ឥទ្ធិពលប្រឆាំងនឹងការរលាកមេកានិក ជួយឲ្យតែផ្លែពុទ្រា​ក្រហមក្លាយជាការពេញនិយម

យោងតាមអ្នកជំនាញអាហារូបត្ថម្ភ Morgan Pearson (សហរដ្ឋអាមេរិក) តែផ្លែពុទ្រា​ក្រហមមានសមាសធាតុរុក្ខជាតិធម្មជាតិជាច្រើនដូចជា flavonoids និង polysaccharide ដែលមានលក្ខណៈសម្បត្តិប្រឆាំងនឹងការរលាក និងប្រឆាំងអុកស៊ីតកម្ម។ ការរលាកគឺជាមូលហេតុចម្បងនៃការកន្ត្រាក់ស្បូនអំឡុងពេលមានរដូវ។ តាមទ្រឹស្ដី សមាសធាតុទាំងនេះអាចជួយសម្រាលប្រតិកម្មរលាក និងផ្តល់នូវអារម្មណ៍រីករាយជាងមុន។

នៅក្នុងឱសថបុរាណចិន ផ្លែពុទ្រាក្រហមត្រូវបានចាត់ទុកថាជាអាហារ លើសសម្ពាធឈាម ដែលតែងតែប្រើក្នុងតែ ឬស៊ុប ដើម្បីជួយរក្សាលំនឹងរាងកាយរបស់ស្ត្រីអំឡុងពេលមករដូវ។ ទោះបីជាយ៉ាងណាក៏ដោយ អ្នកជំនាញបានកត់សម្គាល់ថា បច្ចុប្បន្ននេះមិនមានការសិក្សាស្រាវជ្រាវណាមួយដែលបង្ហាញថា តែផ្លែពុទ្រា​ក្រហមពិតជាបំបាត់ការឈឺចុកចាប់ពេលមករដូវនោះទេ ភាគច្រើនមានប្រសិទ្ធិភាពបន្ធូរអារម្មណ៍ និងជួយដល់ចរន្តឈាម។

ជំនួយដល់ឈាមដែលមានសុខភាពល្អ និងកាត់បន្ថយភាពអស់កម្លាំងក្រោយមករដូវ

យោងតាមវេជ្ជបណ្ឌិត Elizabeth Barnes អ្នកឯកទេសអាហារូបត្ថម្ភនៅសាកលវិទ្យាល័យ South Florida (សហរដ្ឋអាមេរិក) ផ្លែពុទ្រា​ក្រហមមមានផ្ទុកជាតិដែក វីតាមីន C និងសារធាតុប្រឆាំងអុកស៊ីតកម្ម ដែលជាសមាសធាតុសំខាន់ដែលជួយផលិតកោសិកាឈាមក្រហម។ ការថែរក្សាឈាមឲ្យមានសុខភាពល្អ នឹងជួយឲ្យស្ត្រីមានអារម្មណ៍មិនសូវអស់កម្លាំងអំឡុងពេលមករដូវ ។

ការសិក្សាមន្ទីរពិសោធន៍មួយចំនួនក៏បានបង្ហាញផងដែរថា សារធាតុសកម្មនៅក្នុងផ្លែពុទ្រាក្រហមអាចជំរុញខួរឆ្អឹងឲ្យបង្កើតកោសិកាឈាមក្រហម គាំទ្រដល់ដំណើរការនៃការបង្កើតឈាមឡើងវិញបន្ទាប់ពីបាត់បង់ជាតិដែកអំឡុងពេលមករដូវ។ លើសពីនេះ តែក្តៅឧណ្ហៗជួយបង្កើនចរន្តឈាម កាត់បន្ថយអារម្មណ៍នៃការរមួលក្រពើក្នុងពោះ និងបន្ធូររាងកាយ។

