ស្ថិតក្នុងវ័យ ៣៦ឆ្នាំ លោក កឹម វិចិត្រ ជាកសិករចិញ្ចឹមមាន់ស្រែ នៅស្រុកអង្គរជ័យ ខេត្តកំពត បានប្រាប់ កម្ពុជាថ្មី ថា សម្រាប់ពេល​បច្ចុប្បន្នការចិញ្ចឹមមាន់ស្រែរបស់លោកកំពុងមានទីផ្សារល្អ ខណៈអាចលក់ចេញឱ្យឈ្មួញបានជិត២ម៉ឺនរៀល ក្នុង១គីឡូក្រាម។

កសិកររូបនេះ បានឱ្យដឹងទៀតថា មូលហេតុដែលមាន់ស្រែមានទីផ្សារល្អ នេះក៏ព្រោះតែជារៀងរាល់ថ្ងៃនៅតាមភោគជនីយដ្ឋាន និងសណ្ឋាគារមួយចំនួនតាមបណ្ដាខេត្ត និងរាជធានីភ្នំពេញ ក៏កំពុងត្រូវការប្រភេទពូជមាន់ស្រែដើម្បីយកធ្វើចម្អិនធ្វើម្ហូប និងខ្លះទៀតត្រូវការមាន់ស្រែយកទៅអាំងលក់ជាប្រចាំថ្ងៃ។

លោក កឹម វិចិត្រ បានបញ្ជាក់ទៀតដែរថា មាន់ស្រែមានទីផ្សារល្អមកយូរហើយ តែមួយរយៈចុងក្រោយដែលមានជម្លោះព្រំដែនកម្ពុជា-ថៃ ការចិញ្ចឹមមាន់ស្រែក្នុងស្រុកកាន់តែមានតម្រូវការខ្ពស់ ខណៈដែលកន្លងមកការចិញ្ចឹមមាន់ស្រែពុំសូវកាកកប់ ដោយសារតែមានការនាំចូលមាន់ស្រែមកពីប្រទេសថៃមកលក់នៅក្នុងទីផ្សារប្រទេសកម្ពុជា ផងដែរ។

ដ្បិតការចិញ្ចឹមមាន់ស្រែមាន់ទីផ្សារលក់ចេញល្អក៏ពិតមែន ប៉ុន្ដែលោក កឹម វិចិត្រ ចាត់ទុកវាគ្រាន់តែជាមុខរបរបន្ទាប់បន្សំតែប៉ុណ្ណោះ ពោលលោកក៏មានមុខរបរមួយទៀតដោយបើកហាងលក់ទូរសព្ទ និងជួសជុលទូរសព្ទ នៅឯផ្សារស្ថិតនៅស្រុកកំណើតរបស់លោកបន្ថែមទៀត ផងដែរ។

ទាក់ទងនឹងការចិញ្ចឹមមាន់ស្រែនេះដែរ លោក កឹម វិចិត្រ ក៏បានបង្ហើបឱ្យដឹងដែរថា «មាន់ស្រែមិនពិបាកចិញ្ចឹមប៉ុន្មាននោះទេ គ្រាន់តែតម្រូវឱ្យយើងមានដីមួយកន្លែងសមរម្យ ដែលដីនោះគឺមានស្មៅ និងធម្មជាតិខ្លះ យើងក៏អាចចាប់ផ្ដើមរបរមួយនេះបានដែរ»។

គួរឱ្យដឹងថា កសិដ្ឋានចិញ្ចឹមមាន់ស្រែរបស់ កឹម វិចិត្រ មានទីតាំងស្ថិតនៅស្រុកអង្គរជ័យ ខេត្តកំពត។ បច្ចុប្បន្ន កសិដ្ឋានលក្ខណៈគ្រួសារមួយនេះ មានមាន់ប្រមាណជាង១០០០ក្បាល សម្រាប់បង្កាត់ពូជ និងផ្គត់ផ្គង់ទៅកាន់ទីផ្សារបានជារៀងរាល់ថ្ងៃ៕

អត្ថបទ ៖ សួស សិត

The post របរចិញ្ចឹមមាន់ស្រែកំពុងមានទីផ្សារល្អ ខណៈ ១គីឡូលក់បានជិត២ម៉ឺនរៀល appeared first on Kampuchea Thmey Daily.

