ពិព័រណ៍សៀវភៅនេះធ្វើឡើងក្នុងគោលបំណងលើកកម្ពស់ការយល់ដឹងនិងវប្បធម៌នៃការអាន លើកទឹកចិត្តការតែងនិពន្ធប្រកបដោយគុណភាព ផ្សព្វផ្សាយស្នាដៃនិពន្ធថ្មី ក៏ដូចជាចែករំលែកចំណេះដឹង និងបទពិសោធន៍ក្នុងការរៀបចំព្រឹត្តិការណ៍ដូចជា សួនអំណានសម្រាប់មនុស្សធំនិងកុមារ, និងការតាំងបង្ហាញស្នាដៃសិល្បៈទាក់ទងនឹងសៀវភៅជាដើម។

ក្នុងនោះមានសកម្មភាពមួយចំនួនត្រូវបានរៀបចំឡើង រួមមានការចែកជូនសៀវភៅឥតគិតថ្លៃ, ការប្រឹក្សាយោបល់អំពីការអាននិងការតែងនិពន្ធ, ការទទួលការបរិច្ចាគសៀវភៅ, និងអនុញ្ញាតឱ្យមានការដាក់តាំងលក់សៀវភៅពីគ្រឹះស្ថានបោះពុម្ភនានាផងដែរ។

ស្ថាបនិក និងប្រធានប្រតិបត្តិសមាគមបណ្ណាល័យគំនិត ព្រះតេជគុណសីលរក្ខិតោ រឹម ឈាវ លើកទឹកចិត្តមនុស្សគ្រប់រូប គ្រប់សណ្ឋាន ជាពិសេសសិស្ស និស្សិត និងយុវជន ត្រូវតែចាប់យកការអានជាសំខាន់បំផុត។

ព្រះតេជគុណ រឹម ឈាវ៖ «ការអានសៀវភៅ មិនអានឱ្យយើងក្លាយជាអ្នកមាន ប៉ុន្តែគ្មានអ្នកមានណាម្នាក់ដែលមិនអានសៀវភៅនោះទេ។ [..] ចង់ក្លាយជាមនុស្សពូកែគិត ត្រូវតែពូកែអាន, យ៉ាងណាមិញចង់ធ្វើជាមនុស្សពូកែនិយាយត្រូវតែពូកែអានជាដាច់ខាត»។

បណ្ណាល័យគំនិត បង្កើតឡើងនៅឆ្នាំ២០១៨ ជាសមាគមដែលមិនស្វែងរកប្រាក់ចំណេញ មានបេសកកម្មសិក្សាស្រាវជ្រាវនិងបណ្ដុះបណ្ដាល អភិវឌ្ឍបណ្ណាល័យនិងលើកកម្ពស់ការអាននៅកម្ពុជា, និងកិច្ចគាំពារសង្គម៕

អត្ថបទដោយ ហ៊ុន សិរីវឌ្ឍន៍

The post សមាគមបណ្ណាល័យគំនិតរៀបចំពិព័រណ៌សៀវភៅលើកទី១ នៅរាជធានីភ្នំពេញចុងសប្ដាហ៍នេះ appeared first on Kampuchea Thmey Daily.

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍ នៅព្រឹក ថ្ងៃទី១២ មីនា នេះ ថា ចំនួនស្តង់ និងអ្នកចូលរួមក្នុងពិព័រណ៍សៀវភៅរយៈពេលប៉ុន្មានឆ្នាំចុងក្រោយមានការកើនឡើងជាបន្តបន្ទាប់ពិសេសពិព័រណ៍ក្នុងទិវាជាតិអំណាន ថ្ងៃទី១១មីនាឆ្នាំ២០២៤ ឃើញមានចំនួនអ្នកចូលរួមកកកុញច្រើនជាងឆ្នាំមុនៗ ដោយសារតែការតាំងពិព័រណ៍ផ្សេងៗ ដែលក្រសួងអប់រំសហការជាមួយស្ថាប័នពាក់ព័ន្ធកន្លងមករៀបចំនៅបណ្ណាល័យជាតិរាល់ឆ្នាំត្រូវបានលើកទៅធ្វើនៅវិទ្យាស្ថានបច្ចេកវិទ្យាកម្ពុជាដែរ។

