លោក តូច ចាន់កុសល រដ្ឋលេខាធិការ ក្រសួង​សាធារណការ និងដឹកជញ្ជូន ដែល​ចូលរួម​ដឹកនាំ​កិច្ច​ប្រជុំ​បាន​គូស​បញ្ជាក់ថា កិច្ចប្រជុំ​នេះរៀបចំឡើង​​ក្នុងគោល​បំណង ដើម្បីពិនិត្យនិងពិភាក្សាលើរបាយការណ៍សិក្សាប្រមូលធាតុចូល សម្រាប់គម្រោងកែលម្អផ្លូវជាតិ​លេខ ១ និង​សាងសង់​ស្ពានថ្មីឆ្លងកាត់ទន្លេមេគង្គ។

ជាលទ្ធផល អង្គប្រជុំបានវាយតម្លៃខ្ពស់ចំពោះលទ្ធផល និងកិច្ចសហការរបស់ទីភា្នក់ងារសហប្រតិបត្តិការអន្តរជាតិនៃប្រទេស​ជប៉ុន (JICA) ក្នុងការបញ្ជូនជំនាញការជាន់ខ្ពស់របស់ខ្លួន ដើម្បីពិនិត្យនិងរៀបចំផែនការគម្រោងកែលម្អផ្លូវជាតិលេខ ១ និងសាងសង់ស្ពានថ្មីឆ្លងកាត់ទន្លេមេគង្គរបស់កម្ពុជាប្រកបដោយការយកចិត្តទុកដាក់ខ្ពស់។

នៅក្នុង​ពិធី​បើកការដ្ឋានសាងសង់ចំណតផែកុងតឺន័រទឹកជ្រៅជំហានទី ១ នៅកំពង់ផែស្វយ័តក្រុងព្រះសីហនុ កាលពីថ្ងៃទី២២ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏​បានស្នើដល់រដ្ឋាភិបា​លជប៉ុនពិនិត្យលទ្ធភាព​​ជួយ​សាងសង់​ស្ពានឆ្លងទន្លេមេគង្គពីក្តីតាកុយទៅអរិយក្សត្រ។

​តាមរយៈអនុរដ្ឋមន្ត្រីក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ដែលធ្វើ​ទស្សនកិច្ចនៅប្រទេស​កម្ពុជា ​សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា ជប៉ុនគឺជាមិត្តដ៏សំខាន់​ដែលបានចូលរួមចំណែកក្នុងការអភិវឌ្ឍប្រទេសកម្ពុជា ពីអតីតកាល បច្ចុប្បន្នកាល និងទៅអនាគត។

នៅក្នុងក្របខណ្ឌការ​អភិវឌ្ឍ​វិស័យសាធារណការ និងដឹកជញ្ជូន សម្តេច​បានស្នើ​ដល់​រដ្ឋាភបាលជប៉ុន​បន្ត​ជួយ​គាំទ្រដល់​ការអភិវឌ្ឍហេដ្ឋារចនាសម្ព័ន្ធ ផ្លូវស្ពានរបស់ប្រទេស​កម្ពុជាដូចជាគម្រោងពង្រីក និងលើកកម្ពស់កម្រិតគុណភាពផ្លូវជាតិលេខ ១ ទៅដល់ស្ពានអ្នកលឿង និង​ស្ពានឆ្លងកាត់ទន្លេមេគង្គ ក្តីតាកុយ-ទៅអរិយក្សត្រ៕

The post មន្រ្តី​កម្ពុជា​-ជប៉ុន ប្រជុំ​ពិភាក្សា​គ្នា​​ប្រមូល​ធាតុចូល​ គម្រោង​សាងសង់ស្ពាន​​ថ្មី​ឆ្លង​ទន្លេមេគង្គ appeared first on Kampuchea Thmey Daily.

