ស្ថានទូតជប៉ុនប្រចាំកម្ពុជា នាល្ងាចថ្ងៃទី២៨ ខែវិច្ឆិកា បាន រៀបចំពិធីប្រគល់លិខិតសរសើរពីរដ្ឋមន្ត្រីការបរទេសជប៉ុន ជូនលោក សាកាណុ អ៊ីសសេ ទីប្រឹក្សាក្រសួងយុត្តិធម៌កម្ពុជា ដើម្បីជាការទទួលស្គាល់នូវការរួមចំណែករបស់លោក ក្នុងការជំរុញចំណងមិត្តភាពរវាងជប៉ុននិងកម្ពុជា។

ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា អ៊ូអិណុ អាត់ស៊ូស៊ី សម្តែងនូវការអបអរសាទរយ៉ាងស្មោះស្ម័គ្រចំពោះលោក Sakano Issei ទីប្រឹក្សាក្រសួងយុត្តិធម៌កម្ពុជា ដែលទទួលបានលិខិតសរសើររបស់រដ្ឋមន្ត្រីការបរទេសជប៉ុនឆ្នាំ ២០២៥។

ឯកអគ្គរាជទូត អ៊ូអិណុ អាត់ស៊ូស៊ី ឱ្យដឹងថា លោក Sakano បានធ្វើការងារជាច្រើន ក្នុងកិច្ចសហប្រតិបត្តិការរវាងប្រទេសជប៉ុននិងប្រទេសកម្ពុជា ក្នុងវិស័យច្បាប់ និងយុត្តិធម៌ ដែលជាហេតុផលដែលលោកទទួលបានសិខិតសរសើររបស់រដ្ឋមន្ត្រីការបរទេសជប៉ុន។

បើតាមឯកអគ្គរាជទូតជប៉ុន បន្ទាប់ពីបញ្ចប់ការសិក្សាពីសាកលវិទ្យាល័យលោក សាកាណូ បានបង្កើតទំនាក់ទំនងជាមួយប្រទេសកម្ពុជា តាមរយៈការបម្រើការជាអ្នកស្ម័គ្រចិត្តសម្រាប់អាជ្ញាធរបណ្តោះអាសន្នអង្គការសហប្រជាជាតិប្រចាំនៅកម្ពុជា(អ៊ុនតាក់) និងជាបុគ្គលិកគម្រោង នៃអង្គការមិនមែនរដ្ឋាភិបាល(NGO)មួយនៅកម្ពុជា។នៅក្នុងខែធ្នូ ឆ្នាំ១៩៩៨ លោក Sakano បានមកប្រទេសកម្ពុជាក្នុងនាមជាអ្នកជំនាញ JICA រយៈពេលវែង ហើយលោកបានទទួលបន្ទុកក្នុងការបង្កើតគម្រោងអភិវឌ្ឍន៍វិស័យច្បាប់និងយុត្តិធម៌។ បន្ទាប់មក លោក សាកាណូ បានមកប្រទេសកម្ពុជាជាអ្នកជំនាញ JICA រយៈពេលវែង ម្តងទៀតនៅឆ្នាំ២០០៤ ហើយទទួលបន្ទុកក្នុងដំណាក់កាលទី២និងទី៣ នៃគម្រោងអភិវឌ្ឍន៍វិស័យច្បាប់និងយុត្តិធម៌។ លោក សាកាណូបានខិតខំប្រឹងប្រែងក្នុងការរៀបចំតាក់តែងច្បាប់ និងបទប្បញ្ញត្តិសំខាន់ៗនៅប្រទេសកម្ពុជារួមទាំងក្រមរដ្ឋប្បវេណី និងការបណ្តុះបណ្តាលធនធានមនុស្សក្នុងវិស័យច្បាប់ និងយុត្តិធម៌រយៈពេលសរុបជាង១០ឆ្នាំ។

លោក សាកាណូ បានបម្រើការជាទីប្រឹក្សាក្រសួងយុត្តិធម៌កម្ពុជាចាប់តាំងពីឆ្នាំ២០១៨ ហើយបន្តចូលរួមយ៉ាងសកម្មក្នុងការធ្វើវិសោធនកម្មច្បាប់ និងបទប្បញ្ញត្តិដូចជាច្បាប់ភូមិបាលជាដើម។ លោក សាកាណូ ក៏បានចូលរួមចំណែកយ៉ាងច្រើន ដល់ការយោគយល់គ្នានិងមិត្តភាពរវាងប្រទេសជប៉ុន និងកម្ពុជា តាមរយៈការធ្វើបាឋកថា នៅតាមសាកលវិទ្យាល័យនានាក្នុងប្រទេសជប៉ុនអំពីបទពិសោធន៍របស់លោកខក្នុងការគាំទ្រដល់ការអភិវឌ្ឍវិស័យច្បាប់និងយុត្តិធម៌របស់ប្រទេសកម្ពុជានិងប្រព័ន្ធច្បាប់នៅកម្ពុជាផងដែរ។