លោកស្រី បានបន្តថា ករណីនេះបង្ហាញថាចំនួនអ្នកចូលរួមអានមានច្រើនជាងមុនហើយសៀវភៅបោះពុម្ពផ្សាយក៏មានគុណភាពនិងប្រសើរជាងមុនដែរហើយចំណងជើង ឬប្រធានបទមានផ្សេងៗគ្នាច្រើនសម្រាប់ជាជំរើសអ្នកអានក៏ច្រើនជាងមុន។

លោកស្រី ឃួន វិច្ឆិកា បានបន្តទៀតថា ដើម្បីលើកម្ពស់ការអានបន្ថែមក្រសួងអប់រំ បានយកចិត្តទុកដាក់លើវិធីសាស្ត្របង្រៀនដោយផ្តោតទៅលើសិស្សមជ្ឈមណ្ឌលដោយឱ្យសិស្សធ្វើការស្រាវជ្រាវឱ្យបានច្រើនជាងមុនដោយនៅតាមសាលារៀនមានបង្កើតបណ្ណាល័យស្តង់ដាមានការគាំទ្រពីដៃគូពាក់ព័ន្ធក្នុងការរៀបចំបណ្ណាល័យមានលក្ខណៈស្តង់ដា និងមានសៀវភៅឆ្លើយតបទៅនឹងការរៀន និងបង្រៀន និងពង្រឹងគុណភាពគ្រូដោយកែលម្អបណ្ណាល័យតាមសាលាគរុគោសល្យនានា ដោយដាក់សៀវភៅការរៀននិងបង្រៀនជាភាសាខ្មែរ និងភាសាបារាំងហើយឆាប់ខាងមុខនេះបណ្ណាល័យសម្តេចព្រះសង្ឃរាជ ជួន ណាតមានខ្នាតធំ កំពុងសាងសង់ស្ថិតនៅវិទ្យាស្ថានជាតិអប់រំ ហើយគ្រោងនឹងសាងសង់រួចរាល់នៅឆ្នាំ២០២៥ខាងមុខនេះ សម្រាប់សាធារណជនទូទៅសិក្សាស្រាវជ្រាវ និងអាន ផងដែរ៕

អត្ថបទ ៖ សំអឿន

The post អ្នកនាំពាក្យក្រសួងអប់រំ ៖ រយៈពេល ៣ថ្ងៃ អ្នកចូលរួមអានក្នុងពិព័រណ៍សៀវភៅ មានការកើនឡើងជាងមុន appeared first on Kampuchea Thmey Daily.

តាមឱ្យដឹង ពិព័រណ៍សៀវភៅកម្ពុជា គ្រោងរៀបចំធ្វើឡើង ចាប់ពីថ្ងៃទី០៩ ដល់ថ្ងៃទី ១១ ខែមីនា ឆ្នាំ២០២៤ នៅវិទ្យាស្ថានបច្ចេកវិទ្យា ពីម៉ោង ៨:០០ព្រឹក – ៧:០០ យប់ បើកឱ្យចូលរួមដោយសេរី។ ក្នុងនោះ ក៏មានការរៀបចំប្រកួតប្រជែងផ្នែកអំណាន តែងនិពន្ធ សូត្រកំណាព្យ និងស្មូត្រនេះ ដោយបើកឱកាសឱ្យបេក្ខជនមកពីទូទាំងប្រទេស អាចចូលរួមបង្ហាញសមត្ថភាពរបស់ខ្លួនផងដែរ។

គួរបញ្ជាក់ថា ពិព័រណ៍​សៀវភៅនេះ សហការរៀបចំ​ដោយ​ក្រសួង​អប់រំ យុវជន និងកីឡា ក្រសួង​វប្បធម៌ និងវិចិត្រសិល្បៈ ក្រសួង​ព័ត៌មាន និងសហការរៀបចំ​ដោយដៃគូ​ឧបត្ថម្ភ​ជាច្រើន ក្នុងគោលបំណង​បណ្ដុះ​ទម្លាប់​អាន ជំរុញ​វប្បធម៌​អាន លើកកម្ពស់​សមត្ថភាព​អាន ស្មូត្រ​កំណាព្យ និងការតែង​និពន្ធ សំដៅរួម​ចំណែក​ការពារ និងពង្រឹង​វប្បធម៌ អរិយធម៌ខ្មែរ ដល់​សិស្ស និស្សិត មន្ត្រី​រាជការ និងសាធារណជន ព្រមទាំង​លើកកម្ពស់ រក្សា​គុណតម្លៃ​កេរដំណែល​របស់​មនុស្ស​ជាតិ៕

The post ពិព័រណ៍សៀវភៅចុងសប្តាហ៍នេះ មានការប្រកួតប្រជែងផ្នែកអំណាន តែងនិពន្ធ សូត្រកំណាព្យ និងស្មូត្រ appeared first on Kampuchea Thmey Daily.

