វិបត្តិនយោបាយថៃ Archives - Kampuchea Thmey Daily

រដ្ឋមន្ត្រីការបរទេសថៃ គ្រោងចេញទៅបារាំងនិងស្វីស ក្រោយកម្ពុជាធ្វើយុទ្ធនាការការទូតទៅកាន់អឺរ៉ុប

Rann Reuy — Wed, 18 Feb 2026 08:17:42 +0000

រដ្ឋមន្ត្រីការបរទេសថៃ លោក ស៊ីហៈសាក់ ភួងកេតកែវ (Sihasak Phuangketkeow) នឹងធ្វើដំណើរទៅកាន់កាន់ប្រទេសបារាំង និង ស្វីស ដែលសារព័ត៌មានថៃ The Nation បានផ្សាយថា ដើម្បីទប់ទល់នឹងបេសកកម្មការទូតរបស់ភាគីកម្ពុជា ដែលបានស្នើឲ្យភាគីបារាំងដែលធ្លាប់ជាអាណាព្យាបាលលើកម្ពុជា ផ្តល់ឯកសារផ្លូវច្បាប់ ជួយគាំទ្រដល់ការដោះស្រាយជម្លោះជាមួយថៃលើឆាកអន្តរជាតិ។

លោក ស៊ីហៈសាក់ ភួងកេតកែវ (Sihasak Phuangketkeow)។ FB

ការលើកឡើងនេះ ធ្វើឡើងក្នុងកម្មវិធីសន្និសីទសារព័ត៌មានរបស់ក្រសួងការបរទេសថៃ ដោយ លោក Panidone Pachimsawat អគ្គនាយកស្តីទីនៃនាយកដ្ឋានព័ត៌មាន និងជាអ្នកនាំពាក្យរងនៃក្រសួងការបរទេសនិងសហប្រតិបត្តិការអន្តរជាតិ។ ទោះបីជាបែបនេះ រដ្ឋមន្ត្រីការបរទេសថៃមិនទាន់កំណត់ពេលវេលាជាក់លាក់ចេញដំណើរទៅកាន់អឺរ៉ុបនោះទេ។

សារព័ត៌មានថៃ The Nation ដែលទើបបើកបណ្តាញសង្គមឲ្យអ្នកអានខ្មែរបានឃើញក្នុងសប្តាហ៍នេះ បានលើកឡើងថា ក្រសួងការបរទេសថៃនៅថ្ងៃពុធនេះបនាផ្តល់នូវការធ្វើបច្ចុប្បន្នភាពជុំវិញស្ថានភាពព្រំដែនថៃនិងកម្ពុជា ដោយអះអាងថា ស្ថានភាពនៅតាមព្រំដែននៅតែរក្សាស្ថិរភាពក្នុងរយៈពេលជិត២ខែមកនេះ។

ការផ្សព្វផ្សាយរបស់សារព័ត៌មានថៃនេះ មិនបានឆ្លុះបញ្ចាំងពីការពិតដែលថា កងកម្លាំងយោធាថៃបានធ្វើសកម្មភាពរំលោភបទឈប់បាញ់ ដោយការស្ថាបនាផ្លូវចូលទឹកដីកម្ពុជាដែលខ្លួនឈ្លានពានកាលពីខែធ្នូឆ្នាំ២០២៥។ មិនតែប៉ុណ្ណោះ កងទ័ពថៃ បានបានធ្វើសកម្មភាពរំលោភបំពានផ្សេងៗទៀត រួមមាន ការរាយបន្លាលួស ការជីកប្រឡាយ ការដាក់តួកុងតឺន័រក្នុងទឹកដីកម្ពុជា។

តាមការសម្ភាសន៍ផ្តាច់មុខរបស់សារព័ត៌មានរ៉យទ័រ ប្រមុខរាជរដ្ឋាភិបាលកម្ពុជា ក៏បានអះអាងថា សកម្មភាពរំលោភបំពានរបស់ថៃបានចូលជ្រៅក្នុងទឹកដីកម្ពុជា។

