កញ្ញា ម៉ៅ ចាន់រស្មី ឬ ហៅថា កូនទន្សាយ បានរៀបរាប់ថា ខ្លួនបានប្រឡូកក្នុងវិស័យតែងនិពន្ធនេះតាំងពីឆ្នាំ២០១៣មកម្ល៉េះ ដោយសម្រេចបានជាង២០រឿងហើយ ប៉ុន្តែមានមនុស្សតិចតួចណាស់ដែលស្គាល់ថា នាងជានរណា។ រយៈពេល៧ឆ្នាំ យុវតី រស្មី បានចាប់អាជីពដែលគ្មានអ្នកស្គាល់។ បន្ទាប់មក ចន្លោះឆ្នាំ២០២០ កញ្ញា ម៉ៅ ចាន់រស្មី បានសម្រេចនូវស្នាដៃនិពន្ធប្រលោមលោកលើកដំបូងរបស់នាង គឺសៀវភៅរឿងកំណត់ហេតុពណ៌ស្វាយ ដែលទទួលបានសន្ទុះនៃការគាំទ្រយ៉ាងច្រើនពីសំណាក់យុវវ័យ។ នៅពីក្រោយភាពជោគជ័យនេះ កញ្ញា ម៉ៅ ចាន់រស្មី ក៏ធ្លាប់ទទួលរងការបាក់ទឹកចិត្ត និងការអាក់អន់ចិត្តដូចគ្នា ដែលគ្មាននរណាមើលឃើញនាង ប៉ុន្តែ រស្មីនៅតែបន្តដំណើររបស់ខ្លួនទៅមុខទៀត ជាមួយនឹងក្តីស្រម៉ៃរបស់ខ្លួន។

កញ្ញាបាននិយាយថា៖ “ខ្ញុំចំណាយពេល៧ឆ្នាំ ធ្វើជាអ្នកនិពន្ធដែលគ្មាននរណាស្គាល់។ ៧ឆ្នាំ មិនមែនជាពេលវេលាខ្លីទេ ខ្ញុំក៏ធ្លាប់បាក់ទឹកចិត្តដែរ ខ្ញុំក៏អន់ចិត្តដែរ ដែលគេមើលមិនឃើញខ្ញុំ ក៏ប៉ុន្តែ អរគុណព្រះដែលខ្ញុំមិនបានបោះបង់ទេ ព្រោះខ្ញុំស្គាល់ពីសក្តានុពលរបស់ខ្លួនឯង និងឥទ្ធិពលជារបស់ខ្ញុំ”។

ជាមួយគ្នានោះ រយៈពេល២ឆ្នាំចុងក្រោយបន្ទាប់ពីកញ្ញាបានចេញនូវស្នាដៃប្រលោមលោកមួយនេះមក ក៏មានការផ្ទុះចំណាប់អារម្មណ៍ និងការគាំទ្រជាច្រើនពីសំណាក់មហាជនខ្មែរ។ អ្នកនិពន្ធវ័យក្មេងរូបនេះ ក៏ត្រូវបានគេស្គាល់កាន់តែច្រើនឡើងៗតាមរយៈស្នាដៃនិពន្ធដ៏អស្ចារ្យរបស់នាងប្រកបដោយភាពច្នៃប្រឌិតមួយនេះ។ 

កញ្ញា ម៉ៅ ចាន់រស្មី ក៏បានលើកទឹកចិត្តដល់មហាជនទាំងឡាយឱ្យចេះមានការចែករំលែកគ្នា ផ្តល់ការលើកទឹកចិត្ត សេចក្តីស្រឡាញ់ មិនថា ក្នុងកាលៈទេសៈណាក៏ដោយ មិនចាំបាច់ទាល់តែខ្លួនមានភាពល្បីល្បាញ ឬទទួលការគាំទ្រច្រើនទើបអាចផ្តល់ការគាំទ្របានទេ។ 

គួររំលឹកថា កញ្ ញាម៉ៅ ចាន់រស្មី ជាកូនស្រីរបស់អ្នកនិពន្ធជើងចាស់មួយរូប គឺអ្នកស្រី ម៉ៅ សំណាង ដែលជាអ្នកនិពន្ធរឿងប្រលោមលោកដ៏ល្បីល្បាញនៅក្នុងស្រទាប់យុវវ័យកម្ពុជា៕

ដោយ៖ អុន ស្រីមាន

The post ម៉ៅ ចាន់រស្មី៖ ខ្ញុំចំណាយពេល៧ឆ្នាំ ក្នុងអាជីពអ្នកនិពន្ធដែលគ្មានអ្នកស្គាល់ appeared first on Kampuchea Thmey Daily.

