មុនដំបូង ធនាគារ អេស ប៊ី អាយ (ខេមបូឌា) ម.ក ត្រូវបានបង្កើតឡើងជាគ្រឹះស្ថានមីក្រូហិរញ្ញវត្ថុ ហើយបានវិវត្តខ្លួនតាមរយៈភាពជាដៃគូយុទ្ធសាស្ត្ររវាង លោកអ្នកឧកញ៉ា លី ហួរ និងក្រុមហ៊ុន SBI Holdings, Inc. រហូតក្លាយជាធនាគារ អេស ប៊ី អាយ លី ហួរ ម.ក។ នៅក្នុងការផ្លាស់ប្តូរដ៏សំខាន់មួយ ចាប់ពីខែតុលា ឆ្នាំ២០២៥ មក ធនាគារបានក្លាយជាបុត្រសម្ព័ន្ធដែលគ្រប់គ្រងទាំងស្រុងដោយក្រុមហ៊ុន SBI Holdings, Inc. ដែលជាក្រុមហ៊ុនហិរញ្ញវត្ថុលំដាប់ពិភពលោកដ៏ធំបំផុត។

ការដាក់បញ្ចូលធនាគារ អេស ប៊ី អាយ (ខេមបូឌា) ម.ក ទៅក្នុងបណ្តាញសកលរបស់ក្រុមហ៊ុន SBI Group គឺជាការវិឌ្ឍនជាយុទ្ធសាស្ត្រដែលត្រូវបានបង្កើតឡើង ដើម្បីទាញយកអត្ថប្រយោជន៍ពីធនធានអន្តរជាតិ។ ការប្តេជ្ញាចិត្តនេះត្រូវបានបង្ហាញយ៉ាងច្បាស់នៅក្នុងអត្តសញ្ញាណនាមករណ៍ថ្មីរបស់ធនាគារ ដោយការប្រើប្រាស់និមិត្តសញ្ញារបស់ក្រុមហ៊ុនមេ SBI Holdings បង្ហាញពីចក្ខុវិស័យរយៈពេលវែងសម្រាប់ការអភិវឌ្ឍប្រកបដោយចីរភាព។ យុទ្ធសាស្រ្តនៃ “កម្លាំងសកល ផ្តល់ប្រយោជន៍ក្នុងស្រុក” នេះ ធានាថាប្រតិបត្តិការនៅកម្ពុជាត្រូវបានគាំទ្រដោយក្រុមហ៊ុន SBI Holdings, Inc. ដ៏រឹងមាំនៅប្រទេសជប៉ុន។

បច្ចុប្បន្ននេះ ធនាគារ អេស ប៊ី អាយ (ខេមបូឌា) ម.ក បានបង្ហាញពីកំណើនគួរឱ្យកត់សម្គាល់ ដោយមានទ្រព្យសកម្មសរុបកើនឡើងលើសពី ១,១២ ប៊ីលានដុល្លារអាមេរិក ជាមួយនឹងបណ្តាញសាខាគ្របដណ្តប់ទូទាំងប្រទេសចំនួន៥១ សាខា។ យុទ្ធសាស្ត្ររបស់ធនាគារបានរួមបញ្ចូលគ្នាយ៉ាងមានប្រសិទ្ធភាពរវាងហេដ្ឋារចនាសម្ព័ន្ធរូបវន្ត និងសេវាធនាគារឌីជីថលឈានមុខគេ ដើម្បីផ្តល់ជូននូវសេវាកម្មប្រកបដោយគុណភាពខ្ពស់ ជូនដល់អតិថិជនប្រកបអាជីវកម្ម និងអ្នកប្រើប្រាស់ទូទៅ ដែលមិនទាន់ទទួលបានសេវាហិរញ្ញវត្ថុពេញលេញនៅក្នុងសកម្មសេដ្ឋកិច្ចរបស់ពួកគេ។

បន្ថែមលើការផ្លាស់ប្តូរនាមករណ៍ថ្មីនេះ ក្រុមហ៊ុន SBI Group ក៏បានបន្ថែមឥណទានចំនួន ១០០ លានដុល្លារអាមេរិក ដែលឆ្លុះបញ្ចាំងពីការប្តេជ្ញាចិត្តរយៈពេលវែងរបស់ខ្លួនចំពោះវិស័យហិរញ្ញវត្ថុនៅប្រទេសកម្ពុជា។ ការគាំទ្រនេះជួយពង្រឹងសមត្ថភាពរបស់ធនាគារសម្រាប់កំណើនប្រកបដោយចីរភាព និងបង្កើនលទ្ធភាពក្នុងការផ្តល់នូវសេវា ធនាគារដែលមានភាពច្នៃប្រឌិត សុវត្ថិភាព និងគួរឱ្យទុកចិត្ត ជូនដល់ក្រុមគ្រួសារ អាជីវកម្ម និងសេដ្ឋកិច្ចទាំងមូល។

អំពីក្រុមហ៊ុន SBI Holdings, Inc.

