យន្តការនៃការផ្សះផ្សាដោយបង្ខំ Archives - Kampuchea Thmey Daily

អ្នកសម្របសម្រួល UN គាំទ្រកម្ពុជាដែលប្រើយន្តការផ្សះផ្សាដោយបង្ខំជាមួយថៃ

hun sirivadh — Thu, 04 Jun 2026 07:00:57 +0000

អ្នកសម្របសម្រួលអង្គការសហប្រជាជាតិប្រចាំកម្ពុជាលោកស្រី Vladanka Andreeva គាំទ្រដល់ការសម្រេចចិត្តរបស់កម្ពុជាក្នុងការប្រើប្រាស់យន្តការផ្សះផ្សាដោយបង្ខំក្នុងនីតិសមុទ្រអន្តរជាតិដើម្បីដោះស្រាយបញ្ហាដែនសមុទ្រត្រួតស៊ីគ្នាជាមួយប្រទេសថៃ។ ការគាំទ្រនេះក៏នឹងមានការជំនួយផ្នែកច្បាប់ ការប្រឹក្សាយោបល់ និងបច្ចេកទេសផងដែរបើកម្ពុជាស្នើសុំ។

លោកស្រី Vladanka Andreeva ជួបសម្ដេចប្រធានសភា ឃួន សុដារី នៅព្រឹកថ្ងៃទី៤ ខែមិថុនា

លោកស្រី Vladanka បានលើកឡើងបែបនេះក្នុងជំនួបជាមួយប្រធានសភាកម្ពុជាសម្ដេចសភាធិបតី ឃួន សុដារី នៅព្រឹកថ្ងៃទី៤ ខែមិថុនា នៅវិមានរដ្ឋសភាកម្ពុជា។

នាយកខុទ្ទកាល័យ និងជាអ្នកនាំពាក្យសម្ដេចប្រធានសភាលោក កែវ ពិសិដ្ឋ បានឱ្យអ្នកសារព័ត៌មានដឹងបន្ទាប់ពីកិច្ចប្រជុំនេះថាអ្នកសម្របសម្រួលអង្គការសហប្រជាជាតិប្រចាំកម្ពុជាបានគាំទ្រចំពោះជំហរកម្ពុជាក្នុងការប្រើប្រាស់ប្រព័ន្ធពហុភាគីនិយម និងច្បាប់អន្តរជាតិក្នុងការដោះស្រាយទំនាស់ដោយសន្តិវិធី ជាពិសេសគឺការប្រើប្រាស់យន្តការរបស់ UNCLOS សម្រាប់ដោះស្រាយនៅពេលនេះ។

លោកថា៖ «យើងអាចមានការប្រឹក្សាយោបល់ ភាគីទាំងសងខាងអាចមានសិទ្ធិក្នុងការសុំនូវការប្រឹក្សាយោបល់ សិទ្ធិនូវការសុំនូវជំនួយការបច្ចេកទេស ជំនួយផ្សេងៗ ហើយអង្គការសហប្រជាជាតិនឹងឆ្លើយតបតាមតម្រូវការផ្សេងៗ តាមអ្វីដែលគេអាចផ្ដល់បានតាមក្របខណ្ឌនៃអង្គការសហប្រជាជាតិ»។

លោក កែវ ពិសិដ្ឋ ក៏បានបញ្ជាក់ផងដែរថាការជ្រើសរើសយកយន្តការនៃការដោះស្រាយបញ្ហាតាមអង្គការសហប្រជាជាតិព្រោះកម្ពុជា មានជំនឿលើអង្គការនេះធានានូវយុត្តិធម៌ និងស្ថិរភាពពិភពលោក។

