អ្នកស្រី នួន ណារី បានថ្លែងប្រាប់ថា លោកស្រីបានប្រកបមុខរបរនេះចាប់ពីឆ្នាំ ២០២១មក ដែលជំនាញលក់បាយដំណើបនេះចេះពីម្តាយ។ បើតាមអ្នកស្រី មុខរបរនេះនៅពេលលក់ដំបូងត្រូវចំណាយប្រាក់ ២០ ម៉ឺនរៀល ទៅ ៣០ ម៉ឺនរៀល ដើម្បីទិញអង្ករ ត្រីងៀត សាច់មាន់ ស្លឹកចេក និងគ្រឿង ក្នុងការរៀបចំលក់ដូរ។ លោកស្រីថា៖«សព្វថ្ងៃតម្រូវការភ្ញៀវដែលមកទិញច្រើនជាងមុន ត្រូវចំណាយដើមទុន ទៅទិញរហូតដល់ ៧០ ម៉ឺនរៀល»។

បាយដំណើបដែលចំហុយលក់ឲ្យអតិថិជន ១ ថ្ងៃ ត្រូវចំណាយអង្ករដំណើប ៥០ គីឡូ ជាមួយប្រហិត ប្រហិត ១០ គីឡូនិងត្រី ៥ គីឡូ ទើបគ្រប់គ្រាន់សម្រាប់លក់ប្រចាំថ្ងៃ ចាប់ពីម៉ោង ០៥:៣០ ព្រឹក ដល់ ម៉ោង ១៨:០០ យប់ ។ វិធីធ្វើម្ហូបអាហារបែបខ្មែរនេះ អ្នកស្រីនិងក្រុមគ្រួសារ ជួយគ្នារៀបចំធ្វើតាំងពីម៉ោង ៤ ព្រឹក ដោយប្តីជាអ្នកបុកប្រគ្រីវ កូនស្រីជាអ្នករៀបចំ ដាក់អង្ករដំណើបដាក់ត្រាំអង្កររយៈពេល ១ ម៉ោង បន្ទាប់មកត្រូវស្រង់ដាក់នៅស្មុក ធ្វើចំហុយចំនួន១ ម៉ោងទៀតទើបបាយដំណើបឆ្អិនល្អ។

បើតាមអ្នកស្រី នួន ណារី ៖«នៅជារៀងរាល់ថ្ងៃលក់អស់ចំនួន ១០ ឆ្នាំង ដោយក្នុងមួយៗឆ្នាំង មានផ្ទុកចំណុះ ៥ គីឡូ និង ធ្វើប្រហិតប្រហិតត្រី ចៀនស្លាបមាន់ និងចៀនសាច់ជ្រូក ជូតស្លឹកចេកត្រៀមលក់ទៅកាន់អតិថិជន ប្រមាណ ៣០០ នាក់ ចំពោះថ្ងៃ សៅរ៍ អាទិត្យ កំណើនភ្ញៀវមកទិញយកទៅទទួលទានលើសពីនេះ» ។ នៅក្នុងមុខរបបនេះ អ្នកស្រីអាចរកចំណូលចំណេញបានចន្លោះពី ៣០ ម៉ឺនរៀល ទៅ៤០ម៉ឺនរៀល ជាងក្នុងមួយថ្ងៃ ។ អ្នកស្រីលើកឡើងថា ភ្ញៀវដែលចាប់អារម្មណ៍មកទិញកើនឡើងដោយសារ តម្លៃសមរម្យ និងម្ហូបឆ្ងាញ់ ដូចជាបាយសាច់ជ្រូក និងប្រហិតត្រីចៀន លក់ត្រឹមតែ ៣០០០ រៀល ចំណែកឯសាច់មាន់ ១ កញ្ចប់ ៥០០០ រៀល។