ក្រុមហ៊ុន SBI Holdings, Inc. ត្រូវបានបង្កើតឡើងក្នុងឆ្នាំ១៩៩៩ ជាអ្នកផ្តួចផ្តើមផ្តល់សេវាហិរញ្ញវត្ថុតាមអ៊ីនធឺ      ណិត។ ក្រុមហ៊ុន SBI Holdings, Inc. បានវិវត្តទៅជាសម្ព័ន្ធក្រុមហ៊ុនហិរញ្ញវត្ថុដែលមានឥទ្ធិពលបំផុតមួយក្នុងពិភពលោក ដោយប្រតិបត្តិការនៅជាង២០ ប្រទេស ជាមួយនឹងបុត្រសម្ព័ន្ធចំនួន ៦៣៥ ក្រុមហ៊ុន នៅទូទាំងពិភពលោក។

ដោយមានទីស្នាក់ការកណ្តាលនៅទីក្រុងតូក្យូ ប្រទេសជប៉ុន ក្រុមហ៊ុនប្រតិបត្តិការលើប្រព័ន្ធអេកូឡូស៊ីដ៏ទូលំទូលាយ ដែលគ្រប ដណ្តប់លើវិស័យអាជីវកម្មស្នូលចំនួន៥ រួមមាន៖ សេវាហិរញ្ញវត្ថុ (រួមទាំងជាអន្តរការីជើងសាអនឡាញ និងធនាគារឌីជីថល ធំជាងគេរបស់ជប៉ុន) ការគ្រប់គ្រងទ្រព្យសម្បត្តិ ការវិនិយោគលើភាគហ៊ុនឯកជន (PE Investment) អាជីវកម្មទ្រព្យសកម្មគ្រីបតូ (Crypto-asset) និងអាជីវកម្មជំនាន់ថ្មី (បច្ចេកវិទ្យាសាស្ត្រ និង Web3)។ វ៉ែបសាយរបស់ក្រុមហ៊ុន៖ https://www.sbigroup.co.jp/english/company/group/ sbilhbank.html

ក្រុមហ៊ុន SBI Holdings, Inc. គឺជាអ្នកនាំមុខគេលើពិភពលោកក្នុងការអនុវត្តជាក់ស្តែងនៃបច្ចេកវិទ្យា Blockchain និង បច្ចេកវិទ្យាហិរញ្ញវត្ថុ (FinTech)។ នៅក្នុងត្រីមាសទី២ ឆ្នាំ២០២៦ នេះ ក្រុមហ៊ុននឹងប្រកាសដាក់ឱ្យដំណើរការនូវកាក់ Stablecoin ជាប្រាក់យ៉េន ដែលមានការគ្រប់គ្រងយ៉ាងពេញលេញដំបូងគេបង្អស់មួយរបស់ប្រទេសជប៉ុន ដើម្បីសម្របសម្រួលដល់ការទូទាត់របស់សាជីវកម្មខ្នាតធំ និងការទូទាត់ឆ្លងដែនផងដែរ៕

អត្ថបទពាណិជ្ជកម្ម

The post យុគសម័យថ្មី៖ ធនាគារ អេស ប៊ី អាយ លី ហួរ ម.ក ត្រូវបានប្តូរឈ្មោះទៅជាធនាគារ អេស ប៊ី អាយ (ខេមបូឌា) ម.ក appeared first on Kampuchea Thmey Daily.

ដើម្បី​ស្តារ​វិស័យ​អចលនទ្រព្យ​ដែល​រង​សម្ពាធ​ពី​វិបត្តិ​សកល រដ្ឋាភិបាល​កម្ពុជា​បាន​ដាក់​ចេញ​យន្តការ​ជាច្រើន​ដើម្បី​រុញច្រាន​ការ​ងើប​ឡើង​វិញ​នៃ​វិស័យ​អចលទ្រព្យ​និង​សំណង់ ដើម្បី​ជំរុញ​កំណើន​សេដ្ឋកិច្ច​ជាតិ។

ថ្លែង​នៅ​ក្នុង​ពិធី​បើក​សម្ពោធ​ពិព័រណ៍​ឧស្សាហកម្ម​សំណង់​កម្ពុជា​អន្តរជាតិ​ឆ្នាំ ២០២៤ លោក​អ្នក​ឧកញ៉ា ពុង ឃាវសែ ប្រធាន​សមាគមអ្នកសាងសង់​កម្ពុជា ដែល​ជា​វិស័យ​ឯកជន​មាន​ធុរកិច្ច​លើ​វិស័យ​សំណង់ និង​អចនទ្រព្យ​នៅ​កម្ពុជា​​បាន​គូស​បញ្ជាក់ពី​​ការ​ដាក់​ចេញ​គោល​នយោបាយ​របស់​រដ្ឋាភិបាល ក្នុង​ការ​ជួយ​ស្តារ​វិស័យ​សំណង់​និង​អចលទ្រព្យ​ឡើង​វិញក្នុង​ប្រទេស​កម្ពុជា។