ទោះជាយ៉ាងណាក៏ដោយ អ្នកជំនាញណែនាំឲ្យទទួលទានតែផ្លែពុទ្រាក្រហមក្នុងកម្រិតមធ្យម ហើយកុំប្រើប្រាស់វាច្រើនពេក។ ការផឹកស្រាច្រើនពេកអាចបណ្តាលឲ្យហើមពោះ ឬរំលាយអាហារតិចតួច ជាពិសេសចំពោះអ្នកដែលមានប្រព័ន្ធរំលាយអាហារដែលងាយនឹងរំលាយអាហារ។

ដំបូន្មានសម្រាប់ស្ត្រីអំឡុងពេលមករដូវ

តែពុទ្រា​ក្រហមអាចជាជម្រើសដែលមានសុខភាពល្អ ជួយសម្រាក និងធ្វើឲ្យឈាមរត់បានប្រសើរឡើង។ ទោះបីជាមិនមែនជា ថ្នាំបំបាត់ការឈឺចាប់ពេលមករដូវក៏ដោយ តែនេះអាចជួយទ្រទ្រង់រាងកាយបានយ៉ាងទន់ភ្លន់ ជាពិសេសនៅពេលផ្សំជាមួយអាហារសម្បូរជាតិដែក សម្រាកសមហេតុផល និងចៀសវាងភាពតានតឹង។

Morgan Pearson សន្និដ្ឋាន៖ ពេលខ្លះ តែក្តៅមួយពែងមិនត្រឹមតែជាមធ្យោបាយសម្រាប់ស្ត្រីមានអារម្មណ៍ស្រួលប៉ុណ្ណោះទេ ប៉ុន្តែក៏ជាវិធីសម្រាប់ស្ត្រីក្នុងការចំណាយពេលស្តាប់ខ្លួនឯងផងដែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ការផ្លាស់ប្តូរនៅក្នុងខ្លួន នៅពេលឈប់ញ៉ាំស្ករ រយៈពេល ២ សប្តាហ៍

The post តើ​តែ​ពុទ្រាក្រហម​ ពិតជា​ជួយ​បំបាត់​ការ​ឈឺ​ចាប់ ​ពេល​មក​រដូវ​? appeared first on Kampuchea Thmey Daily.

លោក ជិន គ្រក់ រស់នៅក្នុងឃុំចែងមានជ័យ ស្រុកបាណន់បានឲ្យដឹងថា ក្រោយពីលោកនិងភរិយាឈប់ធ្វើជាពលករចំណាកស្រុកអស់រយះពេលជិតមួយឆ្នាំកន្លងមកនេះ លោកបានមើលឃើញពីផលល្អមួយដែលកើតចេញពីដីភូមិ គឺដាំ រាល់ដំណាំទាំងរយះវែងនិងរយះពេលខ្លី ដែល​អាចផ្តល់ចំណូលសម្រាប់ជីវភាពរស់នៅប្រចាំថ្ងៃ​មិន​ខ្វះ​មុខ​ខ្វះក្រោយ។

លោកបានលើកឡើងកាលពីលោកជាពលករនៅក្នុងស្រុកថៃ បានឃើញកសិករថៃបានដឹកជញ្ជូនរាល់កសិផលចូលទីផ្សារ​គ្មានលោះថ្ងៃ តាមពិតកសិផលទាំងនោះមិនមែនពួកគេមានចម្ការ​ទេ គឺជាដំណំាក្រោយផ្ទះប៉ុណ្ណោះ ដែលអាចរកចំណូលបានជាប្រចាំ ក្នុងនោះមាន ផ្លែទៀប ពុទ្រា ក្រូច ជាដើម។

អតីតពលកររូបនេះបន្តថា ដោយសារតែមើលឃើញបែបនេះ លោកជាមួយភរិយាបានសម្រេចចិត្តឈប់យកកម្លាំងដើម្បី​បម្រើ​ប្រយោជន៍ដល់អ្នកដទៃ ហើយយកកម្លាំងមក​បម្រើ​ដល់​ក្រុម​គ្រួសារខ្លួនឯងនៅឯស្រុកកំណើតវិញ។