ក្នុងជំនួបនោះផងដែរប្រធានរដ្ឋសភា សម្ដេចសភាធិបតី ឃួន សុដារី មានប្រសាសន៍ដោយបានអរគុណដល់អង្គការសហប្រជាជាតិដែលជាអ្នកធានាដល់ការអភិវឌ្ឍន៍ និងខែលការពារប្រទេសនានាពីអំពើអយុត្តិធម៌។ សម្ដេចបានបញ្ជាក់ថាកម្ពុជានៅតែមានជំនឿលើប្រព័ន្ធពហុភាគីនិយម និងច្បាប់អន្តរជាតិ ដែលហេតុនេះហើយទើបសភាកម្ពុជាបានអនុម័តអនុម័តយល់ព្រមលើអនុសញ្ញាអង្គការសហប្រជាជាតិស្ដីពីនីតិសមុទ្រកាលពីខែមករា និងសម្រេចប្រើប្រាស់យន្តការផ្សះផ្សាដោយបង្ខំដែលមានក្នុងច្បាប់នេះនៅខែមិថុនានេះផងដែរ។

គួរឱ្យដឹងផងដែរថា កាលពីថ្ងៃទី២ ខែមិថុនា រាជរដ្ឋាភិបាលកម្ពុជាបានផ្ញើលិខិតផ្លូវការទៅកាន់អគ្គលេខាធិការអង្គការសហប្រជាជាតិ និងប្រទេសថៃ ពីការចាប់ផ្ដើមយន្តការនៃការផ្សះផ្សាដោយបង្ខំក្នុងនីតិសមុទ្រ ដោះស្រាយបញ្ហាព្រំដែនសមុទ្រត្រួតស៊ីគ្នាជាមួយថៃ បន្ទាប់ពីថៃបានដកខ្លួនចេញដោយខ្លួនឯងពី MOU ឆ្នាំ២០០១ កាលពីដើមខែឧសភាកន្លងទៅ៕

អត្ថបទដោយ ហ៊ុន សិរីវឌ្ឍន៍

The post អ្នកសម្របសម្រួល UN គាំទ្រកម្ពុជាដែលប្រើយន្តការផ្សះផ្សាដោយបង្ខំជាមួយថៃ appeared first on Kampuchea Thmey Daily.

ដំណើរការនៃយន្តការផ្សះផ្សាដោយបង្ខំក្នុងនីតិសមុទ្រ

hun sirivadh — Wed, 03 Jun 2026 05:25:02 +0000

នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត បានឱ្យដឹងកាលពីថ្ងៃទី២ ខែមិថុនាថារដ្ឋាភិបាលកម្ពុជាបានសម្រេចដាក់លិខិតផ្លូវការទៅកាន់អគ្គលេខាធិការអង្គការសហប្រជាជាតិ និងប្រទេសថៃដើម្បីចាប់ផ្ដើមដំណើរការយន្តការផ្សះផ្សាដោយបង្ខំក្នុងនីតិសមុទ្រ លើដែនសមុទ្រត្រួតស៊ីគ្នារវាងកម្ពុជានិងថៃ។

តើអ្វីជាយន្តការនៃការផ្សះផ្សាដោយបង្ខំ ហើយវាមានដំណើរការយ៉ាងណា?

យន្តការនៃការផ្សះផ្សាដោយបង្ខំគឺជាយន្តការមួយដែលបានចែងក្នុងអនុសញ្ញាអង្គការសហប្រជាជាតិស្ដីពីច្បាប់សមុទ្រឆ្នាំ ១៩៨២ ដែលរដ្ឋភាគីនៃអនុសញ្ញានេះអាចផ្ដើមយន្តការនេះបានដោយមិនចាំបាច់មានការយល់ព្រមពីភាគីម្ខាងទៀតឡើយ ហើយការខកខានណាមួយពីភាគីម្ខាងទៀតក៏មិនអាចបង្អាក់ដំណើរការផ្សះផ្សានេះឡើយ។

ដំណើរការរបស់យន្តការផ្សះផ្សាដោយបង្ខំ

យោងតាមឧបសម្ព័ន្ធទី៥ នៃនីតិសមុទ្រ UNCLOS នីតិវិធីនៃការផ្សះផ្សាដោយបង្ខំចាប់ផ្ដើមដំណើរការពេលដែលមានភាគីណាមួយផ្ញើការជូនដំណឹងជាលាយលក្ខណ៍អក្សរទៅកាន់ភាគីម្ខាងទៀត ទោះបីជាភាគីនោះមិនឆ្លើយតប ឬបដិសេធមិនចូលរួមក៏មិនអាចរារាំងដំណើរការនេះបានដែរ។