ប្រធាន​សមាគមអ្នកសាងសង់កម្ពុជា​រូប​នេះ បាន​លើក​​ពី​ការ​ផ្ដល់​គោលការណ៍​លើក​ទឹកចិត្ត​ពន្ធដាររបស់​រដ្ឋាភិបាល ក្នុងវិស័យអចលនទ្រព្យ ដើម្បី​កាត់បន្ថយ​បន្ទុក​ក្នុង​ការ​ចំណាយ​បង់ពន្ធ​ដល់​អ្នក​អភិវឌ្ឍ​អចលនទ្រព្យ និង​ប្រជាពលរដ្ឋ​ជា​ម្ចាស់​អចលនទ្រព្យដែល​ក្នុងនោះ​រួមមាន ការ​លើក​លែង​ពន្ធ​លើ​ចំណេញ​មូលធន​លើ​អចលនទ្រព្យ, ការអនុញ្ញាត​ការ​បង់ពន្ធជា​កញ្ចប់​តាម​គម្រោង​ដល់​ក្រុមហ៊ុន​អភិវឌ្ឍន៍​សំណង់ និង​ការលើកលែងពន្ធប្រថាប់ត្រា​លើការផ្ទេរកម្មសិទ្ធិ ឬ​សិទ្ធិកាន់ កាប់​លំនៅដ្ឋាន​គ្រប់​ប្រភេទមាន​លក្ខណៈជាបុរីដែលមានតម្លៃក្រោម ឬស្មើ ៧ ម៉ឺនដុល្លារអាមេរិក ដែល​គោលការណ៍​នេះ​ត្រូវបានអនុញ្ញាតឲ្យអនុវត្តរហូតដល់ដំណាច់ឆ្នាំ២០២៥។

ជាមួយគ្នានេះ រាជរដ្ឋាភិបាលក៏​បាន​សម្រេចលើកលែងការយកពន្ធ​លើដីធ្លី​មិនប្រើប្រាស់​សម្រាប់​ដី​ក្រោម ៥ ហិកតា ក្នុងមួយកន្លែងថែមទៀត។

លោក​អ្នក​ឧកញ៉ា ពុង ឃាវសែ បាន​បន្ត​ថា ក្នុងពិធី​សន្និបាតបូកសរុប លទ្ធផល​ការងារឆ្នាំ ២០២៤ និងទិសដៅការងារឆ្នាំបន្តរបស់ក្រសួងរៀបចំដែនដី នគរូបនីយកម្ម និង​សំណង់ សម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេច​ផ្តល់​គោលការណ៍​បន្ថែមកាន់តែល្អប្រសើរថែមទៀត ដើម្បីជួយដល់វិស័យអចលនទ្រព្យ​ដែលមាន​លក្ខណ:ជាបុរី សម្រាប់អ្នកទិញលំនៅឋានលើកទី១ ដែលមានតម្លៃក្រោម ២១ ម៉ឺនដុល្លាអាមេរិក ក៏ត្រូវ​បានលើកលែង​ពន្ធប្រថាប់ត្រាជូនប្រជាពលរដ្ឋត្រឹមដំណាច់ឆ្នាំ២០២៥​ នេះផងដែរ។

ក្នុងឱកាស​អញ្ជើញបិទសន្និបាតបូកសរុបលទ្ធផលការងារឆ្នាំ២០២៣ និងឆ្នាំ២០២៤ និង​ទិសដៅការងារ​ឆ្នាំ ២០២៥ របស់ក្រសួងរៀបចំដែនដី នគរូបនីយកម្ម និងសំណង់ នៅរសៀលថ្ងៃទី ២៦ ខែវិច្ឆិកា ឆ្នាំ​២០២៤ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានថ្លែង​ថា ដើម្បី​ជួយ​ជំរុញ​ដល់​ការ​ងើបឡើង​វិញនៃវិស័យអចលទ្រព្យកម្ពុជា រាជរដ្ឋាភិបាល​បាន​សម្រេច​បន្តអនុគ្រោះ​ឱ្យរួចពន្ធ​ប្រថាប់ត្រា​សម្រាប់​អ្នកទិញផ្ទះតម្លៃក្រោម ៧ ម៉ឺនដុល្លារ រហូតដល់ដាច់ឆ្នាំ២០២៥ បើទោះបីផ្ទះ​នោះ​មាន​កិច្ចសន្យាទិញ-លក់ មុនឆ្នាំ២០២០ ក៏ដោយ។