កិច្ចប្រជុំទ្វេភាគី​មួយ​បាន​ធ្វើ​ឡើង​កាលពីម្សិលមិញនេះ ដោយ​មាន​ការ​ចូលរួម​ពី​លោក តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន និង​លោក Perames Vudthitornetiraks នាយកទីភ្នាក់ងារសហប្រតិបត្តិការដើម្បីអភិវឌ្ឍន៍សេដ្ឋកិច្ចប្រទេសជិតខាង នៃព្រះរាជាណាចក្រថៃ (NEDA)។

គម្រោងធ្វើឱ្យប្រសើរឡើងវិញផ្លូវជាតិលេខ ៦៧ និងផ្លូវជាតិលេខ ៦៨ ផ្តល់​ឥណទាន​ដោយ​ទីភ្នាក់ងារសហប្រតិបត្តិការដើម្បីអភិវឌ្ឍន៍សេដ្ឋកិច្ចប្រទេសជិតខាង នៃព្រះរាជាណាចក្រថៃ (NEDA)។

ក្នុង​ជំនួបរវាង លោក តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន និង​តំណាងមកពី​ទីភ្នាក់ងារសហប្រតិបត្តិការដើម្បីអភិវឌ្ឍន៍សេដ្ឋកិច្ចប្រទេសជិតខាងនៃព្រះរាជាណាចក្រថៃ​កាលពីម្សិលមិញនេះ ក៏មានពិធីចុះកិច្ចសន្យាត្រួតពិនិត្យ និងសិក្សាជាមួយក្រុមហ៊ុនទីប្រឹក្សាបច្ចេកទេស Asian Engineering Consultants​.Crop.,Ltd សម្រាប់គម្រោងធ្វើ​ឲ្យ​ប្រសើរឡើងវិញផ្លូវជាតិលេខ ៦៧ ផងដែរ។

បើតាមលោក តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន បន្ទាប់ពីជ្រើសរើសក្រុមហ៊ុនទីប្រឹក្សាបច្ចេកទេស ក្រុមការងារបច្ចេកទេសនៃក្រសួងសាធារណការ និងដឹកជញ្ជូន នឹងបន្តនីតិវិធីជាមួយក្រុមហ៊ុនទីប្រឹក្សាបច្ចេកទេស ដើម្បីរៀបចំជ្រើសរើសក្រុមហ៊ុន​សាងសង់ឱ្យបានឆាប់។

លោក ស៊ុន ចាន់ថុល ឧបនាយករដ្ឋមន្រ្តី​ដែល​ទទួល​បន្ទុក​ការងារ​គមនាគមន៍​​ដឹកជញ្ជូន និង​ភស្តុភារកម្ម​ក្នុងពិធី​បិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសាធារណការ និងដឹកជញ្ជូន កាលពី​ខែកុម្ភៈ ឆ្នាំ២០២៤ បាន​ជំរុញ​ឲ្យក្រសួង​សាធារណការ​និងដឹកញ្ជូន ខិតខំពន្លឿននិងជំរុញនីតិវិធីក្នុងការអនុវត្តគម្រោងហេដ្ឋារចនាសម្ព័ន្ធផ្លូវ-ស្ពានសំខាន់ៗដែលជាឥណទានសម្បទាន និងហិរញ្ញប្បទានឥតសំណងរបស់បណ្ដាប្រទេសជាមិត្ត និងដៃគូអភិវឌ្ឍន៍នានា ក្នុង​នោះ​ក៏​មាន​គម្រោង​ផ្លូវ​ជាតិចំនួន​ ២ ខ្សែ​ ដែល​ផ្តល់​ឥណទានពី​រដ្ឋាភិបាល​ថៃ​គឺ​ផ្លូវជាតិលេខ៦៧ (សៀមរាប-អន្លង់វែង-ជាំ/សាង៉ាំ) និង​ ផ្លូវជាតិលេខ៦៨ (ក្រឡាញ់-អូរស្មាច់)៕

The post រដ្ឋាភិបាល ​ជំរុញបើក​ការដ្ឋាន​ស្ថាបនា​ផ្លូវជាតិ​លេខ ៦៧ និង លេខ ៦៨ ឱ្យបាន​លឿន appeared first on Kampuchea Thmey Daily.

ក្នុង​ជំនួប​​ជាមួយលោក តូច ចាន់កុសល រដ្ឋលេខាធិការប្រចាំការក្រសួងសាធារណការនិងដឹកជញ្ជូន លោក Peter Vogelmann នាយកផ្នែកលក់អន្តរជាតិតំណាងក្រុមហ៊ុន Doppelmayr Group បានធ្វើបទបង្ហាញពីសាវតាក៏ដូចជា សកម្មភាពប្រតិបត្តិការរបស់ក្រុមហ៊ុនចាប់តាំងពីពេលកកើតរហូតមកដល់បច្ចុប្បន្ន និងគម្រោងនានាដែលក្រុមហ៊ុនបានកំពុងអនុវត្តនៅតាមបណ្តាប្រទេសជាច្រើនជុំវិញពិភពលោកទាំងក្នុងតំបន់អាស៊ី និងអឺរ៉ុប។