យុវតី រ៉ើន ដារីតា​ និស្សិតឆ្នាំទី ១ មកពីខេត្តតាកែវ បានប្រាប់់ឱ្យកម្ពុជាថ្មីដឹងថា កញ្ញា មកចូលរួមកម្មវិធីពិព័រណ៍សៀវភៅនេះ គឺជាលើកទី ១ ហើយអ្វីដែលកញ្ញាចា​ប់អារម្មណ៍ក្នុងថ្ងៃពិព័រណ៍សៀវភៅនេះ គឺបានមើលឃើញថា គ្រប់ស្ដង់ ឬតុបលក់សៀវភៅ ភាគច្រើនសម្បូរទៅដោយសៀវភៅប្រលោមលោក និងសៀវភៅបែបលើកទឹកចិត្តមនុស្សឱ្យស្រឡាញ់ជីវិត ចេះតស៊ូក្នុងឆាកជីវិតរស់នៅ ជាដើម។

ដារីតា បានបន្ថែមថា សម្រាប់រូបកញ្ញាផ្ទាល់ ចូលចិត្តទិញសៀវភៅបែបប្រលោមលោក ដើម្បីយកទៅអានបន្ទាប់ពីទំនេរពីការសិក្សារៀនសូត្រ ពីព្រោះកញ្ញាគិតថា​ សៀវភៅប្រភេទនេះ ពេលអានចប់ទៅបានជួយឱ្យកញ្ញាមានផ្នត់គំនិត គិតតែរឿងបែបវិជ្ជមាន ចេះស្រឡាញ់គ្រួសារ និងបងប្អូន រស់នៅប្រកបដោយសេចក្ដីសុខផ្លូវចិត្ត។ ក្រៅពីនេះ ដារីតា ក៏បានបង្ហើបឱ្យដឹងថា នៅថ្ងៃអនាគតខាងមុខ កញ្ញាក៏មានក្ដីស្រមៃមួយនឹង ចង់ក្លាយទៅអ្នកនិពន្ធប្រលោមលោកមួយរូបដែរ ប្រសិនបើមានឱកាស និងពេលវេលាសមរម្យមួយ កញ្ញានឹងចាប់យកការសរសេរប្រលោមលោក ដូចរៀមច្បងអ្នកនិពន្ធមុនៗ ផងដែរ។

ចំណែក កញ្ញា ផែន ចន្នា និស្សិតឆ្នាំទី ៣ នៃវិទ្យាស្ថានបច្ចេកវិទ្យាកម្ពុជា ក៏បានឱ្យកម្ពុជាថ្មី ដឹងដែរថា កញ្ញា មកចូលរួមកម្មវិធី ពិព័រណ៍សៀវភៅនៅឆ្នាំនេះ កញ្ញាចាប់អារម្មណ៍ចំពោះសៀវភៅបែបប្រលោមលោក បែបទស្សនវិជ្ជា ពីព្រោះសៀវភៅប្រភេទនេះ ជួយឱ្យកញ្ញា បានយល់ដឹងពីទស្សនវិជ្ជា ដែលទាក់ទងនឹងព្រឹត្តិការណ៍សង្គម និងមួយផ្នែកទៀត ជួយឱ្យកញ្ញា អាចមានគំនិតគិតបែបទស្សនវិជ្ជា ចំពោះការត្រិះរិះពិចារណា ចំពោះរឿងរ៉ាវជួបប្រទះ ក្នុងជីវីតរស់នៅប្រចាំថ្ងៃ។ សម្រាប់ ចន្នា ជាទូទៅកញ្ញាបានអានសៀវភៅ ក្នុងមួយខែចាប់ពី ២ក្បាល ទៅ៣ក្បាល នៅពេលដែលឆ្លៀតពេលពីការរៀនសូត្រនៅសាលាផ្ទាល់ និងការងារ តែប៉ុណ្ណោះ។

