លោក សៀង ណាំ Archives - Kampuchea Thmey Daily

លោក សៀង ណាំ ចុះសួរសុខទុក្ខនាំយកគ្រឿងឧបភោគបរិភោគផ្ដល់ជូនជនភៀសសឹកស្នាក់នៅស្រុកក្រឡាញ់

អ៊ិន ពិសី — Mon, 15 Dec 2025 10:17:37 +0000

នៅថ្ងៃទី ១៥ ខែធ្នូ ឆ្នាំ ២០២៥ នេះ លោក សៀង ណាំ តំណាងរាស្ត្រមណ្ឌលសៀមរាប និង លោកស្រី រួមជាមួយរដ្ឋបាលស្រុក ក្រុមការងារ បានអញ្ជើញចុះសួរសុខទុក្ខ និងនាំយកគ្រឿងឧបភោគបរិភោគ ដែលបានការជួយឧបត្ថម្ភពី អ្នកឧកញ៉ា ហេង ឡុង ផ្ដល់ជូនដល់ជនភៀសសឹកចំនួន ១ ៥០០ គ្រួសារ ស្នាក់នៅក្នុងគោលដៅសុវត្ថិភាពក្នុងស្រុកក្រឡាញ់ ខេត្តសៀមរាប។

លោក សៀង ណាំ មានប្រសាសន៍ថា ការប្រយុទ្ធគ្នានៅតាមបណ្ដោយព្រំដែនច្រើនថ្ងៃកន្លងមកនេះ កងកម្លាំងកម្ពុជាបានតស៊ូប្រកៀកស្មាគ្នាក្លាហាន ម៉ឺងម៉ាត់ ប្ដូរផ្ដាច់ រក្សាការពារឱ្យខាងតែបាននូវបូរណភាព និងអធិបតេយ្យភាពទឹកដីមិនរបេះរបូតឡើយ។ ផលវិបាក នៃសង្គ្រាម បានបង្កមហន្តរាយបំផ្លិចបំផ្លាញទ្រព្យសម្បត្តិ និងផ្តាច់ជីវិតមិនរើសមុខ ទាំងទាហាន និងជនស៊ីវិលស្លូតត្រង់ ហើយសង្គ្រាមនេះ បង្ខំចិត្តប្រជាពលរដ្ឋនៅតំបន់កៀកសមរភូមិ ឱ្យភៀសខ្លួនចាកចោលផ្ទះសម្បែង ទ្រព្យសម្បត្តិ គោក្របី ស្រែចម្ការជាដើម មករកទីសុវត្ថិភាព។

លោកបញ្ជាក់ថា ទុក្ខលំបាកនេះធ្វើឱ្យយើងទាំងអស់គ្នាយល់យ៉ាងច្បាស់តម្លៃ នៃសន្តិភាព។ ក្នុងគ្រានេះ យើងត្រូវចែករំលែក ក្រោមស្មារតីខ្មែរតែមួយរួមគ្នា ខ្មែរស្រឡាញ់ខ្មែរជួយគ្នាទៅវិញទៅមក ទាំងសម្ភារ និងស្មារតី។ ជាមួយគ្នានេះ ប្រមុខរាជរដ្ឋាភិបាល និងអាជ្ញាធរគ្រប់លំដាប់ថ្នាក់ តែងតែគិតគូរដោះស្រាយពីទុក្ខលំបាកនោះ ដោយមិនទៅណាចោល និងនៅជាមួយពលរដ្ឋជានិច្ច។

លោក សៀង ណាំ ក៏បានលើកទឹកចិត្ត និងអរគុណដល់គ្រួសារដែលមានកូនមានប្តីជាកងទ័ពកំពុងបំពេញភារកិច្ចនៅសមរភូមិមុខដើម្បីការពារអធិបតេយ្យភាព និងបូរណភាពទឹកដីជាកេរដូនតាយើងបានការពារទុកឱ្យដល់សព្វថ្ងៃ ទទួលបានជោគជ័យគ្រប់ពេលវេលា ហើយសូមឱ្យកម្លាំងមហាសាមគ្គី នៅតែបន្តជាថាមពលរឹងមាំសម្រាប់គាំទ្រ និងផ្តល់កម្លាំងចិត្តដល់វីរកងទ័ពបន្តបេសកកម្មក្នុងការការពារទឹកដីរបស់យើង។

លោកក៏បានណែនាំដល់ប្រជាពលរដ្ឋភៀសសឹកទាំងអស់ ឱ្យយកចិត្តទុកដាក់ថែទាំសុខភាព ថែទាំអនាម័យ ត្រូវហូបស្អាត ផឹកស្អាត ដើម្បីបង្ការ និងចៀសវាងពីជំងឺតម្កាត់នានា ហើយបើមានតម្រូវការបន្ទាន់ ត្រូវទាក់ទងជាមួយអាជ្ញាធរមូលដ្ឋានដែលនៅក្បែរបំផុត៕

អត្ថបទ ៖ គឿនវេត

The post លោក សៀង ណាំ ចុះសួរសុខទុក្ខនាំយកគ្រឿងឧបភោគបរិភោគផ្ដល់ជូនជនភៀសសឹកស្នាក់នៅស្រុកក្រឡាញ់ appeared first on Kampuchea Thmey Daily.