លើសពីនេះ សម្តេចនាយករដ្ឋមន្រ្តី​​បន្ត​ទៀត​ថា ក៏កំពុងរៀបចំឱ្យមានការលើកទឹកបន្ថែមទៀត ដោយ​អនុញ្ញាត​ឱ្យអ្នក​ទិញ​ផ្ទះ​លើកទី ១ តម្លៃ ២១ ម៉ឺន​ដុល្លារ​ចុះក្រោម ក៏​ទទួលបានការ​លើកលែង​ពន្ធប្រថាប់ត្រា​ផ្ទេរ​កម្មសិទ្ធិ​ផង​ដែរ។

សម្តេច​សង្ឃឹមថា វិធានការ​លើកទឹកចិត្ត​ផ្នែកពន្ធដារនេះ នឹងជួយគាំទ្រ​និងបង្កលក្ខណៈ​ដល់​ក្រុមហ៊ុន​អភិវឌ្ឍន៍​លំនៅឋាន អ្នក​វិនិយោគ និង​ប្រជាពលរដ្ឋ​ជាម្ចាស់អចលនទ្រព្យ​ទាំងអស់ ក្នុងការ​ចូលរួម​ចំណែក​ជាមួយ​រាជរដ្ឋាភិបាល​ ដើម្បីអភិវឌ្ឍវិស័យអចលនទ្រព្យ និងសេដ្ឋកិច្ចកម្ពុជា ឱ្យ​កាន់​តែ​រីក​ចម្រើនរឹងមាំបន្ថែមទៀត។

លោកអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជាបាន​​ថ្លែង​ថា ការ​ដែល​រាជរដ្ឋាភិបាល​​សម្រេច​ឱ្យ​មានការបន្ត និងបន្ថែមការលើកទឹកចិត្តពន្ធដារចំពោះ​វិស័យ​អចលនទ្រព្យ បាន​ជួយកាត់បន្ថយបន្ទុកចំណាយបង់ពន្ធ របស់​ក្រុមហ៊ុន​អភិវឌ្ឍន៍​លំនៅឋាន និងប្រជាពលរដ្ឋជាម្ចាស់អចលនទ្រព្យ។

តាម​របាយការណ៍​របស់​ក្រសួង​រៀបចំ​ដែនដី នគរោបនីយកម្ម​និង​សំណង់ ក្នុង​​រយៈពេល ៦ ខែ ដើម​អាណត្តិទី ៧ គម្រោង​​សំណង់​នៅទូទាំង​ប្រទេស​មានចំនួន ១ ៦៤២ ​គម្រោង មាន​តម្លៃ​ទុន​វិនិយោគ​​ប្រមាណ​ជាង ២,៦ ពាន់​លាន​ដុល្លារ។

បើ​ទោះបី​ស្ថាន​ភាពសេដ្ឋកិច្ច​ក្នុង​តំបន់និង​ពិភពលោក​ នៅ​ពុំទាន់​ប្រសើរ​ឡើងវិញ​ដូច​ស្ថាន​ភាព​មុន​ការ​រីក​រាលដាល​នៃ​ជំងឺ​កូវីដ-១៩ ក្ដី វិស័យ​សំណង់​កម្ពុជា​នៅតែ​មានកំណើន​ជាប្រចាំ​។ គម្រោង​ថ្មីៗ​ដែល​បានស្នើសុំក្នុងរយៈពេល ៦ ខែ ឆ្នាំ២០២៤ មាន​កំណើនខ្ពស់​ជាងរយៈពេលដូចគ្នា​កាលពីឆ្នាំ២០២៣។

នៅ​ក្នុង​ពិធី​បិទ​សន្និបាត​បូក​សរុប​លទ្ធផល​ការងារ​ឆ្នាំ ២០២៤ និង​លើក​ទិសដៅ​ការងារ​បន្ត​ឆ្នាំ ២០២៥ លោក សាយ សំអាល់ រដ្ឋមន្រ្តី​ក្រសួង​រៀបចំ​ដែនដី នគរោបនីយកម្ម និង​សំណង់ បាន​ដាក់ក្តី​ពឹង​ទុក​ថា វិស័យ​សំណង់​នឹង​ប្រែក្លាយ​ទៅជាឧស្សាហកម្ម ដែល​នឹង​ចូលរួម​បង្កើន​ចំណូល​ថវិកាជាតិ និង​កំណើន​សេដ្ឋកិច្ច​កម្ពុជា៕

The post តើ​រដ្ឋាភិបាល​បាន​លើកទឹកចិត្ត​អ្វីខ្លះ​លើ​វិស័យ​សំណង់ និង​អចលទ្រព្យ​រហូត​មក​ដល់​ពេលនេះ? appeared first on Kampuchea Thmey Daily.