ដោយឡែក យុវជន យ៉េន ម៉ាលីន អតីតនិស្សិតបរិញ្ញាបរិញ្ញាបត្រ ជំនាញទំនាក់ទំនងអន្តរជាតិ នៃសាកលវិទ្យាល័យកម្ពុជា ក៏បានឱ្យប្រាប់កម្ពុជាថ្មីខុសពី យុវតី ២នាក់ខាងលើ ពីព្រោះលោកមានចំណង់ចំណូលចិត្តអានសៀវភៅ ទាក់ទងនឹង នយោបាយ សេដ្ឋកិច្ច ប្រវត្តិសាស្រ្ដ និងទំនាក់ទំនងអន្ដរជាតិ ដោយលោកអះអាងថា​ សៀវភៅទាំងនេះវាអាចជួយដល់ការសិក្សា និងការងាររបស់លោក ផងដែរ។

ចំណែក អ្វីដែលមើលឃើញថា យុវជនខ្លះក៏និយមជ្រើសរើសការអានសៀវភៅ បែបប្រលោមលោក មនោសញ្ចេតនា និងស្នេហា គឺវាស្ថិតទៅលើចំណង់ចំណូលចិត្ត របស់យុវជន ឬសិស្ស-និស្សិត ដែលនិយមចូលចិត្តប្រលោមលោក តែប៉ុណ្ណោះ៕

អត្ថបទ ៖ សួស​ សិត

The post យុវតីមួយចំនួន និយាយថា ពួកគេចូលចិត្តអានសៀវភៅបែបប្រលោមលោក appeared first on Kampuchea Thmey Daily.

លោក ហង់​ជួន ណារ៉ុន ឧបនាយករដ្ឋមន្រ្ដី រដ្ឋមន្រ្តីក្រសួងអប់រំ យុវជន និងកីឡា បានមានប្រសាសន៍ថា ការអាន និងការសរសេរ គឺជាវប្បធម៌មួយសម្រាប់បណ្ដុះគំនិតស្មារតី មនុស្សខ្មែរ ពិសេសគឺយុវជន ឱ្យមានចំណេះដឹង និងជំនាញផ្សេងៗ សម្រាប់ចូលរួមកសាងសង្គមជាតិរបស់យើង។ លោករដ្ឋមន្រ្ដី បន្ថែមថា តាមរយៈកម្មវិធីពិព័រណ៍សៀវភៅ នៅឆ្នាំនេះ នឹងក្លាយទៅជាជង្រុកវប្បធម៌មួយ ដែលនឹងជួយកសាងសមត្ថភាពមនុស្សក្នុងយុគសម័យបច្ចេកវិទ្យាឌីជីថល ឬសម័យឧស្សាហកម្ម ៤.០ នាពេលបច្ចុប្បន្ននេះ។ ទាក់ទងនឹងការអាននេះដែរ លោករដ្ឋមន្ត្រី ក៏បានបញ្ជាក់ដែរថា ការអានគឺជាមូលដ្ឋាន ដើម្បីចាប់យកភាសា ពិសេសគឺភាសាជាតិរបស់ខ្លួន មុននឹងឈានទៅចាប់រៀនភាសាដទៃទៀត​ យុវជនត្រូវយល់ច្បាស់ពីភាសាជាតិរបស់ខ្លួនជាមុនសិន ទើបអាចចាប់យកភាសាផ្សេងទៀត បានប្រកបដោយប្រសិទ្ធិភាពខ្ពស់។

