ក្នុង​កិច្ចប្រជុំ​ប្រចាំ​ត្រីមាស​ទី ៣ ឆ្នាំ ២០២៥ របស់​ក្រុម​ការងារ​ពិសេស​លុបបំបាត់​ជំងឺ​គ្រុនចាញ់​ថ្នាក់​ខេត្ត នៅ​ថ្ងៃ​ទី ៣០ ខែ​កញ្ញា ឆ្នាំ ២០២៥ នេះ លោក​វេជ្ជបណ្ឌិត ក្រុស សារ៉ាត់ ប្រធាន​មន្ទីរ​សុខាភិបាល នៃ​រដ្ឋបាល​ខេត្ត​សៀមរាប បាន​ឲ្យ​ដឹង​ថា ករណី​ទាំង ៣ ខាងលើ​នេះ​ដែរ ត្រូវ​បាន​កំណត់​ថា​ជា​ករណី​នាំចូល ដោយ ២ ករណី នាំចូល​មកពី​ប្រទេស​ថៃ និង ១ ករណី​ទៀត នាំចូល​មកពី​ខេត្ត​ស្ទឹងត្រែង ដែល​ករណី​នេះ បាន​បង្ហាញ​ពី​ភាព​ជោគជ័យ​ក្នុង​ការ​ទប់ស្កាត់​ការ​ចម្លង​ក្នុង​សហគមន៍។

លោក​វេជ្ជបណ្ឌិត ក្រុស សារ៉ាត់ បញ្ជាក់​ថា ទោះជា​យ៉ាង​នេះ​ក្ដី ក្នុង​ត្រីមាស​ចុងក្រោយ នៃ​ឆ្នាំ ២០២៥ នេះ ក្រុមការងារ​ខេត្ត​សៀមរាប នឹង​អនុវត្ត​យ៉ាង​តឹងរ៉ឹង​នូវ​សារាចរណែនាំ​ស្ដីពី​ការ​គ្រប់គ្រង​ករណី​ជំងឺ​គ្រុនចាញ់​នាំចូល។ សកម្មភាព​នេះ​រួមមាន ការ​ធ្វើការ​ពិនិត្យ ស្រាវជ្រាវ និង​ព្យាបាល​ជំងឺ​គ្រុនចាញ់​រាល់​អ្នក​ធ្វើ​ដំណើរ​មកពី​ក្រៅ​ប្រទេស ឬ​តំបន់​ប្រឈម។ ជាមួយ​គ្នា​នេះ ត្រូវ​ពង្រឹង​សមត្ថភាព​ក្រុម​ការងារ​បន្ថែម ក្នុង​ការ​ធ្វើ​បច្ចុប្បន្នភាព​ទិន្នន័យ នៃ​ជំងឺគ្រុនចាញ់ ស្វែងរក​ដំណោះស្រាយ និង​បន្ត​សម្រេច​ឲ្យ​បាន​នូវ​គោលដៅ​លុបបំបាត់​ជា​ស្ថាពរ។

លោក​វេជ្ជបណ្ឌិត ក៏បាន​អំពាវនាវ​សុំ​កិច្ចសហការ​ពី​គ្រប់​អ្នក​ពាក់ព័ន្ធ បន្ត​ជួយ​ផ្សព្វផ្សាយ​អំពី​វិធី​បង្ការ​ជំងឺ​ដែល​ឆ្លង​ដោយសារ​សត្វ​មូស ដូចជា ការ​គេង​ក្នុង​មុង ការ​សម្អាត​បរិស្ថាន និង​កម្ចាត់​ជម្រក​មូស​ជាដើម។ ជំរុញ​បញ្ហា​នេះ បន្ថែម​ទៅ​តាម​សាលារៀន ​, អប់រំ​ផ្សព្វផ្សាយ​ដល់​ភ្ញៀវ​ទេសចរ​ដែល​ទៅ​តំបន់​ប្រឈម​ , ផ្សព្វផ្សាយ​តាម​មូលដ្ឋាន ជាពិសេស​ជំរុញ​ជា​សំខាន់​តាម​ប្រព័ន្ធ​ផ្សព្វផ្សាយ៕

អត្ថបទ ៖ គឿន វេត

The post ៨ ខែ ឆ្នាំនេះ ខេត្តសៀមរាប រកឃើញករណីវិជ្ជមានជំងឺគ្រុនចាញ់តែ ៣ ករណីប៉ុណ្ណោះ ចំណោមការធ្វើតេស្តជាង ៨ ម៉ឺនករណី appeared first on Kampuchea Thmey Daily.