ប្រមុខរាជរដ្ឋាភិបាលកម្ពុជា សម្តេចបវរធិបតី ហ៊ុន ម៉ាណែត ថ្មីៗនេះធ្លាប់បានស្នើទៅកាន់ប្រធានាធិបតីបារាំង លោក អេម៉ានូអែល ម៉ាក្រុង ដើម្បីសុំការគាំទ្រលើឯកសារប័ណ្ណសារសម័យអាណានិគមបារាំង បានបង្ហាញទៅកាន់ពិភពលោកថា កម្ពុជាកំពុងប្តូរយុទ្ធសាស្ត្រព្រំដែនពី «សមរភូមិជួរមុខ» មកជា «សមរភូមិឯកសារ» វិញ។

តាមរយៈការចុះផ្សាយរបស់សារព័ត៌មានថៃនោះ ភាគីថៃនៅតែចិញ្ចឹមចិត្តចង់ដោះស្រាយជម្លោះតាមរយៈយន្តការទ្វេភាគី ខណៈដែលភាគីថៃខ្លាចញញើតចំពោះការដោះស្រាយនានាតាមយន្តការត្រីភាគី ចតុភាគី ឬក៏ពហុភាគី ដោយសារតែភាពមិនស្មោះត្រង់របស់ខ្លួន និង ខ្លាចអន្តរជាតិដឹងពីភាពពុតត្បុតរបស់ខ្លួន។

លោក Panidone Pachimsawat បានអះអាងជាថ្មីថា ដំណើរការចរចានៃគណៈកម្មការខណ្ឌសីមាព្រំដែនគោក (JBC) នឹងបន្តឡើងវិញដរាបណាការបង្កើតរដ្ឋាភិបាលថ្មីបានធ្វើឡើង។

សារព័ត៌មានអន្តរជាតិនានា កំពុងតាមប្រម៉ាញ់ យុទ្ធសាស្រ្តការទូតរបស់កម្ពុជាលើឆាកអន្តរជាតិ ក្នុងនោះមានការស្នើបារាំងសហការផ្តល់ឯកសារ និងបេសកកម្មរបស់ប្រតិភូកម្ពុជាទៅកាន់សហរដ្ឋអាមេរិក ដើម្បីចូលរួមក្រុមប្រឹក្សាសន្តិភាព (Board of Peace) នៅទីក្រុងវ៉ាស៊ីនតោន ដែលបេសកកម្មទាំងនេះដើម្បីស្វះស្វែងរកដំណោះស្រាយក្នុងជម្លោះព្រំដែនតាមរយៈការទូត៕

សម្តេចធិបតី ហ៊ុន ម៉ាណែត និងប្រធានាធិបតីបារាំង អេម៉ានូអែល ម៉ាក្រុង (រូបថត៖ EPA)

The post រដ្ឋមន្ត្រីការបរទេសថៃ គ្រោងចេញទៅបារាំងនិងស្វីស ក្រោយកម្ពុជាធ្វើយុទ្ធនាការការទូតទៅកាន់អឺរ៉ុប appeared first on Kampuchea Thmey Daily.

បោះឆ្នោតក្នុងថ្ងៃតែ១ដូចជប៉ុនដែរ ប៉ុន្តែអន្តរជាតិរក្សាជំហរស្ងាត់ស្ងៀមចំពោះលទ្ធផលឆ្នោតនៅថៃ

Rann Reuy — Thu, 12 Feb 2026 08:05:03 +0000

ការបោះឆ្នោតនៅប្រទេសថៃ កាលថ្ងៃទី៨ខែកុម្ភៈ បានរៀបចំឡើង ចំពេលជាមួយគ្នានឹងការបោះឆ្នោតនៅប្រទេសជប៉ុន ប៉ុន្តែស្ថានភាពក្រោយការបោះឆ្នោតនៃប្រទេសទាំងពីរគឺខុសគ្នាដាច់ស្រឡះ ដោយសារតែការបោះឆ្នោតនៅថៃប្រឈមភាពមិនប្រក្រតីច្រើន ខណៈនាយករដ្ឋមន្ត្រីជប៉ុនវិញទទួលសារអបអរសាទរជាច្រើនពីការឈ្នះឆ្នោតភ្លូកទឹកភ្លូកដី។