ក្នុងរយៈពេល២១ថ្ងៃបន្ទាប់ពីទទួលបានការជូនដំណឹង ភាគីចុងចម្លើយត្រូវតែងតាំងអ្នកសម្រុះសម្រួល២នាក់ ហើយបើសិនមិនបានតែងតាំងទេ ភាគីដើមបណ្ដឹងអាចសុំឱ្យអគ្គលេខាធិការអង្គការសហប្រជាជាតិតែងតាំងជំនួស។

បន្ទាប់ពីរកបានអ្នកផ្សះផ្សាទាំង៤នាក់ហើយ ក្នុងរយៈពេល៣០ថ្ងៃ អ្នកទាំង៤ត្រូវសម្រេចជ្រើសរើសសមាជិកទី៥ ឱ្យធ្វើជាប្រធាននៃគណៈកម្មការផ្សះផ្សា ហើយបើរើសមិនត្រូវទេ ភាគីណាមួយអាចស្នើសុំឱ្យអគ្គលេខាធិការអង្គការសហប្រជាជាតិជ្រើសរើសឱ្យបាន។

ក្រោយពីសម្រេចបានការបង្កើតគណៈកម្មការផ្សះផ្សារួចមក គណៈកម្មការនេះត្រូវកំណត់នូវនីតិវិធីផ្ទាល់ខ្លួន ដោយនីតិវិធី របាយការណ៍ និងអនុសាសន៍ ត្រូវធ្វើឡើងតាមសំឡេងភាគច្រើននៃសមាជិក។ ការបង្កើតបាននូវនីតិវិធីនេះនឹងឈានដល់ដំណើរការនីតិវិធីដែលគណៈកម្មការនឹងស្ដាប់ការបកស្រាយរបស់ភាគីទាំងសងខាង ពិនិត្យលើការទាមទារ និងការតវ៉ា រួចដាក់សំណើផ្សេងៗដើម្បីស្វែងរកដំណោះស្រាយដោយសន្តិវិធី។

ក្នុងរយៈពេល១២ខែ គណៈកម្មការនេះនឹងស្ដាប់ការបកស្រាយ ពិនិត្យឯកសារ និងភស្តុតាងដែល«រដ្ឋទាំងសង» ខាងដាក់ជូន ដើម្បីយល់ពីជំហរផ្លូវច្បាប់ និងស្វែងរកចំណុចរួម មុននឹងចេញរបាយការណ៍ សេចក្ដីសន្និដ្ឋាន និងអនុសាសន៍មួយជាចុងក្រោយ។

យ៉ាងណាក្ដីរបាយការណ៍ សេចក្ដីសន្និដ្ឋាន និងអនុសាសន៍នេះ មិនមានលក្ខណៈបង្ខំឱ្យអនុវត្ត ចំពោះភាគីជម្លោះនោះឡើយ ហើយដំណើរការនៃការបញ្ចប់នីតិវិធីនឹងត្រូវចប់នៅពេលដែលភាគីទាំងពីរឈានដល់កិច្ចព្រមព្រៀងដោះស្រាយជម្លោះ ឬភាគីណាមួយបដិសេធអនុសាសន៍ក្នុងរបាយការណ៍ដោយផ្ញើលិខិតទៅអគ្គលេខាធិការអង្គការសហប្រជាតិ ឬផុតរយៈពេល៣ខែដោយគ្មានការតវ៉ាគិតចាប់ពីថ្ងៃដែលរបាយការណ៍ត្រូវបានបញ្ជូនទៅភាគីទាំងសងខាង។

