ព្រឹត្តិការណ៍​ចាប់​ត្រី​នៅ​បឹង​បង្កោង មាន​លក្ខណៈពិសេស​ខុសពី​ការនេសាទ​ធម្មតា ដោយសារ​តែមាន ច្បាប់​សហគមន៍​តឹងរ៉ឹង​។ ជា​រៀងរាល់ឆ្នាំ អាជ្ញាធរ​ភូមិ និង​គណៈកម្មការ​វត្ត តែង​ហាមឃាត់​ការ​នេសាទ​ក្នុង​បឹង​នេះ​ពេញ​មួយឆ្នាំ ដើម្បី​រក្សា​ពូជ​ត្រី ហើយ​អនុញ្ញាតឱ្យ​ចាប់​ត្រី​បានតែ​ម្តងគត់​ក្នុង​មួយ​ឆ្នាំ គឺ​ក្នុង​ខែមាឃ បន្ទាប់ពី​ប្រមូល​ផល​ស្រូវ​រួច។

សម្រាប់​ឧបករណ៍​នេសាទ អនុញ្ញាតឱ្យ​ប្រើតែ​ឧបករណ៍​បុរាណ​ប៉ុណ្ណោះ ដូចជា អង្គ្រុត ឈ្នាង សំណាញ់ និង​ត្រក ខណៈ​ឧបករណ៍​ឆក់ ឬ​មធ្យោបាយ​ទំនើប​ផ្សេងៗ​ ដែល​អាច​បំផ្លាញ​ប្រព័ន្ធ​អេកូឡូស៊ី ត្រូវបាន​ហាមឃាត់​យ៉ាង​តឹងរ៉ឹង​។

ទិដ្ឋភាព​នា​ព្រឹកមិញ​នេះ មិន​ត្រឹមតែ​ជាការ​ចុះ​ចាប់​ត្រី​ប៉ុណ្ណោះ​ទេ ប៉ុន្តែ​ថែមទាំង​ជា​ពេលវេលា ​នៃ​ការ​ជួបជុំ​គ្រួសារ និង​ការរួម​សប្បាយ​របស់​សហគមន៍​។ ជាពិសេស កូនចៅ​ដែល​ធ្វើការ​នៅ​ឆ្ងាយ ក៏​តែង​ឆ្លៀត​ត្រឡប់​មកលេង​ស្រុកកំណើត ដើម្បី​ចូលរួម​ក្នុង​ព្រឹត្តិការណ៍​នេះ​ផងដែរ​។

គួរ​ឱ្យ​កត់សម្គាល់ថា ក្នុង​ឆ្នាំ​ ២០២៦​ នេះ មាន​វត្តមាន ភ្ញៀវទេសចរ​អន្តរជាតិ មក​ទស្សនា និង​ថតរូប​ភាព​កាន់តែ​ច្រើនឡើង ដែល​បង្ហាញថា ពិធី​ចាប់​ត្រី​បឹង​បង្កោង បាន​ក្លាយជា​ផលិតផល​ទេសចរណ៍​បែប​វប្បធម៌​ដ៏​សំខាន់​មួយ​របស់​ខេត្តសៀមរាប បន្ថែម​ពីលើ​ប្រាសាទបុរាណ​។

ការរក្សាបាន​នូវ​ប្រពៃណី​ចាប់​ត្រី​នេះ មិន​ត្រឹមតែ​ជា​សក្ខីភាព​ នៃ​ការអភិរក្ស​អត្តសញ្ញាណ​មូលដ្ឋាន​ប៉ុណ្ណោះ​ទេ ប៉ុន្តែ​ថែមទាំង​ជាការ​លើកទឹកចិត្ត​ឱ្យ​យុវជន​ជំនាន់​ក្រោយ ស្គាល់​តម្លៃ និង​ចេះ​ថែរក្សា​ធនធានធម្មជាតិ​ដែលមាន​នៅក្នុង​សហគមន៍​ផងដែរ​៕​

The post រក្សាប្រពៃណីបុរាណ ៖ ចាប់ត្រីបឹងបង្កោង ទាក់ទាញទេសចរអន្តរជាតិ appeared first on Kampuchea Thmey Daily.

