រុស្ស៊ី Archives - Kampuchea Thmey Daily

ត្រាំ គំរាមដាក់ទណ្ឌកម្មរុស្ស៊ី និងប្រទេសពាក់ព័ន្ធ ឱ្យធ្ងន់ធ្ងរ បើមិនបញ្ចប់សង្រ្គាមនៅអ៊ុយក្រែន

Huon Dina — Thu, 23 Jan 2025 04:16:00 +0000

ប្រធានាធិបតីសហរដ្ឋអាមេរិក លោក ដូណាល់ ត្រាំ បានគំរាមកាលពីថ្ងៃពុធថា លោកនឹងបញ្ជូនពន្ធថ្មីទៅលើកញ្ចប់ទណ្ឌកម្មរបស់សហរដ្ឋអាមេរិកលើរុស្ស៊ី និងប្រទេសពាក់ព័ន្ធផ្សេងៗ ប្រសិនបើមិនសម្រេចបាននូវកិច្ចព្រមព្រៀងបញ្ចប់សង្រ្គាមនៅអ៊ុយក្រែនទេនោះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោក ត្រាំ បានបង្ហោះនៅលើបណ្ដាញសង្គម Truth Social របស់ខ្លួន យ៉ាងដូច្នេះថា៖ «ដោះស្រាយឥឡូវនេះ ហើយបញ្ឈប់សង្រ្គាមឆ្កួតឡប់ឥឡូវនេះ។ វាគ្រាន់តែកាន់អាក្រក់ទៅៗប៉ុណ្ណោះទេ»។ លោកបន្តថា៖ «បើយើងមិនសម្រេចបានកិច្ចព្រមព្រៀង និងឱ្យបានឆាប់ទេនោះ នោះខ្ញុំគ្មានជម្រើសអ្វីក្រៅតែពីការដាក់ពន្ធ ពន្ធគយ និងទណ្ឌកម្មកម្រិតខ្ពស់លើគ្រប់អ្វីទាំងអស់ដែលរុស្ស៊ីលក់ឱ្យសហរដ្ឋអាមេរិក និងប្រទេសចូលរួមផ្សេងៗទៀត»។

លោក ត្រាំ មិនបានបញ្ចាក់ឱ្យច្បាស់អំពី «ប្រទេសចូលរួម» នៅក្នុងជម្លោះ ឬថាតើបែបណាដែលហៅថា «ការចូលរួម» នោះទេ។

គួរគត់សម្គាល់ថា រដ្ឋបាលអាណត្តិរបស់លោកប្រធានាធិបតី ចូ បៃដិន បានដាក់ទណ្ឌកម្មធ្ងន់ធ្ងរផ្នែកធនាគារ ផលិតកម្ម ថាមពល បច្ចេកវិទ្យា ការពារជាតិ ក្នុងចំណោមវិស័យផ្សេងៗទៀត រួចហើយទៅលើរុស្ស៊ី ក្រោយមេដឹកនាំប្រទេសនេះ លោក វ្ល៉ាឌីមៀរ ពូទីន បញ្ជាទ័ពឱ្យឈ្លានពានអ៊ុយក្រែនទ្រង់ទ្រាយធំនៅខែកុម្ភៈ ឆ្នាំ ២០២២។ មកទល់ពេលនេះ វាមានរយៈពេលជិត ៣ ឆ្នាំទៅហើយ ហើយការឈ្លានពាននៅតែបន្ត។

ប្រតិកម្មទៅនឹងការលើកឡើងរបស់លោក ត្រាំ អគ្គរដ្ឋទូតរងរុស្ស៊ីប្រចាំអង្គការសហប្រជាជាតិ លោក Dmitry Polyanskiy បាននិយាយថា រុស្ស៊ីនឹងត្រូវមើលឃើញនូវអ្វីដែលលោក ត្រាំ គិតថាជា «កិច្ចព្រមព្រៀង» ដើម្បីបញ្ចប់សង្រ្គាមនៅអ៊ុយក្រែន ជាមុនសិន។ លោកប្រាប់រ៉យទ័រថា៖ «វាមិនមែនគ្រាន់តែជាសំណួរនៃការបញ្ចប់សង្រ្គាមនោះទេ។ វាជាសំណួរដំបូង និងចម្បងបំផុតក្នុងការដោះស្រាយបញ្ហាឫសគល់នៃវិបត្តិអ៊ុយក្រែន»។