លោករដ្ឋមន្រ្តី បានក៏បានលើកឡើងបន្តថា ប្រទេសកម្ពុជាមានសក្ដានុពលខ្លាំងខាងការតែងនិពន្ធ និងសរសេរ តាំងពីសម័យមុនអង្គរមកម្ល៉េះ តាមរយៈភស្ដុតាងជាប្រភេទអត្ថបទសិលាចារឹក ប្រមាណជាង​ ២០០ផ្ទាំង ដែលមិនមានប្រទេសណាមួយដែលមានសិលាចារឹកច្រើនដូចប្រទេសកម្ពុជា នោះឡើយ។ ជាក់ស្ដែង ក្នុងប្រវត្តិសាស្រ្តកម្ពុជា សិលាចារឹកព្រះបាទជ័យវរ្ម័នទី៧ ដែលនិពន្ធដោយ ព្រះនាងឥន្ទ្រទេវី បានបង្ហាញឱ្យយើងដឹងថា ខ្មែរជាប្រទេសមួយដែលបានបណ្ដុះបណ្ដាលអ្នកប្រាជ្ញ បណ្ឌិត តាមរយៈភស្ដុតាង ដែលមានចារជាភាសាសំស្រ្កឹតកម្រិតខ្ពស់ ដែលអាចចាត់ទុកថាខ្មែរយើង ជាប្រទេសដែលមូលដ្ឋានវប្បធម៌ ការសរសេរ និងការតែងនិពន្ធ តាំងពីសម័យបុរាណមកម្ល៉េះ។

ជាមួយគ្នានេះដែរ លោករដ្ឋមន្រ្តី បានសង្ឃឹមយ៉ាងមុតមាំថា ការតាំងពិព័រណ៍សៀវភៅលើកទី១០ នៅឆ្នាំនេះ នឹងក្លាយទៅជាព្រឹត្តិការណ៍ប្រវត្តិសាស្ដ្រដ៏ធំអស្ចារ្យមួយ សម្រាប់មនុស្សជាតិទូទៅ ពិសេសគឺប្រទេសកម្ពុជា ដែលនាំមកនូវសារៈសំខាន់មិនអាចកាត់ថ្លៃបាន  និងទុកជាការចងចាំមួយ សម្រាប់បន្តទៅដល់យុវជនជំនាន់ក្រោយៗទៀត៕

អត្ថបទ ៖ សួស សិត

The post រដ្ឋមន្រ្តីក្រសួងអប់រំ ៖ ការអានសៀវភៅជាប្រភព នៃចំណេះដឹង ប្រែក្លាយយុវជនជាមនុស្សមូលធននិយម appeared first on Kampuchea Thmey Daily.

“កំណាព្យទំនើប ជាការរៀបរាប់អំពី សម្រស់សោកនាដកម្មនៃបាតុភូតរូបវិទ្យាដែលបន្ថែមនូវមនោសញ្ចេតនា និងអារម្មណ៍ ដោយទុកជូនអ្នកអានធ្វើការបកស្រាយដោយខ្លួនឯង”។ នេះជាការផ្តល់អត្ថន័យនៃពាក្យថាកំណាព្យទំនើប ដោយលោក ឡុច ចន្ថា។

លោកបានបន្ថែមថា “ កំណាព្យទំនើបកើតពីប្រពៃណីយ៍ តែមិនមែនជាការសរសេរបែបបុរាណ។ បង្ហាញ តែមិនប្រាប់(to show but not tell) ពោលគឺ សរសេរត្រឹមបង្ហាញពីគោលបញ្ហា បង្ហាញព្រឹត្តិការណ៍ និងប្រើរូបភាព ដើម្បីបញ្ចេញទស្សនៈ ដែលជៀសវាងការប្រៀនប្រដៅត្រង់ៗ ដោយអញ្ជើញអ្នកអានឱ្យចូលរួមដោយមិនចំពោះ ក្នុងការវិភាគ ឬបញ្ចេញទស្សនៈ ទៅតាមបទពិសោធន៍ និងចំណេះជំនាញផ្ទាល់ខ្លួន ”។

លោកបញ្ជាក់ថាសៀវភៅដែលមាន ចំណងជើងថា ចន្លោះ នេះ នឹងផ្តល់ជូនអ្នកអាននូវ ឱរសនៃបណ្តូលវប្បធម៌ តថភាពសង្គម ច្បាប់សកល សិល្ប៍នយោបាយ ជម្រៅទស្សនវិជ្ជា ធម្មជាតិវិជ្ជា វិទ្យាសាស្ត្រព្រលឹងវិញ្ញាណ និងពាក់ព័ន្ធទ្រឹស្តីសាសនានានា…។ល។ កំណាព្យនេះត្បិតអាចអានបានគ្រប់វ័យ គ្រប់និន្នាការទស្សនៈដោយសេចក្តីសោមនស្ស តែសាកសមបំផុតសម្រាប់អ្នកស្នេហាកិច្ចនយោបាយ ទស្សនវិជ្ជា អ្នកវិទ្យាសាស្ត្រព្រលឹងវិញ្ញាណ ធម្មជាតិវិជ្ជា សាសនិកជន និងអ្នកស្នេហាអក្សរសាស្ត្រ។ល។ 

