លោកអភិបាលរងខេត្តកណ្ដាល បានស្នើឡើងដូច្នេះ នៅក្នុងកិច្ចប្រជុំពិនិត្យស្នើសុំបន្ធូរបន្ថយទោស និងលើកលែងទោស ក្នុងឱកាសពិធីបុណ្យ ចូលឆ្នាំថ្មី ប្រពៃណីជាតិ និងពិធីបុណ្យវិសាខបូជា កាលពីរសៀលថ្ងៃទី២៧ ខែមករា ឆ្នាំ២០២៦នេះ នៅសាលាខេត្តកណ្តាល។

លោកអភិបាលរងខេត្តបានលើកឡើងថា៖ ទណ្ឌិតទាំងឡាយដែលអាចស្នើសុំការបន្ធូរបន្ថយទោស និងលើកលែងទោសត្រូវមានលក្ខណៈសម្បត្តិគ្រប់គ្រាន់ តាមលក្ខខណ្ឌកំណត់ដោយច្បាប់ សម្រាប់ទោសដែលមិនមែនជាកម្មវត្ថុក្នុងការលើកលែងទោស បន្ធូរបន្ថយទោស ឬពិបាកក្នុងការលើកលែងទោស និងបន្ថយទោសនោះគឺមានដូចជាទោស ចាប់ជំរិតទារប្រាក់ ប្លន់សម្លាប់ រំលោភសម្លាប់ឃាត់កម្មសាហាវឃោរឃៅ ទោសផលិត និងជួញដូរគ្រឿងញៀន ភារវកម្ម ជនប្រដាប់អាវុធ ទណ្ឌិតទទួលទោសច្រើនដង ទណ្ឌិតដែលជាប់ពន្ធនាគារច្រើនដង និងទណ្ឌិតធ្លាប់ល្មើសជាប់ពិន័យជាដើម។

លោកឧត្តមអគ្គានុរក្ស ឯម និមល ប្រធានពន្ធនាគារ បានអោយដឹងថា អង្គភាពពន្ធនាគារខេត្តកណ្ដាល បានជ្រើសយកទណ្ឌិតចំនួន៣៣ ស្រី៤នាក់ សម្រាប់ការបន្ធូរបន្ថយទោស ក្នុងពិធីបុណ្យ ចូលឆ្នាំថ្មី ប្រពៃណីជាតិ លើកលែងទោស មានចំនួន១៧នាក់ និងស្រី០២នាក់។ ស្នើសុំបន្ធូរបន្ថយទោសរយៈពេល ៣ខែ ចំនួន ១៥ នាក់ (ស្រី ០២នាក់) ស្នើសុំបន្ធូរបន្ថយទោសរយៈពេល ៣ខែចំនួន ០២ នាក់ (ស្រី គ្មាន) និងពិធីបុណ្យវិសាខបូជា ស្ថិតិទណ្ឌិតសរុប ដែលស្នើសុំបន្ធូរបន្ថយទោស និងលើកលែងទោស មានចំនួន១៦នាក់ និងស្រី០២នាក់ ស្នើសុំបន្ធូរបន្ថយទោសរយៈពេល ៣ខែចំនួន ០៩ នាក់ (ស្រី ០១នាក់) ស្នើសុំបន្ធូរបន្ថយទោសរយៈពេល ៦ខែ ចំនួន ០៥ នាក់ (ស្រី ០១នាក់) ស្នើសុំបន្ធូរបន្ថយទោសរយៈពេល ៩ខែចំនួន ០១ នាក់ (ស្រី គ្មាន) ស្នើសុំបន្ធូរបន្ថយទោសរយៈពេល១២ខែ ចំនួន ០១ នាក់ (ស្រី គ្មាន)។

គួរបញ្ជាក់ដែរថា៖ ព្រះរាជាណាចក្រកម្ពុជា បានកំណត់យកពិធីបុណ្យចំនួន០៥ សំរាប់ស្នើសុំបន្ធូរបន្ថយទោស និងលើកលែងទោសឲ្យទណ្ឌិត ក្នុងនោះមាន ៖ ១/ទិវាជ័យជម្នះលើរបបប្រល័យពូជសាសន៍ ៧ មករា ២/ពិធីបុណ្យចូលឆ្នាំថ្មីប្រពៃណីជាតិខ្មែរ ៣/ពិធីបុណ្យវិសាខបូជា ៤/ពិធីបុណ្យឯករាជ្យជាតិ និងទី៥គឺព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក៕ ដោយ ៖ ម៉េង

The post ពន្ធនាគារខេត្តកណ្តាលស្នើសុំបន្ធូរបន្ថយ និងលើកលែងទោស ទណ្ឌិតក្នុងពិធីបុណ្យ ចូលឆ្នាំថ្មី ប្រពៃណីជាតិ និងពិធីបុណ្យវិសាខបូជា ឆ្នាំ២០២៦ appeared first on Kampuchea Thmey Daily.

