អគ្គលេខាធិការនៃអគ្គលេខាធិការដ្ឋានរាជបណ្ឌិត្យសភាកម្ពុជា លោកបណ្ឌិត យង់ ពៅ បានសរសេរនៅគណនីហ្វេសប៊ុកផ្ទាល់ខ្លួនថា វប្បធម៌សន្ទនាដំណើរការបាន លុះត្រាតែមាន៥ចំណុច។ លោក​បណ្ឌិត យង់ ពៅ បានសរសេរបែបនេះ​ ក្រោយពេលដែល សម្ដេចធិបតី ហ៊ុន ម៉ាណែត​ ជួបជាមួយកម្មករ និយោជិត នាព្រឹកថ្ងៃ០៣ ខែតុលានេះ ហើយសម្ដេចធិបតី បានលើកឡើងថា សកម្មជនប្រឆាំងជ្រុលនិយមបានជេរ និងវាយប្រហារមកលើរូបសម្ដេចថា សម្ដេចធិបតីមិនព្រមសន្ទនាជាមួយក្រុមប្រឆាំងទាំងនោះ។

សម្រាប់សម្ដេចមហាបវរធិបតី ហ៊ុន ម៉ាណែត វប្បធម៌សន្ទនាអាចកើតឡើងបាន លុះត្រាតែភាគីទាំងសងខាងយល់ពីគ្នា ហើយមិនត្រូវជេរ ដៀលគ្នាមិនដាច់ពីមាត់ឡើយ។

ដោយឡែក លោក បណ្ឌិត យង់ ពៅ បានសរសេរនៅលើគណនីហ្វេសប៊ុកថា វប្បធម៌សន្ទនា អាចកើតឡើងបាន លុះតា្រតែមានចំណុចសំខាន់ៗចំនួន៥ គឺ៖ ១/ កម្លាំងនយោបាយប្រហែលគ្នា។ ២/មានសុឆន្ទៈល្អទៅវិញទៅមក។ ៣/គោរពគ្នាទៅវិញទៅមក(ជៀសវាងជេរដៀលគ្នាកប់មាត់)។ ៤/តម្កល់ផលប្រយោជន៍ជាតិជាគោលចម្បង។ ៥/ បញ្ហាប្រធានស័ក្ដិ ដែលនាំឱ្យអ្នកនយោបាយបត់លឿន។

ជាក់ស្ដែង ក្រុមប្រឆាំងជ្រុលនិយមតែងតែជេរ និងធ្វើសកម្មភាពបាតុកម្មដុតរូបថតសម្ដេចតេជោ និងយករូប សម្ដេច តេជោ រូបថតសម្ដេច ហ៊ុន ម៉ាណែត មកជាន់នឹងជើងជាដើម ហើយថ្មីៗនេះ កំឡុងពេលសម្ដេចធិបតី អញ្ជើញចូលមហាសន្និបាតអង្គការសហប្រជាជាតិលើកទី៧៨ នៅក្នុងទីក្រុងញូវយ៉កសហរដ្ឋអាមេរិក គឺមានក្រុមប្រឆាំងជ្រុលធ្វើសកម្មភាពបាតុកម្មប្រឆាំង រួមជាមួយរូបភាពអសីលធម៌ មិនអាចទទួលយកបាន។

បើទោះបីជាក្រុមប្រឆាំងជេរប្រមាថ និងវាយប្រហារឥតដាច់ពីមាត់យ៉ាងណាក៏ដោយ សម្ដេចធិបតីបានឆ្លើយតបថា សម្ដេចផ្ទាល់មិនឈឺឆ្អាលជាមួយពាក្យក្រុមប្រឆាំងឡើយ​ ហើយសម្ដេចក៏បានបញ្ឈឺត្រឡប់ទៅក្រុមប្រឆាំងវិញដោយឱ្យក្រុមទាំងនោះ បន្តជេរទៀតចុះ  ដោយសម្ដេចនឹងយកពេលគិតគូរកម្មករ ហើយប្រារព្ធព្រះរាជពិធីអុំទូក អកអំបុក សំពះព្រះខែ បង្កើតជាភាពសប្បាយរីករាយជាមួយប្រជាជាតិកម្ពុជា៕

ដោយ៖ ង៉ិល ណារ៉ាត់

The post បណ្ឌិត យង់​ ពៅ ៖ វប្បធម៌សន្ទនាដំណើរការបាន អាស្រ័យលើ៥ចំណុច ក្នុងនោះត្រូវជៀសវាងការជេរ ដៀលគ្នា appeared first on Kampuchea Thmey Daily.