តំណាង​ក្រុមហ៊ុន​បាន​លើកបង្ហាញពីគុណសម្បត្តិនៃការជ្រើសយកការដឹកជញ្ជូនដោយ “កន្រ្តកខ្សែកាប” (Cable Car) មកបម្រើឱ្យវិស័យដឹកជញ្ជូនសាធារណៈនៅក្នុងតំបន់ទីក្រុង ទីប្រជុំជន និងតំបន់ទេសចរណ៍នានា។

លោក Peter Vogelmann ក៏បានបង្ហាញពីចំណាប់អារម្មណ៍របស់ខ្លួនលើវិស័យដឹកជញ្ជូនសាធារណៈនៅក្នុងប្រទេស​កម្ពុជា ជាពិសេសនៅភូមិសាស្ត្ររាជធានីភ្នំពេញផ្ទាល់ ដែលមាននិន្នាការងាកទៅរកការដឹកជញ្ជូនរួមមួយប្រកបដោយនិរន្តភាព (Sustainability) និងការគិតគូរដល់បរិស្ថាន (Environmental Friendly)។

លោក តូច ចាន់កុសល រដ្ឋលេខាធិការប្រចាំការបានគូសបញ្ជាក់ពីវិស័យដឹកជញ្ជូនសាធារណៈ ដែល​រដ្ឋាភិបាលកម្ពុជា កំពុងខិតខំប្រឹងប្រែងគិតគូរ និងស្វែងរកដៃគូអភិវឌ្ឍន៍ ដើម្បីកាត់បន្ថយការកកស្ទះចរាចរណ៍ និងលើកកម្ពស់ជីវភាពរស់នៅរបស់ ប្រជាពលរដ្ឋនៅក្នុងទីក្រុង និងទីប្រជុំជនឱ្យកាន់តែប្រសើរឡើងថែមទៀតផងដែរ។

លោករដ្ឋលេខាធិការបានបញ្ជាក់ថា ទំនោរនៃការប្រើប្រាស់សេវាដឹកជញ្ជូនសាធារណៈ របស់ប្រជាពលរដ្ឋនៅក្នុងរាជធានីភ្នំពេញនៅមានកម្រិតនៅឡើយ ប៉ុន្តែក្រសួងនៅតែបន្តបញ្ជ្រាបការយល់ដឹងពីគុណសម្បត្តិនៃការប្រើប្រាស់សេវាដឹកជញ្ជូនសាធារណៈទៅកាន់ពួកគាត់ ហើយសង្ឃឹមយ៉ាងមុតមាំថា នាពេលអនាគតប្រជាពលរដ្ឋគ្រប់រូប នឹងផ្លាស់ប្តូរផ្នត់គំនិត​ងាក​មកប្រើប្រាស់សេវាដឹកជញ្ជូនសាធារណៈនេះបានកាន់តែច្រើនឡើង។

ជាមួយគ្នានេះ លោកបានបញ្ជាក់ទៀតថា ក្រសួងបានធ្វើការសិក្សាលើគម្រោងអភិវឌ្ឍន៍វិស័យដឹកជញ្ជូនសាធារណៈនៅក្នុងទីក្រុង ក៏ដូចជាកំពុងស្វែងរកដៃគូវិនិយោគបន្ថែមដើម្បីអភិវឌ្ឍវិស័យនេះឱ្យកាន់តែមានភាពរីកចម្រើន ក្នុងនាមជាប្រទេស​ដែលកំពុងអភិវឌ្ឍមួយក្នុងតំបន់។

ក្រុមហ៊ុន Doppelmayr Group គឺជាក្រុមហ៊ុនធំមួយនៅអឺរ៉ុបមានជំនាញក្នុងរៀបចំផែនការ អភិវឌ្ឍ រចនា ផលិត សាង​សង់ និងគាំទ្រគម្រោងច្នៃប្រឌិត ដែលទាក់ទងនឹងវិស័យដឹកជញ្ជូនសាធារណៈដោយកន្រ្តកខ្សែកាប (Cable Car) ៕

The post កន្រ្តកខ្សែកាប (Cable Car) ទំនើប​ជួយ​វិស័យ​ដឹកជញ្ចូនសាធារណៈនៅកម្ពុជា appeared first on Kampuchea Thmey Daily.