លោកថា បើគិតមកត្រឹមពេលនេះ នៅលើដីភូមិលោកគឺមានផលដាំណាំច្រើនប្រភេទ ហើយ​ចំណូល​ពី​ដំណាំជុំវិញ​ផ្ទះ​នេះ​យ៉ាងហោច ១ថ្ងៃក៏បានចន្លោះពី ២៥ ដល់ ៣០ មុឺនរៀលដែរ តាមរយះផលផ្លែទៀបស្វិតរបស់លោកដែលបានដាំប្រហែល​ជាង ៣០ ដើម គឺលោកនិងភរិយាបានប្រមូលផលវិលជុំតែម្តង ក្រោយពីលោកបានប្រមូលផលម្ទេសរួចរាល់។

ចំណែកកសិករម្នាក់ទៀតនៅក្នុងស្រុកបាណន់ជាមួយគ្នា គឺលោក ធឿន បានលើកឡើងដែរថា លោកមានដាំក្រូចពោធិសាត់ ប្របាណជិត ១០ ដើម ហើយលោកបានបំប៉នទឹក គឺបានហុចផលល្អ និងបានចំណូលរាល់ថ្ងៃ សូម្បីអ្នកភូមិជិតគ្នាក៏ចូលចិត្តបរិភោគដែរ ព្រោះក្រូចលោកមានរសជាតិផ្អែមឆ្ងាញ់ ហើយក្រៅពីនេះលោកក៏មានដាំដំណាំវិលជុំនៅក្បែរផ្ទះជាច្រើនផងដែរ។

លោកបន្តថា “មិនសូវជាលំបាកប៉ុន្មានទេ ក្នុងមួយថ្ងៃខ្ញុំឆ្លៀតពេលតែបន្តិច យូរទៅវាអាចផ្តល់ផលដោយមិនដឹងខ្លួន តែកុំឲ្យតែយើងខ្ចិលគឺលុយចូលរហូត”។

ចំណែកឯកសិករ នៅស្រុកមោងឫស្សីឯណោះវិញ គឺលោក ឡុង ភាព ក៏បានឲ្យដឹងដែរថា នៅលើទំហំដីជិត ១ ហិកតាក្បែរផ្ទះរបស់លោក បានដាំដើមពុទ្រាពូជ ៣ រសជាតិ ហើយដែល​បច្ចុប្បន្ន កំពុងប្រមូលផលទាំង ១០០ ដើម។

លោកថា ក្នុងមួយ ថ្ងៃលោករកចំណូលបានចន្លោះពី ២០ ម៉ឺនរៀលទៅ ៣០ ម៉ឺនរៀល ខណះការប្រមូលផលបានក្នុងមួយថ្ងៃចន្លោះពី ៥០ ទៅ ៦០ គីឡូក្រាម។ លោកថា លោកបានដាំរយះពេលជិត ៥ ឆ្នាំ ហើយពូជពុទ្រានេះដាំបាន ១ ឆ្នាំ គឺវាបានហុចផលខ្លះៗហើយ។ តាមរយះផលដំណាំនេះ លោក​ថា​បានផ្តល់សេដ្ឋកិច្ចគ្រួសារបានយ៉ាងកក់ក្តៅ ខណះលោកថា កាលពីមុនលោក​បានដើរសុីឈ្នួលឲ្យគេដល់ខេត្តកំពង់ចាម មិនបានគិតដល់ថា ដីទុកទំនេរក្បែរផ្ទះបានផ្តល់ប្រយោជន៍បែបនេះទេ។