លោក អានុទីន ឆានវីរៈគុល។ Standard

ការបោះឆ្នោតនៅប្រទេសជប៉ុន បានបញ្ចប់ទៅដោយលទ្ធផលឈ្នះឆ្នោតបានទៅលើគណបក្សកំពុងកាន់អំណាច និងការអបអរសាទរពីបណ្តាប្រទេសជាមិត្តជាច្រើនភ្លាមៗតែម្តង ប៉ុន្តែការបោះឆ្នោតនៅប្រទេសថៃវិញរងសម្ពាធពីការតវ៉ាយ៉ាងខ្លាំងដោយសារតែការរកឃើញនូវភាពមិនប្រក្រតីច្រើននៅស្ទើរទូទាំងប្រទេសរហូតដល់ពេលនេះ។

បន្ទាប់ពីការបោះឆ្នោត៤ថ្ងៃ មិនមានប្រទេសណាបង្ហាញការអបអរសាទរដល់ការឈ្នះឆ្នោតរបស់ លោក អានុទីន ឆានវីរៈគុលនោះទេ លើកលែងតែអ្នកនាំពាក្យក្រសួងការបរទេសចិន លោក លីន ជៀន (Lin Jian) បានថ្លែងដោយផ្ទាល់មាត់ក្នុងកម្មវិធីសន្និសីទសារព័ត៌មានជាប្រចាំថា «ការបោះឆ្នោតថៃប្រព្រឹត្តទៅដោយរលួន»។ យោងការដាក់ស្រង់ពីសារព័ត៌មាន Khaosod English។

ក្រៅពីមន្ត្រីចិន ភ្លាមៗបន្ទាប់ការមើលឃើញនូវលទ្ធផលនាំមុខដាច់កាន់តែឆ្ងាយ នាយករដ្ឋមន្ត្រីសិង្ហបុរី លោក Lawrence Wong ក៏បានបញ្ជូសារអបអរសាទរដល់លោក អានុទីន ចំពោះការឈ្នះឆ្នោតនោះ ដោយមិនបង្អង់ចាំមើលស្ថានភាពនៃការបោះឆ្នោតឡើយ។ នៅក្នងសារដែលចេញផ្សាយដោយ CNA នាយករដ្ឋមន្ត្រីសិង្ហបុរី ក៏បានរំឭកដល់ចំណងទំនាក់ទំនងខួប៦០ឆ្នាំនៃប្រទេសថៃនិងសិង្ហបុរីផងដែរ។

ក្រៅពីចិននិងសិង្ហបុរី តៃវ៉ាន់ក៏បានចូលរួមអបអរលោកអានុទីនផងដែរ។

លទ្ធផលបណ្តោះអាសន្ននៃការបោះឆ្នោតក្នុងប្រទេសថៃ ត្រូវបានប្រកាសជាបឋមថា គណបក្សភូមិចៃថៃរបស់លោក អានុទីន ឆានវីរៈគុល បានទទួលជ័យជម្នះលើសគេ ដោយទទួលបានអាសនៈសរុប១៩៣ តាមពីក្រោយដោយគណបក្សប្រជាជនថៃទទួលបានអាសនៈ១១៨ រីឯគណបក្សភឿថៃឈរនៅលំដាប់លេខ៣ ទទួលបានអាសនៈ ៧៤ និងគណបក្សធំទី៤ គឺ គណបក្ស Kla Tham ដោយទទួលបានអាសនៈចំនួន៥៨។

លទ្ធផលជ័យជម្នះលោក អានុទីន ឆានវីរៈគុល ដែលត្រូវគេដឹងថា បានប្រើប្រាស់យុទ្ធសាស្រ្តជំរុញការគាំទ្រតាមចរន្តជាតិនិយម ដោយបង្កឲ្យមានជម្លោះប្រដាប់អាវុធជាមួយកម្ពុជា ក្រោយធ្លាក់ប្រជាប្រិយភាពយ៉ាងខ្លាំងនោះ មិនស្ថិតនៅផ្លូវមោទនភាពដែលប្រជាជនថៃទូទៅអបអរសាទរឡើយ ដោយរហូតដល់ពេលនេះ ការផ្ទុះបាតុកម្មតវ៉ា បានកើតឡើងនៅច្រើនខេត្ត និងច្រើនមណ្ឌលបោះឆ្នោត ជាពិសេសការកើនឡើងនៃចរន្តទាមទារឲ្យមានការរាប់សន្លឹកឆ្នោតឡើងវិញ ព្រោះតែការរកឃើញនូវភាពមិនប្រក្រតីច្រើនពេក។

