ដូចនេះ កម្ពុជាថ្មី សូមណែនាំភាពយន្តភាគគំនូរជីវចលល្បីៗភាគច្រើន ដែលទទួលបានការគាំទ្រខ្លាំងនៅកម្ពុជា។

១. Dragon Ball  
Dragon Ball គឺជាសិទ្ធិផ្តាច់មុខប្រព័ន្ធផ្សព្វផ្សាយរបស់ប្រទេសជប៉ុន ដែលបង្កើតឡើងដោយ Akira Toriyama ក្នុងឆ្នាំ១៩៨៤ ។ គំនូរជីវចលដើមនៃរឿងនេះ ត្រូវបានដាក់ជាស៊េរីក្នុង Weekly Shōnen Jump ពីឆ្នាំ១៩៨៤ ដល់ឆ្នាំ ១៩៩៥ និងត្រូវបានចាក់ផ្សាយនៅកម្ពុជា ប្រហែលខ្ទង់ឆ្នាំ២០០០ឡើង ដោយទទួលបានភាពល្បីល្បាញបំផុតនាពេលនោះ។

តាមរយៈដើរតាមដំណើរផ្សងព្រេងរបស់ Son Goku ដែលជាអ្នកក្បាច់គុនវ័យក្មេង និងមិត្តភក្តិមួយក្រុម ក្នុងបេសកកម្មស្វែងរកគ្រាប់បាល់គ្រីស្តាល់ទាំង ៧ ដើម្បីសុំបំណងប្រថ្នា ក៏ដូចជាប្រយុទ្ធជាមួយនឹងអំពើអាក្រក់ គំនូរជីវចលមួយនេះ បានធ្វើឱ្យភាគច្រើននៃមនុស្សពេញវ័យ ៣០ឆ្នាំឡើងទៅ នៅតែចងចាំអនុស្សាវរីយកុមារភាពមួយនេះមិនអាចបំភ្លេចបាន។ ពិសេស តួអង្គសំខាន់ៗ ដូចជា ស៊ុបភើ សៃយ៉ា (Super Saiyan) | Goku និង បិសាចបួរ ជាដើម។

២. វីរៈនារីសេឡាម៉ូន “Sailor Moon
ជា​ស៊េរី​គំនូរជីវចល​ជប៉ុន​ ដែល​និពន្ធ​និង​គូរ​ដោយ​ Naoko Takeuchi ។ រឿងនេះត្រូវបានសរសេរជាស៊េរីដំបូង នៅក្នុងទស្សនាវដ្តី shōjo manga របស់ Kodansha Nakayoshi ពីឆ្នាំ១៩៩១ ដល់ឆ្នាំ១៩៩៧ និងចាក់ផ្សាយនៅកម្ពុជាប្រហែលនឹងពេលវេលាគំនូរជីវចលខាងលើដែរ។ 

ស៊េរីរឿងនេះ ជាដំណើរផ្សងព្រេងរបស់សិស្សស្រីម្នាក់ឈ្មោះ Usagi Tsukino ដែលអាចប្រែកាយខ្លួនទៅជាវីរៈនារី ហើយត្រូវគេហៅថា សេឡាម៉ូន ។ នាងក៏ជាដឹកនាំសិស្សស្រីដែលមានវេទមន្ត្តមួយក្រុមផងដែរ “Sailor Guardians” ដែលមានតួនាទីប្រយុទ្ធ ដើម្បីការពារការលួច Silver Crystal និងការបំផ្លិចបំផ្លាញនៃប្រព័ន្ធព្រះអាទិត្យ។ រឿងនេះល្បីល្បាញខ្លាំង រហូតមានការផលិតជាផ្ទាំងរូបតុក្កកាផ្គុំ និងដាក់លក់លើទីផ្សារកម្ពុជាថែមទៀតផង។

