លោក ភាវ សុវុទ្ធី អនុរដ្ឋលេខាធិការក្រសួងបរិស្ថាន នៅក្នុងសិក្ខាសាលាស្តីពី «ការពង្រឹងសមត្ថភាពបច្ចេកទេសប្រព័ន្ធផ្សព្វផ្សាយ និងអ្នកសារព័ត៌មានស្តីពីការប្រែប្រួលអាកាសធាតុ លើកទី១» ថ្ងៃទី១៨ ខែកញ្ញា ឆ្នាំ២០២៣ បានឲ្យដឹងថា ការកើនឡើងកម្ដៅកាន់តែខ្លាំង និងព្រឹត្តិការណ៍អាកាសធាតុ ដូចជា គ្រោះទឹកជំនន់ គ្រោះរាំងស្ងួត ការកើនឡើងនៃកម្ពស់នីវ៉ូទឹកសមុទ្រ និងរលកកម្ដៅ បានកើតមានឡើងកាន់តែច្រើន និងញឹកញាប់ជាងមុន។

លោកបានរម្លឹកថា កម្ពុជា ជាប្រទេសមួយដែលប្រឈមនឹងភាពងាយរងគ្រោះពីឥទ្ធិពលនៃការប្រែប្រួលអាកាសធាតុ ក៏ប៉ុន្តែ កម្ពុជាតែងតែចិត្តទុកដាក់ខ្ពស់ក្នុងការរៀបចំផែនការយុទ្ធសាស្ត្របន្សំ និងឆ្លើយតបនឹងការប្រែប្រួលអាកាសធាតុ ព្រមទាំងជំរុញការអនុវត្តនិងការផ្សព្វផ្សាយឱ្យកាន់តែទូលំទូលាយផងដែរ។ ទោះជាយ៉ាងណាក៏ដោយ ធនធានមនុស្ស ហិរញ្ញវត្ថុ និងបច្ចេកវិទ្យារបស់កម្ពុជាក្នុងការឆ្លើយតបទៅនឹងការប្រែប្រួលអាកាសធាតុ នៅតែជាកត្តាប្រឈម ដោយទាមទារឱ្យមានការចូលរួមគាំទ្រពីគ្រប់ភាគី និងដៃគូអភិវឌ្ឍន៍នានា។

អនុរដ្ឋលេខាធិការក្រសួងបរិស្ថានរូបនេះ បានបន្ថែមថា ដើម្បីសម្រេចឱ្យបាននូវគោលដៅការបន្សំ និងកសាងភាពធន់នឹងអាកាសធាតុក្នុងសហគមន៍មួយ គឺចាំបាច់ណាស់ដែលសហគមន៍ទាំងអស់នោះ មានការយល់ដឹងពីយន្តការ យុទ្ធសាស្ត្រ នានាក៏ដូចជា ផែនការជាតិបន្សំនឹងការប្រែប្រួលអាកាសធាតុ។ ក្នុងន័យនេះ ប្រព័ន្ធផ្សព្វផ្សាយ និងអ្នកសារព័ត៌មាន ដើរតួនាទីយ៉ាងសំខាន់ក្នុងការចូលរួមផ្សព្វផ្សាយព័ត៌មាន និងលើកកម្ពស់ការយល់ដឹងដល់សហគមន៍ ទាំងអស់នោះ និងជាពិសេស ការសរសេរបកស្រាយនូវព័ត៌មាន ទិន្នន័យបែបវិទ្យាសាស្ត្រ រូបសាស្ត្រ ទាក់ទងការប្រែប្រួលអាកាសធាតុឱ្យស្របទៅតាមគោលនយោបាយ និងយុទ្ធសាស្ត្រជាតិ ក្រុមគោលដៅ និងក្រុមងាយរងគ្រោះ ឬស្ថាប័នជាតិ-អន្តរជាតិ និងទៅតាមស្ថានភាពជាក់ស្ដែងនៃសង្គមកម្ពុជា។

យោងតាមរបាយការណ៍នៃការសិក្សាលើកទី៣ ស្ដីពី ការស្វែងយល់ពីទស្សនៈសាធារណជន ចំពោះការប្រែប្រួលអាកាសធាតុនៅកម្ពុជា ចំណេះដឹង ឥរិយាបថ និងការអនុវត្ត (KAP3)ដែលបានរៀបចំឡើងដោយក្រុមប្រឹក្សាជាតិអភិវឌ្ឍន៍ដោយចីរភាព នៃក្រសួងបរិស្ថានក្នុងឆ្នាំ២០២០ មានប្រជាជនកម្ពុជាប្រមាណតែ៥៦% ប៉ុណ្ណោះ ដែលយល់ថាខ្លួន បានត្រៀមខ្លួនគ្រប់គ្រាន់ឆ្លើយតបទៅនឹងបញ្ហាអាកាសធាតុដែលអាចកើតមាន។ ដោយឡែក ប្រជាជន ៤៤% ផ្សេងទៀត យល់ថា ខ្លួនមិនបានត្រៀមខ្លួនគ្រប់គ្រាន់ សម្រាប់ករណីមានបញ្ហាអាកាសធាតុណាមួយកើតឡើងនេះទេ។

