នេះជាការលើកឡើងរបស់លោក ហ៊ុន សុរិទ្ធី អភិបាលរងរាជធានី ខណៈលោកអញ្ជើញ ជាតំណាងលោក ឃួង ស្រេង អភិបាល នៃគណះអភិបាលរាជធានីភ្នំពេញ ក្នុងពិធីសម្ពោធជាផ្លូវការសាខាក្នុងស្រុក ក្រុមហ៊ុនតូយ៉ូតា(ខេមបូឌា) នៅល្ងាចថ្ងៃទី១៥ វិច្ឆិកា ស្ថិតលើមហាវិថីសម្តេចតេជោហ៊ុន សែន (ផ្លូវ៦០ម៉ែត្រ)ក្នុងខណ្ឌមានជ័យ ។

លោក ហ៊ុន សុរិទ្ធី បានលើកឡើងថា ការសម្ពោធជាផ្លូវការសាខាក្នុងស្រុក ក្រុមហ៊ុនតូយ៉ូតា(ខេមបូឌា) ស្ថិតក្នុងខណ្ឌមានជ័យ នាពេលនេះ គឺពិតជាបានឆ្លុះបញ្ចាំងអោយឃើញពីការសម្រេចចិត្តដ៏ត្រឹមត្រូវរបស់ក្រុមហ៊ុនតូយ៉ូតា។ នេះជាជោគជ័យថ្មីមួយទៀត នៃការអនុវត្តកម្មវិធីនយោបាយ និងយុទ្ធសាស្ត្របញ្ចាកោណដំណាក់កាលទី១ របស់រាជរដ្ឋាភិបាល អាណត្តិទី៧ ក្នុងការខិតខំទាក់ទាញនូវការវិនិយោគទាំងក្នុង និងក្រៅប្រទេស ជាពិសេសគឺការខិតខំបង្កើនជំនឿ ជឿជាក់ជូនដល់ពាណិជ្ជករ វិនិយោគ និងធុរជន ដើម្បីបណ្តាក់ទុនធ្វើអាជីវកម្មនៅកម្ពុជា សំដៅរួមចំណែក ជំរុញឲ្យមានកំណើនសេដ្ឋកិច្ច បង្កើតការងារ កាត់បន្ថយភាពក្រីក្រ និងអភិវឌ្ឍន៍រាជធានីភ្នំពេញឲ្យកាន់តែរីកចម្រើនបន្ថែមទៀត។

ក្នុងឱកាសនោះ លោក ហ៊ុន សុរិទ្ធី បានជំរុញ និងលើកទឹកចិត្ត ចំពោះការ បណ្តាក់ទុនវិនិយោគធ្វើអាជីវកម្ម សេវាកម្មស្របច្បាប់គ្រប់ប្រភេទ ជាពិសេសការពង្រឹងពង្រីកសហគ្រិនភាព កិច្ចសហប្រតិបត្តិការ ពាណិជ្ជកម្ម ការបើកទូលាយបរិយាកាសវិនិយោគឲ្យកាន់តែមានភាពល្អប្រសើរ ប្រកបដោយ ភាពទាក់ទាញ និងផ្ដល់ទំនុកចិត្តខ្ពស់ជូនដល់ធុរជន និងសហគ្រិនទាំងអស់ ស្របតាមក្របខណ្ឌពាណិជ្ជកម្ម សកល សម្រាប់ជំរុញកំណើនសេដ្ឋកិច្ច និងពង្រីកសក្តានុពលថ្មីៗ ប្រកបដោយគុណវុឌ្ឍខ្ពស់។

លោកបន្តថា ការអភិវឌ្ឍន៍ប្រទេសលើគ្រប់វិស័យបានជោគជ័យ ទាល់តែយើងមានសុខសន្តិភាព និងស្ថេរភាព នយោបាយ លោកសូមអោយរួមគ្នារក្សាអោយបាននៅសុខសន្តិភាពនៅកម្ពុជា ដើម្បីកម្ពុជាមានឱកាសអភិវឌ្ឍន៍ប្រទេសអោយរីកចំរើនថែមទៀត។

លោកឧកញ៉ា គង់ នួន ប្រធានក្រុមហ៊ុនតូយ៉ូតា(ខេមបូឌា) ក៏ឱកាសនោះក៏បានលើកឡើងដែរថា៖ ក្រុមហ៊ុនតូយ៉ូតា (ខេមបូឌា) តែងបានបន្តពង្រីកសាខារបស់ខ្លួនទៅតំបន់ ដែលមានសក្តានុពលសេដ្ឋកិច្ច ដូចជានៅពេលថ្មីៗ ក្រុមហ៊ុន បានពង្រីកសាខា នៅខេត្តកំពង់ចាម និងបន្តបើកសាខាថ្មីមួយទៀតនៅខណ្ឌមានជ័យ នាពេលនេះ ។សាខាថ្មីនេះ មានផ្ទៃដីជាង១ហិចតា ដោយមានទាំងសេវាកម្មជួសជុលរថយន្ត បង់រំលួសរថយន្ត ទិញ-លក់រថយន្ត តូយ៉ូតាថ្មី និងមួយតឹកផងដែរ៕