យ៉ាងណាមិញ នៅក្នុងស្រុកបាណន់ និងស្រុកសំឡូត ក្នុង​ខេត្ត​បាត់ដំបង ក៏សង្កេតឃើញកសិករបានចិញ្ចឹមជាលក្ខណះគ្រួសារជាច្រើនបន្ថែម ពីលើការដាំដុះដំណាំផ្សេងៗដូចជា ដាំម្ទេស ពោត និងដំឡូងមី ដើម្បីទប់ទល់និងកម្រិតជីវភាព​គ្រួសារ ហើយក្នុងនោះពួកគាត់ក៏បានសន្សំថវិការដែលកើតចេញពីការចិញ្ចឹមមាន់ស្រែនេះ ដើម្បីធ្វើជាដើមទុនក្នុងការដាំដំណាំកសិកម្មផ្សេងៗកាត់បន្ថយ ការខ្ចីបុលពី មីក្រូ ឬធនាគារ ផ្សេងៗ។

ប៉ុន្តែកសិករ​ចិញ្ចឹមមាន់ស្រែ​បានលើកឡើងប្រហាក់ប្រហែលគ្នាថា នៅប៉ុន្មានឆ្នាំចុងក្រោយនេះ តម្លៃមាន់ស្រែហាក់ដាំក្បាលចុះជាបន្តបន្ទាប់ តាមរយះក្រុមឈ្មួញដើរទិញតាមភូមិ ហើយពេលខ្លះកសិករមួយចំនួនមិនលក់ទេ សុខចិត្តទុកធ្វើជាម្ហូបអាហារក្នុងគ្រួសារ។

បើតាមកសិករក្នុងស្រុកបាណន់ បានឲ្យដឹងថា មាន់ស្រែដែលពួកគាត់ចិញ្ចឹមឲ្យដើររកចំណីក្នុងដីភូមិ មិនដែលប្រឈមនិងជំងឺ​នោះទេ យូរៗបាចអង្ករឲ្យសុីម្តង តែពួកវាធំធាត់ល្អណាស់ ហើយសាច់ក៏មានរស់ជាតិឆ្ងាញ់ មិនដូចរស់ជាតិមាន់កសិកម្មនោះទេ។

លោក ជិន គ្រក់ ជាកសិករ រស់នៅឃុំចែងមានជ័យ ក្នុងស្រុកបាណន់ បានឲ្យដឹងថា មាន់ស្រែរបស់លោកមិន​ចិញ្ចឹមច្រើនប៉ុន្មានទេ ដោយ​បាន​ចាប់លក់ឬឈ្មួញមកទិញជាញឹកញាប់​ ព្រោះវាទម្លាក់ពងកូនជាបន្តបន្ទាប់។

យ៉ាងណាមិញ លោក​ថា មាន់ស្រែឥឡូវធ្លាក់ថ្លៃខ្លាំងណាស់ មិនដូចកាលពីអំឡុងឆ្នាំ ២០២២-២៣ នោះទេ ព្រោះបច្ចុប្បន្ន ១ គីឡូក្រាមលក់បានតែចន្លោះពី ១៣ ០០០ រៀលដល់ ១៥ ០០០ រៀលប៉ុណ្ណោះ នៅប៉ុន្មានឆ្នាំចុងក្រោយនេះ។លោកបានសំណូមពរដល់ជំនាញពាក់ព័ន្ធ ជួយជម្រុញទីផ្សារឲ្យបានឡើងថ្លៃសមរម្យបន្តិចផង ដើម្បីជួយលើកកម្ពស់កម្រិត សេដ្ឋកិច្ចគ្រួសាររបស់កសិករ។

មន្ត្រីពាណិជ្ជកម្មខេត្តបាត់ដំបង​កាលពីថ្ងៃទី២០ ខែឧសភា ឆ្នាំ២០២៥ រួមទាំង​ក្រុមការងារគម្រោង “អេមស៍” នៃមន្ទីរពាណិជ្ជកម្មខេត្តបាត់ដំបង បានរៀបចំវេទិកាពហុភាគីអ្នកពាក់ព័ន្ធលើខ្សែច្រវាក់តម្លៃមាន់ស្រែ ដើម្បីភ្ជាប់កិច្ចសន្យាទិញលក់រវាងក្រុមផលិត និងឈ្មួញ នៅភូមិអូររំចេកក្រោម ឃុំអូរសំរិល ស្រុកសំឡូត។

វេទិការនេះ មានការចូលរួមពីលោកមេឃុំអូរ សំរិល មន្ត្រីកសិកម្មឃុំអូរសំរិល តំណាងធនាគារអភិវឌ្ឍន៍ជនបទ និងកសិកម្ម (ARDB) សហគមក៍កសិកម្ម ឈ្មួញ និងក្រុម ផលិត សរុបចំនួន ៤១ នាក់ ដើម្បីជំរុញឲ្យមានទីផ្សារល្អជាងនេះ ក្នុងការលើកស្ទួយជីវិភាពគ្រួសាររបស់កសិករ ជាអ្នកចិញ្ចឹមមាន់ស្រែ ហើយទន្ទឹមនោះដែរក៏បានលើកទឹកចិត្តដល់កសិករក្នុងការចិញ្ចឹមជាលក្ខណ:គ្រួសារផងដែរ ៕

អត្ថបទ÷ សៅ សារិទ្ធ

The post មាន់ស្រែលក់មួយគីឡូបានត្រឹម ១៣ ០០០ រៀល កសិករចិញ្ចឹមត្អូញត្អែរ​​តម្លៃ​ធ្លាក់ចុះបន្តបន្ទាប់ appeared first on Kampuchea Thmey Daily.