វង់តន្ដ្រីខ្មែរ Archives - Kampuchea Thmey Daily

លោកសាស្ត្រាចារ្យ កែវ សុនន្ទកវី ជួយកូនក្រុមឲ្យឈ្នះជយលាភីលេខ ១ ទាំងពីររដូវកាល

Sorn Phanith — Tue, 14 Dec 2021 03:27:55 +0000

កាលពីល្ងាចថ្ងៃទី០៩ ខែធ្នូ ឆ្នាំ២០២១ កម្មវិធីវង់តន្ត្រីខ្មែរ រដូវកាលទី២ វគ្គផ្ដាច់ព្រ័ត្របានប្រព្រឹត្តទៅដោយជោគជ័យ នៅស្ថានីយ៍ទូរទស្សន៍ BTV ស្ទឹងមានជ័យ ក្រោមអធិបតីភាព ឯកឧត្តម ហាប់ ទូច រដ្ឋលេខាធិការក្រសួងវប្បធម៌ និងវិចិត្រសិល្បៈ តំណាងដ៏ខ្ពង់ខ្ពស់ លោកជំទាវបណ្ឌិត្យសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងឯកឧត្តម ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា ព្រមទាំងភ្ញៀវកិត្តិយសជាច្រើនរូបទៀត។

ឆ្លងកាត់ការដាក់ពិន្ទុយ៉ាងសុក្រឹតពីសំណាក់គណៈកម្មការមេប្រយោគទាំង ៥ រូប ក្នុងកម្មវិធីវង់តន្ត្រីខ្មែរ រដូវកាលទី ២ ក៏បានស្វែងរកឃើញម្ចាស់ជយលាភីទាំងបីក្រុម គឺ ក្រុមទេពបទុមវង្សពិណពាទ្យ ទទួលបានជយលាភីលេខ ១ រួមជាមួយប្រាក់រង្វាន់ ១២ លានរៀល, ក្រុមយុវជនល្ខោនខោលកម្ពុជា ទទួលបានជយលាភីលេខ ២ ជាមួយប្រាក់រង្វាន់ ៨ លានរៀល និងក្រុមមន្ទីរវប្បធម៌ខេត្តបន្ទាយមានជ័យ ទទួលបានជយលាភីលេខ ៣ ជាមួយប្រាក់រង្វាន់ ៤ លានរៀល។

អ្វីដែលគួរឲ្យកត់សម្គាល់ គឺលោកសាស្ត្រាចារ្យ កែវ សុនន្ទកវី ដែលជាគ្រូបង្វឹករបស់ក្រុមទេពបទុមវង្សពិណពាណ្យ ក៏ជាគ្រូបង្វឹកនៃក្រុមជយលាភីលេខ ១ ក្នុងកម្មវិធីវង់តន្ត្រីខ្មែរ កាលពីរដូវកាលទី១ ផងដែរ គឺក្រុមកេរមរតកដូនតា មកពីរាជធានីភ្នំពេញ ក្រោមវិញ្ញាសា “វង់ភ្លេងការបុរាណខ្មែរ” ដែលមានន័យថា លោកសាស្ត្រាចារ្យ បានជួយកូនក្រុមរបស់ខ្លួនឲ្យឈ្នះជយលាភីលេខ ១ ទាំងពីររដូវកាល។

គួរបញ្ជាក់ថា កម្មវិធីនេះ គឺជាគំនិតផ្ដួចផ្ដើម និងបង្កើតឡើងដោយសហភាពសហព័ន្ធយុវជនកម្ពុជា ខេត្តស្វាយរៀង គាំទ្រដោយ ក្រសួងវប្បធម៌ និងវិចិត្រសិល្បៈ និងសមាគមមិត្តតន្ត្រីករ។ កម្មវិធីនេះ រៀបចំឡើងក្នុងគោលបំណង៖ ចូលរួមលើកកម្ពស់ ថែរក្សា ការពារសិល្បៈ ទំនៀមទម្លាប់ ប្រពៃណី វប្បធម៌ដែលជាអត្តសញ្ញាណជាតិ និងផ្សព្វផ្សាយឧបករណ៍តន្ត្រីខ្មែរទៅកាន់ប្រជាពលរដ្ឋ ជាពិសេសយុវជនជំនាន់ក្រោយ និងបរទេសបានស្គាល់ឲ្យកាន់តែច្រើន។ ជាមួយគ្នានេះ កម្មវិធីវង់តន្ត្រីខ្មែរ ក៏បានលើកតម្លៃ និងសម្រស់នៃឧបករណ៍បុរាណ និងសំលៀកបំពាក់ប្រពៃណីខ្មែរ ដោយតម្រូវឲ្យបេក្ខជនចូលរួមប្រកួត រៀបចំខ្លួន ស្លៀកពាក់ទៅតាមទម្រង់ ស្រស់ស្អាតតាមបែបប្រពៃណីបុរាណខ្មែរក្នុងអំឡុងពេលប្រកួត៕

The post លោកសាស្ត្រាចារ្យ កែវ សុនន្ទកវី ជួយកូនក្រុមឲ្យឈ្នះជយលាភីលេខ ១ ទាំងពីររដូវកាល appeared first on Kampuchea Thmey Daily.

ជើងខ្លាំងទាំង៥ក្រុម ក្នុងវគ្គជម្រុះចុងក្រោយ មាន៣ក្រុមណាទៅវគ្គផ្ដាច់ព្រ័ត្របាន?

Sorn Phanith — Mon, 01 Nov 2021 08:00:49 +0000

កាលពីវគ្គពាក់កណ្ដាលផ្ដាច់ព្រ័ត្រ ដែលបានបញ្ចប់កន្លងទៅ កម្មវិធីវង់តន្ត្រីខ្មែរ រដូវកាលទី២ បានស្វែងរកឃើញបេក្ខជនឆ្នើមទាំង៥ក្រុម ក្នុងវិញ្ញាសាបីផ្សេងគ្នារួមមាន វង់ភ្លេងពិណពាទ្យ ល្ខោនខោល និងល្ខោនយីកេ។

បេក្ខជនប្រកួតទាំង ៥ក្រុម ក៏បានឆ្លងកាត់នូវដំណាក់កាលបោះឆ្នោតពីទស្សនិកជន តាមរយៈវីដេអូបង្ហាញសមត្ថភាពនៃបេក្ខជននីមួយៗក្នុងផេកហ្វេសប៊ុកផ្លូវការរបស់សហភាពសហព័ន្ធយុវជនកម្ពុជា ពោលគឺពិន្ទុសម្រាប់វគ្គជម្រុះចុងក្រោយនេះ មាន៤០% ដែលយកចេញពីពិន្ទុបោះឆ្នោតរបស់បងប្អូនទស្សនិកជន។

