អាជ្ញាធរស្រុក និងមន្ត្រីជំនាញ បានចុះពិនិត្យជាក់ស្ដែងលើស្ថានភាពចរាចរណ៍ ការតាំងលក់របស់អាជីវករ និងការប្រើប្រាស់ចិញ្ចើមផ្លូវសាធារណៈ ដោយបានធ្វើការណែនាំ និងសម្របសម្រួលដល់អាជីវករឱ្យចូលរួមរក្សាសណ្ដាប់ធ្នាប់ របៀបរៀបរយ និងអនាម័យបរិស្ថានជុំវិញផ្សារ ដើម្បីបង្កភាពងាយស្រួលដល់ការធ្វើចរាចរណ៍ និងលើកកម្ពស់សោភ័ណភាពទីប្រជុំជនឱ្យកាន់តែល្អប្រសើរ។

ជាមួយគ្នានេះផងដែរ ក្រុមការងារក៏បានរៀបចំដាំបង្គោលភ្លើងបំភ្លឺផ្លូវប្រើប្រាស់ថាមពលសូឡា នៅតាមដងផ្លូវជុំវិញតំបន់ផ្សារ ដែលជាអំណោយដ៏ថ្លៃថ្លារបស់ព្រះសង្ឃ ឯកឧត្តម លោកជំទាវ លោកឧកញ៉ា សប្បុរសជន និងមន្ត្រីរាជការ ដែលបានរួមចំណែកគាំទ្រដល់ការអភិវឌ្ឍមូលដ្ឋាន និងការលើកកម្ពស់សុខុមាលភាពសាធារណៈ។

ការដំឡើងបង្គោលភ្លើងសូឡានេះ មិនត្រឹមតែជួយបំភ្លឺផ្លូវនៅពេលយប់ប៉ុណ្ណោះទេ ប៉ុន្តែថែមទាំងជួយកាត់បន្ថយហានិភ័យគ្រោះថ្នាក់ចរាចរណ៍ បង្កើនសុវត្ថិភាពសម្រាប់ប្រជាពលរដ្ឋ និងអាជីវករ ព្រមទាំងចូលរួមកាត់បន្ថយការប្រើប្រាស់ថាមពលអគ្គិសនីតាមបែបប្រពៃណី ស្របតាមគោលនយោបាយអភិវឌ្ឍបៃតង និងបរិស្ថានស្អាតផងដែរ។

លោក សាយ វណ្ណៈ ក៏បានថ្លែងអំណរគុណដល់ព្រះសង្ឃ ថ្នាក់ដឹកនាំ សប្បុរសជន និងមន្ត្រីពាក់ព័ន្ធទាំងអស់ ដែលតែងតែចូលរួមឧបត្ថម្ភគាំទ្រ និងសហការជាមួយអាជ្ញាធរមូលដ្ឋាន ក្នុងការអភិវឌ្ឍហេដ្ឋារចនាសម្ព័ន្ធ និងកែលម្អសណ្ដាប់ធ្នាប់សាធារណៈ ដើម្បីឆ្លើយតបទៅនឹងតម្រូវការរស់នៅប្រចាំថ្ងៃរបស់ប្រជាពលរដ្ឋឱ្យកាន់តែប្រសើរឡើង។
អាជ្ញាធរស្រុកបាទី ក៏បានអំពាវនាវដល់ប្រជាពលរដ្ឋ និងអាជីវករទាំងអស់ បន្តចូលរួមថែរក្សាសណ្ដាប់ធ្នាប់ អនាម័យ និងទ្រព្យសម្បត្តិសាធារណៈរួម ដើម្បីធ្វើឱ្យតំបន់ផ្សារសំរោងយ៉ោង ក្លាយជាតំបន់មានរបៀបរៀបរយ ស្អាត និងមានសុវត្ថិភាព សមស្របទៅនឹងការរីកចម្រើនរបស់មូលដ្ឋាន៕

អត្ថបទ៖ វីរៈ

The post អភិបាលស្រុកបាទី ដឹកនាំរៀបចំសណ្ដាប់ធ្នាប់ផ្សារសំរោងយ៉ោង និងដំឡើងបង្គោលភ្លើងសូឡា លើកកម្ពស់សោភ័ណភាព និងសុវត្ថិភាពសាធារណៈ appeared first on Kampuchea Thmey Daily.

លោក អ៊ូច ភា អភិបាល​នៃ​គណៈ​អភិបាល​ខេត្ត​តាកែវ​បាន​បញ្ជាក់​ថា បង្គោល​ភ្លើង​បំភ្លឺ​នេះ​ជា​គម្រោង​របស់​ក្រសួង​សាធារណការ​និង​ដឹក​ជញ្ជូន ដែល​បាន​រៀបចំ​នៅ​ក្នុង​តំបន់​ប្រជុំ​ជន​តាម​ផ្លូវជាតិ​ក្នុង​ខេត្ត។

លោក​អភិបាល​ខេត្ត​បន្ត​ថា ក្រៅ​ពី​នៅ​តំបន់​ប្រជុំជន​ផ្សារ​សំរោងយ៉ោង​តាម​ផ្លូវជាតិ​លេខ ២ ក៏​បាន​រៀបចំ​ដំឡើង​​បង្គោល​ភ្លើង​បំភ្លឺ​នៅ​ផ្សារ​អង់តាសោម​តាម​ផ្លូវជាតិ​លេខ ៣ និង​នៅ​ក្នុង​ក្រុង​ដូនកែវ​ខេត្ត​តាកែវ។

លោក​អភិបាល​ខេត្ត​បន្ថែម​​ថា ការ​រៀបចំ​បង្គោល​​ភ្លើង​បំភ្លឺ​តាម​ផ្លូវជាតិសំខាន់ៗ​នៅ​​ក្នុង​​តំបន់ប្រជុំជន ក្រៅ​ពី​បង្កើន​​សោភណភាពបង្ក​លក្ខណៈ​ងាយស្រួល​សម្រាប់​ពលរដ្ឋ​ធ្វើ​ដំណើរយប់ព្រលប់ ក៏​ជួយ​ពង្រឹង​ការពារ​សន្តិសុខ​​ប្រជាពលរដ្ឋ​នៅ​តាម​មូលដ្ឋាន​ផង​ដែរ៕

The post តាមផ្លូវជាតិលេខ ២ ប្រជុំជន​ផ្សារ​សំរោងយ៉ោង​រៀបចំ​បង្គោល​ភ្លើង​បំភ្លឺ ងាយស្រួល​ធ្វើ​ដំណើរ​​យប់​ព្រលប់ appeared first on Kampuchea Thmey Daily.