ការលក់រថយន្តចិននៅឥណ្ឌូណេស៊ីកើនឡើងកប់ពពក ខណៈរថយន្តជប៉ុនធ្លាក់ចុះ

Huon Dina — Mon, 12 May 2025 07:42:22 +0000

សមាគមឧស្សាហកម្មរថយន្តឥណ្ឌូណេស៊ី (Gaikindo) បានឱ្យដឹងថា ការលក់រថយន្តរបស់ក្រុមហ៊ុនផលិតចិន បានវាតទីលើចំណែកទីផ្សារឥណ្ឌូណេស៊ីយ៉ាងឆាប់រហ័ស ដោយកើនឡើងប្រមាណ ១៥៣ ភាគរយ នៅត្រីមាសទី ១ ឆ្នាំ ២០២៥ ទោះបីជាទីផ្សារលក់ទាំងមូល ក៏ដូចជាការលក់របស់ក្រុមហ៊ុនជប៉ុន បានធ្លាក់ចុះក៏ដោយ។ នេះបើតាមការចុះផ្សាយរបស់កាសែត Jakarta Globe កាលពីថ្ងៃអាទិត្យ។

ក្រុមហ៊ុនផលិតរថយន្តចិន បានលក់រថយន្តចំនួន ២០ ៦៧២ គ្រឿង ចន្លោះពីខែមករា ដល់ខែមីនា ពោលគឺកើនឡើងពីត្រឹម ៨ ១៤៨ គ្រឿង នៅរយៈពេលដូចគ្នាកាលពីឆ្នាំមុន។ ក្រុមហ៊ុនចិន កាន់កាប់ចំណែកទីផ្សារ ១០ ភាគរយ របស់ឥណ្ឌូណេស៊ី ដោយកើនឡើងពីត្រឹម ៣,៨៣ ភាគរយ នៅឆ្នាំមុន។

ផ្ទុយទៅវិញ ទីផ្សារលក់រថយន្តឥណ្ឌូណេស៊ី បានធ្លាក់ចុះ ៤,៧ ភាគរយ មកត្រឹម ២០៥ ១៦០ គ្រឿង ពី ២១៥ ១៦០ គ្រឿង នៅត្រីមាសទី ១ ឆ្នាំមុន។

ក្រុមហ៊ុនជប៉ុនដូចជា Daihatsu, Honda, Suzuki, Mitsubishi, Isuzu សុទ្ធតែកត់ត្រាពីការធ្លាក់ចុះ។ មានតែ Toyota ប៉ុណ្ណោះ ដែលជាក្រុមហ៊ុនជប៉ុន ដែលបានកត់ត្រាពីកំណើនការលក់រថយន្តនៅឥណ្ឌូណេស៊ី ប្រមាណ ៥ ភាគរយ ដោយនាំមុខគេលើចំណែកទីផ្សារ ៣៣,៦ ភាគរយ។ ចំណែកទីផ្សាររបស់ក្រុមហ៊ុនជប៉ុន បានធ្លាក់ចុះពី ៩១,៧ ភាគរយ នៅត្រីមាសទី ១ ឆ្នាំមុន មកនៅ ៨៥,៦ ភាគរយ នៅត្រីមាសទី ១ ឆ្នាំនេះ។

កំណើននៃការលក់រថយន្តរបស់ចិន បណ្ដាលមកពីកំណើនតម្រូវការនៃរថយន្តអគ្គិសនី ដែលក្រុមហ៊ុនជប៉ុនមិនទាន់ប្រជែងខ្លាំងនៅឡើយនៅលើទីផ្សារ។ អ្នកជំនាញលើកឡើងថា កំណើនដដែលមិនមែនមកពីការរីកមាឌនៃទីផ្សារលក់រថយន្តឥណ្ឌូណេស៊ីនោះទេ ប៉ុន្តែជាការដណ្ដើមចំណែកទីផ្សាររបស់ជប៉ុន៕

The post ការលក់រថយន្តចិននៅឥណ្ឌូណេស៊ីកើនឡើងកប់ពពក ខណៈរថយន្តជប៉ុនធ្លាក់ចុះ appeared first on Kampuchea Thmey Daily.