ថ្លែងនៅក្នុងពិធីផ្សព្វផ្សាយក្រុមការងារគ្រូពេទ្យសង្គ្រោះបឋម និងបន្ទាន់ នៃព្រឹត្តិការណ៍អង្គរសង្ក្រាន្តឆ្នាំ២០២៥ នៅខេត្តសៀមរាប នាព្រឹកថ្ងៃទី០៦ ខែមេសា ឆ្នាំ២០២៥នេះ លោកវេជ្ជបណ្ឌិត ក្រុស សារ៉ាត់ មានប្រសាសន៍ថា អង្គរសង្ក្រាន្តឆ្នាំនេះ បានរៀបចំឡើងទ្រង់ទ្រាយធំដែលគេរំពឹងថា នឹងមានភ្ញៀវទេសចរជាតិ និងអន្តរជាតិ និងប្រជាពលរដ្ឋខ្មែររាប់ម៉ឺននាក់នឹងមកចូលរួមកម្សាន្តដូចនេះបញ្ហាសុខភាពគឺជាកត្តាដ៏សំខាន់ផងដែរដែលត្រូវយកចិត្តទុកដាក់។

លោកវេជ្ជបណ្ឌិតបានបន្តថា នៅក្នុងព្រឹត្តិការណ៍អង្គរសង្ក្រាន្តឆ្នាំនេះ មន្ទីរបានដាក់ក្រុមគ្រូពេទ្យ និងក្រុមសង្គ្រោះបឋមចំនួន៣ទីតាំងធំៗ ទី១ ទីតាំងនៅបរិវេណមុខប្រាសាទអង្គរវត្ត មានក្រុមគ្រូពេទ្យ និងរថយន្តគិលានសង្គ្រោះប្រចាំការចំនួន៣កន្លែង ទី២ តំបន់មាត់ស្ទឹងសៀមរាប មានក្រុមគ្រូពេទ្យ និងរថយន្តគិលានសង្គ្រោះប្រចាំការចំនួន៥កន្លែង និងទីតាំងទី៣ នៅបរិវេណអតីតអង្គរឃ្យុងយូ មានក្រុមគ្រូពេទ្យ និងរថយន្តគិលានសង្គ្រោះប្រចាំការចំនួន១កន្លែង។ ដោយមន្ទីរសុខាភិបាល បានត្រៀមគ្រូពេទ្យសរុប២៨៨នាក់ និងក្រុមការងារសម្របសម្រួលចំនួន៣៦នាក់។

មន្ទីរសុខាភិបាលបានសហការជាមួយសហភាពសហព័ន្ធយុវជនកម្ពុជាខេត្តសៀមរាបអញ្ជើញក្រុមការងារទាំងអស់ មកជួបជុំគ្នា ដោយក្រុមគ្រូពេទ្យជំនាញ ក៏បានធ្វើបទបង្ហាញបន្ថែម អំពីការងារបច្ចេកទេសមួយចំនួន ក្នុងការងារសង្គ្រោះបឋមដល់អ្នកជំងឺដោយសារតែមានបញ្ហាបេះដូង ឬជួបបញ្ហាសុខភាពផ្សេងៗ ដែលកើតមាន នៅក្នុងព្រឹត្តិការអង្គរសង្ក្រាន្ត។

ជាមួយគ្នានេះដែរ នៅគ្រប់មន្ទីរពេទ្យ មណ្ឌលសុខភាព ទាំងអស់ក្នុងខេត្តសៀមរាប គឺក៏មានគ្រូពេទ្យផ្តល់សេវាសុខភាពធម្មតា ដោយពុំមានការអនុញ្ញាតឱ្យឈប់សម្រាកនោះទេ។

លោកវេជ្ជបណ្ឌិត ក្រុស សារ៉ាត់ ក៏បានអំពាវនាវឱ្យបងប្អូនប្រជាពលរដ្ឋទាំងអស់ ជាពិសេសភ្ញៀវទេសចរជាតិ អន្តរជាតិ និងប្រជាពលរដ្ឋដែលមកកម្សាន្ត នៅក្នុងព្រឹត្តការណ៍អង្គរសង្ក្រាន្តសូមថែរក្សាសុខភាពឱ្យបានល្អ ត្រូវទទួលទានទឹកឱ្យបានច្រើន ទទួលទានអាហារឱ្យមានអនាម័យ ដើម្បីសុខភាពល្អទាំងអស់គ្នា ពោលគឺមក្សាន្តសប្បាយហើយ ត្រឡប់ទៅផ្ទះវិញដោយសុខភាពល្អ៕

ដោយ៖ជុន កុសល

The post ខេត្តសៀមរាបត្រៀមគ្រូពេទ្យប្រចាំការជិត៣០០នាក់សម្រាប់ព្រឹត្តិការណ៍អង្គរសង្ក្រាន្ត appeared first on Kampuchea Thmey Daily.