លោក លាង ឬទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាម នៃក្រសួងសុខាភិបាល បានប្រាប់«កម្ពុជាថ្មី» ថា ស្ថានភាពជំងឺក្នុងអំឡុងពេល ២សប្តាហ៍ចុងក្រោយនេះ ករណីចម្លង ដោយក្នុងនោះ សប្តាហ៍ទី២៣ មានចំនួន ១ ២៥០ករណី និងសប្តាហ៍ទី២៤ មានចំនួន ១ ៥២៦ករណី មានការកើនឡើងការចម្លង ស្មើនឹងចំនួន ២៧៦ករណី ឬ១៨%។

លោកបន្តថា ជំងឺគ្រុនឈាមដែលមានករណីច្រើនជាងគេគឺ រាជធានីភ្នំពេញ ខេត្តត្បូងឃ្មុំ កំពង់ធំ កំពង់ចាម កណ្តាល ព្រះវិហារ សៀមរាប ព្រះសីហនុ ក្រចេះ និងកំពង់ឆ្នាំង ហើយភាគច្រើនកើតទៅលើមនុស្សដែលមានអាយុចន្លោះពី៥ ទៅ ១៥ឆ្នាំ។

បើតាមលោក លាង ឬទ្ធា ជាការសន្និដ្ឋាន ស្ថានភាពជំងឺគ្រុនឈាមឆ្នាំ២០២៥ នេះ នឹងបន្តកើនឡើងរហូតដល់សប្តាហ៍ទី២៩ ព្រោះជាស្ថានភាពក្នុងរដូវវស្សា ហើយស្ថានភាពជំងឹអាចនឹងចាប់ផ្តើមធ្លាក់ចុះចាប់ពីសប្តាហ៍ទី៣០ ជាបន្តបន្ទាប់។ លោកថា ការកើនឡើងនេះស្ថិតក្នុងលក្ខខណៈទាប ហើយកំណើនប្រចាំសប្តាហ៍បានថយចុះប្រម៉ាណ២០% ក្រោមការចង្អុលបង្ហាញដ៏ខ្ពង់ខ្ពស់ពី លោក ឈាង រ៉ា រដ្ឋមន្ត្រីក្រសួងសុខាភិបាល។ មានន័យថា ស្ថានភាពចម្លងជំងឺគ្រុនឈាមនេះនឹងមិនអាចបង្កឱ្យមានការរាតត្បាត ឬបង្កហានិភ័យទ្រង់ទ្រាយធំដល់សុខភាពប្រជាជននោះទេ។

ប៉ុន្តែទោះជាយ៉ាងណា ការបន្តបុរេសកម្ម ការចូលរួមពីអាជ្ញាធរមូលដ្នាន គឺជាគន្លឹះយុទ្ធសាស្ត្រប្រយុទ្ធនឹងភ្នាក់ងារចម្លងក្នុងសហគន៍នីមួយ។ ការបន្តពង្រឹងការចូលរួមពីសេវាឯកជនឱ្យបញ្ជូនអ្នកជំងឺមកសេវារដ្ឋទាន់ពេលវានៅតែជាកត្តាសំខាន់ដែលចូលរួមកាត់បន្ថយអត្រាស្លាប់ដោយសារជំងឺគ្រុនឈាម។ ជាពិសេស សកម្មភាពបង្កើនការងារអប់រំសុខភាពវិធានបង្ការជំងឺគ្រុនឈាមជាកិច្ចការចាំបាច់ត្រូវលើកកម្ពស់ចូលរួមអនុវត្តជាប្រចាំ និងត្រូវជំរុញសកម្មភាពបញ្ជូនអ្នកជំងឺគ្រុនឈាមមកសេវាសាធារណៈឱ្យបានលឿនមិនលើសពី ៤៨ម៉ោង បន្ទាប់ពីគ្រុនក្តៅ និងមិនត្រូវសាកល្បងទិញថ្នាំព្យាបាលដោយខ្លួនឯងនៅផ្ទះឡើយ។ នេះជាការបញ្ជាក់បន្ថែមរបស់ប្រធានកម្មវិធីជាតិប្រយុទ្ធនឹងជំងឺគ្រុនឈាម។

ជាមួយគ្នានេះ ប្រធានកម្មវិធីជាតិប្រយុទ្ធនឹងជំងឺគ្រុនឈាមដដែល ក៏បានអំពាវនាវដល់ប្រជាពលរដ្ឋ បន្តការសម្អាតបរិស្ថានជុំវិញផ្ទះ ដូចជា សំបកកំប៉ុង ត្រឡោកដូង វត្ថុដក់ទឹកផ្សេងៗ។ បន្ថែមពីនេះ អាជ្ញាធរមូលដ្ឋាន សូមជួយពិនិត្យមើលកង់ឡាងដែលប្រជាពលរដ្ឋធ្វើអាជីវកម្ម ត្រូវទុកដាក់ឱ្យបានត្រឹមត្រូវ ដើម្បីកុំឱ្យកើតមានដង្កូវទឹក។

ក្នុងករណីមានរោគសញ្ញា ក្តៅខ្លួនគួរឱ្យសង្ស័យ សូមកុំព្យាយាមព្យាបាលដោយខ្លួនឯង ឬទៅព្យាបាលនៅគ្លីនិកឯកជនដែលគ្មានចំណេះជំនាញវិជ្ជាជីវៈច្បាស់លាស់ ត្រូវទៅព្យាបាលនៅមន្ទីរពេទ្យរដ្ឋឱ្យបានទាន់ពេលវេលា ចៀសវាងមានគ្រោះថ្នាក់ដល់ជីវិត៕

The post ក្នុងរយៈពេល៦ ខែឆ្នាំនេះ ជំងឺគ្រុនឈាមកើតមានជាង ៨ពាន់ករណី កើនឡើង២៨.៦% បើធៀបនឹងឆ្នាំមុន appeared first on Kampuchea Thmey Daily.