ប៉ុន្តែសម្រាប់ការបោះឆ្នោតនៅប្រទេសជប៉ុនក្នុងថ្ងៃតែមួយវិញ យោងសារព័ត៌មានជប៉ុន Japan Times លទ្ធផលបង្ហាញថា គណបក្សប្រជាធិបតេយ្យសេរី (LDP) ដែលកំពុងកាន់អំណាច របស់លោកស្រីនាយករដ្ឋមន្ត្រី សាណាអេ តាកាអ៊ិឈិ (Sanae Takaichi) បានទទួលអាសនៈសភាកើនឡើងពី១៩៨នៅមុនការបោះឆ្នោត ដល់៣១៦អាសនៈ ដែលជាសម្ទុះគាំទ្រដ៏ខ្លាំង។

នាយករដ្ឋមន្ត្រីជប៉ុន សាណាអេ តាកាអ៊ិឈិ។ Bloomberg

ភ្លាមៗក្រោយការប្រកាសលទ្ធផលឆ្នោតកាលពីថ្ងៃចន្ទ ប្រទេសជាច្រើនបានប្រកាសអបអរសាទរលោកស្រី សាណាអេ ដែលត្រូវបានប្រជាជនជប៉ុនបោះឆ្នោតគាំទ្រឈ្នះភ្លូកទឹកភ្លូកដី។ ប្រទេសដែលចេញសារអបអរសាទរនោះ រួមមាន ប្រធានាធិបតី ដូណាល់ ត្រាំ, ម៉ាឡេស៊ី, តៃវ៉ាន់ , កូរ៉េខាងត្បូង, សិង្ហបុរី, ប៉ាគីស្ថាន, និងក៏មាន ឥណ្ឌា កាណាដា និងអ៊ីស្រាអែលផងដែរ។

សរុបសេចក្តីមក រហូតមកដល់ពេលនេះ សហគមន៍អន្តរជាតិកំពុងរង់ចាំមើលការវិវឌ្ឍន៍ព្រឹត្តិការណ៍ក្រោយការបោះឆ្នោតនៅប្រទេសថៃដែលមានចរន្តនៃការតវ៉ាខ្លាំង ដោយសារតែរកឃើញនូវភាពមិនប្រក្រតីច្រើន និងចរន្តនៃការតវ៉ាកាន់តែខ្លាំង ដោយសារតែលទ្ធផលឈ្នះឆ្នោតរបស់គណបក្សភូមិចៃថៃ បានផ្ទុយស្រឡះចំពោះលទ្ធផលនៃការស្ទង់មតិនានានៅមុនការបោះឆ្នោត ដែលគណបក្សភូមិចៃថៃគ្មានប្រជាប្រិយភាពអាចយកឈ្នះការបោះឆ្នោតនោះទេ៕

រ៉ាន់ រើយ

The post បោះឆ្នោតក្នុងថ្ងៃតែ១ដូចជប៉ុនដែរ ប៉ុន្តែអន្តរជាតិរក្សាជំហរស្ងាត់ស្ងៀមចំពោះលទ្ធផលឆ្នោតនៅថៃ appeared first on Kampuchea Thmey Daily.

ភាពមិនប្រក្រតីជុំវិញការបោះឆ្នោតនៅថៃ ផ្ទុះឡើងច្រើនខេត្ត ខណៈ អានុទីនថា រួចរាល់ជាង៩០%

Rann Reuy — Tue, 10 Feb 2026 07:45:41 +0000

ភាពមិនប្រក្រតីនិងការបន្លំក្នុងការបោះឆ្នោតក្នុងប្រទេសថៃបានផ្ទុះឡើងជាបន្តបន្ទាប់ ដោយជំរុញឲ្យគណៈកម្មការរៀបចំការបោះឆ្នោតថៃ បើកកិច្ចប្រជុំផ្ទៃក្នុងបន្ទាន់មួយនៅថ្ងៃទី១០ខែកុម្ភៈនេះ ខណៈអតីតមន្ត្រីនៃគណកម្មការរៀបចំការបោះឆ្នោតចេញមករិះគន់ការបោះឆ្នោតលើកនេះ ព្រមទាំងព្រលយអំពីលទ្ធភាពដែលអាចឲ្យរៀបចំការបោះឆ្នោតឡើងវិញទៀតផង។