ផ្លូវពីផ្លូវជាតិលេខ ៦ ដល់តំបន់ទេសចរណ៍កំពង់ភ្លុកមាត់បឹងទន្លេសាប គ្រោងបញ្ចប់នៅចុងខែមិថុនានេះ

Dy Bunnara — Mon, 26 May 2025 02:58:53 +0000

ផ្លូវមួយខ្សែពីផ្លូវជាតិលេខ ៦ ទៅដល់តំបន់ទេសចរណ៍កំពង់ភ្លុកក្នុងស្រុកប្រាសាទបាគង នឹងសម្រេចការសាងសង់បញ្ចប់នៅចុងខែមិថុនានេះ។ នេះបើតាមការគូសបញ្ជាក់របស់លោក សៀង ណាំ តំណាងរាស្រ្តមណ្ឌលខេត្តសៀមរាប។

លោក សៀង ណាំ តំណាងរាស្រ្តមណ្ឌលខេត្តសៀមរាប និងជាប្រធានក្រុមកងវិស្វកម្មសម្តេចតេជោ ខេត្តសៀមរាបបានបញ្ជាក់ថា ផ្លូវដែលជាអំណោយសម្តេចបវរធិបតី ហ៊ុន ម៉ាណែត នឹងកសាងរួចជាស្ថាពរនៅចុងខែមិថុនាខាងមុខនេះ។

ផ្លូវទៅកំពង់ភ្លុកដែលជាតំបន់សក្ដានុពលទេសចរដ៏ទាក់ទាញនៅជាប់មាត់បឹងទន្លេសាប នឹងប្រែក្លាយពីផ្លូវដីតូចចង្អៀតទៅជាផ្លូវកៅស៊ូឆាប់ៗខាងមុខនេះ ខណៈដែលកងវិស្វកម្មកំពុងតែសម្រុកស្ថាបនាឲ្យរួចរាល់នៅចុងរដូវប្រាំងនេះ។

លោក សូរ ប្លាតុង អភិបាលស្រុកប្រាសាទបាគងខេត្តសៀមរាបបានឲ្យកម្ពុជាថ្មីដឹងថា ផ្លូវទៅកំពង់ភ្លុកមានប្រវែងសរុបជាង ១៥ គីឡូម៉ែត្រ ចាប់ពីផ្លូវជាតិលេខ ៦ ដោយឆ្លងកាត់ឃុំចំនួន ៣ មានឃុំរលួស ឃុំមានជ័យ រហូតដល់ឃុំកំពង់ភ្លុកជាប់មាត់បឹងទន្លេសាប។

ផ្លូវនេះមួយកំណាត់ជាផ្លូវបេតុង ដែលបានសាងសង់បានប្រវែងជាង ២ គីឡូម៉ែត្រចេញពីផ្លូវជាតិលេខ ៦ ខណៈកំណាត់ផ្លូវនៅសល់ជាផ្លូវដី ដែលខែប្រាំងហ៊ុយពិបាកធ្វើដំណើរ និងខែវស្សារងការជន់លិចថែមទៀត។

លោក សូរ ប្លាតុង បានបញ្ជាក់ថា សម្ដេចធិបតីបានបញ្ជាឲ្យកងវិស្វកម្មសាងសង់ផ្លូវបន្តប្រវែងជាង ៨ គីឡូម៉ែត្រទៀត ដោយពង្រីកទទឹង ៨ ម៉ែត្រ ចាប់ពីឃុំមានជ័យរហូតដល់ឃុំកំពង់ភ្លុកជាប់មាត់បឹងទន្លេសាប។

ក្នុងដំណើរចុះទស្សនកិច្ច និងជួបសំណេះសំណាលជាមួយពលរដ្ឋរស់នៅសហគមន៍ទេសចរណ៍កំពង់ភ្លុកកាលពីថ្ងៃទី ២ ខែធ្នូ ឆ្នាំ២០២៤ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានឆ្លើយតបទៅសំណូមពរពីសហគមន៍ ក្នុងការសម្រេចឲ្យកសាងផ្លូវកៅស៊ូប្រវែង ៨ គីឡូម៉ែត្រ ដើម្បីសម្រួលដល់ពលរដ្ឋនិងទេសចរធ្វើដំណើរមកកម្សាន្តនៅតំបន់ទេសចរណ៍កំពង់ភ្លុក។

បន្ថែមពីនេះ សម្តេចក៏ឲ្យកសាងបញ្ជរលក់សំបុត្រថ្មីដល់សហគមន៍ រួមទាំងផ្តល់បន្ថែមនូវធុងសំរាមក្នុងសហគមន៍ ដើម្បីថែរក្សាអនាម័យ និងបរិស្ថាននៅក្នុងតំបន់ថែមទៀត៕

The post ផ្លូវពីផ្លូវជាតិលេខ ៦ ដល់តំបន់ទេសចរណ៍កំពង់ភ្លុកមាត់បឹងទន្លេសាប គ្រោងបញ្ចប់នៅចុងខែមិថុនានេះ appeared first on Kampuchea Thmey Daily.

លោក សៀង ណាំ Archives - Kampuchea Thmey Daily

លោក សៀង ណាំ ចុះសួរសុខទុក្ខនាំយកគ្រឿងឧបភោគបរិភោគផ្ដល់ជូន​ជនភៀសសឹកស្នាក់នៅស្រុកក្រឡាញ់

លោក សៀង ណាំ ចុះសួរសុខទុក្ខនាំយកគ្រឿងឧបភោគបរិភោគផ្ដល់ជូនជនភៀសសឹកស្នាក់នៅស្រុកក្រឡាញ់