សម្ដេចធិបតី ហ៊ុន ម៉ាណែត បានថ្លែងថា រាជរដ្ឋាភិបាល កំពុងដាក់ទិសដៅឱ្យមានការរៀបចំធ្វើយ៉ាងណាឱ្យកំពង់ផែរបស់កម្ពុជាមានការកែលម្អកាន់តែប្រសើរថែមទៀត ដើម្បីជំរុញទាក់ទាញការវិនិយោគពីបរទេស និងធានាដល់វិស័យដឹកជញ្ជូន និងភស្តុភារកម្មរបស់កម្ពុជាមានភាពរីកចម្រើនជឿនលឿន។ ក្នុងនោះ សម្ដេចធិបតី បានសម្រេចប្រគល់ភារកិច្ចឱ្យលោកឧបនាយករដ្ឋមន្ត្រី ស៊ុន ចាន់ថុល ដើម្បីធ្វើការសិក្សារៀបចំផែនការមេមួយក្នុងការសម្របសម្រួល និងផែនការយុទ្ធសាស្ត្រសម្រាប់កំពង់ផែ ទាំងនៅកំពង់ផែស្វយ័តក្រុងព្រះសីហនុ ក៏ដូចជាកំពង់ផែសមុទ្រផ្សេងទៀតរបស់កម្ពុជា ដោយធ្វើយ៉ាងណាឱ្យការរៀបចំជាយុទ្ធសាស្ត្រប្រទាក់ក្រឡា និងបំពេញគ្នាទៅវិញទៅមក។

សម្ដេចនាយករដ្ឋមន្ត្រី បានចាត់ទុកកំពង់ផែស្វយ័តក្រុងព្រះសីហនុ ជាកំពង់ផែនាំមុខក្នុងការធ្វើពាណិជ្ជកម្មរវាងកម្ពុជាជាមួយនឹងតំបន់ និងពិភពលោក ហើយក្នុងនាមជាប្រមុខរាជរដ្ឋាភិបាលកម្ពុជា ក្នុងអាណត្តិទី៧នេះ សម្ដេចនាយករដ្ឋមន្ត្រី ក៏បានដាក់ទិសដៅឱ្យរៀបចំកសាងផែរបស់កម្ពុជានេះ ទៅជាមណ្ឌលភស្តុភារកម្មថ្នាក់តំបន់តែម្ដង ពោល គឺមិនសម្រាប់តែបម្រើជាប្រយោជន៍ជាតិប៉ុណ្ណោះទេ តែថែមទាំងជាផែដែលបម្រើឱ្យផលប្រយោជន៍តំបន់។

ជាមួយនឹងការដាក់ទិសដៅកែលម្អកំពង់ផែសមុទ្រ សម្ដេចធិបតី ក៏បានប្រគល់ភារកិច្ចឱ្យលោកឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច ធ្វើការវាយតម្លៃ និងរៀបចំសិក្សាឱ្យលម្អិតឡើងវិញលើផែនការយុទ្ធសាស្ត្រសម្រាប់ប្រព័ន្ធដឹកជញ្ជូនផ្លូវទឹកសាបផងដែរ។ សម្ដេចធិបតី បញ្ជាក់ថាដូច្នេះថា៖ «កំពង់ផែទឹកសាប ក៏ត្រូវគិតគូឡើងវិញ ថាតើត្រូវវាយតម្លៃបែបណា ដើម្បីឱ្យផែទឹកសាបដើរទៅមុខ ហើយដើម្បីឈានឆ្ពោះទៅការតភ្ជាប់រវាងផែទឹកសាប និងទឹកប្រៃ ក្នុងការធ្វើជាព្រែកជីករបស់កម្ពុជា។ ចឹងត្រូវធ្វើយ៉ាងណាឱ្យប្រព័ន្ធឡូជីស្ទិកប្រទាក់ប្រឡាគ្នា ដើម្បីបង្កើនសក្តានុពលសេដ្ឋកិច្ចនៅតាមខេត្តជាប់តាមទន្លេសាប​ និងទន្លេមេគង្គ ភ្ជាប់ជាមួយខេត្តជាប់សមុទ្រ»៕  

The post សម្ដេចនាយករដ្ឋមន្ត្រី ណែនាំឱ្យសិក្សាលម្អិតផែន ការមេអភិវឌ្ឍផែកម្ពុជាទៅជាមណ្ឌលភស្តុភារកម្មតំបន់ appeared first on Kampuchea Thmey Daily.

ពិធីចុះហត្ថលេខាកិច្ចព្រមព្រៀងថ្មីនេះ ធ្វើឡើងនៅថ្ងៃទី១៩ ខែមេសា ដោយលោក ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ​ និងដឹកជញ្ជូន និងលោក Asad Yaqub តំណាងរបស់ IFC ប្រចាំប្រទេសកម្ពុជា។

លោក ស៊ុន ចាន់ថុល បានឱ្យដឹងថា មជ្ឈមណ្ឌល​ភស្តុភារកម្មក្រុងព្រះសីហនុ គឺជា​មជ្ឈមណ្ឌល​ភស្តុភារកម្មអាទិភាព​មួយក្នុងចំណោម ​មជ្ឈមណ្ឌល​ភស្តុភារកម្ម​អាទិភាពចំនួនពីរ ដែល​ត្រូវអភិវឌ្ឍន៍​ក្នុងប្រទេសកម្ពុជា។ គោលបំណង​របស់យើង ​គឺយកប្រទេសកម្ពុជាធ្វើជាមជ្ឈមណ្ឌល​ផ្ទេរភស្តុភារកម្មប្រចាំតំបន់ក្នុងតំបន់អាស៊ីអាគ្នេយ៍។

