សភាពាណិជ្ជកម្មជំរុញការធ្វើជញ្ជីងពាណិជ្ជកម្មផ្ទៃក្នុង ទប់ស្កាត់ការបង្ហូរផលិតផលលើសលុបពីក្រៅប្រទេសចូលទីផ្សារកម្ពុជា

Dy Bunnara — Thu, 03 Jul 2025 01:34:15 +0000

ការធ្វើជញ្ជីងពាណិជ្ជកម្មផ្ទៃក្នុង ដើម្បីជំរុញទាំងអ្នកនាំចូល អ្នកផលិតក្នុងប្រទេស ធ្វើយ៉ាងណាឲ្យមានតុល្យភាព បញ្ចៀសការបង្ហូរផលិតផលច្រើនលើសលុបពីក្រៅប្រទេសចូលទីផ្សារក្នុងស្រុក។ នេះបើតាមលោក តាន់ មុនីវណ្ណ អនុប្រធានសភាពាណិជ្ជកម្មកម្ពុជា។

ថ្លែងនៅក្នុងវេទិកាធុរកិច្ច និងនវានុវត្តន៍ដែលរៀបចំដោយសភាពាណិជ្ជកម្មកម្ពុជាកាលពីម្សិលមិញនេះ លោក តាន់ មុនីវណ្ណ អនុប្រធានសភាពាណិជ្ជកម្មកម្ពុជាបានថ្លែងថា ថ្ងៃខាងមុខ សភាពាណិជ្ជកម្មកម្ពុជានឹងដើរតួនាទីជាអាជ្ញាកណ្ដាលដើម្បីសម្របសម្រួលរវាងអ្នកនាំចូលនិងអ្នកផលិត។ តាមរយៈការធ្វើជញ្ជីងពាណិជ្ជកម្មផ្ទៃក្នុងដោយសហការជាមួយសភាពាណិជ្ជកម្មទាំង ២៥ ខេត្តក្រុង ដើម្បីក្តាប់ទិន្នន័យរួមងាយស្រួលគ្រប់គ្រងផលិតផលដែលនាំចូលនិងផលិតផលដែលផលិតផ្គត់ផ្គង់ក្នុងស្រុក។

«កន្លងទៅនេះយើងខ្វះទិន្នន័យ មិនដឹងថាតើយើងនាំចូលប៉ុណ្ណា សមត្ថភាពផលិតក្នុងស្រុកបានកម្រិតណា។ តាមរយៈការធ្វើជញ្ជីងពាណិជ្ជកម្មផ្ទៃក្នុង យើងអាចដឹងពីសមត្ថភាពផលិតក្នុងស្រុកមានតុល្យភាពកម្រិតណាជាមួយការនាំចូល»។

ក្នុងកិច្ចព្រមព្រៀងពាណិជ្ជកម្មសេរី បើតាមលោក តាន់ មុនីវណ្ណ គ្រប់ប្រទេសទាំងអស់អាចដាក់រនាំងលើការនាំចូលផលិតផលមួយចំនួនតាមរយៈការដាក់របាំងមិនមែនពន្ធគយ និងការដាក់ចេញវិធានការសុវត្ថិភាពផ្សេងៗទៀត ដើម្បីគ្រប់គ្រងការបង្ហូរផលិតផលច្រើនលើសការផ្គត់ផ្គង់ ដែលនាំឲ្យប៉ះពាល់ដល់ទីផ្សារក្នុងស្រុក៕

The post សភាពាណិជ្ជកម្មជំរុញការធ្វើជញ្ជីងពាណិជ្ជកម្មផ្ទៃក្នុង ទប់ស្កាត់ការបង្ហូរផលិតផលលើសលុបពីក្រៅប្រទេសចូលទីផ្សារកម្ពុជា appeared first on Kampuchea Thmey Daily.

លោក តាន់ មុនីវណ្ណ ៖ អគារខ្ពស់ៗមួយចំនួនសាងសង់ខុសតម្រូវការទីផ្សារ

Sophal Tuon — Wed, 28 Jun 2023 01:50:01 +0000

កម្ពុជា មានការប្រកួតប្រជែងទីផ្សារសំណង់អគារពុំមានតម្លាភាពច្បាស់លាស់នោះទេ។ តម្រូវការទីផ្សារនៅតែមាន ប៉ុន្តែការផលិតស្តង់ដារ មិនទាន់ត្រូវតាមតម្រូវការទីផ្សារ និងមិនបានបត់បែនទាន់សភាពការណ៍។ នេះជាការបញ្ជាក់របស់លោក តាន់ មុនីវណ្ណ អគ្គនាយករងក្រុមហ៊ុនម៉ុងឬទ្ធី និងជាទីប្រឹក្សាសមាគមអភិវឌ្ឍន៍លំនៅឋានកម្ពុជា។