គួរបញ្ជាក់ផងដែរថា សៀវភៅកំណាព្យទំនើបដែលស្នាដៃដំបូងនេះ មានផ្សាយចេញជាបីភាសា ខ្មែរ អង់គ្លេស និងចិន៕

The post កវី ឡុច ចន្ថា ប្រើពេល១២ឆ្នាំ ដើម្បីសរសេរសៀវភៅអក្សរសិល្ប៍ទំនើប និងបោះពុម្ពជាបីភាសា appeared first on Kampuchea Thmey Daily.

ពិព័រណ៍សៀវភៅនេះមានការអញ្ជើញចូលរួមជាអធិបតីរបស់លោក ខៀវ កញ្ញារីទ្ធ រដ្ឋមន្ត្រីក្រសួងព័ត៌មាន លោកស្រី ទន់ សាអ៊ីម អនុរដ្ឋលេខាធិការក្រសួងអប់រំ លោក Andrew Yap សហស្ថាបនិក Big Bad Wolf Books លោកឧកញ៉ា អ៊ុក ចន្ថា និងលោកស្រីអគ្គនាយិកាផ្សារទំនើបអូឡាំព្យា។

រយៈពេលមួយទសវត្ស៍កន្លងមកនេះ​ Big Bad Wolf Books បានរៀបចំពិព័រណ៍សៀវភៅដ៏ធំបែបនេះជាលើកច្រើនរួចមកហើយនៅប្រទេសចំនួន១៥ ក្នុងនោះមាន ៣៧ទីក្រុង ដែល Big Bad Wolf Books បានទៅដល់ និងរៀបចំពិធីនេះឡើង។

ដោយឡែក នៅកម្ពុជា អ្នកចូលចិត្ដអានសៀវភៅនៅរាជធានីភ្នំពេញ អាចនឹងទទួលបានសៀវភៅដែលមានតម្លៃសមរម្យ ចាប់ពី១ដុល្លារឡើងទៅក្នុងមួយក្បាលសម្រាប់ក្នុងពិព័រណ៍សៀវភៅ Big Bad Wolf Book Sale Cambodia ២០២៣នេះ។

ពិព័រណ៍សៀវភៅនេះនឹងបើកឲ្យសាធារណៈជនចូលរួមដោយសេរីចាប់ពីថ្ងៃទី ២២ ខែកុម្ភៈ ឆ្នាំ២០២៣ នេះតទៅ ហើយកម្មវិធីនេះនឹងបន្តរយៈពេលកាន់តែយូរជាងមុនទៅទៀត គឺរហូតដល់ថ្ងៃទី១២ ខែមីនា ឆ្នាំ ២០២៣ ឯណោះ។ កម្មវិធីនឹងបន្តជារៀងរាល់ថ្ងៃចាប់ពីម៉ោង ៩ព្រឹក រហូតដល់ម៉ោង ១២យប់។

ជាមួយនឹងការដាក់តាំងលក់សៀវភៅនេះ Big Bad Wolf មានបំណងចង់កសាងវប្បធម៌នៃការអាននៅកម្ពុជាដោយនាំមកសៀវភៅភាសាអង់គ្លេសដែលមានតម្លៃសមរម្យសម្រាប់មនុស្សគ្រប់រូប និងមានសៀវភៅជាច្រើនប្រភេទដែលយក មកដាក់តាំង ដូចជា៖ សៀវភៅសម្រាប់កុមារ, រឿងប្រឌិត, រឿងពិត, ដែលអនុញ្ញាតឲ្យមនុស្សស្ថិតនៅក្នុងជំនាន់ផ្សេងៗគ្នាអាចស្វែងរកសៀវភៅ។