កំណើននៃការនាំចេញរថយន្តរបស់ចិន រំពឹងថានឹងធ្លាក់ចុះនៅឆ្នាំនេះ

Huon Dina — Tue, 14 Jan 2025 03:33:02 +0000

ទិន្នន័យពីសមាគមក្រុមហ៊ុនផលិតរថយន្តចិន (CAAM) បានបង្ហាញកាលពីថ្ងៃចន្ទថា ការនាំចេញរថយន្តរបស់ប្រទេសចិនរំពឹងថានឹងកើនឡើងត្រឹម ៥,៨ ភាគរយ ក្នុងចំនួនសរុប ៦,២ លានគ្រឿងនៅឆ្នាំ ២០២៥ នេះ ដោយថយចុះពីកំណើន ១៩,៣ ភាគរយ ក្នុងឆ្នាំ ២០២៤។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

CAAM មិនបានផ្តល់ការប៉ាន់ស្មានលម្អិតស្ដីពីប្រភេទរថយន្តតាមម៉ាស៊ីននោះទេ ប៉ុន្តែបានបញ្ជាក់ថា ការនាំចេញរថយន្តអគ្គិសនីបានធ្លាក់ចុះ ១០,៤ ភាគរយ កាលពីឆ្នាំមុន ខណៈការនាំចេញនៃរថយន្តកូនកាត់ (ស៊ីសាំង និងសាកភ្លើង) បានកើនឡើងរហូតដល់ ១៩០ ភាគរយ។

ការនាំចេញរថយន្តអគ្គិសនីក្នុងឆ្នាំ ២០២៣ បានកើនឡើងរហូតដល់ ៨០,៩ ភាគរយ។ ការថយចុះយ៉ាងគំហុកបែបនេះនៅឆ្នាំ ២០២៤ បង្ហាញពីផលប៉ះពាល់ ដែលបណ្ដាលមកពីវិធានការពន្ធ ដែលសហភាពអឺរ៉ុបបានដាក់លើរថយន្តអគ្គិសនីនាំចូលពីចិនកាលពីចុងខែតុលា ឆ្នាំមុន។

ខណៈ CAAM ព្យាករពីការធ្លាក់ចុះនៃកំណើននាំចេញរថយន្តចិន អ្នកវិភាគមួយចំនួនបានលើកឡើងពីផលវិបាកនៃភាពតានតឹងពាណិជ្ជកម្ម ដែលបណ្ដាលមកពីគោលនយោបាយការពារនិយម ដែលកំណត់គោលដៅលើរថយន្តអគ្គិសនីចិន ចំពេលដែលវិស័យនេះរបស់ចិនហក់ឡើងដណ្ដើមចំណែកទីផ្សារសកល។

ទោះបីជាបែបនេះក៏ដោយ CAAM បានព្យាករថា ការលក់រថយន្តក្នុងស្រុកចិននឹងកើនឡើង ៤,៧ ភាគរយ ក្នុងចំនួនសរុប ៣២,៩ លានគ្រឿងនៅឆ្នាំនេះ ដោយបន្តពីកំណើន ៤,៥ ភាគរយ នៅឆ្នាំ ២០២៤៕

The post កំណើននៃការនាំចេញរថយន្តរបស់ចិន រំពឹងថានឹងធ្លាក់ចុះនៅឆ្នាំនេះ appeared first on Kampuchea Thmey Daily.

រថយន្តចិន Archives - Kampuchea Thmey Daily

ការលក់រថយន្តចិននៅឥណ្ឌូណេស៊ីកើនឡើង​កប់​ពពក ខណៈរថយន្តជប៉ុនធ្លាក់ចុះ

កំណើននៃការនាំចេញ​រថយន្តរបស់​ចិន រំពឹង​ថានឹង​ធ្លាក់ចុះ​នៅ​ឆ្នាំ​នេះ

ការលក់រថយន្តចិននៅឥណ្ឌូណេស៊ីកើនឡើងកប់ពពក ខណៈរថយន្តជប៉ុនធ្លាក់ចុះ

កំណើននៃការនាំចេញរថយន្តរបស់ចិន រំពឹងថានឹងធ្លាក់ចុះនៅឆ្នាំនេះ