រដ្ឋមន្ត្រីក្រសួងការបរទេសកម្ពុជា ឧបនាយករដ្ឋមន្ត្រី ប្រាក់ សុខុន បានថ្លែងបញ្ជាក់ប្រាប់សារព័ត៌មាន BTV កាលពីថ្ងៃទី២ ខែមិថុនាថា បន្ទាប់ជម្រាបទៅកាន់អង្គទូតនានានៅកម្ពុជាពីជំហររបស់កម្ពុជាលើព្រំដែនសមុទ្រត្រួតស៊ីគ្នាជាមួយថៃនៅទីស្ដីការក្រសួងការបរទេស ថាដំណើរការនីតិវិធីនេះគឺចាប់ផ្ដើមហើយក្រោយពីកម្ពុជាបានផ្ញើលិខិតទៅប្រទេសថៃ និងអង្គការសហប្រជាជាតិ ខណៈកម្ពុជាបានរើសអ្នកផ្សះផ្សាដែលជាអ្នកជំនាញច្បាប់អន្តរជាតិ២នាក់រូបរួចរាល់អស់ហើយ គឺនៅរង់ចាំការឆ្លើយតបពីថៃប៉ុណ្ណោះក្នុងរង្វង់៣សប្ដាហ៍ទៀត។

ពិនិត្យលើការប្រើប្រាស់នីតិវិធីផ្សះផ្សាដោយបង្ខំរបស់ទីម័រខាងកើតជាមួយអូស្រ្តាលី

នីតិវិធីផ្សះផ្សាដោយបង្ខំក្នុងច្បាប់សមុទ្រត្រូវបានប្រើប្រាស់ជាលើកដំបូងដើម្បីដោះស្រាយវិវាទត្រូវបានប្រើប្រាស់ដោយប្រទេសទីម័រខាងកើតកាលពីឆ្នាំ២០១៦ បន្ទាប់ពីព្យាយាមក្នុងការស្វែងរកការខណ្ឌព្រំដែនសមុទ្រជាមួយអូស្ត្រាលីអស់ជាច្រើនឆ្នាំបន្ទាប់ពីប្រទេសនេះបានឯករាជ្យនៅឆ្នាំ២០០២។

យោងតាមការបង្ហោះលើគេហទំព័រការិយាល័យព្រំដែនដី និងសមុទ្រ នៃប្រទេសទីម័រខាងកើត ឱ្យដឹងថា មុនពេលទីម័រខាងកើតទទួលបានឯករាជ្យ២សប្ដាហ៍ប្រទេសអូស្ត្រាលីបានប្រកាសដកខ្លួនចេញពីសមត្ថកិច្ចកាត់សេចក្ដីរបស់តុលាការអន្តរជាតិដើម្បីកុំឱ្យទីម័រខាងកើតប្ដឹងខ្លួនបាន។ ការដកខ្លួនរបស់អូស្ត្រាលីបានធ្វើឱ្យការចរចាទ្វេភាគីជាប់គាំងជាច្រើនឆ្នាំ រហូតដល់ឆ្នាំ២០១៦ ទើបទីម័រខាងកើតសម្រេចចិត្តប្រើប្រាស់យន្តការនៃការផ្សះផ្សាដោយបង្ខំតែម្ដង ដែលជាលើកទី១ក្នុងប្រវត្តិសាស្ត្រពិភពលោក។

យ៉ាងណាក្ដីប្រទេសអូស្ត្រាលីបានតវ៉ាថា គណៈកម្មការផ្សះផ្សាគ្មានសមត្ថកិច្ចលើខ្លួនទេ ប៉ុន្ដែត្រូវបានគណៈកម្មការផ្សះផ្សាបញ្ជាក់ថាការដកខ្លួនរបស់អូស្ត្រាលីក្នុងឆ្នាំ២០០២ អាចគេចផុតពីតុលាការកាត់ក្ដី ប៉ុន្ដែមិនអាចគេចផុតពីយន្តការផ្សះផ្សាដោយបង្ខំនោះទេ ព្រោះអូស្ត្រាលីនៅតែជារដ្ឋសមាជិកនៃអនុសញ្ញាអង្គការសហប្រជាជាតិស្ដីពីច្បាប់សមុទ្រ។ ដំណើរការនេះបានបង្ខំឱ្យអូស្ត្រាលីចូលដំណើរការនៃនីតិវិធីផ្សះផ្សាដោយបង្ខំ។