ពិធីចាប់ត្រីនោះធ្វើឡើងនៅថ្ងៃទី៩ ខែកុម្ភៈ ឆ្នាំ២០២៥ ដោយមានប្រជាពលរដ្ឋចាស់ ក្មេង ប្រុស ស្រីជាច្រើនរយនាក់ ក្នុងដៃមានកាន់សំណាញ់ អង្រុត ឈ្នាង និងទ្រុង បានមកជួបជុំគ្នាដោយគណៈកម្មការបានកំណត់ការជួបជុំគ្នា និងចុះចាប់ត្រីនៅម៉ោង៧ព្រឹក ដែលមានបាញ់កាំជ្រួចធ្វើជាសញ្ញាឱ្យចាប់ត្រីរួមគ្នានៅក្នុងបឹងសហគមន៍ ស្ថិតនៅភូមិបង្កោង ឃុំអំពិល ស្រុកប្រាសាទបាគង ដោយមានអ្នកចូលរួមមកពីគ្រប់ទិសទីយ៉ាងច្រើនកុះករ។

លោក សូរ ប្លាតុង អភិបាលស្រុកប្រាសាទបាគង បានឱ្យដឹងថា ពិធីចាប់ត្រីរួមគ្នានៅក្នុងបឹងសហគមន៍ ដែលត្រូវបានអភិរក្ស ថែរក្សាដោយគណៈកម្មាការក្នុងភូមិ សម្រាប់យកធ្វើម្ហូបអាហារ ឬធ្វើទឹកសម្លរនំបញ្ចុកនៅក្នុងពិធីឡើងមាឃនោះ ប្រជាពលរដ្ឋរស់នៅភូមិបង្កោង បានប្រកាន់ភ្ជាប់យ៉ាងខ្ជាប់ខ្ជួន តាំងពីបុរាណមកមិនដែលខកខានឡើយ។

លោកថា ពិធីចាប់ត្រីរួមគ្នានៅឆ្នាំ២០២៥នេះ មិនខុសប្លែកពីរាល់ៗឆ្នាំប៉ុន្មានឡើយ ដោយទឹកនៅក្នុងបឹងសហគមន៍សម្រាប់ឆ្នាំនេះហាក់សំបូរត្រីច្រើនជាងឆ្នាំមុន ព្រោះកាលពីរដូវវស្សាកន្លងមក អាជ្ញាធរបានលែងត្រីជាច្រើនប្រភេទប្រមាណ១ម៉ឺនក្បាលនៅក្នុងបឹង ដែលធ្វើឱ្យអ្នកចូលរួមចាប់ត្រីពីក្នុងបឹងសហគមន៍នេះ មានភាពសប្បាយរីករាយ។
លោកបន្តថា ឆ្នាំនេះមានភាពកុះករជាងឆ្នាំមុនៗ ដោយបើកឱ្យចាប់ត្រីជាសាធាណៈ ដោយមិនគិតថា ប្រជាពលរដ្ឋនៅក្នុងសហគមន៍ ឬមកពីទីជិតឆ្ងាយនោះទេ គឺពួកគាត់អាចរកត្រីបានដូចគ្នា ដោយប្រើប្រាស់តែឧបករណ៍បុរាណទាំងអស់ រួមមានដូចជា ឈ្នាង អង្រុត និងសំណាញ់ជាដើម។ លោកបន្ថែមថា សម្រាប់ទិន្នផលត្រីឆ្នាំនេះ មានប្រហាក់ប្រហែលឆ្នាំមុន ប៉ុន្តែអ្នកចូលរួមមានចំនួនច្រើនជាងឆ្នាំមុនៗ។ លោកបន្ថែមថា ប្រជាពលរដ្ឋនឹងបន្ដថែរក្សាប្រពៃណីដូនតាចាប់ត្រីនេះជារៀងរហូត ដើម្បីទាក់ទាញអ្នកទេសចរទៅកម្សាន្ដ ដោយពួកគាត់ នឹងអភិរក្សត្រីក្នុងបឹងសហគមន៍មួយនេះនៅឆ្នាំក្រោយៗទៀត។

លោក ទា គឹមសុទ្ធ ប្រធានមន្ទីរកសិកម្មរុក្ខាប្រម៉ាញ់ និងនេសាទ ខេត្តសៀមរាប បានឲ្យដឹងថា បឹងសហគម៍មួយនេះ ត្រូវបានលែងកូនត្រីប្រមាណមួយម៉ឺនក្បាលកាលពីរដូវវស្សាកន្លងមក ហើយបានអភិរក្សបានយ៉ាងល្អ ដែលធ្វើឱ្យក្នុងបឹងរក្សាបានកំណើនត្រីច្រើនគួរឱ្យកត់សំគាល់។ លោកបន្ថែមថា ពិធីចាប់ត្រីសហគមន៍ឆ្នាំនេះ មានមនុស្សចូលរួមច្រើន ដោយសារអាជ្ញាធរបានប្រកាសចាប់ត្រីប្រពៃណីនេះជាសាធារណៈដោយមិនប្រកាន់អ្នកមកពីទីជិតឆ្ងាយឡើយ។