ដោយឡែកពិន្ទុ៦០%ទៀត ជាការវិនិច្ឆ័យវាយតម្លៃពីសំណាក់គណៈកម្មការមេប្រយោគ ដែលក្នុងនោះ សមាសភាពបេក្ខជនរួមមាន៖

១. ក្រុមទេពបទុមវង្សពិណពាទ្យ (រាជធានីភ្នំពេញ) វិញ្ញាសា បទដំណើរសេះបីជាន់ ឬ(បទសាឡូម៉ា) ៣ជាន់។

២. ក្រុមពន្លកយុវជនយីកេ (រាជធានីភ្នំពេញ) វិញ្ញាសា រឿង ទិព្វសូដាច័ន្ធ (ភាគបញ្ចប់)

៣. ក្រុមមន្ទីរវប្បធម៌ខេត្តបន្ទាយមានជ័យ (ខេត្តបន្ទាយមានជ័យ) វិញ្ញាសា បទដំណើរសេះបីជាន់ ឬ(បទសាឡូម៉ា) ៣ជាន់

៤. ក្រុម យុវជនខ្មែរថែមរតកដូនតា (ខេត្តកណ្តាល) វិញ្ញាសា បទដំណើរសេះបីជាន់ ឬ(បទសាឡូម៉ា) ៣ជាន់

៥. ក្រុមយុវជនល្ខោនខោលកម្ពុជា (រាជធានីភ្នំពេញ) វិញ្ញាសា ដកស្រង់ពីរឿងរាមកេរ្តិ៍

ជាលទ្ធផល គឺកម្មវិធីបានរកឃើញក្រុមចំនួន៣ ដែលទទួលបានពិន្ទុសរុបខ្ពស់ជាងគេ (ពិន្ទុបោះឆ្នោត បូកនឹងពិន្ទុវាយតម្លៃពីគណៈកម្មការ) គឺក្រុមទេពបទុមវង្សពិណពាទ្យ ក្រុមមន្ទីរវប្បធម៌ខេត្តបន្ទាយមានជ័យ ក្រុមយុវជនល្ខោនខោលកម្ពុជា។

បេក្ខជនទាំង៣ក្រុម នឹងមានឱកាសទៅវគ្គផ្ដាច់ព្រ័ត្រ ដើម្បីយកជយលាភីលេខ១ បន្តដោយលេខ២ និងលេខ៣។ ដោយឡែក កម្មវិធីក៏សូមចូលរួមសោកស្ដាយចំពោះក្រុមពន្លកយុវជនយីកេ និងក្រុមយុវជនខ្មែរថែមរតកដូនតា ដែលមិនមានឱកាសទៅវគ្គបន្ត ហើយពីកម្មវិធីក៏លើកទឹកចិត្តឲ្យក្រុមទាំង២ បន្តនូវស្មារតីលើកតម្កើងវប្បធម៌បុរាណខ្មែរជានិច្ចនិរន្តរ៍។

កម្មវិធីវង់តន្ត្រីខ្មែររដូវកាលទី២ នឹងមានការចាក់ផ្សាយលើកញ្ចក់ទូរទស្សន៍ BTV រៀងរាល់ថ្ងៃសៅរ៍ ចាប់ពីម៉ោង ៨យប់តទៅ និងការផ្សាយបន្តផ្ទាល់លើផេកផ្លូវការ របស់សហភាពសហព័ន្ធយុវជនកម្ពុជា ខេត្តស្វាយរៀងផងដែរ៕

The post ជើងខ្លាំងទាំង៥ក្រុម ក្នុងវគ្គជម្រុះចុងក្រោយ មាន៣ក្រុមណាទៅវគ្គផ្ដាច់ព្រ័ត្របាន? appeared first on Kampuchea Thmey Daily.

បើពុកម៉ែបងប្អូនស្រឡាញ់ពេញចិត្តក្រុមពន្លកយុវជនយីកេ សូមកុំភ្លេចបោះឆ្នោតដល់ក្រុមនេះ

Sorn Phanith — Sat, 23 Oct 2021 08:58:42 +0000

ក្រុមពន្លកយុវជនយីកេ ដែលបានបង្កើតឡើងនៅថ្ងៃទី១១ ខែមិថុនា ឆ្នាំ២០២១ មានសមាជិកចំនួន ១១នាក់ ដោយក្នុងនោះមានលោក វី វ័យ ជាប្រធានក្រុម ព្រមទាំងអនុប្រធានទី១ ឈ្មោះ សុវណ្ណ ស៊ុនហេង និងអនុប្រធានទី២ ឈ្មោះ ប៉ិច ស៊ីនួន។ តាំងពីការកកើតជាក្រុម មកទល់សព្វថ្ងៃនេះមានលោកគ្រូ កើត ថារ៉ាន់ មកជួយមើលនិងបង្ហាត់បង្រៀន។

ជាសិស្សដែលកំពុងសិក្សានៅសាលាមធ្យមវិចិត្រសិល្បៈ សិល្បករទាំងអស់ក្នុងក្រុមនេះនឹងជួយបង្ហាត់បង្រៀនដោយក្ដីស្រលាញ់ និងពេញចិត្តមិនគិតពីរកម្រៃអ្វីឡើយ ដល់បងប្អូនដែលស្រលាញ់ហើយចង់ចេះពីទម្រង់ល្ខោនយីកេនេះ។ ក៏ប៉ុន្តែក្រុមយើងខ្ញុំសុទ្ធតែជាសិស្សានុសិស្ស ដែលកំពុងស្ថិតនៅក្នុងការអប់រំសិក្សានៅឡើយ ដូច្នេះហើយយើងខ្ញុំមិនអាចបង្ហាត់បង្រៀនបានយ៉ាងល្អ និងក្បោះក្បាយបានទេ តែបើបងប្អូនស្រលាញ់ហើយពិតជាចង់ចេះពីទម្រង់ល្ខោនយីកេនេះពិតប្រាកដ ក្រុមយើងខ្ញុំនិងជួយបង្ហាត់បង្រៀនឲ្យអស់ពីចិត្ត ពីថ្លើមតាមដែលអាចធ្វើទៅបាន។ នេះបើតាមការលើកឡើងរបស់ប្រធានក្រុម លោក វី វ័យ។