គួរគូសបញ្ជាក់ថា មុនឈ្នះការបោះឆ្នោតនាថ្ងៃទី ៥ វិច្ឆិកា លោក ត្រាំ បានបញ្ចេញវោហាសាស្រ្តជាច្រើនដងថា លោកនឹងបញ្ចប់ «សង្រ្គាមអ៊ុយក្រែន» នៅថ្ងៃដំបូងពេលលោកឡើងកាន់អំណាច។ យ៉ាងណាមិញ ក្រោយមក ជំនួយការរបស់លោក ត្រាំ បានលើកឡើងថា កិច្ចព្រមព្រៀងដើម្បីបញ្ចប់សង្រ្គាមអាចចំណាយពេលច្រើនខែ ឬយូរជាងនេះ៕

The post ត្រាំ គំរាមដាក់ទណ្ឌកម្មរុស្ស៊ី និងប្រទេសពាក់ព័ន្ធ ឱ្យធ្ងន់ធ្ងរ បើមិនបញ្ចប់សង្រ្គាមនៅអ៊ុយក្រែន appeared first on Kampuchea Thmey Daily.

ធនាគាររុស្ស៊ី Sberbank៖ ពាណិជ្ជកម្មឥណ្ឌា-រុស្ស៊ីលូតលាស់ ទោះបីមានទណ្ឌកម្មពីលោកខាងលិចក្ដី

Huon Dina — Tue, 03 Sep 2024 04:02:52 +0000

អគ្គនាយករងនៃធនាគារផ្តល់ប្រាក់កម្ចីធំជាងគេរបស់រុស្ស៊ី Sberbank លោក Anatoly Popov បានប្រាប់ទីភ្នាក់ងារសារព័ត៌មានរ៉យទ័រថា ពាណិជ្ជកម្មរបស់រុស្ស៊ីជាមួយឥណ្ឌាកំពុងរីកចម្រើន ហើយការទូទាត់ហិរញ្ញវត្ថុទ្វេភាគីកំពុងដំណើរការយ៉ាងរលូនដោយគ្មានបញ្ហារំខានដូចពាណិជ្ជកម្មជាមួយប្រទេសដទៃទៀត ទោះបីមានទណ្ឌកម្មពីលោកខាងលិចក្ដី។

Sberbank គ្រប់គ្រងការទូទាត់រហូតដល់ ៧០ ភាគរយ នៃការនាំចេញរុស្ស៊ីទាំងអស់ទៅកាន់ប្រទេសឥណ្ឌា។ ពាណិជ្ជកម្មរបស់រុស្ស៊ីជាមួយឥណ្ឌា បានកើនឡើងជិតទ្វេដងទៅដល់ ៦៥ ប៊ីលានដុល្លារ ក្នុងឆ្នាំ ២០២៣ ដោយឥណ្ឌាបានក្លាយជាអតិថិជនទិញប្រេងដ៏សំខាន់បំផុតមួយរបស់រុស្ស៊ី ក្រោយលោកខាងលិចដាក់ទណ្ឌកម្មនៅឆ្នាំ ២០២២ ជុំវិញការចូលឈ្លានពានអ៊ុយក្រែន ដោយរំលោភច្បាប់អធិបតេយ្យភាពអន្តរជាតិ។