លោកបានបន្តថា ពិធីនេះមានសារៈសំខាន់ណាស់ ទី១ រក្សាបានវប្បធម៌ ប្រពៃណី ទំនៀមទម្លាប់ របស់ដូនតាយើង ទី២ទាក់ទាញភ្ញៀវទេសចរជាតិ និងអន្តរជាតិឱ្យពួកគាត់មកឃើញអំពីទំនៀមទម្លាប់ និងអ្វីដែលយើងបានអភិរក្សនេះ ព្រោះស្រុកប្រាសាទបាគង ជាស្រុកមរតកវប្បធម៌ និងទី៣នៅពេលគេស្គាល់កន្លែងយើងច្រើន ប្រជាសហគមន៍ និងទទួលបានចំណូល ហើយក៏មានការអភិវឌ្ឍនៅមូលដ្ឋានយើងជាបន្តបន្ទាប់ផងដែរ។

លោកបានបន្តថា កាលពីមុនពិធីចាប់ត្រីនេះ អ្នកមកចូលរួមគឺមានតែអ្នកភូមិបង្កោងប៉ុណ្ណោះ ប៉ុន្តែឥឡូវដោយមានការផ្សព្វផ្សាយបានទូលំទូលាយ ធ្វើឱ្យមានការចូលរួមច្រើនមកពីគ្រប់ទិសទី មានទាំងភ្ញៀវទេសចរបរទេសផងដែរ។ ដូចនេះអាជ្ញាធរមានគម្រោងបន្តលេងកូនត្រីនៅក្នុងបឹងនេះបន្ថែម ហើយដល់ខែទឹកឡើងដាក់ព្រួលការពារកុំឱ្យត្រី នៅក្នុងបឹងនេះចេញទៅខាងក្រៅ ជាពិសេសនោះ គឺអាជ្ញាធរមានគម្រោងរៀបចំធ្វើយ៉ាងម៉េចឱ្យប្រជាពលរដ្ឋនៅក្នុងមូលដ្ឋាននេះទទួលបានចំណូលដោយផ្ទាល់ផងដែរ៕

អត្ថបទ៖ ជុន កុសល

The post អ្នកស្រុកតំបន់អង្គរ បន្ដធ្វើពិធីចាប់ត្រីរួមគ្នា​តាមទំនៀមទម្លាប់ពីដូនតា សម្រាប់ប្រារព្ធពិធីឡើង​មាឃ appeared first on Kampuchea Thmey Daily.

ជាពិធីចាប់ត្រី ដើម្បីរម្លឹកថែរក្សាអភិរក្សកេរ្តិ៍តំណែលពីបុរាណតរៀងមក ដោយប្រើឧបករណ៍ អង្រុត ឈ្នាង ដើម្បីចាប់ត្រី​មកធ្វើជាម្ហូបជាលក្ខណៈគ្រួសារយ៉ាងសប្បាយរីករាយ។ ដោយមានការចូលរួមពីសំណាក់ លោក ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំក្នុងពិធីចាប់ត្រីតាមបែបប្រពៃណីបុរាណ នៅបឹងក្រម ឬបឹងត្រពាំងក្រម ស្ថិតនៅភូមិសាទុំ ឃុំជាំក្រវៀន ស្រុកមេមត់។

ជាង២០០ឆ្នាំមកហើយ ដែលបងប្អូនប្រជាពលរដ្ឋនៅភូមិសាទុំ តែងតែរៀបចំពិធីចាប់ត្រីនៅបឹងក្រមនេះជារៀងរាល់ឆ្នាំនៅក្នុងខែកុម្ភៈនេះ បន្ទាប់ពីបងប្អូនប្រជាកសិករយើងបានប្រមូលផលកសិកម្មរួចរាល់អស់ហើយនោះ បើតាមលោកយាយ លោកតាដំណាលប្រាប់។

លោកបណ្ឌិត ជាម ច័ន្ទសោភ័ណ បានមានប្រសាសន៍ឲ្យដឹងថា ពិធីចាប់ត្រីនេះ ត្រូវបានអាក់ខានក្នុងរបបប៉ុលពត ប៉ុន្តែចាប់ពីថ្ងៃជ័យជំនះ ៧ មករា ១៩៧៩ មកបានរៀបចំធ្វើពិធីនេះឡើងវិញ មានអ្នកចូលរួមយ៉ាងច្រើនកុះករ។

លោកអភិបាលខេត្ត បញ្ជាក់ថា សម្រាប់ឆ្នាំនេះ មានប្រមាណ៤មុឺននាក់ដែលមកពីទីជិតឆ្ងាយ មកពីខេត្តត្បូងឃ្មុំ ខេត្តកំពង់ចាម ខេត្តព្រៃវែង ខេត្តស្វាយរៀង រាជធានីភ្នំពេញ និងខេត្តនានាផងដែរ។ ក្នុងស្មារតីភាតរភាពសាមគ្គីភាព ស្រលាញ់រាក់ទាក់គ្នា ប្រកបដោយ សីលធម៌ សុជីវធម៌ យ៉ាងល្អផូរផង់។