លោក បានលើកឡើងដូច្នេះថា« ខ្ញុំជាអ្នកវាយតម្លៃអចលនទ្រព្យដែរ ចុងក្រោយនេះរឿងពីរបីដែលកើតឡើង យើងដឹងទី១ ការផ្គត់ផ្គង់ទីផ្សារលើស ទី២ សំណង់មួយចំនួនធំ មិនតម្រូវការទីផ្សារទេ បានន័យថា សមត្ថភាពអ្នកសាងសង់អត់បានសិក្សាពីទីផ្សារ ដូច្នេះឃើញថា អគារខ្ពស់ៗមួយចំនួនសាងសង់ខុសតម្រូវការទីផ្សារ ជាពិសេសបញ្ហាតម្លៃ និងចំណត»។

លោក តាន់ មុនីវណ្ណ កត់សម្គាល់ឃើញថា អ្នកសាងសង់ហាក់មិនមើលតម្រូវការទីផ្សារ បញ្ហាបច្ចេកទេស រចនាបថសំណង់ និងបញ្ហាអភិវឌ្ឍន៍ដីធ្លីលឿនពេក ក៏ធ្វើឱ្យប៉ះពាល់ផងដែរ។ ប៉ុន្តែបញ្ហានេះ លោកមើលឃើញថា មិនមែនកើតឡើងតែនៅកម្ពុជាទេ គឺរងផលប៉ះពាល់ដោយសារវិបត្តិសេដ្ឋកិច្ចសកល។

ពាក់ព័ន្ធនឹងការអភិវឌ្ឍវិស័យសំណង់នេះ ក្រសួងរៀបចំដែនដី នគរូបនីយកម្ម និងសំណង់ បានផ្តល់លិខិតអនុញ្ញាតសាងសង់សំណង់ចំនួន ១៤៦៣គម្រោង មានផ្ទៃក្រឡាជាង ៥លានម៉ែត្រការ៉េ លើទុនវិនិយោគជាង ២២៧០លានដុល្លារអាមេរិក រយៈពេល ៥ខែ ឆ្នាំ ២០២៣ ពោលគឺបានកើនឡើង ១៣៨ភាគរយ បើធៀបនឹងរយៈពេលដូចគ្នា កាលពីឆ្នាំ ២០២២។ នេះបើតាមការបញ្ជាក់របស់លោក ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នៅក្នុងកិច្ចពិភាក្សាស្តីពី ស្ថានភាពទីផ្សារអចលនទ្រព្យនៅកម្ពុជា កាលពីថ្ងៃទី ២៣ មិថុនា ឆ្នាំ ២០២៣។

មន្រ្តីជាន់ខ្ពស់ក្រសួងរៀបចំដែនដី បានឱ្យដឹងទៀតថា អគារចាប់ពី ៥ជាន់ឡើងទៅ គឺមានចំនួន ២៥៨៦អគារ នៅទូទាំងប្រទេស ក្នុងនោះ នៅរាជធានីភ្នំពេញ មានចំនួន ១៧១១អគារ ខេត្តព្រះសីហនុ ៩៩០អគារ បន្ទាយមានជ័យ ១៤២អគារ ខេត្តផ្សេងទៀត មានចំនួន ៤៣អគារ។ ចំណែកអគារដែលខ្ពស់បំផុតចាប់ពី ៤០ជាន់ឡើងទៅ មានចំនួន ៥២អគារ។ ដោយឡែក បុរីលំនៅឋាន និងបណ្តុំលំនៅឋានលក្ខណៈបុរី មានចំនួន ៥៧៤គម្រោង ប៉ុន្តែនៅក្នុងគម្រោងលំនៅឋានតួចៗ មានរាប់ពាន់លំនៅឋានទៀត។ ក្នុងនោះផ្ទះល្វែងដែលបាននិងកំពុងសាងសង់មានចំនួនជាង ៤ម៉ឺនខ្នង រយៈពេល ៥ខែ ឆ្នាំនេះ។

លោក ឡៅ ទិព្វសីហា បានបន្តថា ការកើនឡើងនេះ គឺស្របតាមការវាយតម្លៃរបស់ក្រសួងសេដ្ឋកិច្ច និងហិរញ្ញវត្ថុ ដែលថា វិស័យសំណង់នឹងមានកំណើននៅឆ្នាំ ២០២៣នេះ៕

The post លោក តាន់ មុនីវណ្ណ ៖ អគារខ្ពស់ៗមួយចំនួនសាងសង់ខុសតម្រូវការទីផ្សារ appeared first on Kampuchea Thmey Daily.

លោក តាន់ មុនីវណ្ណ Archives - Kampuchea Thmey Daily

លោក តាន់ មុនីវណ្ណ ៖ អគារខ្ពស់ៗមួយចំនួន​សាង​សង់ខុសតម្រូវការទីផ្សារ

លោក តាន់ មុនីវណ្ណ ៖ អគារខ្ពស់ៗមួយចំនួនសាងសង់ខុសតម្រូវការទីផ្សារ