ឯកអគ្គរាជទូត អ៊ូអិណុ អាត់ស៊ូស៊ី  វាយតម្លៃថា÷”ជោគជ័យជាច្រើនឆ្នាំរបស់លោកសាកាណូ នៅកម្ពុជា គឺជានិមិត្តរូបនៃការគាំទ្ររបស់ប្រទេសជប៉ុនចំពោះការកសាង ប្រទេសជាតិរបស់កម្ពុជាហើយលោកបានចូលរួមចំណែកមិនត្រឹមតែក្នុងវិស័យច្បាប់ និងយុត្តិធម៌ប៉ុណ្ណោះទេ ប៉ុន្តែថែមទាំងក្នុងការអភិវឌ្ឍទំនាក់ទំនងទ្វេភាគីទាំងមូលផងដែរ។ ខ្ញុំសូមឆ្លៀតយកឱកាសនេះ ដើម្បីសម្តែងការគោរពដល់សមិទ្ធផលជាច្រើនឆ្នាំរបស់លោកសាកាណូ និងសូមជូនពរឱ្យលោកទទួលបានជោគជ័យក្នុងគ្រប់ភារកិច្ចថែមទៀត នាពេលអនាគត។ “។

ស្របពេលជំនួយរបស់ប្រទេសជប៉ុនចំពោះប្រទេសកម្ពុជាសម្រាប់ការអភិវឌ្ឍប្រព័ន្ធច្បាប់បានបន្តអស់រយៈពេលជាង២៥ ឆ្នាំមកហើយ ហើយឯកអគ្គរាជទូតជប៉ុននៅកម្ពុជាយល់ថាជំនួយដ៏យូរអង្វែងនេះ អាចធ្វើទៅបានដោយសារកិច្ចខិតខំប្រឹងប្រែងឥតឈប់ឈររបស់លោក Sakano និងភាគីពាក់ព័ន្ធទាំងអស់របស់ប្រទេសទាំងពីរ ដែលមានវត្តមាននៅទីនេះក្នុងថ្ងៃនេះ។

ឯកអគ្គរាជទូតជប៉ុន ដាក់ក្ដីសង្ឃឹមថា ÷”ការប្រគល់លិខិតសរសើររបស់រដ្ឋមន្ត្រីការបរទេសជប៉ុនដល់លោកSakano នេះ នឹងធ្វើឱ្យកិច្ចសហប្រតិបត្តិការរវាងប្រទេសជប៉ុន និងកម្ពុជាកាន់តែស៊ីជម្រៅថែមទៀតនៅក្នុងវិស័យច្បាប់ និងយុត្តិធម៌និងនាំទៅរកការអភិវឌ្ឍបន្ថែមទៀតនៃប្រព័ន្ធច្បាប់ និងយុត្តិធម៌របស់ប្រទេសកម្ពុជា។”៕

The post ទីប្រឹក្សាក្រសួងយុត្តិធម៌កម្ពុជាសញ្ជាតិជប៉ុន ដែលជួយវិស័យច្បាប់ និងយុត្តិធម៌ជាង៣០ឆ្នាំ ទទួលបានលិខិតសរសើរពីរដ្ឋមន្ត្រីការបរទេសជប៉ុន appeared first on Kampuchea Thmey Daily.

បើតាមការបញ្ជាក់ ការចុះហត្ថាលេខារវាងថ្នាក់ដឹកនាំតំណាងប្រទេសទាំងពីរ នឹងធ្វើឡើងនៅថ្ងៃទី២៤ ខែឧសភា នាទីស្តីការក្រសួង លើលិខិតប្តូរសារ និងឯកសារពាក់ព័ន្ធមួយចំនួនខាងក្រោមនេះ៖
១. ឥណទានសម្បទានប្រាក់យ៉េន ដែលមានទឹកប្រាក់ចំនួន ៧.២០៥ លានយ៉េន ដែលស្មើនឹងប្រមាណ ៥២,៦ លានដុល្លារអាមេរិក សម្រាប់អនុវត្ត «គម្រោងការធ្វើឱ្យប្រសើរឡើងវិញនូវផ្លូវជាតិលេខ៥ (កំណាត់ផ្លូវពីព្រែកក្តាម-ធ្លាម្អម) ដំណាក់កាលទី៤» ។

២. ហិរញ្ញប្បទានឥតសំណង ដែលមានទឹកប្រាក់ចំនួន ៣៦៦ លានយ៉េន (ប្រមាណ ២,៦៧ លានដុល្លារអាមេរិក) សម្រាប់អនុវត្ត «គម្រោងអាហាររូបករណ៍អភិវឌ្ឍន៍ធនធានមនុស្ស»។

បើតាមនាយកដ្ឋាន ការផ្តល់ជំនួយអភិវឌ្ឍន៍ផ្លូវការខាងលើ ជាការចូលរួមចំណែកដលល់កិច្ចខិតខំប្រឹងប្រែងអភិវឌ្ឍន៍​សេដ្ឋកិច្ច-សង្គម ជាបន្តបន្ទាប់ របស់រាជរដ្ឋាភិបាលកម្ពុជា ព្រមទាំងបង្កើតគការពង្រីកទំនាក់ទំនងល្អ និងកិច្ចសហប្រតិបត្តិការ ដែលកំពុងលូតលាស់លើគ្រប់វិស័យរវាងប្រជាជាតិទាំងពីរ៕

The post ជប៉ុន នឹងផ្តល់ឥណទាន និងហិរញ្ញប្បទានឥតសំណងបន្ថែមទៀតដល់កម្ពុជា appeared first on Kampuchea Thmey Daily.