លោក Popov បានប្រាប់រ៉យទ័រក្នុងបទសម្ភាសន៍មុនវេទិកាសេដ្ឋកិច្ចបូព៌ា ដែលជាសន្និសីទសេដ្ឋកិច្ចផ្តោតលើដៃគូអាស៊ីរបស់រុស្ស៊ីថា៖ «នៅឆ្នាំ ២០២២ មានការកើនឡើងគួរឱ្យកត់សម្គាល់នៃពាណិជ្ជកម្មរុស្ស៊ីនៅទីផ្សារឥណ្ឌា ពីព្រោះទីផ្សារនេះបម្រើជាជម្រើសមួយ»។

Sberbank មានសាខារបស់ខ្លួននៅឥណ្ឌាក្នុងក្រុង Delhi និង Mumbai ក៏ដូចជាមជ្ឈមណ្ឌលព័ត៌មានវិទ្យានៅក្រុង Bangalore ។ ធនាគារនេះស្ថិតនៅក្រោមការដាក់ទណ្ឌកម្មរបស់លោកខាងលិច ដូច្នេះហើយវាមិនអាចធ្វើប្រតិបត្តិការជាដុល្លារ និងអឺរ៉ូ ឬប្រើប្រព័ន្ធផ្ទេរប្រាក់ SWIFT សម្រាប់ការផ្ទេរប្រាក់អន្តរជាតិបាននោះទេ។

ទោះយ៉ាងណា លោក Popov បាននិយាយថា ធនាគារមិនបានជួបប្រទះនឹងបញ្ហាណាមួយក្នុងប្រទេសឥណ្ឌាទេ។ លោកថ្លែងយ៉ាងដូច្នេះថា៖ «Sberbank បានចូលរួមពេញលេញក្នុងប្រព័ន្ធទូទាត់ និងអន្តរធនាគាររបស់ឥណ្ឌាទាំងអស់។ គ្មានការរឹតបន្តឹងលើប្រតិបត្តិការរបស់ខ្លួនទេ»។

គួរគូសបញ្ជាក់ថា ខុសពីសម្ព័ន្ធមិត្តលោកខាងលិច ឥណ្ឌាមិនបានចូលរួមដាក់ទណ្ឌកម្មប្រឆាំងរុស្ស៊ីណាមួយឡើយ ហើយរក្សាទំនាក់ទំនងមិត្តភាពជាមួយរុស្ស៊ី ដែលជាសមាជិករួមគ្នានៃក្រុមប្រទេសប្រ៊ីក (BRICS)៕

The post ធនាគាររុស្ស៊ី Sberbank៖ ពាណិជ្ជកម្មឥណ្ឌា-រុស្ស៊ីលូតលាស់ ទោះបីមានទណ្ឌកម្មពីលោកខាងលិចក្ដី appeared first on Kampuchea Thmey Daily.

រុស្ស៊ី​ Archives - Kampuchea Thmey Daily

ត្រាំ គំរាម​​ដាក់ទណ្ឌកម្មរុស្ស៊ី និង​ប្រទេស​ពាក់ព័ន្ធ ​ឱ្យធ្ងន់ធ្ងរ ​បើមិនបញ្ចប់សង្រ្គាមនៅអ៊ុយក្រែន

ធនាគាររុស្ស៊ី​ Sberbank៖ ​ពាណិជ្ជកម្ម​ឥណ្ឌា​-រុស្ស៊ី​លូត​លាស់​ ទោះ​បី​មាន​ទណ្ឌកម្ម​ពី​លោកខាង​លិច​ក្ដី​ ​

រុស្ស៊ី Archives - Kampuchea Thmey Daily

ត្រាំ គំរាមដាក់ទណ្ឌកម្មរុស្ស៊ី និងប្រទេសពាក់ព័ន្ធ ឱ្យធ្ងន់ធ្ងរ បើមិនបញ្ចប់សង្រ្គាមនៅអ៊ុយក្រែន

ធនាគាររុស្ស៊ី Sberbank៖ ពាណិជ្ជកម្មឥណ្ឌា-រុស្ស៊ីលូតលាស់ ទោះបីមានទណ្ឌកម្មពីលោកខាងលិចក្ដី