កញ្ញា ម៉ៅ ចាន់រស្មី ដែលហ្វេនៗប្រលោមលោកស្គាល់នាមប៉ាកកាថា កូនទន្សាយ និងត្រូវជាកូនស្រីទោលរបស់ អ្នកស្រី ម៉ៅ សំណាង (ទន្សាយ) បច្ចុប្បន្នមានប្រិយមិត្តគាំទ្រច្រើនឡើងៗ ដោយសារតែសៀវភៅទី១របស់កញ្ញាត្រូវបានទទួលស្គាល់នូវគុណភាព និងទឹកដៃល្អមិនចាញ់ម្ដាយនោះទេ។   

ចំណែកសៀវភៅបន្ទាប់ ក្រោមចំណងជើង “កំណត់ហេតុពណ៌ស្វាយ២” ក៏ត្រូវបានប្រិយមិត្តដែលបានអានរួចហើយ កោតសរសើរថាល្អអាន មិនខុសពីស្នាដៃមុនផងដែរ។

បើយោងតាមប្រភពពីផេកហ្វេសប៊ុករបស់ កញ្ញា ម៉ៅ ចាន់រស្មី-កូនទន្សាយ បានបង្ហោះសារដោយបង្ហាញហេតុផល ៥ យ៉ាងចេញពីស្នាដៃថ្មីនេះ ដែលហ្វេនៗមិនគួរខកខានគឺ៖

១. កំណត់ហេតុទី២ សរសេរឡើងដោយ វេហាស៍ វិញម្តង (តួឯកប្រុស)។ ក្នុងភាគ១ សំណេរក្នុងកំណត់ហេតុ ជាការរៀបរាប់របស់តួឯកស្រី វីយ៉ូឡែត។

២. កំណត់ហេតុទី២ បង្ហាញពីជ្រុងម្ខាងទៀតនៃដំណើររឿងទាំងមូលដែល វីយ៉ូឡែត ឬលីឡា និងមិត្តអ្នកអានមិនបានដឹងតាមរយៈភាគ១ឡើយ។

៣. កំណត់ហេតុទី២ នឹងបកស្រាយនូវចម្ងល់ជាច្រើន ដែលមិត្តអ្នកអានមាននៅក្នុងភាគ១។

៤. អនុស្សាវរីយ៍ខ្លះរបស់អ្នកទាំងពីរក្នុងអតីតកាល​ គឺដកស្រង់ពីរឿងពិតនាទសវត្សរ៍ទី​ ៦០​ ដែលអ្នកនិពន្ធបានដឹងពីអតីតមន្ត្រីរាជការម្នាក់នៅសម័យនោះ។

៥. កំណត់ហេតុទី២ នឹងកាន់តែធ្វើឱ្យប្រិយមិត្តពេញចិត្ត ព្រោះសាច់រឿងនៃតួឯកទាំងពីរកាន់តែផ្អែមល្ហែមជាង កំណត់ហេតុទី១ទៅទៀត។

ចំពោះប្រិយមិត្តដែលបានអានប្រលោមលោក កំណត់ហេតុពណ៌ស្វាយ ភាគ១ ពិតជាបានដឹងច្បាស់នូវសាច់រឿងដ៏ជក់ចិត្ត ពុទ្ធិដ៏មានតម្លៃ និងទឹកដៃនិពន្ធ របស់ កូនទន្សាយ ជាក់ជាមិនខាន។ ដូច្នេះ បើចឹងដឹងភាគ២ ល្អកម្រិតណា ខុសប្លែកពីមុនយ៉ាងណាខ្លះ កុំភ្លេចរកទិញមកអាន ពីបណ្ដាហាងលក់សៀវភៅនានា និងហាងសៀវភៅអនឡាញជាច្រើនផងដែរ៕

អត្ថបទ៖ សន្យា

ចុចអាន៖ បាក់ទឹកចិត្តមែនទេ? សៀវភៅ ៣ ក្បាលនេះអាចជួយសម្រួលភាពស្មុគស្មាញបាន

ចុចអាន៖ សៀវភៅ៤ក្បាលរៀបរាប់អំពីពុកនិងម៉ែ អានហើយភ្ញាក់ខ្លួន

The post “កូនទន្សាយ” បង្ហាញហេតុផល ៥ចំណុច ហ្វេនៗមិនគួររំលងស្នាដៃទី២របស់ខ្លួន appeared first on Kampuchea Thmey Daily.