កម្ពុជាថ្មីមិនអាចទាក់ទងអ្នកនាំពាក្យអគ្គនាយកដ្ឋានពន្ធនាគារលោក ឃៀង សុណាឌីន ដើម្បីសុំព័ត៌មានលម្អិតបាននៅឡើយទេ តែប្រភពគួរឱ្យទុកចិត្តបានឱ្យដឹងថាពន្ធនាគារខេត្តកណ្ដាល និងដោះដូរជាមួយមជ្ឈមណ្ឌលជាតិព្យាបាល និងស្ថារនីតិសម្បទាអ្នកញៀនគ្រឿងញៀន មានទីតាំងស្ថិតនៅក្នុងភូមិបាគូរ ឃុំបាគូរ ស្រុកកណ្ដាលស្ទឹង ខេត្តកណ្តាល ដែលធំជាងពន្ធនាគារបច្ចុប្បន្ន។

អគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀននាយឧត្តមសេនីយ៍ មាស វីរិទ្ធ បានឱ្យកម្ពុជាថ្មីដឹងថាពិតជាមានគម្រោងដោះដូរនេះមែន ដើម្បីដោះស្រាយភាពចង្អៀតណែននៅពន្ធនាគារខេត្តកណ្ដាល។ ទោះជាយ៉ាងណាលោកមិនទាន់អាចបញ្ជាក់ថាពេលណានឹងអាចដោះដូរនៅឡើយទេដោយរង់ចាំការសម្រេចរបស់រាជរដ្ឋាភិបាល។

លោកថា៖ «យើងមានជាគោលការណ៍ បានឯកភាពគ្នាដើម្បីដោះស្រាយភាពចង្អៀតណែនតាមពន្ធនាគារ»។

របាយការណ៍របស់អង្គការលីកាដូចេញកាលពីថ្ងៃទី១៨ ខែកុម្ភៈ ឆ្នាំ២០២៥នេះឱ្យដឹងថាពន្ធនាគារ​ខេត្ត​កណ្តាល​ គឺជា​ពន្ធនាគារ​ ដែល​មាន​ភាព​ចង្អៀត​ណែន​ជាង​គេ​ ដោយ​មាន​ជនជាប់ឃុំជាង​ ៣៩០០​នាក់​ នៅ​ក្នុ​ងទំហំ​ពន្ធនាគារ​ ​ដែល​អាច​ដាក់​បាន​ត្រឹម​តែ​៦០០​​នាក់ ដែល​ធ្វើ​ឱ្យ​ពន្ធនាគារ​នេះ​ មាន​អត្រាដាក់​ជនជាប់ឃុំ​ដល់ទៅជាង​៦៥០​%។

កន្លងទៅដោយសារភាពចង្អៀតណែន ពន្ធនាគារខេត្តកណ្ដាលបានផ្ទេរអ្នកទោសទៅកាន់មណ្ឌលយុវនីតិសម្បទានក្នុងខេត្ត ឬពន្ធនាគារផ្សេងដើម្បីដោះស្រាយភាពចង្អៀតណែនក្នុងពន្ធនាគារនេះ។

នាយកប្រតិបត្តិអង្គការសិទ្ធិមនុស្សលីកាដូលោក អំ សំអាត ថាការផ្លាស់ប្ដូរទៅកាន់ទីតាំងដែលធំទូលាយគឺបានជួយកាត់បន្ថយនូវបញ្ហាដែលពន្ធនាគារខេត្តកណ្ដាលជួបប្រទះដែរ ទោះជាយ៉ាងណាលោកថាការកាត់បន្ថយភាពចង្អៀតណែនដោយដូរទីតាំងនេះមិនមែនជាដំណោះស្រាយយូរអង្វែងនោះទេ ដោយជំរុញដល់គ្រប់ភាគីពាក់ព័ន្ធពិនិត្យនូវវិធានការច្បាប់ផ្សេងដែលមានស្រាប់វិញ។

លោកថា៖ «ឥឡូវនេះខ្ញុំក៏បានឃើញក្រសួងយុត្តិធម៌លោកក៏បានប្រកាសដែរពីការអនុវត្តន៍ទោសការងារសហគមន៍ ព្រោះកន្លងមកយើងអត់បានអនុវត្តន៍។ អ៉ីចឹងទោសខ្លះត្រូវអនុវត្តន៍ទោសការងារសហគមន៍ រៀបចំនីតិវិធីនិងការរៀបចំក្នុងការអនុវត្តទៅ ហើយទោសផ្សេងទៀតដែលអនុវត្តឱ្យនៅក្រៅឃុំបានគួរតែជ្រើសរើស ហើយមួយទៀតគឺការឃុំខ្លួនបណ្ដោះអាសន្នគួរតែជម្រើសចុងក្រោយ​តាមនីតិវិធីតាមផ្លូវច្បាប់»។

មជ្ឈមណ្ឌលជាតិព្យាបាល និងស្ថារនីតិសម្បទាអ្នកញៀនគ្រឿងញៀន មានទីតាំងស្ថិតនៅក្នុងភូមិបាគូរ ឃុំបាគូរ ស្រុកកណ្ដាលស្ទឹង ខេត្តកណ្តាលត្រូវបានសម្ពោធដាក់ឱ្យប្រើប្រាស់កាលពីថ្ងៃទី១២ ខែមករា ឆ្នាំ២០២៣ ដែលបានសាងសង់លើ​ទំហំផ្ទៃដី ៤៨ ៨៣០ម៉ែត្រការ៉េ និងមានអគារសរុបចំនួន ១៥ខ្នង និងកំពុងរៀបចំធ្វើឱ្យស្របតាមស្ដង់ដាពន្ធនាគារ៕

អត្ថបទដោយ ហ៊ុន សិរីវឌ្ឍន៍

The post ក្រសួងមហាផ្ទៃគ្រោងប្ដូរពន្ធនាគារខេត្តកណ្ដាលទៅកន្លែងថ្មីដើម្បីដោះស្រាយភាពចង្អៀតណែន appeared first on Kampuchea Thmey Daily.