកម្មកំពង់ផែ​ទន្លេ និងការតភ្ជាប់បណ្តាញប្រព័ន្ធដឹកជញ្ជូនតាមផ្លូវទឹកទន្លេជាមួយផ្លូវសមុទ្រ រួមទាំងមណ្ឌលអាជីវកម្មអាទិភាព​សម្រាប់ប្រតិបត្តិការអាជីវកម្មកំពង់ផែផងដែរ​។

បើតាម​លោក​រដ្ឋមន្រ្តី​ ក្រោមកិច្ចសម្របសម្រួលរបស់ក្រុមប្រឹក្សាអភិវឌ្ឍន៍កម្ពុជា ក្រសួងសាធារណការ និងដឹកជញ្ជូនក៏បានកំពុងចូលរួមសិក្សានិងរៀបចំផែនការមេអភិវឌ្ឍន៍កំពង់ផែ និងមជ្ឈមណ្ឌលភស្ដុភារកម្មនៅក្រុងព្រះសីហនុ ដើម្បីជំរុញលើកកម្ពស់ការអភិវឌ្ឍវិស័យកំពង់ផែនៅកម្ពុជា។

គួរ​ជម្រាប​ដែរថា ចំណតផែរណបពហុបំណង TS១១ មានទីតាំងស្ថិតនៅសង្កាត់គីឡូម៉ែត្រលេខ ៦ ខណ្ឌឫស្សីកែវ រាជធានី​​ភ្នំពេញ កើតចេញពីការសហការវិនិយោគរវាង​កំពង់ផែស្វយ័តភ្នំពេញជាមួយក្រុមហ៊ុន PTLS Cooperation Co., Ltd. លើផ្ទៃដីទំហំ ៤ ហិកតា។ គោលបំណងនៃការបង្កើតចំណតផែរណបពហុបំណង TS១១ ដើម្បីប្រតិបត្តិការផ្ទេរ-ផ្ទុក លើកដាក់កុងតឺន័រ និងទំនិញរាយដូចជា គ្រឿងសំណង់ ដែក ថ្មម៉ាប ដំឡូងមី​ជាដើម។ បច្ចុប្បន្ននេះ ចំណត​ផែរណ​ប​ពហុបំណង TS១១ បានសាងសង់ហេដ្ឋារចនាសម្ព័ន្ធគ្រប់គ្រាន់ ដើម្បីបម្រើឱ្យប្រតិបត្តិការលើកដាក់ទំនិញ និងកុងតឺន័រ និងស្ថិតនៅទីតាំងដែលមានសក្តានុពលខ្ពស់សម្រាប់បម្រើឱ្យសេចក្តីត្រូវការប្រើប្រាស់របស់អតិថិជន ក្នុងរាជធានីភ្នំពេញ ខេត្តកណ្តាល និងខេត្តផ្សេងៗទៀត ជាពិសេសចូលរួមចំណែកបានយ៉ាងច្រើនក្នុងការកាត់បន្ថយការកកស្ទះចរាចរណ៍ក្នុងរាជធានីភ្នំពេញ។

ចំពោះចំណតផែរណបពហុបំណង UM២ មានទីតាំងស្ថិតនៅ ភូមិដូនម៉ៅលើ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។ ចំណតផែរណបពហុបំណង UM២ កើតចេញពីការសហការវិនិយោគរវាង​ពង់ផែស្វយ័តភ្នំពេញជាមួយក្រុមហ៊ុន PTLS Cooperation Co., Ltd. លើផ្ទៃដីទំហំ ១៦,៣ ហិកតា។ គោលបំណងនៃការបង្កើតចំណត ផែរណបពហុបំណង UM២ ដើម្បីប្រតិបត្តិការផ្ទេរ-ផ្ទុក លើកដាក់ កុងតឺន័រ និងទំនិញរាយ ដូចជា គ្រឿងសំណង់ ចំណីសត្វ សសរគ្រឹះបេតុង ដែក កៅស៊ូ ស្រូវ ផលិតផលកសិផលផ្សេងទៀត។

ចំណតផែរណបពហុបំណង UM២ ក៏ជាចំណតផែទន្លេដែលមានសក្តានុពលខ្ពស់សម្រាប់បម្រើឱ្យសេចក្តីត្រូវការរបស់អ្នកប្រើប្រាស់នៅតំបន់ជុំវិញតាមដងទន្លេមេគង្គលើ ដើម្បីធ្វើការនាំចេញទៅក្រៅប្រទេស និងនាំចូលទំនិញពីខាងក្រៅមកចំណតផែរណបនេះវិញ។ បន្ថែមពីនេះ ចំណតផែរណបពហុបំណងនេះនឹងចូលរួមចំណែកកាត់បន្ថយថ្លៃដឹកជញ្ជូនទំនិញ និងការខូចខាតផ្លូវថ្នល់។

ដោយឡែកចំណតផែរណបពហុបំណង LM ២៦ មានទីតាំងស្ថិតនៅ ឃុំកោះរកា ស្រុកពាមជរ ខេត្តព្រៃវែង មានផ្ទៃដី ទំហំ ១៨,៦ ហិកតា។ បច្ចុប្បន្នចំណតផែរណបពហុបំណងនេះ បានសាងសង់ហេដ្ឋារចនាសម្ព័ន្ធសំខាន់ៗជាច្រើន ដោយ​​ប្រើប្រាស់ប្រភពទុនវិនិយោគផ្ទាល់របស់​ពង់ផែស្វយ័តភ្នំពេញ។ គោលបំណងនៃការបង្កើតចំណតផែរណបពហុបំណង LM២៦ គឺដើម្បីបម្រើដល់ប្រតិបត្តិការផ្ទេរ-ផ្ទុក លើកដាក់ កុងតឺន័រ និងទំនិញរាយ ដូចជា គ្រឿងសំណង់ ធ្យូងថ្ម ទំនិញកសិផល ដូចជា ស្រូវ អង្ករ ពោត ដំឡូងមី កៅស៊ូ ម្រេច ជាដើម៕

The post ​ផែ​រណប​តាម​ដងទន្លេ​ ០៣ ទីតាំង​បញ្ចប់​ការ​សាងសង់​ដាក់​ឲ្យ​ប្រើប្រាស់​ជា​ផ្លូវការ appeared first on Kampuchea Thmey Daily.