មកទល់ពេលនេះ សមាជិកក្រុមធ្លាប់បានចេញសម្ដែងរឿងខ្លះៗដូចជា រឿងព្រះវេសន្ដរ រឿងទុំទាវ រឿងម៉ាក់ថើង រឿងក្អុកក្អីបែបកំប្លែងក្នុងសាច់រឿងព្រះវេស្សន្ដរ រឿងរលកវាស្នា រឿងបុរសបេះដូងមាស។ល។ ភាគច្រើនសម្ដែងនៅក្នុងឱកាសបុណ្យទានដូចជា បុណ្យចម្រើនព្រះជន បុណ្យផ្កា ឡើងផ្ទះ និងបុណ្យឆ្លងចេតិយជាដើម។

ក្នុងនាមជាសិល្បករជ្រកក្រោមម្លប់នៃវិស័យវប្បធម៌ សិល្បៈបុរាណ ដែលកំពុងបម្រើ លើកស្ទួយ និងការពារទម្រង់ “ល្ខោនយីកេ” ក្រុមពន្លកយុវជនយីកេ កំពុងតែជួបបញ្ហានិងឧបសគ្គដូចជា៖ សព្វថ្ងៃនេះល្ខោនយីកេស្ទើរតែបាត់បង់ប្រជាប្រិយភាពទាំងស្រុងទៅហើយ ហើយមិនសូវជាមានអ្នកឲ្យតម្លៃនិងគាំទ្រលើសិល្បៈបុរាណមួយនេះ។ មិនត្រឹមតែប៉ុណ្ណោះ ល្ខោនយីកេមិនសូវមានទីផ្សារធ្វើឲ្យសិល្បករមួយចំនួនបោះបង់ចោល ជំនាញសិល្បៈបុរាណនេះ ធ្វើឲ្យសិល្បករនិងសិស្សានុសិស្សបាក់ទឹកចិត្តក្នុងការហាត់រៀនបន្ត។

គួរបញ្ជាក់ផងដែរថា សព្វថ្ងៃនេះ ក្នុងកម្មវិធីវង់តន្ត្រីខ្មែរ រដូវកាលទី២ ក្រុមពន្លកយុវជនយីកេ គឺជាបេក្ខជនប្រកួត ដែលមានទេពកោសល្យឆ្នើម ឆ្ពោះមកកាន់វគ្គជម្រុះចុងក្រោយ។ តាំងពីវគ្គជម្រើសដំបូង មកដល់វគ្គនេះ តំណាងក្រុមបានអះអាងថា ក្រុមរបស់យើងខ្ញុំបានឆ្លងកាត់នូវការលំបាក ទៅលើកង្វះហិរញ្ញវត្ថុ សម្រាប់យកមកផ្គត់ផ្គងខាងដេគ័រ មានរយៈពេលខ្លីសម្រាប់ឲ្យពួកខ្ញុំហាត់រឿង និងធ្វើដេគ័រ ហើយសាច់រឿងខ្លះត្រូវធ្វើសំលៀកបំពាក់ថ្មី ដូច្នេះត្រូវការពេលវេលាទាំងក្នុងការហាត់ ទាំងធ្វើដេគ័រ និងសំលៀកបំពាក់។ ឧបសគ្គដែលធំជាងគេ គឺគ្រប់តួអង្គនៅក្នុងក្រុមរបស់យើង សុទ្ធតែជាសិស្សដែលកំពុងស្ថិតនៅក្នុងការសិក្សារៀនសូត្រនៅឡើយ ហើយនៅមានកម្រិត មិនទាន់ក្លាយជាអ្នកសិល្បៈអាជីពទេ ទើបធ្វើឲ្យការសម្ដែងមានការខុសឆ្គង មិនទាន់ល្អឥតខ្ជោះ។ ចំពោះការប្រកួតតាមប្រព័ន្ធអនឡាញ ក្នុងបរិបទកូវីដ១៩ នេះ ក្រុមពន្លកយុវជនយីកេយល់ឃើញថាទទួលបានបទពិសោធន៍ថ្មីៗជាច្រើនក្នុងកាប្រើប្រាស់ប្រព័ន្ធអនឡាញ ជាពិសេសយើងអាចប្រកួតប្រជែងជាមួយគ្នាដោយមិនចាំបាច់ជួបផ្ទាល់ ហើយអាចបញ្ចៀសពីជំងឺកូវីដ១៩ទៀតផង។

ការបោះឆ្នោតពីបងប្អូន សាធារណជននឹងរួមចំណែកដល់ទៅ៤០ភាគរយនៃពិន្ទុសរុប និងជួយជ្រោមជ្រែងឲ្យក្រុមនីមួយៗមានឱកាសទៅវគ្គផ្ដាច់ព្រ័ត្រ។ ដូចនេះ បើសិនជាពុកម៉ែ បងប្អូន ដែលពេញចិត្តនូវក្រុមពន្លកយុវជនយីកេ សូមមេត្តាកុំភ្លេចជួយបោះឆ្នោតក្រុមនេះ តាមរយៈការចុចរូបមេដៃ (like) សើច(haha) វ៉ាវ (wow) បេះដូង (heart) លើកលែងតែរូបក្រៀមក្រំ (sad) និងរូបខឹង (angry) នៅលើវីដេអូបង្ហាញសម្ដែង ដែលបង្ហោះលើផេកហ្វេសប៊ុកជាផ្លូវការរបស់សហភាពសហព័ន្ធយុវជនកម្ពុជា ចាប់ពីថ្ងៃទី ១៧ ដល់ថ្ងៃទី ២៥ ខែតុលា ឆ្នាំ ២០២១។

តំណភ្ជាប់ទៅកាន់វីដេអូ៖ https://web.facebook.com/uyfc.svay.rieng/videos/408062134170829/

The post បើពុកម៉ែបងប្អូនស្រឡាញ់ពេញចិត្តក្រុមពន្លកយុវជនយីកេ សូមកុំភ្លេចបោះឆ្នោតដល់ក្រុមនេះ appeared first on Kampuchea Thmey Daily.