លោក ជាម ច័ន្ទសោភ័ណ គូសបញ្ជាក់បន្ថែមថា ការជួបជុំយ៉ាងអធិកអធមទាំងនេះ គឺអាចប្រព្រឹត្តទៅបានដោយសារប្រទេសជាតិមានស្ថេរភាព និងការអភិវឌ្ឍន៍រីកចំរើនលើគ្រប់វិស័យ មានសុខសន្តិភាពពេញផ្ទៃប្រទេស ក្រោមម្លប់សន្តិភាពដែលសម្តេចមហាធិបតី ហ៊ុន ម៉ាណែត ដូច្នេះយើងទាំងអស់គ្នាត្រូវអរគុណសន្តិភាព។

ក្នុងកម្មវិធីនេះ មានការចុះចាប់ត្រី យកចំអិនហូបជុំគ្នា រាំលេងកំសាន្ត ពិសេសឯកឧត្តមបណ្ឌិត អភិបាលខេត្ត និងលោកជំទាវផងដែរ។

សូមជម្រាបថា ការប្រារព្ធពិធីចាប់ត្រី នៅបឹងត្រពាំងក្រមនេះ ធ្វើឡើងជារៀងរាល់ឆ្នាំនៅក្នុងខែកុម្ភៈនេះ គឺបងប្អូនបាន​មក​ជួបជុំគ្នា ដើរលែងកំសាន្ត ទស្សនាទេសភាពស្ថិតនៅជុំវិញតំបន់បឹងក្រម ដែលមានកេរ្តិ៍ដំណែលពីដូនតាយើងរួមមាន៖ ថ្មតាជ្រូក ដីពណ៌ឈាម ក្បាលតាជក តាព្រាម កន្លែងឡស្រា និងស្រះទឹកនាងលើមជាដើម៕

អត្ថបទ៖ សាន វិឡែម

The post ពលរដ្ឋប្រមាណ ៤ ម៉ឺនាក់ ចុះចាប់ត្រីតាមបែបបុរាណ នៅបឹងត្រពាំងក្រមក្នុងស្រុកមេមត់ appeared first on Kampuchea Thmey Daily.

ពិធីនេះធ្វើឡើងនៅក្នុងបឹងដ៏ធំក្នុងភូមិ និងជាបឹងបុរាណដែលអ្នកភូមិប្រើប្រាស់សម្រាប់ស្រោចស្រពផលកសិកម្ម និងមានការយាមកាមមិនឱ្យមានការនេសាទអ្វីទាំងអស់ គឺទុកសម្រាប់ពិធីចុះចាប់ត្រីរួមគ្នា។

បឹងដ៏ធំមួយនេះ ត្រូវបានអ្នកភូមិអភិរក្សត្រីទុកមិនឱ្យមានការនេសាទផ្តេសផ្តាសនោះឡើយ គឺសម្រាប់តែរកត្រីរួមគ្នាដើម្បី​យកមកធ្វើជាចង្ហាន់ប្រគេនព្រះសង្ឃក្នុងថ្ងៃឡើងមាឃ ឬឡើងអ្នកតា និងធ្វើម្ហូបសម្រាប់គ្រួសារ ព្រមទាំងទទួលភ្ញៀវ ដែលជាទំនៀមទម្លាប់ របស់អ្នកស្រុកតំបន់អង្គរ ប្រារព្ធធ្វើជារៀងរាល់ឆ្នាំ។

ការរកត្រីនេះ អនុញ្ញាតឱ្យប្រជាជនក្នុងភូមិបង្កោងតែប៉ុណ្ណោះ ដោយមិនអនុញ្ញាតឱ្យតែប្រជាជនភូមិក្រៅចុះចាប់នោះឡើយ និងប្រើប្រាស់តែឧបករណ៍បុរាណទាំងអស់ រួមមានដូចជា ឈ្នាង អង្រុត និងសំណាញ់ជាដើម។

ចំពោះការចាប់ត្រីនេះ គណៈកម្មការបានកំណត់ជាពីរផ្នែក គឺផ្នែកទី០១ប្រជាជនទាំងអស់អាចរកត្រីទុកសម្រាប់ខ្លួនឯងផ្ទាល់ និងផ្នែកទី០២ នៃបឹងដែលដាក់សម្រាស់ការពារមិនឱ្យចាប់ពីដំបូងនោះ ត្រូវចាប់ទុករួមសម្រាប់ធ្វើទឹកនំបញ្ចុកប្រគេនព្រះសង្ឃ៕

អត្ថបទ៖ កុសល

The post អ្នកខេត្តសៀមរាប នាំគ្នាចាប់ត្រី តាមរបៀបបុរាណ ដើម្បីទុកប្រារព្ធបុណ្យភូមិ appeared first on Kampuchea Thmey Daily.