លោកបន្តថា “ខ្ញុំចាប់ផ្តើមដាំ ដោយសារកាលខ្ញុំដើរទៅធ្វើការនៅខេត្តកំពង់ចាម ក៏បានឃើញអ្នកស្រុកខេត្តនោះគេដាំ ហើយបានផលល្អ លុយចូលរហូត ខ្ញុំរកបានលុយបន្តិចបន្តួចក៏វិលមកស្រុកវិញ ហើយសាកល្បងដាំក៏បានហុចផលផ្លែផ្កា និងបានរកចំណូលបានតាំងតែពីដាំបានរយះពេល ១ ឆ្នាំដំបូង ហើយ​ខ្ញុំក៏ឈប់ដើរ នៅតែថែទាំដំណាំនេះរហូតមកដល់ពេលនេះ ដែល​មិន​ត្រឹម​មាន​បាន​ចំណូល​ហើយ​បាននៅជុំគ្រួសារទៀតផង”៕

អត្ថបទ៖ សៅ សារិទ្ធ

The post កសិករ​ ៣ នាក់ ប្រាប់បទពិសោធន៍​កែច្នៃដី​​ទំនេរ​ជុំវិញ​ផ្ទះ​ បង្កើត​ចំណូល​ក្នុង​គ្រួសារ appeared first on Kampuchea Thmey Daily.

អ្នកស្រី លន់ ភាព ជាប្រជាកសិកររស់នៅឃុំព្រៃតូច ស្រុកមោងឬស្សី ខេត្តបាត់ដំបង បានរៀបរាប់ថា រយៈពេល ២ ឆ្នាំមកហើយ ដែលអ្នកស្រីបានដាំដុះដើមពុទ្រា ៣សាសន៍នេះ ដែលសព្វថ្ងៃអ្នកស្រីមានដើមពុទ្រាប្រមាណជាង ១០០ ដើម ដែលស្ថិតនៅជុំវិញផ្ទះរបស់អ្នកស្រី។

អ្នកស្រីបានបន្ថែមថា ការចាប់ផ្ដើមដាំដំបូងតែក្នុងរយៈពេលប្រមាណ ៥ខែប៉ុណ្ណោះ គឺអ្នកស្រីចាប់ផ្ដើមប្រមូលផលជាលើកដំបូង ហើយក្រោយពីប្រមូលផលរួច គឺត្រូវបាញ់ថ្នាំម្ដងដើម្បីសម្លាប់សត្វល្អិត បើមិនដូច្នោះទេនៅពេលផ្លែពុទ្រាទុំលើកក្រោយគឺអាចស្អុយ និងជ្រុះជាក់ជាមិនខាន ដោយសារតែកូនសត្វល្អិតទិចឬខាំ ដែលធ្វើឲ្យផ្លែពុទ្រាខូចអស់។ 

អ្នកស្រី លន់ ភាព បានសង្កត់ធ្ងន់ថា ចូលមកដល់ឆ្នាំទី២នេះ គឺអ្នកស្រីប្រមូលផលម្ដងអាចចាប់ពី ១០០គីឡូក្រាមឡើងទៅ ហើយមានម៉ូយមកចាំទិញដល់ចំការ ដែលអាចលក់បានតម្លៃចាប់ពី ៤.០០០ ទៅ ៥.០០០ រៀល ក្នុងមួយគីឡូក្រាម ដោយសារតែ ពូជពុទ្រានេះ មានរសជាតិឆ្ងាញ់ហើយសម្បូរអតិថិជនចូលចិត្តពិសារ ហើយបច្ចុប្បន្នអ្នកស្រី និងក្រុមគ្រួសារកំពុងសាកដើមដើម្បីដាំបន្ថែមទៀតទៅលើផ្ទៃដីដែលនៅសល់។