របាយការណ៍ដដែលនេះ ក៏បានបញ្ជាក់ផងដែរពីសារសំខាន់នៃបណ្តាញផ្សព្វផ្សាយមានដូចជា ទូរទស្សន៍ វិទ្យុ និងបណ្ដាញសង្គម ដែលគ្រប់ដណ្តប់ប្រមាណ ៥០% នៃប្រភព ទទួលបានព័ត៌មានស្ដីពីការប្រែប្រួលអាកាសធាតុដែលប្រជាជនទទួលបាន។ ការបង្ហាញនេះ បានឱ្យឃើញពីតួនាទីសំខាន់នៃបណ្តាយផ្សព្វផ្សាយអ្នកសារព័ត៌មាន ក្នុងការលើកកម្ពស់ការយល់ដឹង និងឆ្លើយតបនឹង ការប្រែប្រួលអាកាសធាតុ៕

The post ការប្រែប្រួលអាកាសធាតុ នៅតែជាកត្តាប្រឈម ដែលទាមទារឱ្យមានការចូលរួមគាំទ្រពីគ្រប់ភាគី និងដៃគូអភិវឌ្ឍន៍នានា appeared first on Kampuchea Thmey Daily.

លោក លោក ភាវ សុវុទ្ធី អនុរដ្ឋលេខាធិការក្រសួងបរិស្ថាន បានបញ្ជាក់ថា ប្រទេសកម្ពុជា ជាប្រទេសមួយដែលងាយរងគ្រោះដោយសារការប្រែប្រួលអាកាសធាតុ ហើយជាញឹកញាប់ កម្ពុជា បានទទួលរងនូវផលប៉ះពាល់ពីគ្រោះទឹកជំនន់ គ្រោះរាំងស្ងួត និងខ្យល់ព្យុះជាដើម។ ការសិក្សារថ្មីៗនេះ បានបង្ហាញថា ការប្រែប្រួលអាកាសធាតុ នឹងអាចកាត់បន្ថយផលិតផលក្នុងស្រុកសរុប ចំនួន២,៥% នៅឆ្នាំ២០៣០ និងរហូតដល់ ៩,៨% នៅឆ្នាំ២០៥០ ទោះបីជាការកើនឡើងសីតុណ្ហភាពសកលនៅក្រោម ២អង្សាសែលស៊ុសក៏ដោយ។ ដូច្នេះ អាទិភាពចម្បងរបស់កម្ពុជា គឺការកសាងភាពធន់ក្នុងវិស័យសេដ្ឋកិច្ច និងសង្គម ដើម្បីកាត់បន្ថយនូវផលប៉ះពាល់បណ្តាលមកពីការប្រែប្រួលអាកាសធាតុលើសុខភាព ហេដ្ឋារចនាសម្ព័ន្ធ និងផលិតភាពកសិកម្មជាដើម។

ចាប់តាំងពីឆ្នាំ២០០០មក រាជរដ្ឋាភិបាលកម្ពុជា បានយកចិត្តទុកដាក់ និងឈានមុខគេក្នុងការអនុវត្តវិធានការបន្ស៊ាំនឹងការប្រែប្រួលអាកាសធាតុ និងមានវឌ្ឍនភាពខ្លាំងផ្នែករៀបចំសកម្មភាព និងផែនការ ដើម្បីដោះស្រាយបញ្ហាប្រែប្រួលអាកាសធាតុ។ ជាក់ស្ដែង ការប្រែប្រួលអាកាសធាតុ និងកំពុងត្រូវបានបញ្ជ្រាបទៅក្នុងយុទ្ធសាស្ត្របញ្ចកោណដំណាក់កាលទី១ ផែនការយុទ្ធសាស្ត្រអភិវឌ្ឍន៍ជាតិ (NSDP) យុទ្ធសាស្ត្រ និងផែនការសកម្មភាពបរិស្ថានជាតិ (NESAP) ២០១៦-២០២៣ យុទ្ធសាស្ត្រ និងគោលនយោបាយអភិវឌ្ឍន៍ពាក់ព័ន្ធផ្សេងៗ។

ជាពិសេស បានធ្វើការបញ្ជ្រាប និងដាក់បញ្ចូលការប្រែប្រួលអាកាសធាតុ នៅក្នុងផែនការអភិវឌ្ឍន៍ និងផែនការថវិកាទាំងនៅថ្នាក់ជាតិ និងថ្នាក់ក្រោមជាតិផងដែរ។ ប្រទេសកម្ពុជា ក៏បានត្រៀមខ្លួន និងបានរៀបចំនូវក្របខ័ណ្ឌបន្ស៉ាំនឹងការប្រែប្រួលអាកាសធាតុដែលជាមូលដ្ឋានគ្រឹះដ៏រឹងមាំសម្រាប់ការរៀបចំដំណើរការផែនការជាតិបន្សំ (NAP)។ ជាលទ្ធផល ប្រទេសកម្ពុជា សម្រេចបាននូវការរៀបចំឯកសារសំខាន់ៗ ចំនួន៣ រួមមាន ១)ដំណើរការផែនការជាតិបន្សំ ឆ្នាំ២០១៧ ២)ក្របខ័ណ្ឌហិរញ្ញប្បទានផែនការជាតិបន្សំ និងផែនការអនុវត្តន៍ឆ្នាំ២០១៧ និង ៣) យុទ្ធសាស្ត្រទំនាក់ទំនងផែនការជាតិបន្សំឆ្នាំ ២០១៨៕

The post មន្ត្រីក្រសួងបរិស្ថាន៖ ការប្រែប្រួលអាកាសធាតុ នឹងអាចកាត់បន្ថយផលិតផលក្នុងស្រុក appeared first on Kampuchea Thmey Daily.