ក្នុងនោះ ក៏មានសៀវភៅល្បីៗ, ប្រលោមលោក, រឿងប្រឌិតបែបវិទ្យាសាស្ត្រ, មនោសញ្ចេតនា, សៀវភៅអភិវឌ្ឍន៍ខ្លួន, អក្សរសាស្ត្រ, ប្រលោមលោកក្រាហ្វិក, អាជីវកម្ម, ស្ថាបត្យកម្ម និងរចនា។ ទន្ទឹមនេះ សៀវភៅធ្វើម្ហូប និងសៀវភៅជាច្រើនប្រភេទទៀត ក៏មាននៅក្នុងកម្មវិធីពិព័រណ៍សៀវភៅដ៏ធំនេះដែរ។ មិនត្រឹមប៉ុណ្ណោះ សម្រាប់មិត្តអ្នកអានដែលមានអាយដលជាអ្នកនិពន្ធក្នុងចិត្ត កុំភ្លេចនាំគ្នាមកគាំទ្រពួកគាត់ ពីព្រោះថាក្រៅពីសៀវភៅបរទេស ក៏មានសៀវភៅខ្មែរដែលនិពន្ធដោយអ្នកនិពន្ធក្នុងស្រុកជាច្រើនរាប់មិនអស់ផងដែរ។

ពិព័រណ៍ Big Bad Wolf Books នឹងផ្តល់ឱកាសដល់ប្រជាជនកម្ពុជា ដើម្បីទទួលបាននូវបទពិសោធក្នុងការទិញសៀវភៅជាភាសាអង់គ្លេសដែលមានគុណភាពល្អ និងថ្មីៗក្នុងតម្លៃមួយដ៏សមរម្យ។ ពិព័រណ៍នេះ មានសារៈសំខាន់ណាស់ក្នុងការរៀនភាសាថ្មីមួយ និងបង្រៀនឲ្យមនុស្សមានទម្លាប់អានតាំងពីក្មេង ទើបធ្វើឲ្យក្មេងៗជំនាន់ក្រោយនៅ ពេលធំដឹងក្តីពោរពេញដោយចំណេះដឹង។

និយាយជារួម Big Bad Wolf Book Sale គឺជាពិព័រណ៍សៀវភៅដ៏ធំបំផុតនៅក្នុងប្រទេសកម្ពុជា។ ជាមួយគ្នានេះ ពិព័រណ៍សៀវភៅ Big Bad Wolf Book Sale នឹងចូលរួមគាំទ្រចំពោះគំនិតផ្ដួចផ្ដើមនៃការបរិច្ចាគសៀវភៅចំនួន៣០០ក្បាលទៅកាន់បណ្ណាល័យកំពង់ត្របែក។

ថ្លែងនៅក្នុងពិធីបើកពិព័រណ៍នេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានចាត់ទុកការតាំងពិព័រណ៍សៀវភៅ Big Bad Wolf Books នៅកម្ពុជានាពេលនេះ មានសារសំខាន់ណាស់ក្នុងការចូលរួមចំណែកលើកកម្ពស់វប្បធម៌នៃការអាន និងផ្តល់ឱកាសដល់ប្រជាជនកម្ពុជា ដើម្បីទទួលបានបទពិសោធក្នុងការទិញសៀវភៅដែលមានគុណភាពល្អ និងមានតម្លៃមួយដ៏សមរម្យ។

លោក ខៀវ កាញារីទ្ធ ក៏បានស្នើដល់លោក Andrew Yap សហស្ថាបនិក Big Bad Wolf Books បន្តរៀបចំការតាំងពិព័រណ៍នេះជារៀងរាល់ឆ្នាំនៅកម្ពុជា និងពិនិត្យលទ្ធភាពពង្រីកកម្មវិធីតាំងពិព័រណ៍នេះនៅតាមបណ្ដាខេត្តនានារបស់កម្ពុជាផងដែរ៕

(អត្ថបទពាណិជ្ជកម្ម)

The post ពិព័រណ៍សៀវភៅធំជាងគេនៅលើពិភពលោក Big Bad Wolf Books បានត្រលប់មកកម្ពុជាថ្មីម្តងទៀតហើយ appeared first on Kampuchea Thmey Daily.