៣. ជ្រូកអវកាស ប៉ូលីន
ជាខ្សែភាពយន្តគំនូរជីវចលរបស់ជប៉ុន ដែលដកស្រង់ចេញពីសៀវភៅ Manga Series ហើយក្រោយមកក៏ផលិតជាខ្សែភាពយន្តគំនូរជីវចល (Anime Series) ដែលមាន Nippon Animation ជាអ្នកផលិត រួចក៏ចាក់ផ្សាយផ្លូវការដោយ MBS Stations របស់ជប៉ុន នៅថ្ងៃទី០៣ ខែកញ្ញា ឆ្នាំ១៩៩៤ រហូតដល់ថ្ងៃទី ២៦ ខែសីហា ឆ្នាំ១៩៩៥ ។ ដំណាលនៃភាពយន្តនេះ មិនសូវជាខុសគ្នានឹងរឿងខាងលើ និយាយពីវីរៈនារីជួយដល់មនុស្សលោក ដែលប្រែក្រឡាជាជ្រូក មានបេសកកមម្មការពារយុត្តិធម៌ និងប្រមូលគុជខ្យង។

៤. ឈីងចាំង (Shin-Chan) 
ឈីងចាំង ជាភាពយន្តគំនូរជីវចលដ៏ល្បីរបស់ជប៉ុន ផលិតឡើងដោយលោក Yoshito Usui ។ ភាពល្បីល្បាញនៃភាពយន្តគំនូរជីវចលមួយនេះ គឺល្បីទូទាំងពិភពលោកតែម្តង ខណៈក៏ទទួលការគាំទ្រខ្លាំងផងដែរនៅកម្ពុជា។

៥. ជូពី និង ឌូឌូ (T’choupi et Doudou)
T’choupi et Doudou គឺជារឿងភាគទូរទស្សន៍បែបគំនូរជីវចល បារាំង-កាណាដា ដែលផលិតចេញពីរឿងភាគអក្សរសិល្បិ៍ ចាក់ផ្សាយជាផ្លូវការនៅបារាំង និងកាណាដា អំឡុងឆ្នាំ១៩៩៩ ។ ដ្បិតកម្ពុជាមិនអាចបញ្ជាក់ឆ្នាំដែលចាក់ផ្សាយនៅកម្ពុជា ប៉ុន្តែដំណាលរឿងក្មេងប្រុសដែលមិនអាចឃ្លាតឆ្ងាយពីតុក្កតាខ្លាឃ្មុំរបស់ខ្លួនមួយនេះ ទទួលបានការគាំទ្រមិនធម្មតាឡើយ និងនៅតែធ្វើឱ្យមនុស្សពេញវ័យ ចងចាំមិនភ្លេចនូវអនុស្សាវរីយ៍ជាមួយគំនូរជីវចលមួយនេះ។

៦. វេជ្ជបណ្ឌិត គ្លូប៊ីល (Dr.Globule)
ជាគំនូរចីវចលភាគរបស់បារាំង-អង់គ្លេស និយាយពីអ្នកវិទ្យាសាស្ត្រមួយរូប ដែលចូលចិត្តធ្វើរឿងឆ្កួតលីលា និងមានសុនខគ្រោងឆ្អឹងមួយឈ្មោះ Horrifido រស់នៅជាមួយ។ តុក្កតានេះបង្កើតឡើងដោយលោក Tony Barnes ផលិតដោយ Philippe Mounier Marketing Production និង The Sleepy Kids Company Ltd ចាក់ដំបូង នៅចក្រភពអង់គ្លេស លើប៉ុស្តិ៍ ITV ឆ្នាំ១៩៩៤ រហូតឆ្នាំ១៩៩៧ ។ រឿងនេះ ត្រូវបានចាក់ផ្សាយតាមកញ្ចក់ទូរទស្សន៍ ទទក និងទទួលបានភាពល្បីល្បាញខ្លាំងដូចគ្នា។