លោកបានលើកឡើងដូច្នេះថា “តាមរយៈការធ្វើការជាមួយ IFC យើងអាច​ទាញយកផលពីជំនាញ​ជាសាកល​របស់​ពួកគេ នៅពេលដែល យើងស្វែងរកជម្រើសដ៏ល្អបំផុត ដើម្បីជំរុញការចូលរួមពីវិស័យឯកជន​ក្នុងការអភិវឌ្ឍ​ហេដ្ឋារចនាសម្ព័ន្ធភស្តុភារកម្មដ៏សំខាន់នេះ​នៅក្នុងប្រទេសកម្ពុជា។”

ក្រោមកិច្ចព្រមព្រៀងថ្មីនេះ IFC ជាទីប្រឹក្សាដឹកនាំផ្តាច់មុខ ក្នុងការរៀបចំរចនាសម្ព័ន្ធប្រតិបត្តិការ PPP និងគាំទ្ររដ្ឋាភិបាលក្នុងការដេញថ្លៃដែលមានលក្ខណៈប្រកួតប្រជែងជាអន្តរជាតិ ដើម្បី​ជ្រើសរើស​ក្រុមហ៊ុនវិនិយោគឯកជនដែលមានគុណវុឌ្ឍិស្របតាមច្បាប់​ ភាពជាដៃគូរវាងវិស័យសាធារណៈ និងវិស័យឯកជន ​របស់ប្រទេសកម្ពុជា។

គម្រោងនេះរំពឹងថា នឹងត្រូវបានដំណើរការឡើងជាដំណាក់​កាល​ ជាមួយ​នឹងដើមទុន​សរុប​ប្រមាណជា​ ២០០ លានដុល្លារ។ ក្រុមហ៊ុនវិនិយោគរំពឹងថា​ នឹងផ្តល់ហិរញ្ញប្បទាន អភិវឌ្ឍន៍​ និងដំណើរការហេដ្ឋារចនាសម្ព័ន្ធ គ្រឿង បរិក្ខារ ​និងប្រព័ន្ធនានានៅក្នុងមជ្ឈមណ្ឌល​ភស្តុភារកម្ម​ក្រោមកិច្ច​សន្យារយៈពេលវែង​ក្នុង​ភាពជាដៃគូររវាងរដ្ឋាភិបាល ​និងវិស័យឯកជន។ ការផ្តល់កិច្ចសន្យាទៅឲ្យអ្នកដេញថ្លៃឈ្នះ ទំនង​ជានឹងត្រូវធ្វើឡើង​នៅចុងឆ្នាំ ២០២៤ ដោយ​មជ្ឈមណ្ឌល​នេះនឹងត្រូវសាងសង់ក្នុងរយៈពេល ៣ ឆ្នាំ។

ជាមួយនឹងទីតាំងយុទ្ធសាស្ត្ររបស់ខ្លួននៅ​ភាគនិរតី​តាមឆ្នេរសមុទ្រកម្ពុជា និងដោយមានការ​តភ្ជាប់​ល្អ ជាមួយផ្លូវថ្នល់ ផ្លូវដែក និងផ្លូវអាកាស មជ្ឈមណ្ឌល​មណ្ឌល​ភស្តុភារកម្មនេះអាចបំពេញ​បន្ថែម​ទៅឲ្យកំពង់ផែក្រុងព្រះសីហនុ ដែលជាកំពង់ផែសមុទ្រទឹកជ្រៅអន្តរជាតិ និងពាណិជ្ជកម្មតែមួយគត់​របស់កម្ពុជា​ ដែលគ្រប់គ្រងពីរភាគបីនៃចំនួន​កុងតឺន័រទាំង​អស់ដែលឆ្លងកាត់ប្រទេសកម្ពុជា ។ មជ្ឈមណ្ឌលភស្តុភារកម្មទំនើប រួមជាមួយការដឹកជញ្ជូន​ដែលគាំ​ទ្រកំពង់ផែនេះ នឹងជួយ​ពន្លឿន​ចលនានៃការនាំចេញ ការនាំចូល​ និងកាត់បន្ថយការកកស្ទះនៅកំពង់ផែ។

គម្រោងនេះនឹងធ្វើឱ្យប្រសើរឡើងនូវប្រសិទ្ធភាព និងកាត់បន្ថយ ថ្លៃដើមដឹកជញ្ជូននៅក្នុងប្រទេស ដែលបច្ចុប្បន្ននេះ​កម្ពុជាកំពុងស្ថិតក្នុងចំណោមប្រទេសដែលមានថ្លៃដឹកជញ្ជូនខ្ពស់​បំផុតនៅ​អាស៊ីបូព៌ា និងជាឧបសគ្គដ៏ធំ​មួយចំពោះ​ការប្រកួតប្រជែង​ និងការធ្វើពិពិធកម្ម៕

The post មជ្ឈមណ្ឌល​ភស្តុភារកម្ម តម្លៃ ២០០លានដុល្លារ នឹងបង្កើតឡើងនៅខេត្តព្រះសីហនុ appeared first on Kampuchea Thmey Daily.