ការស្នើរបស់លោករដ្ឋមន្ត្រី បានធ្វើឡើងក្នុងឱកាសអញ្ជើញជាអធិបតីក្នុងពិធីបើកពិព័រណ៍សៀវភៅ Big Bad Wolf Books ជាលើកទី២ នៅរាជធានីភ្នំពេញ នាព្រឹកថ្ងៃទី២២ ខែកុម្ភៈនេះ។

លោក ខៀវ កាញារីទ្ធ បានថ្លែងថា ពិព័រណ៍សៀវភៅ Big Bad Wolf Books បានចាប់ផ្ដើមរៀបចំជាលើកទី១ ក្នុងឆ្នាំ ២០២០ ហើយពេលនោះ ការតាំងពិព័រណ៍សៀវភៅនេះ គឺទទួលបានការស្វាគមន៍ និងគាំទ្រពីសាធារណជន ក៏ដូចជាអ្នកចូលចិត្តអានសៀវភៅមានចំនួនច្រើនលើសពីការរំពឹងទុក។ លោករដ្ឋមន្ត្រី បញ្ជាក់ថា ការទទួលបានភាពជោគជ័យនៃពិព័រណ៍នេះ គឺដោយហេតុថា សៀវភៅដែលយកមកដាក់តាំងលក់សុទ្ធសឹងជាប្រភេទសៀវភៅថ្មីៗដែលមានស្នាដៃល្អៗ មានគុណភាពខ្ពស់ ហើយជាពិសេសនោះមានតម្លៃទាបជាងទីផ្សារ។

លោករដ្ឋមន្ត្រី ខៀវ កាញារីទ្ធ បានចាត់ទុកការតាំងពិព័រណ៍សៀវភៅ Big Bad Wolf Books នៅកម្ពុជានាពេលនេះ គឺមានសារសំខាន់ណាស់ក្នុងការចូលរួមចំណែកលើកកម្ពស់វប្បធម៌នៃការអាន ហើយនឹងផ្តល់ឱកាសដល់ប្រជាជនកម្ពុជា ដើម្បីទទួលបានបទពិសោធក្នុងការទិញសៀវភៅដែលមានគុណភាពល្អ និងមានតម្លៃមួយដ៏សមរម្យ។ លោករដ្ឋមន្ត្រី ក៏ បានស្នើដល់លោក Andrew Yap សហស្ថាបនិក Big Bad Wolf Books បន្តរៀបចំការតាំងពិព័រណ៍នេះជារៀងរាល់ឆ្នាំនៅកម្ពុជា និងពិនិត្យលទ្ធភាពពង្រីកកម្មវិធីតាំងពិព័រណ៍នេះនៅតាមបណ្ដាខេត្តនានារបស់កម្ពុជាផងដែរ។

បើតាមលោក Andrew Yap គឺ Big Bad Wolf Books បានរៀបចំពិព័រណ៍សៀវភៅដ៏ធំបែបនេះជាច្រើនលើករួច មកហើយនៅប្រទេសចំនួន១៥ ដែលមាននៅ ៣៧ទីក្រុង ហើយពិព័រណ៍សៀវភៅនេះ ក៏បានចាប់បើកជាលើកដំបូងនៅកម្ពុជា កាលពីឆ្នាំ២០២០ ក្នុងគោលបំណងកសាងវប្បធម៌នៃការអាននៅកម្ពុជាដោយនាំមកសៀវភៅជាភាសាអង់គ្លេសដែលមានតម្លៃសមរម្យសម្រាប់មនុស្សគ្រប់រូប។ លោក Andrew បានថ្លែងឲ្យដឹងថា ឆ្នាំ២០២៣នេះ Big Bad Wolf Books នឹងដាក់តាំងពិព័រណ៍សៀវភៅដ៏ធំនេះជាថ្មីម្ដងទៀត នៅរាជធានីភ្នំពេញ ចាប់ពីថ្ងៃទី២២ ខែកុម្ភៈ ដល់ថ្ងៃទី១២ ខែមីនា ឆ្នាំ២០២៣ ហើយចាប់បើកដំណើរការពីម៉ោង ៩ព្រឹក ដល់ម៉ោង ១២យប់ នៅផ្សារទំនើបអូឡាំព្យា៕

ដោយ៖ ធឿន វ៉ាន់សុង

The post លោក ខៀវ កាញារីទ្ធ ស្នើ Big Bad Wolf Books បន្តរៀបចំពិព័រណ៍នេះជារៀងរាល់ឆ្នាំនៅកម្ពុជា appeared first on Kampuchea Thmey Daily.