អត្ថបទ៖ ស្រីរ័ត្ន

The post ពាណិជ្ជករធុរជនវិនិយោគិនជាតិ និងអន្តរជាតិ បាននឹងកំពុងរីករាយទទួលមនុញ្ញផលនៃការអនុវត្តគោលនយោបាយយុទ្ធសាស្ត្ររបស់រាជរដ្ឋាភិបាល appeared first on Kampuchea Thmey Daily.

សេចក្តីប្រកាសព័ត៌មានរួមគ្នារវាងអាស៊ាន និងសហភាពអឺរ៉ុប ចុះថ្ងៃទី៣០ ខែវិច្ឆិកា បានឲ្យដឹងយ៉ាងនេះថា “ចាប់ពីពេលនេះតទៅ ផ្នែកឯកជននៅក្នុងតំបន់អាស៊ាន នឹងមានលទ្ធភាពចូលទៅប្រើប្រាស់ប្រព័ន្ធ​អនឡាញ​ថ្មីមួយប្រកបដោយអានុភាពខ្លាំង សម្រាប់គ្រប់គ្រងទំនិញឆ្លងកាត់គយជាភាសាអង់គ្លេស គឺ ​ASEAN Customs Transit System (ACTS) ដែលនឹងកាត់បន្ថយនូវបញ្ហាប្រឈមនានា នៅក្នុង​ការ​ធ្វើពាណិជ្ជកម្ម​ក្នុងរង្វង់តំបន់អាស៊ាន និងជួយបង្កលទ្ធភាពឱ្យបណ្តាក្រុមហ៊ុនអាចទាញយក​អត្ថប្រយោជន៍​ពេញលេញពីសហគមន៍សេដ្ឋកិច្ចអាស៊ាន (AEC) តាមរយៈការធ្វើចរាចរណ៍ទំនិញដោយ​សេរីក្នុងតំបន់​ទាំងមូល”។

កាលពីឆ្នាំ២០១៧ បណ្ដា​រដ្ឋមន្ត្រី​សេដ្ឋកិច្ច​អាស៊ាន បានដាក់ចេញគោលដៅពីរសម្រាប់ឈានទៅកាត់​បន្ថយចំណាយលើការទូទាត់ទំនិញឆ្លងកាត់ក្នុងកម្រិត១០ភាគរយ នៅត្រឹមឆ្នាំ២០២០ និងសម្រាប់​បង្កើន​ទំហំ​ពាណិជ្ជ​កម្ម​ក្នុង​រង្វង់តំបន់អាស៊ាន ឱ្យកើន​ទ្វេ​ឡើង​ រវាងឆ្នាំ២០១៧ និងឆ្នាំ២០២៥។

ក្នុងការឈានទៅសម្រេចគោលដៅនេះឱ្យបាន ប្រព័ន្ធ ACTS នេះ ត្រូវបានបង្កើតឡើង​សម្រាប់អនុញ្ញាត​ឱ្យក្រុមហ៊ុននានា អាចបំពេញបែបបទប្រតិវេទន៍គយតាមប្រព័ន្ធអេឡិចត្រូនិកដោយផ្ទាល់ ជាមួយអាជ្ញាធរ​គយអាស៊ាន ហើយតាមរយៈការងារនេះ គេអាចតាមដានចរាចរណ៍ទំនិញរបស់ខ្លួនចាប់​តាំងពីពេល​លើក​ដាក់​មុនចេញដំណើរ រហូតដល់ពេលប្រគល់នៅទីដៅចុងក្រោយទៀតផង។

ទាក់ទងបញ្ហានេះ លោក Dato Lim Jock Hoi អគ្គលេខាធិការអាស៊ានបានថ្លែង​ថា “ការបង្កើតប្រព័ន្ធ​គ្រប់គ្រង​ទំនិញឆ្លងកាត់គយ ក្នុងតំបន់អាស៊ាននេះ ដើរតួនាទីសំខាន់ខ្លាំងណាស់សម្រាប់សម្រួលការធ្វើ​ចរាចរណ៍ទំនិញនៅក្នុងតំបន់ឱ្យប្រព្រឹត្តទៅបានយ៉ាងរលូន។ លោកជឿជាក់ថា ប្រព័ន្ធនេះនឹងក្លាយ​ទៅជា​ឧបករណ៍មួយដ៏ល្អឥតខ្ចោះសម្រាប់ពង្រីកការធ្វើពាណិជ្ជកម្ម និងបណ្តាញផលិតកម្មរបស់អាស៊ាន ក៏ដូច​ជានៅក្នុងការបង្កើតឱ្យមានទីផ្សារមួយដែលមានលក្ខណៈកាន់តែសមមូលគ្នាឡើង សម្រាប់បណ្តាក្រុមហ៊ុន និងអ្នកប្រើប្រាស់នៅក្នុងតំបន់នេះ”។