លោក អានុទីន ដឹកនាំមន្ត្រីរដ្ឋាភិបាលនៃរដ្ឋបាលចាស់ចូលប្រជុំនៅថ្ងៃទី១០ខែកុម្ភៈ។ Standard

សារព័ត៌មានថៃជាច្រើន បានងាកមកចាប់អារម្មណ៍ចុះផ្សាយយ៉ាងព្រោងព្រាតអំពីការតវ៉ារបស់ប្រជាជនថៃ នៅខេត្តមួយចំនួន មានដូចជា ខេត្ត Phatum Thani ខេត្ត Chon Buri ខេត្ត Ubon Ratchathani ខេត្ត Si Sa Ket ខេត្ត Phuket និង បណ្តាទីតាំងស្ថានីយបោះឆ្នោតជាច្រើនទៀត។

យោងការផ្សាយរបស់សារព័ត៌មាន Thai Enquirer គណៈកម្មការរៀបចំការបោះឆ្នោតថៃ បានបើកកិច្ចប្រជុំផ្ទៃក្នុងជុំវិញភាពមិនប្រក្រតីដែលត្រូវបានគេសង្ស័យនៅក្នុងការរាប់សន្លឹកឆ្នោត និង ការដោះស្រាយទំនាស់ ដោយគណៈកម្មការនេះត្រុវតម្រូវឲ្យប្រធានគណៈកម្មការបោះឆ្នោតតាមបណ្តាខេត្តសរសេរបកស្រាយ មុនគណៈកម្មការបោះឆ្នោតថ្នាក់ជាតិបកស្រាយទៅដល់សាធារណៈជន។

ភាពមិនប្រក្រតីនៃការបោះឆ្នោតនៅប្រទេសថៃបានផ្ទុះឡើងនិងរីករាលដាលយ៉ាងឆាប់រហ័សទៅច្រើនតំបន់ ខណៈមានថ្នាក់ដឹកនាំនយោបាយបានចេញមកទាមទារឲ្យមានការទទួលខុសត្រូវជាបន្តបន្ទាប់ដូចគ្នា។

សារព័ត៌មាន The Standard របស់ប្រទេសថៃ បានស្រង់សំណេររបស់ លោក Phumtham Wechayachai ថ្នាក់ដឹកនាំជាន់ខ្ពស់មួយរូបរបស់គណបក្សភឿថៃបង្ហោះនៅថ្ងៃទី១០កុម្ភៈនេះថា «ការបោះឆ្នោតមានភាពមិនប្រក្រតីនិងទាមទារឲ្យមានការទទួលខុសត្រូវ» ដោយសង្កត់ធ្ងន់ថា គណបក្សនេះក៏មើលឃើញនូវភាពមិនប្រក្រតីកើតឡើងដូចប្រជាជនជាច្រើនតំបន់បានមើលឃើញដែរ។

ជាមួយគ្នានោះអតីតសមាជិកគណកម្មការរៀបចំការបោះឆ្នោតថៃ លោក Somchai Srisutthiyakorn ត្រូវបានកាសែត Khaosod English របស់ប្រទេសថៃស្រង់សំណេរក្នុងហ្វេសប៊ូករបស់លោក បានផ្សាយថា ភាពមិនប្រក្រត្រីដែលបានកើតឡើងនេះ បង្ហាញពីភាពខ្វះវិជ្ជាជីវៈរបស់មន្ត្រី និងការគ្រប់គ្រងការបោះឆ្នោត។

តាមអ្វីដែលលោកបានលើកឡើង ការបោះឆ្នោតថ្ងៃទី៨ខែកុម្ភៈ ឆ្នាំ ២០២៦ បានឃើញបាតុភូតជាច្រើនដែលឆ្លុះបញ្ចាំងថា គណៈកម្មការរៀបចំការបោះឆ្នោតនៅតែមិនទាន់បានគ្រប់គ្រងការបោះឆ្នោតតាមរបៀបវិជ្ជាជីវៈនៅឡើយ។ មន្ត្រីការិយាល័យបោះឆ្នោតខ្វះស្តង់ដារស៊ីសង្វាក់គ្នាក្នុងការអនុវត្តភារកិច្ចរបស់ពួកគេ។