ក្រុមមន្ទីរវប្បធម៌ខេត្តបន្ទាយមានជ័យ លើកទឹកចិត្តឲ្យអ្នកសិល្បៈយោគយល់អធ្យាស្រ័យគ្នារាប់អានគ្នា

Sorn Phanith — Sat, 23 Oct 2021 08:40:33 +0000

លោក រិន កវី ដែលជាស្ថាបនិកនៃក្រុមមន្ទីរវប្បធម៌ខេត្តបន្ទាយមានជ័យ បានលើកឡើងថា៖ ក្រុមរបស់ខ្ញុំ បង្កើតតាំងពីឆ្នាំ២០១៥ ហើយតាំងពីកកើតក្រុមរហូតដល់សព្វថ្ងៃ គឺខ្ញុំជាអ្នកបង្ហាត់បង្រៀនតែម្នាក់ឯង តែខ្ញុំមានស្គាល់លោកគ្រូនៅខាងភ្នំពេញខ្លះ និងខាងសៀមរាបបានសុំរៀនពីតិចនិកខ្លះៗតាម(Facebook ) ក្នុងនោះមាន លោកគ្រូ កិ ស្រុកពួក(តិចនិកស្រឡៃ)លោកគ្រូ កែវ ប្រសិទ្ធី(ខាងឯកសារ និងតុងសំឡេង) លោកគ្រូ កែវ សុន្ទនកវី (បច្ចេកទេសរបៀបគោះរនាត និងទ្រឹស្ដីខ្លះៗពីភ្លេង) លោកគ្រូ កែវ ដូលីវណ្ណ (តិចនិកដង្ហើម ឧបករណ៍ផ្លុំ)។

ភ្លេងពិណពាទ្យ ដែលត្រូវបានមនុស្សមួយភាគតូចហៅថាភ្លេងសៀមវិញ តំណាងក្រុមមន្ទីរវប្បធម៌ខេត្តបន្ទាយមានជ័យ ក៏បានបន្តទៀតថា៖ នេះជាអ្វីដែលខ្ញុំតែងឮព្រោះថា ខេត្ដខ្ញុំជាប់ថៃផង ខ្ញុំសែនស្រណោះវង់ភ្លេងពិណពាទ្យយើងណាស់ តែខ្ញុំតែងពន្យល់ដោយសុជីវធម៌ ដល់ពួកគាត់ ហើយដោយសារតែឮពាក្យនេះ បានជាខ្ញុំខំប្រឹងបង្រៀន បង្កើតជាក្រុមភ្លេងពិណពាទ្យឡើង ដើម្បីឲ្យក្មេងៗ ពិសេសយុវជនក្នុងខេត្ដបានស្គាល់ ហើយជួយខ្ញុំលុបបំបាត់ឈ្មោះ ថាភ្លេងសៀមនេះចេញ ព្រោះណាមួយជាប់ព្រំដែនថៃផង។

យើងដឹងហើយថា ភាគច្រើននៃទស្សនីយភាពរបាំ ពិធីបុណ្យទាន ឬមហោស្រពផ្សេងៗ សុទ្ធតែត្រូវការវង់ភ្លេងពិណពាទ្យ។ សម្រាប់ចំណាប់អារម្មណ៍លោក រិន កវី ផ្ទាល់ ជឿជាក់ថាវានឹងបាត់បង់ទេព្រោះជាភ្លេងរបស់ខ្មែរ កូនខ្មែរយើងនៅតែមាននិស្ស័យនឹងភ្លេងនេះ ហើយឈាមជ័រខ្មែរយើង គឺមានការស្រឡាញ់ជាតំណពូជ។

បច្ចុប្បន្ន ក្រុមមន្ទីរវប្បធម៌ខេត្តបន្ទាយមានជ័យ គឺជាបេក្ខជនប្រកួតនៅក្នុងកម្មវិធីវង់តន្ត្រីខ្មែរ រដូវកាលទី២ ដែលមានសមត្ថភាពឆ្នើម ឆ្ពោះមកកាន់វគ្គជម្រុះចុងក្រោយ។ ការជម្រុះពីមួយវគ្គទៅមួយវគ្គ កាន់តែស្វិតស្វាញទៅៗ ដែលទាមទារឲ្យបេក្ខជននីមួយៗប្រឹងប្រែងខ្លាំង។ តាំងពីវគ្គដំបូង មកដល់វគ្គនេះ ចំពោះក្រុមមន្ទីរវប្បធម៌ខេត្តបន្ទាយមានជ័យ បានឆ្លងកាត់នូវការលំបាកច្រើនគួរសមដែរ បញ្ហាចម្បងដែលត្រូវប្រឈមគឺត្រូវថែរក្សាសុវត្ថិភាព អនុវត្ដ ៣កុំ៣ការពារ ហើយទាមទារឲ្យមានការប្រឹងប្រែងខ្ពស់ ហាត់ទឹកដៃ សំយោគនូវសាច់ភ្លេង បង្កើតការទាក់ទាញក្នុងការសម្ដែង សោភ័ណភាពភ្លេងត្រូវជួសជុល ឬទិញផ្លាស់ថ្មីនូវឧបករណ៍ និងលាបពណ៌ថ្មី។ល។

ជាចុងក្រោយ ស្ថាបនិកក្រុមនេះក៏មានពាក្យពេចន៍ និងសំណូមពរដល់ពុកម៉ែបងប្អូនជាពិសេសបងប្អូនអ្នកសិល្បៈបុរាណខ្មែរថា ឲ្យជួយគាំទ្រ ស្រឡាញ់ការពារ អភិរក្ស នូវសិល្បៈបុរាណយើង ត្រូវចេះចែករំលែក ជួយផ្សព្វផ្សាយ ចំពោះអ្នកសិល្បៈចេះស្រឡាញ់គ្នា យោគយល់អធ្យាស្រ័យគ្នា រាប់អានគ្នា ធ្វើខ្លួនឲ្យមានតម្លៃ សុជីវធម៌ល្អ ថ្លៃថ្នូរ រៀនឲ្យច្បាស់ចេះទាំងទ្រឹស្ដី ទាំងការអនុវត្ដ ព្រោះថាសិល្បៈយើងរីកចម្រើនមានតម្លៃក៏អាស្រ័យលើសិល្បករហើយ គ្មានអ្នកណា មកយល់ច្បាស់ពីតម្លៃសិល្បៈខ្មែរយើង ជាងអ្នកសិល្បៈខ្មែរ និងប្រជាជនខ្មែរយើងឡើយ។