រយៈពេល២ឆ្នាំក្រោយមក ពោលគឺនៅឆ្នាំ២០១៨ ប្រទេសទាំងពីរបានចុះហត្ថលេខាលើសន្ធិសញ្ញាព្រំដែនសមុទ្រអចិន្ត្រៃយ៍ថ្មីមួយនៅទីក្រុងញ៉ូវយក សហរដ្ឋអាមេរិក ដោយបានកំណត់យកខ្សែបន្ទាត់ពាក់កណ្ដាលស្របតាមច្បាប់អន្តរជាតិ ដែលធ្វើឱ្យតំបន់ប្រេងកាត និងឧស្ម័នធម្មជាតិភាគច្រើនត្រូវស្ថិតក្រោមអធិបតេយ្យភាពរបស់ទីម័រខាងកើត៕

អត្ថបទដោយ ហ៊ុន សិរីវឌ្ឍន៍

The post ដំណើរការនៃយន្តការផ្សះផ្សាដោយបង្ខំក្នុងនីតិសមុទ្រ appeared first on Kampuchea Thmey Daily.

កម្ពុជាផ្ញើលិខិតជាផ្លូវការទៅថៃ និងអគ្គលេខាធិការ UN ដើម្បីចាប់ផ្ដើមដំណើរការយន្តការផ្សះផ្សាដោយបង្ខំ

hun sirivadh — Tue, 02 Jun 2026 05:31:59 +0000

រាជរដ្ឋាភិបាលបានសម្រេចដាក់លិខិតជាផ្លូវការទៅអគ្គលេខាធិការអង្គការសហប្រជាជាតិនៅព្រឹកថ្ងៃទី២ ខែមិថុនា ឆ្នាំ២០២៦ នេះដើម្បីចាប់ផ្ដើមដំណើរការយន្តការផ្សះផ្សាដោយបង្ខំតាមនីតិសមុទ្រលើតំបន់សមុទ្រត្រួតស៊ីគ្នារវាងកម្ពុជានិងថៃ។ លិខិតផ្លូវការនេះក៏បានបញ្ជូនទៅឱ្យប្រទេសថៃបានដឹងផងដែរ។

ក្នុងសេចក្ដីថ្លែងការណ៍នៅម៉ោង១១ ព្រឹកថ្ងៃទីអង្គារ៍នេះ សម្ដេចធិបតី ហ៊ុន ម៉ាណែត បានបញ្ជាក់ថាការដកខ្លួនចេញរបស់ថៃពី MOU ឆ្នាំ២០០១ គ្មានជម្រើសអ្វីក្រៅពីការអនុវត្តន៍អនុសញ្ញាអន្តរជាតិស្ដីពីនីតិសមុទ្រដែលកម្ពុជា និងថៃជារដ្ឋភាគីនោះទេ។ សម្ដេចបញ្ជាក់ថាអនុវត្តយន្តការផ្សះផ្សាដោយបង្ខំ នឹងអនុញ្ញាតឱ្យប្រទេសទាំងពីរបង្ហាញជំហររបស់ខ្លួននៅចំពោះមុខគណៈកម្មការឯករាជ្យមួយដែលសុទ្ធតែជាអ្នកជំនាញផ្នែកច្បាប់អន្តរជាតិ។

សម្ដេចធិបតីបានបញ្ជាក់ថា៖ «អធិបតេយ្យភាពជាតិ និងសិទ្ធិលើដែនសមុទ្រកម្ពុជាត្រូវតែគោរពជាដាច់ខាត»។

សម្ដេចសង្ឃឹមថាដំណើរការនេះនឹងបង្ហាញនូវតម្លៃពិតប្រាកដនៃច្បាប់អន្តរជាតិ និងការដោះស្រាយជម្លោះដោយសន្ដិវិធី។ ការប្រើប្រាស់យន្តការនៃការផ្សះផ្សាដោយបង្ខំមិនមែនជាការបង្កើនភាពតានតឹងនោះទេ តែជាការខិតខំដោះស្រាយជម្លោះតាមការចរចារបស់ប្រទេសទាំងពីរក្រោមការសម្របសម្រួលពីអ្នកជំនាញអង្គការសហប្រជាជាតិ។