កាល​ពី​ម្សិលមិញនេះ ខណៈ​ដែល​​ក្រុម​ការងារ​កម្ពុជា​ថ្មី​ចុះ​យក​ព័ត៌មាន​ពីការអភិវឌ្ឍ​តាម​មូលដ្ឋាន​របស់ប្រជា​ពលរដ្ឋ​នៅ​ស្រុក​កោះ​សុទិន និង​ស្រុក​ត្បូង​ឃ្មុំ​ព្រំ​ប្រទល់​រវាង​ខេត្ត​ត្បូង​ឃ្មុំ​និង​ខេត្ត​កំពង់ចាម ក៏​បាន​ចុះ​ទៅ​មើលពី​​វឌ្ឍនភាព​ការអភិវឌ្ឍ​ចំណត​ផែ​រណប​ទន្លេ​បិទ​ក្នុង​ខេត្ត​ត្បូង​ឃ្មុំ ឃើញ​ថា​​ហេដ្ឋា​រចនាសម្ព័ន្ធក្នុង​កំពង់ផែ​បាន​សាងសង់​ស្ទើរ​តែ​បញ្ចប់​ ១០០%។

បើតាម​មន្រ្តី​បម្រើ​ការងារ​នៅផែ​រណប​ទន្លេបិទ​បាន​អះអាង​ប្រាប់​កម្ពុជា​ថ្មី​ថា នៅ​ប៉ុន្មាន​ថ្ងៃ​ទៀតនឹង​មាន​មន្រ្តី​ចុះមក​​ពិនិត្យ​និង​ដាក់​​ឲ្យ​ដំណើរការ​បណ្តោះអាសន្ន។

បើទោះ​បីផែ​រណប​ទន្លេ​បិទ​​មិនទាន់ដាក់​ឲ្យប្រើប្រាស់​ ប៉ុន្តែ​ជាក់ស្តែ​ងនៅពេលក្រុម​ការងារ​ចុះ​ទៅកាលពី​ម្សិលមិញ​នេះ​​ក៏​មាន​សកម្មភាពដំណើរការ​ខ្លះ​ៗ​ដោយ​មាន​កបាល់​ដឹកទំនិញផ្សេងៗចេញចូល​ប្រើប្រាស់​​កំពង់ផែ​។

គួរ​បញ្ជាក់ថា រដ្ឋាភិបាលតាមរយៈក្រសួងសាធារណៈការនិងដឹកជញ្ជូន គ្រោងសាងសង់កំពង់ផែ​រណបតាម​ដង​ទន្លេ​ចំនួន ​៧ កន្លែង នៅក្នុង​ផែន​ការ​​ពង្រីក​សកម្មភាព​ដឹក​ជញ្ជូន តាម​ផ្លូវ​ទឹក​​​ក្នុង​ប្រទេ​ស​​កម្ពុជា។

លោក ស៊ុន ចាន់ថុល រដ្ឋមន្រ្តី​ក្រសួង​សាធារណការ​និង​ដឹកជញ្ជូន​បាន​ថ្លែង​​ថា ​ការ​​អភិវឌ្ឍ​ផែ​រណប​តាម​ដង​ទន្លេ​ដើម្បី​ពង្រីកសកម្មភាព​ដឹកជញ្ជូន​តាម​ផ្លូវទឹក​។ ការ​អភិវឌ្ឍ​កំពង់ផែ​រណបតាមផ្លូវ​ទឹកឲ្យ​ច្រើន នឹង​រួមចំណែក​កាត់បន្ថយ​ការ​ខូចខាត​ដល់​​ផ្លូវថ្នល់ ចំណេញ​ពេលវេលា និង​បន្ថយ​ថ្លៃ​ដើមលើការ​ដឹក​ជញ្ជូន។

គម្រោងចំណតផែរណបតាមដងទន្លេចំនួន ៧ កន្លែងដែល​រដ្ឋាភិបាល​គ្រោង​សាងសង់​​​រួមមាន ចំណតផែរណបពហុបំណង​​កោះរកា (LM២៦) ចំណតផែរណបពហុបំណងព្រែកអញ្ចាញ (UM១) ចំណតផែរណបពហុបំណងទន្លេបិទ (UM២) ចំណត​ផែ​រណប​ពហុបំណងឆ្លូង (ក្រចេះ) ចំណតផែរណបពហុបំណងកំពង់ឆ្នាំង និងចំណតផែរណបពហុបំណងព្រែកក្តាម៕

The post កប៉ាល់​ចេញ​ចូល​ដឹកទំនិញ​បណ្តើរ​ៗ​នៅ​ផែ​រណប​ទន្លេ​បិទ​ ខណៈ​ហេដ្ឋារចនាសម្ពន្ធ​សម្ព័ន្ធ​នានា​សាងសង់​ស្ទើរ​រួច​ទាំង​ស្រុង appeared first on Kampuchea Thmey Daily.