សូមបញ្ជាក់ថា ការបោះឆ្នោតពីបងប្អូន សាធារណជននឹងរួមចំណែកដល់ទៅ៤០ភាគរយនៃពិន្ទុសរុប និងជួយជ្រោមជ្រែងឲ្យក្រុមនីមួយៗមានឱកាសទៅវគ្គផ្ដាច់ព្រ័ត្រ។ ដូចនេះ បើសិនជាពុកម៉ែ បងប្អូន ដែលពេញចិត្តនូវក្រុមមន្ទីរវប្បធម៌ខេត្តបន្ទាយមានជ័យ សូមមេត្តាកុំភ្លេចជួយបោះឆ្នោតក្រុមនេះ តាមរយៈការចុចរូបមេដៃ (like) សើច(haha) វ៉ាវ (wow) បេះដូង (heart) លើកលែងតែរូបក្រៀមក្រំ (sad) និងរូបខឹង (angry) នៅលើវីដេអូបង្ហាញសម្ដែង ដែលបង្ហោះលើផេកហ្វេសប៊ុកជាផ្លូវការរបស់សហភាពសហព័ន្ធយុវជនកម្ពុជា ចាប់ពីថ្ងៃទី ១៧ ដល់ថ្ងៃទី ២៥ ខែតុលា ឆ្នាំ២០២១។

តំណភ្ជាប់ទៅកាន់វីដេអូ៖ https://web.facebook.com/uyfc.svay.rieng/videos/570397710960751

The post ក្រុមមន្ទីរវប្បធម៌ខេត្តបន្ទាយមានជ័យ លើកទឹកចិត្តឲ្យអ្នកសិល្បៈយោគយល់អធ្យាស្រ័យគ្នារាប់អានគ្នា appeared first on Kampuchea Thmey Daily.

រកឃើញហើយសមាសភាពបេក្ខជនទាំង៥ក្រុម ឆ្ពោះមកកាន់វគ្គជម្រុះចុងក្រោយ

Sorn Phanith — Mon, 18 Oct 2021 08:32:00 +0000

ទស្សនីយភាពសិល្បៈបុរាណគ្រប់ទម្រង់ ពីសំណាក់បេក្ខជនទាំង៨ក្រុម យ៉ាងសម្បើម និងកក្រើកវេទិកា ក្នុងកម្មវិធីវង់តន្ត្រីខ្មែរ រដូវកាលទី២ កាលពីវគ្គពាក់កណ្ដាលផ្ដាច់ព្រ័ត្រ បានធ្វើឲ្យគណៈកម្មការមេប្រយោគ និងគ្រូបង្វឹក ស្ងើចសរសើរ និងកើតក្ដីរំភើបជាមួយការវិវឌ្ឍនៃសមត្ថភាពក្រុមនីមួយៗដែលឈានមកដល់វគ្គនេះ។

យ៉ាងណាមិញ ជាលក្ខន្តិកៈដែលតម្រូវឲ្យមានការជម្រុះរាល់ដំណាក់កាលនីមួយៗ នាវគ្គពាក់កណ្ដាលផ្ដាច់ព្រ័ត្រនេះ ដោយឆ្លងកាត់ការវាយតម្លៃ និងដាក់ពិន្ទុពីគណៈកម្មការទាំង ៤រូប កម្មវិធីវង់តន្ត្រីខ្មែរ រដូវកាលទី២ក៏បានស្វែងរកឃើញបេក្ខជនចំនួន ៥ក្រុម ដែលមានទេពកោសល្យលេចធ្លោ ស័ក្ដិសមជាបេក្ខជនឆ្នើមឆ្ពោះមកកាន់វគ្គជម្រុះចុងក្រោយ ដែលរួមមាន៖

១. បេក្ខជន ក្រុមយុវជនខ្មែរថែមរតកដូនតា មកពីខេត្តកណ្ដាល

២. បេក្ខជន ក្រុមយុវជនល្ខោនខោលកម្ពុជា មកពីរាជធានីភ្នំពេញ

៣. បេក្ខជន ក្រុមទេពបទុមវង្សពិណពាទ្យ មកពីរាជធានីភ្នំពេញ

៤. បេក្ខជន ក្រុមមន្ទីរវប្បធម៌ខេត្តបន្ទាយមានជ័យ មកពីខេត្តបន្ទាយមានជ័យ

៥. បេក្ខជន ក្រុមពន្លកយុវជនយីកេ មកពីរាជធានីភ្នំពេញ

សូមបញ្ជាក់ផងដែរថា វគ្គផ្ដាច់ព្រ័ត្រនឹងប្រព្រឹត្តទៅ បន្ទាប់វគ្គជម្រុះចុងក្រោយនេះបញ្ចប់។ ក្នុងវគ្គនេះទៀតសោត ការចូលរួមរបស់ទស្សនិកជនពិតជាសំខាន់ ចំពោះជោគវាសនានៃក្រុមប្រកួតនីមួយៗ ព្រោះថាសម្រាប់វគ្គជម្រុះចុងក្រោយនេះ បងប្អូនទស្សនិកជន នឹងមានសិទ្ធិបោះឆ្នោតជូនបេក្ខជន ដែលខ្លួនស្រឡាញ់ និងពេញចិត្ត តាមរយៈការចុច Like ឬចុចរូបផ្សេងៗទៀតដូចជា បេះដូច (love) សើច (haha) និង វ៉ាវ (wow) នៅលើវីដេអូរបស់បេក្ខជនទាំង៥ក្រុម ដែលបានបង្ហោះលើទំព័រហ្វេសប៊ុកផ្លូវការរបស់សហភាពសហព័ន្ធយុវជនកម្ពុជា ខេត្តស្វាយរៀង ដែលការបោះឆ្នោតនេះទៀតសោតមានរយៈពេលតែ ៩ថ្ងៃប៉ុណ្ណោះ គិតចាប់ពីថ្ងៃទី១៧ ដល់ថ្ងៃទី ២៥ ខែតុលា ឆ្នាំ ២០២១។

គួររំឭកថា កម្មវិធីវង់តន្ត្រីខ្មែររដូវកាលទី២ នឹងមានការចាក់ផ្សាយលើកញ្ចក់ទូរទស្សន៍ BTV រៀងរាល់ថ្ងៃសៅរ៍ ចាប់ពីម៉ោង ៨យប់តទៅ និងការផ្សាយបន្តផ្ទាល់លើផេកផ្លូវការ របស់សហភាពសហព័ន្ធយុវជនកម្ពុជា ខេត្តស្វាយរៀងផងដែរ៕

The post រកឃើញហើយសមាសភាពបេក្ខជនទាំង៥ក្រុម ឆ្ពោះមកកាន់វគ្គជម្រុះចុងក្រោយ appeared first on Kampuchea Thmey Daily.