លោកបន្តថា “ប្រព័ន្ធ ACTS នេះក៏អាចនឹងជួយផងដែរ ដល់កិច្ចខិត​ខំស្តារសេដ្ឋកិច្ចឱ្យងើបឡើងវិញ ក្រោយវិបត្តិកូវីដ ដើម្បីពន្លឿនចរាចរណ៍ឆ្លងកាត់ នៃសម្ភារពេទ្យ វ៉ាក់សាំង និងគ្រឿងបរិក្ខារការពារខ្លួន ក្នុងចំណោមរដ្ឋសមាជិកក្នុងតំបន់”។

ប្រព័ន្ធគ្រប់គ្រងទំនិញឆ្លងកាត់គយក្នុងតំបន់អាស៊ាន (ACTS) នេះ សម្រួលឱ្យចរាចរណ៍ទំនិញ​នៅក្នុង​តំបន់​ទាំង​មូលមានភាពសាមញ្ញ ក្នុងគោលដៅធ្វើយ៉ាងណា ឱ្យការដឹកជញ្ជូនទំនិញនេះកាន់តែមាន​ប្រសិទ្ធិ​ភាព​ និងចំណាយកាន់តែទាប។

​នៅក្រោមប្រព័ន្ធ ACTS ផ្នែកឯកជនអាចបំពេញបែបបទប្រតិវេទន៍ទំនិញឆ្លងកាត់គយតែមួយ សម្រាប់ការ​ដឹក​ជញ្ជូនទំនិញឆ្លងកាត់ច្រើនប្រទេសនៅក្នុងតំបន់អាស៊ាន ដោយមិនចាំបាច់បំពេញបែបបទដដែល​ច្រើន​លើក ឬផ្លាស់ប្តូរយានដឹកជញ្ជូននៅពេលឆ្លងកាត់ច្រកព្រំដែននីមួយៗទេ។ ការរៀបចំចាត់ចែងពិសេស នឹង​អនុញ្ញាត​ឱ្យពាណិជ្ជករមានកេរ្តិ៍ឈ្មោះដែលទុកចិត្តបាន អាចផ្ទុកទំនិញនៅក្នុងទីតាំងរបស់ខ្លួន​ក្នុងប្រទេស​ជាប្រភពចេញដំណើរ និងដាក់ទំនិញចុះនៅទីតាំងផ្ទាល់របស់ខ្លួនក្នុងប្រទេស​ដែលជាគោលដៅនៃការដឹក​ជញ្ជូន។

​ប្រព័ន្ធនេះស្ថិតនៅក្រោមការគ្រប់គ្រងរបស់ក្រុមការងារអចិន្ត្រៃយ៍ ដែលហៅជាភាសាអង់គ្លេសថា ACTS Central Management Team ដែលមានទីស្នាក់ការក្នុងអគ្គ​លេខាធិការដ្ឋានអាស៊ានក្នុងទី​ក្រុងហ្សាការ​តា ប្រទេសឥណ្ឌូនេស៊ី ក្រោមការជួយជ្រោមជ្រែងរបស់កម្មវិធី ARISE Plus តាមរយៈការគាំទ្រផ្នែក​ហិរញ្ញ​វត្ថុ​ពីសហភាពអឺរ៉ុប។

ប្រព័ន្ធ ACTS ​ត្រូវបានសម្ពោធដាក់ឱ្យប្រើប្រាស់ទូទៅជាផ្លូវការហើយ បន្ទាប់ពីបានអនុវត្តការសាកល្បង​ប្រើនៅក្នុងប្រទេសកម្ពុជា, ឡាវ, ម៉ាឡេស៊ី, សិង្ហបុរី, ថៃ និងវៀតណាម រួចមក៕

អត្ថបទ ៖ កោះកែវ
 

The post ពាណិជ្ជករឆ្លងដែន អាចទាញប្រយោជន៍ពី ប្រព័ន្ធ ACTS សម្រាប់ការត្រួតពិនិត្យទំនិញឆ្លងកាត់ គយ appeared first on Kampuchea Thmey Daily.