ដោយឡែកលោក រស់ ផល្លា ជាអាជីវករលក់ផ្លែឈើនៅផ្សារបឹងឈូក កណ្ដាលក្រុងបាត់ដំបងបានរៀបរាប់ថា សព្វថ្ងៃសម្រាប់ផ្លែពុទ្រា ៣សាសន៍នេះ សម្បូរអ្នកនិយមចូលចិត្តណាស់ ដោយលោកបានដើរទិញតាមចំការ និងយកមកលក់រាយនៅទីផ្សារបានមួយគីឡូក្រាម ៨.០០០ រៀល បើកាច់កងទៅនឹងសោហ៊ុយ គឺលោកអាចសល់កម្រៃបានខ្លះដើម្បីទប់ទល់ក្នុងជីវភាពគ្រួសារប្រចាំថ្ងៃ។ ហើយចំពោះផ្លែពុទ្រានេះ គឺលក់ដាច់មិនដែលសល់នោះឡើយ ដោយសារតែប្រជាពលរដ្ឋស្គាល់ពីរសជាតិទើបនិយមចូលចិត្តទិញយកទៅពិសា ៕

អត្ថបទ៖ សោ និយមរ័ត្ន

The post កសិករដាំពុទ្រា៣សាសន៍ កំពុងទទួលបានតម្លៃខ្ពស់នៅលើទីផ្សារ appeared first on Kampuchea Thmey Daily.

អ្នកស្រី មុំ កល្យាណ ជា​អ្នក​នៅ​មើលថែ​ចម្ការ​ពុទ្រា ដែលមាន​ទីតាំង​នៅក្នុង​ភូមិ​អណ្តើក​ហែប ស្រុក ​រតនៈមណ្ឌល ខេត្តបាត់ដំបង បាន​រៀបរាប់ថា ពូជ​ពុទ្រា​នេះ ​វា​ដូចជា​មិន​ចំ​ជា​ពុទ្រា​ចិន ឬក៏​ពុទ្រា​ខ្មែរ​ទេ គឺ​វា​ហាក់ដូចជា​កូនកាត់ ប៉ុន្តែ​សម្រាប់​ពុទ្រា​នេះ​មាន​លក្ខណៈ​ស្រួយ ផ្អែម ដូច​ផ្លែ​ប៉ម ដែល​ពលរដ្ឋ​ខ្លះ​បានដាក់​ឈ្មោះថា ផ្លែ​ពុទ្រា​ឆ្ងាញ់ ។​

នៅលើ​ផ្ទៃដី​ប្រមាណ​កន្លះ​ហិកតា គឺ​គ្រាន់តែ​ជា​ការដាំ​សាកល្បង​តែប៉ុណ្ណោះ ដោយ​ឆ្នាំមុន ​មិនសូវ​ហុច​ផល​ប៉ុន្មាន​នោះ​ទ លុះដល់​ឆ្នាំនេះ ក្រោយពី​មាន​ទឹកជំនន់​លិច​ចម្ការ​ពុទ្រា​នេះ​មួយរយៈ​មក ក៏​ស្រាប់តែ​ដើម​ពុទ្រា​បានចេញ​ផ្លែ​គួរអោយ​ចាប់អារម្មណ៍ គឺ​ក្រោយពេល​ទឹក​ស្រក​អស់ ដែល​ពួកគាត់​បេះ​សឹង​មិនទាន់ ។​

អ្នកស្រី​បាន​បន្តថា ពុទ្រា​នេះ​មិន​មានប្រើ​សារធាតុ​គីមី​អ្វី​នោះទេ ហើយ​បច្ចុប្បន្ន​លក់ដាច់​ណាស់​មិន​ថា​នៅលើ​ទីផ្សារ​នោះទេ ដោយ​ភាគច្រើន​មាន​អ្នក​ទូរស័ព្ទ​ទៅ​កុម្មង់​អោយ​បេះ​ទុកអោយ ឯ​ពលរដ្ឋ​ខ្លះទៀត​គឺ​គេ​បាន​ចុះ​ទៅលេង​ដល់​ចម្ការ​តែម្តង ដើម្បី​បាន​ដើរ​បេះ និង​ទិញ​នៅ​ទីនោះ​តែម្តង ។​