បេក្ខជន៨ក្រុម និងទោលដំបូងក្នុងវគ្គ Top20 សប្ដាហ៍ទី១ពិតជាមិនធម្មតា

Sorn Phanith — Mon, 13 Sep 2021 07:31:26 +0000

បន្ទាប់ពីឆ្លងកាត់វគ្គជម្រុះដោយគណៈកម្មការ ឬវគ្គ Judge Audition ចំនួន ៤ សប្ដាហ៍កន្លងទៅ កម្មវិធីវង់តន្ត្រីខ្មែររដូវកាលទី២ បានចម្រាញ់ស្វែងរកឃើញបេក្ខជន ដែលមានទេពកោសល្យឆ្នើមចំនួន២០ក្រុម និងទោល ដើម្បីឆ្លងមកកាន់វគ្គកំពូលទាំង២០ ឬ Top20 ។

កាន់តែពិសេសជាងវគ្គមុនៗ ក្នុងវគ្គនេះ បេក្ខជនទាំង២០ក្រុមនិងទោល នឹងបង្ហាញសមត្ថភាពទៅតាមវិញ្ញាសារៀងៗខ្លួន ដែលផ្ដល់ដោយគណៈកម្មការ កាលពីថ្ងៃប្រកាសលទ្ធផលវគ្គជម្រុះដោយគណៈកម្មការ សប្ដាហ៍ទី៤។

នៅសប្ដាហ៍ទី១ នៃវគ្គកំពូលទាំង២០ បេក្ខជនដែលបានចូលរួមបង្ហាញសមត្ថភាពរួមមាន៖

១. បេក្ខជន ក្រុមមហោនារា មកពីរាជធានីភ្នំពេញ ចាប់បានវិញ្ញាសា “បទ ខ្មែរច្រូតស្រូវ”

២. បេក្ខនារី ស៊ី ចន្ទសុជាតា មកពីរាជធានីភ្នំពេញ ចាប់បានវិញ្ញាសា “របាំ សេកសារិកា”

៣. បេក្ខនារី សំ ប៉ូលីដា មកពីខេត្តព្រៃវែង ចាប់បានវិញ្ញាសា “បទ កិន្នរ”

៤. បេក្ខជន ក្រុមមរតកអង្គរ មកពីខេត្តសៀមរាប ចាប់បានវិញ្ញាសា “បទ ជើតជូនគ្រូ”

៥. បេក្ខជន សារី សិលា មកពីខេត្តព្រៃវែង ចាប់បានវិញ្ញាសា “សន្សឹមៗកុំបំបោល ក្រែងលោមិនដល់ដូចប្រាថ្នា”

៦. បេក្ខជន ក្រុមទេពបទុមវង្សពិណពាទ្យ មកពីរាជធានីភ្នំពេញ ចាប់បានវិញ្ញាសា “បទ ស្មឺខ័ឌ្គសមុទ្រ”

៧. បេក្ខជន ក្រុមកុញ្ជរជ័យ មកពីរាជធានីភ្នំពេញ ចាប់បានវិញ្ញាសា “បទ រោទិ៍ភពផាត់”

៨. បេក្ខជន ក្លឹបបណ្ដុះបណ្ដាលសិល្បៈវប្បធម៌ខ្មែរអង្គរ មកពីខេត្តសៀមរាប ចាប់បានវិញ្ញាសា “ដកស្រង់ពីរឿងរាមកេរ្តិ៍”

គួរបញ្ជាក់ផងដែរថា វគ្គកំពូលទាំង២០ នឹងត្រូវបែងចែកជាបីសប្ដាហ៍ ដែលសប្ដាហ៍ទី៣ ក៏ជាថ្ងៃដែលត្រូវប្រកាសលទ្ធផលរួមគ្នាផងដែរ។

កម្មវិធីវង់តន្ត្រីខ្មែររដូវកាលទី២ រៀបចំនិងផ្ដួចផ្ដើមបង្កើតឡើង ដោយសហភាពសហព័ន្ធយុវជនកម្ពុជា ខេត្តស្វាយរៀង គាំទ្រដោយ ក្រសួងវប្បធម៌ និងវិចិត្រសិល្បៈ និងសមាគមមិត្តតន្ត្រីករ និងមានការចាក់ផ្សាយលើកញ្ចក់ទូរទស្សន៍ BTV រៀងរាល់ថ្ងៃសៅរ៍ ចាប់ពីម៉ោង ៧យប់តទៅ និងការផ្សាយបន្តផ្ទាល់លើផេកផ្លូវការ របស់សហភាពសហព័ន្ធយុវជនកម្ពុជា ខេត្តស្វាយរៀងផងដែរ៕

The post បេក្ខជន៨ក្រុម និងទោលដំបូងក្នុងវគ្គ Top20 សប្ដាហ៍ទី១ពិតជាមិនធម្មតា appeared first on Kampuchea Thmey Daily.

ឯកឧត្តម ហ៊ុន ម៉ានី កោតសរសើរកម្មវិធីវង់តន្ត្រីខ្មែររដូវកាលទី២

Sorn Phanith — Mon, 06 Sep 2021 09:37:40 +0000

កាលពីថ្ងៃទី៥ ខែកញ្ញា ឆ្នាំ២០២១ នេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានសម្ដែងនូវការកោតសរសើរ ចំពោះកម្មវិធី វង់តន្ត្រីខ្មែរ រដូវកាលទី២ ដែលរៀបចំ និងផ្ដួចផ្ដើមបង្កើតឡើង ដោយសហភាពសហព័ន្ធយុវជនកម្ពុជា ខេត្តស្វាយរៀង គាំទ្រដោយ ក្រសួងវប្បធម៌ និងវិចិត្រសិល្បៈ និងសមាគមមិត្តតន្ត្រីករ។

ឯកឧត្តម ហ៊ុន ម៉ានី បានមានប្រសាសន៍លើហ្វេសប៊ុកផ្លូវការថា «ខ្ញុំសូមចូលរួមកោតសរសើរចំពោះគណៈកម្មការរៀបចំ ក៏ដូចជាបេក្ខជន បេក្ខនារីទាំងអស់ដែលបានចូលរួមយ៉ាងសស្រាក់សស្រាំក្នុងកម្មវិធី “វង់តន្ត្រីខ្មែរ” រដូវកាលទី២ ដែលរៀបចំដោយសហភាពសហព័ន្ធយុវជនកម្ពុជាខេត្តស្វាយរៀង និងស្ថានីយ៍ទូរទស្សន៍បាយ័ន។ គំនិតផ្តួចផ្តើមដ៏ល្អប្រពៃណី គឺជាផ្នែកមួយនៃការចូលរួមលើកតម្កើងមរតកវប្បធម៌ខ្មែរ ក្នុងវិស័យសិល្បៈបុរាណ និងប្រពៃណីដែលដូនតាយើងបានបន្សល់ទុកឱ្យ។ ខ្ញុំបានឃើញនូវស្មារតីចូលរួមយ៉ាងផុលផុសរបស់បេក្ខជន បេក្ខនារីទាំងអស់ដែលនេះ ពិតជាបានបង្ហាញពីឆន្ទៈមោះមុតក្នុងការលើកស្ទួយអ្វីដែលជាសម្បត្តិវប្បធម៌ជាតិ។»

