ក្នុងឱកាសចែកសញ្ញាបត្រជូនសិស្សជិត ២០០ នាក់ដែលបានបញ្ចប់ការសិក្សា លោក ខុម ផលលឿន បានបន្តថា វិទ្យាស្ថានជាតិសង្គមកិច្ច ជាគ្រឹះស្ថានឧត្តមសិក្សាក្រោម ក្រសួងសង្គមកិច្ច អតីតយុទ្ធជន និងយុវនីតិសម្បទាកន្លងមកនេះ ក្រៅពីបណ្ដុះបណ្តាលធនធានមនុស្សកម្ពុជា វិទ្យាស្ថានក៏បាន​ស្រូបទាញ​សិស្សពីបរទេសជាង ៥០ ប្រទេសមកសិក្សានៅកម្ពុជា ​លើមុខជំនាញ វិស្វកម្មឧបករណ៍​សប្បនិម្មិត ​និងរណប ផងដែរ។

លោកបានបន្តទៀតថា បច្ចុប្បន្នវិទ្យាស្ថានជាតិសង្គមកិច្ចកំពុងបណ្ដុះបណ្តាលធនធានមនុស្សលើការសិក្សាចំនួន ​៩ មុខវិជ្ជា ដែលបម្រើឱ្យវិស័យសង្គមកិច្ច។ លោកបានបន្តទៀតថា ក្នុងចំណោម ៩ មុខវិជ្ជា គឺមាន ១មុខវិជ្ជា ជាមុខវិជ្ជាអន្តរជាតិ គឺមុខ​ជំនាញ ​វិស្វកម្មឧបករណ៍សប្បនិម្មិត​ និងរណប ដែលមុខវិជ្ជានេះសម្រាប់​កម្ពុជា គឺមានការបណ្ដុះបណ្ដាលនៅក្នុងវិទ្យាស្ថានសង្គមកិច្ចតែមួយប៉ុណ្ណោះ ហើយកម្មវិធីសិក្សាមួយនេះ ​ក៏មានការទទួលស្គាល់គុណភាពពី​ សមាគមអវៈយវៈ ISPO ផងដែរ។

លោកបានបញ្ជាក់ថា ថ្មីៗនេះ វិទ្យាស្ថានក៏បានទទួលយកនិស្សិត​ មកពីប្រទេស មីយ៉ាន់ម៉ា ប្រមាណ ២០ នាក់មកសិក្សាលើជំនាញនេះផងដែរ ​ខណៈសាលានៅប្រទេសមីយ៉ាន់ម៉ា បានបិទទ្វារ។

ក្នុងឱកាសប្រគល់សញ្ញាបត្រជូននិស្សិតបញ្ចប់ការសិក្សានេះដែរ លោក វង សូត រដ្ឋមន្រ្តីក្រសួង​សង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍ថា ធនធានមនុស្សក្នុងវិស័យសង្គមកិច្ច​ គឺមានតម្រូវការច្រើនសម្រាប់សង្គមបច្ចុប្បន្ន ជាក់ស្ដែងក្រសួងមានគោលដៅរៀបចំឱ្យមាន​ អ្នកសង្គមកិច្ចអាជីព​ រឺអ្នកសង្គមកិច្ចអាជីពរង ឱ្យបាន ​២ នាក់​ក្នុងមួយឃុំសង្កាត់​ ក្នុងការដោះស្រាយបញ្ហានានា​ជូនប្រជាពលរដ្ឋ។

នៅក្នុងឱកាសនោះដែរ លោក រដ្ឋមន្រ្តីក៏បានផ្ដល់ដំបូន្មានដល់និស្សិតទទួលសញ្ញាបត្រទាំងអស់ ត្រូវយក​សមត្ថភាព​ដែលទទួលបានពីការបណ្ដុះបណ្ដាល ​ទៅប្រើប្រាស់ឱ្យចំគោលដៅ ​មានប្រសិទ្ធភាព នៅតាមស្ថាប័នរដ្ឋ ​ឯកជន បណ្ដាអង្គការជាដើម ដើម្បីលើកកម្ពស់វិស័យសង្គមកិច្ចនៅកម្ពុជាឱ្យកាន់តែប្រសើរឡើងថែមទៀត៕

អត្ថបទ៖ សំអឿន

The post សិស្សបរទេសជាង ៥០ ប្រទេស មកសិក្សាជំនាញលើវិស័យសង្គមកិច្ច នៅកម្ពុជា appeared first on Kampuchea Thmey Daily.