សម្ដេចបន្ថែមថា៖ «ខ្ញុំសូមបញ្ជាក់ថាការប្រើប្រាស់យន្តការផ្សះផ្សាដោយបង្ខំក្រោយអនុសញ្ញា UNCLOS មិនមែនមានន័យថាកម្ពុជាងាកចេញពីយន្តការនៃការសន្ទនានោះទេតែផ្ទុយទៅវិញកម្ពុជាកំពុងនាំយកការសន្ទនាចូលទៅក្នុងក្របខ័ណ្ឌអន្តរជាតិដែលមានរចនាសម្ព័ន្ធច្បាស់លាស់និងទទួលស្គាល់ដោយប្រទេសទាំងពីរ»។

ជាមួយគ្នានេះសម្ដេចបានបញ្ជាក់ជាថ្មីថាកម្ពុជាមិនដែលរំលោភបំពានអធិបតេយ្យភាពរបស់ប្រទេសដទៃឡើយ ហើយក៏មិនឱ្យប្រទេសណាមកបំពានអធិបតេយ្យភាពរបស់កម្ពុជាដែរ ដោយប្រើប្រាស់យន្តការច្បាប់ ការរួមគ្នាដោះស្រាយដោយសន្តិវិធី។

បើតាមសម្ដេចធិបតីនេះជាលើកទី២ក្នុងប្រវត្តិសាស្ត្រ UNCLOS ហើយដែលប្រទេសមានជម្លោះលើដែនសមុទ្រស្វែងរកយន្តការផ្សះផ្សាដោយបង្ខំនេះបន្ទាប់ពីប្រទេសអូស្រ្តាលី និងទីម័រខាងកើត ក្នុងឆ្នាំ២០១៨។

ប្រទេសថៃបានសម្រេចលុបចោលអនុស្សរណៈយោគយល់គ្នាលើតំបន់សមុទ្រត្រួតស៊ីគ្នា ឆ្នាំ២០០១ ជាមួយកម្ពុជាកាលពីថ្ងៃទី៥ ខែឧសភា ឆ្នាំ២០២៦ ដោយប្រើលេសថាគ្មានវឌ្ឍនភាព។ ក្រោយការប្រកាសលុបដោយឯកតោភាគីរបស់ថៃ កម្ពុជាបានប្រកាសជំហរថានឹងប្រើប្រាស់យន្តការផ្សះផ្សាដោយចាប់បង្ខំក្នុងច្បាប់សមុទ្រអន្តរជាតិដើម្បីស្វែងរកដំណោះស្រាយបន្ត៕

អត្ថបទដោយ ហ៊ុន សិរីវឌ្ឍន៍

The post កម្ពុជាផ្ញើលិខិតជាផ្លូវការទៅថៃ និងអគ្គលេខាធិការ UN ដើម្បីចាប់ផ្ដើមដំណើរការយន្តការផ្សះផ្សាដោយបង្ខំ appeared first on Kampuchea Thmey Daily.

យន្តការនៃការ​ផ្សះផ្សាដោយបង្ខំ Archives - Kampuchea Thmey Daily

អ្នក​សម្របសម្រួល​ UN គាំទ្រ​កម្ពុជា​ដែល​ប្រើ​យន្ត​ការ​ផ្សះផ្សា​ដោយ​បង្ខំ​ជាមួយ​ថៃ​

ដំណើរការ​នៃ​យន្ត​ការ​ផ្សះផ្សា​ដោយ​បង្ខំ​ក្នុង​នីតិ​សមុទ្រ

យន្តការនៃការផ្សះផ្សាដោយបង្ខំ Archives - Kampuchea Thmey Daily

អ្នកសម្របសម្រួល UN គាំទ្រកម្ពុជាដែលប្រើយន្តការផ្សះផ្សាដោយបង្ខំជាមួយថៃ

ដំណើរការនៃយន្តការផ្សះផ្សាដោយបង្ខំក្នុងនីតិសមុទ្រ