លោកស្រីបញ្ជាក់ថា៖« តម្លៃនេះសមរម្យ ទើបមានភ្ញៀវកើនឡើងជាបន្តបន្ទាប់ ចូលចិត្តរសជាតិបាយដំណើបចំហុយ និងការវេចខ្ចប់ ពីព្រោះយើងវេចខ្ចប់បាយដំណើប ដោយស្លឹកចេក ប្រហិតបែបខ្មែរ ត្រី សាច់ធម្មជាតិនៅក្នុងស្រុក និងមានបុកប្រគ្រីវ បែបកេរ្តិ៍ដំណែលដូនតាខ្មែរ»៕

The post មុខរបរលក់បាយដំណើបខ្ចប់ស្លឹកចេកបែបខ្មែរ កំពុងទទួលបានការចាប់អារម្មណ៍ និងគាំទ្រខ្លាំង appeared first on Kampuchea Thmey Daily.

អ្នកស្រី ឃុន ស្រីលក្ខណ៍ រស់នៅក្នុងសង្កាត់ក្តុលដូនទាវ ស្រុក​ឯកភ្នំ ខេត្ត​បាត់ដំបង​បានលើកឡើងថា មុខរបរធ្វើចេកបន្ទះនេះ អ្នកស្រីចេះតពីដូនតា សម្រាប់រកកម្រៃបន្ថែមជួយទ្រទ្រង់ជីវិតភាពប្រចាំថ្ងៃ បើទោះចំណូលបានតិចតួចក៏ប្រសើរជាងការទំនេរ ក្រៅពីមុខ កសិកម្មប្រចាំរដូវកាល។

របរធ្វើចេកបន្ទះនេះ គឺគ្មានពេលទំនេរទេពីមួយថ្ងៃទៅមួយថ្ងៃ គឺចាប់ពីព្រឹករហូតដល់យប់។ ថ្ងៃខ្លះក៏រហូតដល់ម៉ោង ១២ យប់ទើបបានសម្រាក តែវាជាការងារស្រាលមិនប្រើកម្លាំងនោះទេសូម្បីតែស្ត្រីមេផ្ទះក៏អាចរកកម្រៃបានដែរ។

អ្នកស្រីបន្តថា “ជីវិភាពប្រចាំថ្ងៃគ្រួសារខ្ញុំ គឺបានមកពីមុខរបរនេះហើយ គ្រាន់បានជួយដោះបន្ទុកគ្រួសារ ហើយមួយផ្នែកទៀត​ក៏បានចំណូលពីភ្ញៀវទេសចរបរទេសមកទស្សនា និងជួយទិញផងដែរ”។

ស្ត្រីម្នាក់ទៀតដែលប្រកបមុខរបរដូចគ្នា គឺអ្នកស្រី នួន ចំណាន ក៏បានរៀបរាប់ពីប្រាក់ចំណូល តាមរយះមុខរបរមួយនេះ​ថា គ្រួសារអ្នកស្រីគឺបានពឹងផ្អែកទាំងស្រុងលើមុខរបរដ៏យូរឆ្នាំមួយនេះ ហើយក៏ពុំមានការប្រឈមការខ្វះខាតណាស់ណានោះដែរ គឺកម្រិតជីវភាពគ្រួសារ​ដូចគេឯងដែរ បើទោះបីមុខរបរនេះមម៉ាញឹកយ៉ាងណា ក៏អ្នកស្រីមិនបោះបង់ដែរព្រោះវាជា មុខរបរបន្តវេន​តាមទំនៀមទម្លាប់ដូនតា ហើយក៏បានធ្វើឲ្យមានជីវភាពរស់នៅប្រចាំថ្ងៃបានប្រសើរដល់សព្វថ្ងៃនេះដែរ ។

អ្នកស្រីបន្តថា ចេកអាំងបន្ទះនេះ តាមដូនតា គឺនិយមយកផ្លែចេកណាវ៉ា ឬណាំវ៉ាថៃ ព្រោះចេកក្រៅពីនេះ វាមានជាតិជូរ ហើយ ហាលទៅឡើងពណ៌ខ្មៅ រសជាតិក៏មិនសូវឈ្ងុយឆ្ងាញ់ដែរ ហើយភ្ញៀវបរទេសដែលមកទស្សនា ក៏ចូលចិត្តដែរ តែ​ភាគច្រើនពួក គេចូលបរិភោគចេកហាលឆៅ (ចេកមិនអាំង)។

