យោងតាមលោក Daniel Spinks ដែលជាមិត្តភ័ក្រ្តដ៏យូរលង់ម្នាក់របស់លោក Alexander បាននិយាយថា បុរសសួតដែករូបនេះបានទទួលមរណភាពកាលពីថ្ងៃចន្ទក្នុងអាយុ ៧៨ ឆ្នាំនៅមន្ទីរពេទ្យ Dallas ។ លោក​បាន​និយាយ​ថា ថ្មីៗ​នេះ Alexander ​ត្រូវ​បាន​បញ្ជូន​ទៅ​មន្ទីរពេទ្យ​ បន្ទាប់​ពី​ត្រូវ​បាន​ធ្វើ​រោគ​វិនិច្ឆ័យ​ថា​មាន​ជំងឺ​កូវីដ ១៩ ប៉ុន្តែ​លោក​មិន​បាន​ដឹង​ពី​មូលហេតុ​ពិតប្រាកដនៃ​ការ​ស្លាប់នេះ​នោះ​ទេ ។

គួររំឭកថា Alexander​ ដែលជាបុរសសួតដែក​បានទទួលការចាប់អារម្មណ៍ពីមនុស្សជុំវិញពិភពលោក បន្ទាប់ពីមានការផ្សព្វផ្សាយពីជីវីតដ៏លំបាក និងការតស៊ូរបស់គាត់រស់នៅក្នុងបំពង់សួតដែកដើម្បីដកដង្ហើម និងការបំផុសគំនិតវិជ្ជមានរបស់គាត់ដែលផ្ដល់ក្ដីសង្ឃឹមដល់ជនពិការផ្សេងទៀត ។

Alexander បានឆ្លងជំងឺស្វិតដៃជើងនៅឆ្នាំ ១៩៥២ នៅពេលគាត់មានអាយុ ៦ ឆ្នាំ ។ គាត់ខ្វិនតាំងពី ក ចុះក្រោម ហើយបានចាប់ផ្តើមប្រើសួតដែក ដែលជាបំពង់ស៊ីឡាំងរុំរាងកាយរបស់គាត់ ខណៈដែលសម្ពាធខ្យល់នៅក្នុងបន្ទប់ខ្យល់ចេញចូលពីសួត អាចធ្វើឲ្យគាត់អាចដកដង្ហើមរស់រានមានជីវិតបាន ។

បើទោះបីជាប់ក្នុងសួតដែក បន្ទាប់ពីកើតជំងឺស្វិតដៃជើងកាលពីកុមារភាព ប៉ុន្តែលោក Paul Alexander បានទទួលបានសញ្ញាបត្រច្បាប់ ទទួលបរិញ្ញាបត្រផ្នែកសេដ្ឋកិច្ច សរសេរសៀវភៅអំពីជីវិតរបស់គាត់ បង្កើតមាតិកាដែលមានអ្នកតាមដានច្រើនបំផុតនៅលើប្រព័ន្ធផ្សព្វផ្សាយសង្គម និងបំផុសគំនិតមួយទាក់ទងនឹងទស្សនវិស័យវិជ្ជមានរបស់គាត់ទៅកាន់អ្នកតាមមដាននៅលើគណនី TikTok របស់គាត់ ។

គួរបញ្ជាក់ថា ជំងឺស្វិតដៃជើងធ្លាប់ជាជំងឺដ៏គួរឲ្យខ្លាចបំផុតរបស់សហរដ្ឋអាមេរិក ខណៈមានអ្នកខ្វិនរាប់ពាន់ករណីផ្ទុះឡើងជារៀងរាល់ឆ្នាំ ។ ជំងឺនេះប៉ះពាល់ដល់កុមារជាចម្បង ប៉ុន្តែនៅឆ្នាំ ១៩៧៩ ជំងឺនេះត្រូវបានអាមេរិកប្រកាសលែងមានការរីករាលដាលទាំងស្រុង ៕

អត្ថបទ ៖ ប៊ុន សុភាព

The post បុរសដែលដាក់សួតដែកទទួលមរណភាពហើយក្នុងវ័យ ៧៨ ឆ្នាំ appeared first on Kampuchea Thmey Daily.