លោកបានបន្តទៀតថា «ខ្ញុំសូមអំពាវនាវដល់បងប្អូនប្រជាពលរដ្ឋទូទៅ ចូលរួមគាំទ្រ និងលើកទឹកចិត្តដល់កម្មវិធី “វង់តន្ត្រីខ្មែរ” រដូវកាលទី២នេះឱ្យបានច្រើនកុះករតាមរយៈការចូលរួមតាមដានទស្សនាការប្រកួត និងចែករំលែកព័ត៌មានជាដើម។ កាយវិការទាំងនេះនឹងក្លាយជាកម្លាំងចិត្ដដ៏ខ្លាំងក្លា មិនត្រឹមតែសម្រាប់បេក្ខជន បេក្ខនារីរបស់យើងប៉ុណ្ណោះទេ តែក៏ជាផ្តល់នូវការគោរពជូនចំពោះលោក លោកស្រីសាស្ត្រាចារ្យដែលជាគណៈមេប្រយោគដែលបានខិតខំប្រឹងប្រែង លះបង់កម្លាំងកាយ ចិត្តចំពោះវិស័យសិល្បៈផងដែរ។»

គួរបញ្ជាក់ផងដែរថា កន្លងផុតទៅរយៈពេល ៤សប្ដាហ៍ ក្នុងវគ្គជម្រុះដោយគណៈកម្មការ កម្មវិធីវង់តន្ត្រីខ្មែររដូវកាលទី២ ក៏បានស្វែងរកឃើញបេក្ខជនឆ្នើមចំនួន ២០ក្រុម និងទោល នៅលើវិញ្ញាសាសិល្បៈបុរាណជាច្រើនទម្រង់ រួមមាន អាយ៉ៃ, ចាប៉ីដងវែង, វង់ភ្លេងពិណពាទ្យ, របាំបុរាណ, ល្ខោនខោល, យីកេ និងល្ខោនបាសាក់ ជាដើម។

សម្រាប់បេក្ខជន ទាំង២០ក្រុម និងទោល ដែលបានជាប់ក្នុងវគ្គជម្រុះដោយគណៈកម្មការ រួមមាន៖

១. បេក្ខជន ក្រុមមនោហារា មកពីរាជធានីភ្នំពេញ

២. បេក្ខនារី ស៊ី ចន្ទសុជាតា មកពីរាជធានីភ្នំពេញ

៣. បេក្ខនារី សំ ប៉ូលីដា មកពីខេត្តព្រៃវែង

៤. បេក្ខជន ក្រុមមរតកអង្គរ មកពីខេត្តសៀមរាប

៥. បេក្ខជន សារី សិលា មកពីខេត្តព្រៃវែង

៦. បេក្ខជន ក្រុមទេពបទុមវង្សពិណពាទ្យ មកពីរាជធានីភ្នំពេញ

៧. បេក្ខជន ក្រុមកុញ្ជរជ័យ មកពីរាជធានីភ្នំពេញ

៨. បេក្ខជន ក្រុមក្លឹបបណ្ដុះបណ្ដាលសិល្បៈវប្បធម៌ខ្មែរអង្គរ មកពីខេត្តសៀមរាប

៩. បេក្ខជន ក្រុមអាយ៉ៃលោកគ្រូ ជិនអេង មកពីខេត្តតាកែវ

១០. បេក្ខជន ក្រុមមន្ទីរវប្បធម៌ខេត្តបន្ទាយមានជ័យ មកពីខេត្តបន្ទាយមានជ័យ

១១. បេក្ខជន ក្រុមពន្លកយុវជនយីកេ មកពីរាជធានីភ្នំពេញ

១២. បេក្ខជន ក្រុមមន្ទីរវប្បធម៌ខេត្តកែប មកពីខេត្តកែប

១៣. បេក្ខជន ក្រុមមរតកភ្នំគ្រាំងដីមាស មកពីខេត្តកំពង់ឆ្នាំង

១៤. បេក្ខជន ក្រុមយុវជនល្ខោនខោលកម្ពុជា មកពីរាជធានីភ្នំពេញ

១៥. បេក្ខជន ក្រុម សិរីភទ្រ មកពីខេត្តស្វាយរៀង

១៦. បេក្ខជន ក្រុមយុវជននគរតន្ត្រីបុរាណខ្មែរ មកពីរាជធានីភ្នំពេញ

១៧. បេក្ខជន សេង អូន មកពីខេត្តឧត្តរមានជ័យ

១៨. បេក្ខជន ក្រុមយុវជនសាមគ្គី ១២៥ មកពីរាជធានីភ្នំពេញ

១៩. បេក្ខជន ក្រុមយុវជនមន្ទីរវប្បធម៌ និងវិចិត្រសិល្បៈខេត្តព្រៃវែង មកពីខេត្តព្រៃវែង

២០. បេក្ខជន ក្រុមយុវជនខ្មែរថែមរតកដូនតា មកពីខេត្តកណ្ដាល។

គួររំឭកថា សប្ដាហ៍ក្រោយនេះ កម្មវិធីវង់តន្ត្រីខ្មែរ រដូវកាលទី២ នឹងឈានដល់វគ្គកំពូលទាំង២០ហើយ ហើយនឹងមានការចាក់ផ្សាយលើកញ្ចក់ទូរទស្សន៍ BTV នៅថ្ងៃសៅរ៍ ចាប់ពីម៉ោង ៧យប់តទៅ និងការផ្សាយបន្តផ្ទាល់លើផេកផ្លូវការ របស់សហភាពសហព័ន្ធយុវជនកម្ពុជា ខេត្តស្វាយរៀងផងដែរ៕

The post ឯកឧត្តម ហ៊ុន ម៉ានី កោតសរសើរកម្មវិធីវង់តន្ត្រីខ្មែររដូវកាលទី២ appeared first on Kampuchea Thmey Daily.