លោកវេជ្ជបណ្ឌិត លាង ឬទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាមបានមានប្រសាសន៍នៅព្រឹកថ្ងៃទី ១០ មីនានេះថា រយៈពេល ៧ សប្តាហ៍ដើមឆ្នាំ២០២៣ មានករណីជំងឺគ្រុនឈាមចំនួន ៧៥៩ ករណីក្នុងនោះស្លាប់ ២ ករណីមានការកើនឡើងជិត ៣ ដងបើប្រៀបធៀបទៅនឹងរយៈពេល៧សប្តាហ៍ដូចគ្នាកាលពីឆ្នាំ២០២២ កន្លងទៅដែលមានត្រឹមតែ ២៩១ ករណីនិងមិនមានករណីស្លាប់ទេ។

រាជធានីខេត្តដែលមានករណីជំងឺគ្រុនឈាមច្រើនជាងគេរួមមានខេត្តកណ្តាល រាជធានីភ្នំពេញ បន្ទាយមានជ័យ កំពង់ឆ្នាំង កំពង់ធំ ខេត្តព្រះសីហនុ និងខេត្តតាកែវ។

លោកវេជ្ជបណ្ឌិតបានប៉ាន់ស្មានថា ស្ថានភាពជំងឺគ្រុនឈាមអាចនឹងកើនឡើងដល់ជាង ២ ម៉ឺនករណីខ្ពស់ជាងឆ្នាំ​២០២២ ដែលមានករណីជំងឺគ្រុនឈាមជាង ១២ ៥០០ ករណីក្នុងនោះស្លាប់ ១៩ ករណី ដោយសារជាឆ្នាំកៀកទៅនឹងវដ្ឋ​នៃការផ្ទុះជំងឺគ្រុនឈាមទ្រង់ទ្រាយធំ ខណៈការផ្ទុះលើកចុងក្រោយនៅឆ្នាំ២០១៩។

លោកវេជ្ជបណ្ឌិតបានបន្តទៀតថា ក្រសួងសុខាភិបាលបានតៀមថ្នាំអាបេតចំនួន ២០០ តោន សេរ៉ូមជិត ៦ ម៉ឺនប្លោកនិងថ្នាំបាញ់សម្លាប់មូសជិត ៥ ពាន់លីត្រ ដើម្បីទប់ស្កាត់ការរាតត្បាតជំងឺគ្រុនឈាមទ្រង់ទ្រាយធំនៅឆ្នាំ២០២៣។ ជាមួយគ្នានេះ ក្រសួងក៏មានត្រៀមសារអប់រំពីវិធានការការពារជំងឺគ្រុនឈាមសម្រាប់ផ្សព្វផ្សាយតាមប្រព័ន្ធបណ្តាញសង្គម វិទ្យុ​អនឡាញ​និងទូរទ្សសន៍ ដើម្បីបញ្ជ្រាបដល់ប្រជាពលរដ្ឋបានយល់ដឹងការពារកូនចៅកុំឱ្យឆ្លងជំងឺគ្រុនឈាម។

លោកវេជ្ជបណ្ឌិត បានអំពាវនាវដល់អាណាព្យាបាល មាតាបិតាកុមារាកុមារីគ្រប់រូបរួមទាំងអាជ្ញាធរមូលដ្ឋាន ត្រូវចូលរួមកំចាត់ដង្កូវទឹកនៅតាមទីកន្លែង ដែលមានទឹកដក់ដូចជា ពាង អាងទឹក ថូផ្កា ចានទ្រជើង ក្រឡ ខាប់ ជាដើម និងអាជីវករនិង​ម្ចាស់ជីវកម្មទាំងឡាយដែលប្រកបរបរពាក់ព័ន្ធសំបកកង់ឡានម៉ូតូ សូមធ្វើការគ្រប់គ្រងសំបកកង់ទាំងនេះឲ្យមានសុវត្ថិភាព ជៀសផុតពីការដក់ទឹកដោយមិនត្រូវទុកចោលពាសវាលពាសកាល បង្កើតបានជាប្រភពកកើត និងជំរកមូសខ្លាដ៏គ្រោះថ្នាក់បំផុត ដែលអំណោយដល់ការចម្លងជំងឺគ្រុនឈាមកើនឡើង និងអាចឈានទៅរកការរាតត្បាតគ្រប់ពេលវេលា។

ក្នុងករណីមានរោគសញ្ញាក្តៅខ្លួនខ្លាំងភ្លាមៗត្រូវប្រញ៉ាប់នាំអ្នកជំងឺទៅរកសេវាព្យាបាលរបស់រដ្ឋដូចជាមណ្ឌលសុខភាព និងមន្ទីរពេទ្យដែលនៅជិតបំផុតនិងកុំសាកល្បងព្យាបាលជំងឺ ដោយខ្លួនឯងឬពន្យារពេលតាមដានព្យាបាលអ្នកជំងឺនៅសេវាឯកជនដែលគ្មានសមត្ថភាពផ្នែកជំងឺគ្រុនឈាមព្រោះអាចធ្វើឱ្យកុមារស្លាប់បាត់បង់ជជីវិតបាន៕

អត្ថបទ៖ សំអឿន

The post ត្រឹម ៧ សប្តាហ៍ កម្ពុជាមានករណីជំងឺគ្រុនឈាមជាង ៧៥០ ករណី មាន​អ្នក​ស្លាប់ ២ នាក់ appeared first on Kampuchea Thmey Daily.