៧. រឿងនិទានលោកឪកាស្ទ័រ
Les Histoires du père Castor គឺជាស៊េរីគំនូរជីវចលបារាំង-កាណាដា ដែលផលិតដោយ Cinar ដោយផ្អែកលើសៀវភៅនិទានកុមារ Père Castor ស្នាដៃអ្នកនិពន្ធជនជាតិបារាំង Paul Faucher ។ ភាពយន្តគំនូរជីវចល ដែលដំណាលពីរឿងនិទានផ្សេងៗរបស់លោកឪកាស្ទ័រនេះ ត្រូវបានចាក់ផ្សាយតាមកញ្ចក់ទូរទស្សន៍ជាតិកម្ពុជា «ទទក» និងទទួលបានគាំទ្រច្រើនដូចគ្នារឿងទាំងអស់ខាងលើដែរ។

៨. សាមបារ និងសត្វទន្សាយ (Samba et Leuk)
ជាភាពយន្តគំនូរជីវចលភាគបារាំង-កាណាដា បង្កើតឡើងដោយ Olivier Massart និងចាក់ផ្សាយនៅបារាំង និងកាណាដា ក្នុងឆ្នាំ១៩៩៧ ជារឿងដំណាលពីក្មេងប្រុសអាហ្វ្រិកម្នាក់ ដែលមានបេសកកម្មស្វែងរកវត្ថុស័ក្តិសិទ្ធបូជាដល់ព្រះម៉ែគូរី ជាមួយដៃគូ ២នាក់ទៀត ម៉ារីណា និងឡឹក ដើម្បីសង្គ្រោះភូមិស្រុកពីអំណាចខ្មៅងងឺតរបស់បិសាច ទូហ្គោម ។

៩. ព្រះនាង ហ្សេរ៉ាហ្សាត (Shéhérazade)
ជាភាពយន្តភាគបែបគំនូរជីវចលរបស់បារាំងដែលចាក់ផ្សាយដំបូងពីឆ្នាំ១៩៩៦ រហូតដល់ឆ្នាំ២០០០ នៅលើប៉ុស្តិ៍ទូរទស្សន៍បារាំង France 2 និងត្រូវបានចាក់ផ្សាយលើប៉ុស្តិ៍ ទទក ហើយទទួលបានការគាំទ្រផងដែរ។

១០. ក្មេងតូចត្រកូលធ្មប់ (The Little Witches)
ជាគំនូរចីវចលរបស់ប្រទេស បារាំង និងអេស្ប៉ាញ ដំណាលពីទីក្រុងនៅថ្ងៃអនាគតមួយឈ្មោះ City Base ដែលប្រឈមមុខនិងការគំរាមកំហែងរបស់ Megalomaniac Wolti ទាមទារឱ្យត្រកូលធ្មប់ទាំងនេះ តតាំងការពារ។

១១. វីរៈនារីអេនីម៉ា
ជាភាពយន្តតុក្កតារបស់បារាំងមួយទៀត ដែល «ទទក» យកមកចាក់ផ្សាយនិងទទួលបានការគាំទ្រច្រើន។ រឿងនេះ និយាយពីក្មេងស្រីម្នាក់ អាចហោះហើរជាមួយឈុតចារនា ក្រោយប្រើស្បែកជើងវេទមន្តបង្កើតឡើងដោយលោក Eunice Alvarado Ellis ផលិតដោយ Vintage Production ចាក់ផ្សាយនៅបារាំងឆ្នាំ១៩៩៧ ។

១២. វីរៈនារីទាំង ៣ (Totally Spies)
ជាភាពយន្តគំនូរជីវចលរបស់បារាំង និយាយអំពីចារនារី ៣ នាក់នៅ Beverly Hills រដ្ឋ California សហរដ្ឋអាមេរិក ដែលធ្វើការជាភ្នាក់ងារសម្ងាត់ បំពេញបេសកកម្មជាមួយអាវុធបែបវិទ្យាសាស្ត្រ និងចាក់ផ្សាយដំបូងនៅបារាំងឆ្នាំ២០០២ ។

The post ភាពយន្តគំនូរជីវចល ១២ កំដរកុមារភាពកុមារកម្ពុជាជាង ២ទសវត្សរ៍មុន និងយកបានប្រជាប្រិយភាពខ្លាំង appeared first on Kampuchea Thmey Daily.