អ្នកស្រីថា លក់មួយបន្ទះតម្លៃ ១០០០ រៀល បើបន្ទះដែលមានទម្រង់មូល គឺចិតផ្លែចេកហើយដាក់តម្រៀបលើសំបក​ណែម តម្លៃ ១ បន្ទះ ១០០០ រៀលដូចគ្នា មានទាំងអាំងទាំងឆៅតម្រូវតាមចំណង់ចំណូលចិត្តរបស់អតិថិជន និងភ្ញៀវបរទេស។

អ្នកស្រីថា ថ្ងៃខ្លះមានភ្ញៀវបរទេសចរមកទស្សនាច្រើន គឺចេកបន្ទះក៏មានការខ្វះខាតលក់ឲ្យម៉ូយផងដែរ។

ក្រៅពីចំណូលពីការលក់ចេក អ្នកស្រីក៏បានរកកម្រៃបន្ថែមប្រចាំថ្ងៃពីភ្ញៀវបរទេសដែរ ដោយអ្នកស្រីតម្រូវឲ្យភ្ញៀវបរទេ ស​ម្នាក់បង់ប្រាក់ ២០០០ រៀល ក្នុងការចូលទស្សនា និងឲ្យពួកគេបានភ្លក់រសជាតិចេកបន្ទះផង ហើយពួកគេក៏បាន​ជួយទិញបន្ថែមផង ដែលធ្វើឲ្យខ្វះខាតក្នុងការលក់ដល់ម៉ូយមួយចំនួន។

អ្នកស្រីថា មុខរបរនេះ នៅក្នុងសង្កាត់ក្ដុលដូនទាវ មានច្រើនដែរ តែសំខាន់ការធ្វើនិងការច្នៃឲ្យមានរសជាតិឆ្ងាញ់ ហើយមុខរបរនេះគ្មានពេលទំនេរទេ ពីព្រឹករហូតដល់យប់ពាក់កណ្តាល អាទ្រាត្រក៏មាន ហើយកូនៗទំនេរពីរៀនក៏បានជួយខ្លះៗដែរ ហើយចំណាយពេលហាលចេកគឺចន្លោះពី២ទៅ៣ថ្ងៃទៀត ។

បើតាមអាជ្ញាធរសង្កាត់ក្តុលដូនទាវ ​ស្រុក​ឯកភ្នំ​បានឲ្យដឹងថា ទីតាំងតាមផ្ទះធ្វើចេកបន្ទះរបស់ប្រជាពលរដ្ឋ មួយថ្ងៃៗសង្កេតឃើញមាន ភ្ញៀវបរទេសមកដើរទស្សនាជាបន្តបន្ទាប់ ក្នុងគោលបំណងពួកគេចង់ឃើញពីរបៀបធ្វើនិងការរស់នៅប្រចាំថ្ងៃរបស់ប្រជាពល រដ្ឋ ដែលនិយមមុខរបរធ្វើចេកបន្ទះនេះផង ជាពិសេសពួកគេចង់ភ្លក់រសជាតិចេកបន្ទះអាំងរបស់អ្នកស្រុកផង។ប្រភពខាងលើ បន្តថា ប្រជាពលរដ្ឋដែលចាប់យករបរនេះ មានជាង១០០គ្រួសារ នៅទូទាំងសង្កាត់ក្តុលដូនទាវ នៃស្រុកឯកភ្នំ ដែលជាមុខរបរ ចាត់ទុកជាទំនៀបទម្លាប់ប្រពៃណីពីដូនតារបស់ខ្មែរយើង៕

អត្ថបទ៖ សៅ សារិទ្ធ

The post របរធ្វើចេកបន្ទះប្រពៃណី​នៅ​​ក្តុលដូនទាវ ក្លាយជា​គោលដៅ​ទាក់ទាញ​​ទេសចរបរទេស​ចូលទស្សនា appeared first on Kampuchea Thmey Daily.