អ្នកស្រី ឌុ​ច សុគន្ធា ជា​គ្រូបង្រៀន​នៅ​ក្រុង​បាត់ដំបង ដែល​បានធ្វើ​ដំណើរ​ទៅដល់​ចម្ការ​ផ្ទាល់ បាន​និយាយថា ផ្លែ​ពុ​ទ្រនេះ​មានឱជារស​ឆ្ងាញ់​ណាស់ គឺ​ឆ្ងាញ់​ជាង​ផ្លែ​ពុទ្រា​មកពី​ក្រៅ​ស្រុក​ទៅទៀត ដោយមាន​លក្ខណៈ​ផ្អែម និង​ស្រួយ បើ​ទិញ​យកមក​ដាក់​ចូលក្នុង​ទូរ​ទឹកកក កាន់តែ​ពិសេស​មែនទែន ។​

បច្ចុប្បន្ន​គេ​ស​ង្គេ​ត​ឃើញថា នៅ​មិនទាន់មាន​ការដាំ​ផុសផុល​នៅឡើយ​ទេ នៅក្នុង​ខេត្តបាត់ដំបង​នេះ ពិសេស​នៅក្នុង​ស្រុក​រតនៈមណ្ឌល​តែម្តង ៕

អត្ថបទ​៖ សោ និយម​រ័ត្ន​

​

The post កសិករ​ដាំ​ដំណាំ ពុទ្រា​ចិន កំពុងមាន​ទីផ្សារ និង​អាច​ទ្រទ្រង់​ជីវភាព​បានល្អ​ប្រសើរ​ appeared first on Kampuchea Thmey Daily.

លោក ឡេង បាន​ដើរ​ម៉ៅ​ដើមពុទ្រានៅក្នុងដីឡូត៏មួយ​ស្ថិត​ក្នុងភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ ដែលមានដើម​ពុទ្រា​ចំនួន ៧៥ ដើម។

លោក ឡេង​ឲ្យ​ដឹ​ង​ថា ម្ចាស់ដីឡូត៏មិនចង់ឲ្យដីទំនេរក៏បានដាំដើមពុទ្រា​ និងដើមស្វាយទុកលក់ឲ្យអ្នកម៉ៅចម្ការតែម្តង។

ក្នុងការម៉ៅចម្ការពុទ្រា​លោក​បាន​ម៉ៅ​តម្លៃ១៥០ដុល្លារ តែការម៉ៅនេះក្នុង១រដូវបានរយៈតែ៣ខែប៉ុណ្ណោះ គឺចាប់ពីខែ វិច្ឆិកាដល់ខែមករា ដែលជារដូវពុទ្រាទុំ។ លោក ឡេងឲ្យ​ដឹង​ថា ផ្លែពុទ្រាដែលម៉ៅនេះជាពូជផ្លែពុទ្រា​ធំផ្អែមដោយលោក​លក់ខ្លួនឯង ពុំមានការលក់បន្តនោះឡើយ។

ចំពោះការថែទាំនៅពេលដែលប្រមូលផល ផ្លែពុទ្រា​ទាំង​នោះ​ត្រូវ​ការ​កាប់មែកឲ្យអស់នៅសល់តែគល់ ដើម្បីវាបានលូតលាស់បន្តទៀត។ ទីផ្សារពុទ្រា​អាចលក់បាន១គីឡូក្រាមថ្លៃ៤ពាន់ទៅ៥ពាន់រៀល៕

អត្ថបទ៖ កញ្ញា វ៉ាត

The post រយៈពេល៧ឆ្នាំ លោក​ឡេង ដើរ​ម៉ៅ​ចម្ការ​ពុទ្រា ទ្រទ្រង់ជីវភាព appeared first on Kampuchea Thmey Daily.