សិល្បករជើងចាស់ ប្រាប់តិកនិកយកពិន្ទុវគ្គតម្រង់ទិសកម្មវិធីវង់តន្ត្រីខ្មែរដូវកាលទី២

Dy Bunnara — Mon, 09 Aug 2021 06:59:59 +0000

កម្មវិធីវង់តន្ត្រីខ្មែរ រដូវកាលទី២ បានឈានមកដល់វគ្គតម្រង់ទិសហើយ។ នៅក្នុងសប្ដាហ៍នៃវគ្គតម្រង់ទិសនេះ ត្រូវបានរៀបចំឡើងក្នុងគោលបំណងផ្ដល់នូវមតិយោបល់មួយចំនួនទាក់ទងនឹងក្បួនខ្នាត តិកនិក និងគន្លឹះសំខាន់ៗពីសំណាក់គណៈកម្មការមេប្រយោគទាំង ៤ រូប ដើម្បីឲ្យបេក្ខជនទាំង៣០ក្រុម និងទោល បានសិក្សារៀនសូត្រ និងត្រៀមខ្លួនឲ្យបានល្អបន្ថែមទៀតនៅវគ្គជម្រុះជាបន្តបន្ទាប់។ ជាពិសេស បេក្ខជនទាំងអស់ ក៏បានជួបជាមួយអ្នកជំនាញ ដើម្បីផ្ដល់ការបណ្ដុះបណ្ដាលអំពីបច្ចេកទេស របៀបថតវីដេអូតាមទូរស័ព្ទ ក៏ដូចជាកាមេរ៉ា ឲ្យមានគុណភាពប្រកបដោយវិជ្ជាជីវៈផងដែរ។

ក្នុងការផ្ដល់អនុសាសន៍ជូនទៅកាន់បេក្ខជន ឯកឧត្តមបណ្ឌិតសាស្រ្តាចារ្យ យន់ ខៀន បានលើកឡើងថា សម្រាប់បេក្ខជនលេងឧបករណ៍តន្ត្រីបុរាណជាទោល ត្រូវលេងឲ្យត្រូវបទ ត្រូវផ្អែម និងត្រូវរត់តាមទឹកដៃ រីឯបេក្ខជនជាក្រុម ត្រូវរឹតខ្សែឲ្យស៊ីគ្នា ចាប់ផ្ដើមនិងចប់ឲ្យស្រុះគ្នា កុំឲ្យភ្លាវ ហើយអ្នកច្រៀងត្រូវមានទឹកដមសំនៀង មនោសញ្ចេតនា និងកាយវិការគួបផ្សំគ្នា។

ចំណែក លោកស្រីព្រឹទ្ធាចារ្យ អ៊ុក សុផា បានប្រាប់ដល់បេក្ខជន ដែលប្រកួតលើវិញ្ញាសា ចម្រៀងអាយ៉ៃ និងចាប៉ី ត្រូវផ្ដោតការយកចិត្តខ្ពស់ទៅលើ សំឡេង ភ្លេង និងខ្លឹមសារចាប់ចួន ព្រោះថាចំណុចទាំងនេះ គឺជាលក្ខខណ្ឌវិនិច្ឆ័យនៃការដាក់ពិន្ទុ។ ជាមួយគ្នានេះ ឯកឧត្តមសាស្រ្តាចារ្យ ព្រឿង ឈៀង បានមានប្រសាសន៍ថា ការរើសបេក្ខជនជយលាភី៣ក្រុម ក្នុងទម្រង់ខុសៗគ្នា មកផ្ទឹមគ្នា ការប្រៀបធៀបគ្មានខ្នាតដូចវិទ្យាសាស្ត្រទេ ប៉ុន្តែគណៈកម្មការនឹងរកវិធីសាស្ត្រវាយតម្លៃឲ្យសុក្រឹត និងគតិយុត្តិ មិនឲ្យបេក្ខជនខកចិត្តឡើយ។

លោកស្រីសាស្រ្តាចារ្យ អ៊ុយ លតាវណ្ណ ក៏បានថ្លែងលើវេទិកាផងដែរថា ស្នាដៃល្ខោននិយាយ និងល្ខោនយីកេដែលល្អ គឺអាស្រ័យលើអ្នកនិពន្ធល្អ អ្នកដឹករឿងល្អ និងអ្នកសម្ដែងល្អ ជាពិសេសត្រូវរើសប្រធានបទល្អ ចាប់ខ្លឹមសារ និងគំនិតឲ្យបានច្បាស់លាស់។

កម្មវិធីវង់តន្ត្រីខ្មែរ រដូវកាលទី២ ក្រោមប្រធានបទ “សិល្បៈបុរាណចម្រុះ” នឹងមានដំណើរការនៃការប្រកួតចំនួន ៨ វគ្គ ដើម្បីស្វែងរកម្ចាស់ជយលាភីទាំងបីរូប ដែលម្ចាស់ជយលាភីលេខ៣ នឹងទទួលបានប្រាក់រង្វាន់ ៤,០០០,០០០ រៀល, ម្ចាស់ជយលាភីលេខ២ នឹងទទួលបានប្រាក់រង្វាន់ ៨,០០០,០០០រៀល និងម្ចាស់ជយលាភីលេខ១ នឹងទទួលបានប្រាក់រង្វាន់ ១២,០០០,០០០រៀល។

កម្មវិធីវង់តន្ត្រីខ្មែរ រដូវកាលទី២ នឹងមានការចាក់ផ្សាយលើកញ្ចក់ទូរទស្សន៍ BTV រៀងរាល់ថ្ងៃសៅរ៍ ចាប់ពីម៉ោង ៨យប់តទៅ និងផ្សាយបន្តផ្ទាល់លើផេកផ្លូវការ របស់សហភាពសហព័ន្ធយុវជនកម្ពុជាខេត្តស្វាយរៀង ហើយនៅថ្ងៃសៅរ៍សប្ដាហ៍នេះ គឺជាវគ្គជម្រុះដោយគណៈកម្មការ ដែលនឹងមានការជម្រុះបេក្ខជនចំនួន ១០ក្រុម ឬទោល ចេញពីកម្មវិធីផងដែរ៕

The post សិល្បករជើងចាស់ ប្រាប់តិកនិកយកពិន្ទុវគ្គតម្រង់ទិសកម្មវិធីវង់តន្ត្រីខ្មែរដូវកាលទី២ appeared first on Kampuchea Thmey Daily.