បើតាមការចុះផ្សាយនោះ ភាពមិនប្រក្រតីកើនឡើងយ៉ាងរហ័សនេះ ការរាប់សន្លឹកឆ្នោតនៅតាមស្ថានីយបោះឆ្នោតខ្លះមិនអាចឆ្លុះបញ្ចាំងពីដំណោះស្រាយទាំងមូលទេ ហើយ ដើម្បីដោះស្រាយបញ្ហានេះឲ្យបានល្អ ការបោះឆ្នោតឡើងវិញជាវិធីសាស្ត្រដើម្បីបញ្ចប់ការតវ៉ា។

នៅថ្ងៃទី១០ខែកុម្ភៈនេះ លោក អានុទីន ឆានវីរៈគុល នាយករដ្ឋមន្ត្រីចាំផ្ទុះ និងជារដ្ឋមន្ត្រីក្រសួងមហាផ្ទៃ បានផ្តល់បទសម្ភាសន៍មុនដឹកនាំកិច្ចប្រជុំគណៈរដ្ឋមន្ត្រីក្រោយថ្ងៃបោះឆ្នោត ដោយបញ្ជាក់ថា លទ្ធផលនៃការបោះឆ្នោតមិនទាន់ជាផ្លូវការនៅឡើយទេ គឺប្រហែល ៩២%។ ដូច្នេះ លោកបានបដិសេធមិនធ្វើអត្ថាធិប្បាយលើជំហររបស់ប្រធានសភាតំណាងរាស្ត្រ ឬការបង្កើតរដ្ឋាភិបាលថ្មីនោះទេ ដោយស្នើសុំឱ្យរង់ចាំការបញ្ជាក់ពេញលេញពីគណៈកម្មការរៀបចំការបោះឆ្នោត (EC)៕

រ៉ាន់ រើយ

The post ភាពមិនប្រក្រតីជុំវិញការបោះឆ្នោតនៅថៃ ផ្ទុះឡើងច្រើនខេត្ត ខណៈ អានុទីនថា រួចរាល់ជាង៩០% appeared first on Kampuchea Thmey Daily.

ប្រឈមប្រជាប្រិយភាពដ៏អន់ លោក អានុទីន ថា លោក ស្គាល់ប្រព័ន្ធថៃ

Rann Reuy — Wed, 04 Feb 2026 03:51:16 +0000

ប្រធានគណបក្សភូមិចៃថៃ លោក អានុទីន ឆានវីរៈគុល ដែលបានជ្រើសរើសផ្លូវនយោបាយយកកម្ពុជាជាចំណាប់ខ្មាំង សម្រាប់បង្កើនប្រជាប្រិយភាពក្នុងការបោះឆ្នោតរបស់ខ្លួននោះ បានអះអាងអំពីក្តីរំពឹងទទួលបានទំនុកចិត្តពីអ្នកបោះឆ្នោតសម្រាប់ការបោះឆ្នោតនៅចុងសប្តាហ៍នេះ បើទោះបីជាការស្ទង់មតិថ្មីៗនេះបង្ហាញថា «លោកគ្មានប្រជាប្រិយភាពឈ្នះឆ្នោតឡើយ»។

លោក អានុទីន ឆានវីរៈគុល ពេលចុះឃោសនារកការគាំទ្រ។ Khaosod English

ក្នុងអំឡុងពេលចុះទៅឃោសនារកការគាំទ្រពីប្រជាជននៅខេត្តក្នុងភូមិភាគឦសាន្តប្រទេសថៃ រួមមានខេត្ត អ៊ូប៊ុន ខេត្តស៊ីសាកេត ខេត្តស៊ូរិន ដែលជាប់ព្រំដែនជាមួយប្រទេសកម្ពុជា និងដែលទើបបញ្ចប់ការប្រយុទ្ធគ្នាដោយអាវុធ លោក អានុទីន ដែលត្រូវបានស្ទាក់សួរដោយសារព័ត៌មាន Chanel News Asia (CNA) បាននិយាយថា៖«ខ្ញុំត្រូវតែនិយាយថា យើងប៉ុនប៉ងខ្ពស់។ ខ្ញុំគិតថា យើងនឹងមានលទ្ធភាពទទួលការទុកចិត្តនិងទំនុកចិត្តពីអ្នកបោះឆ្នោតរបស់យើង»។

CNA បានស្រង់សម្តីលោក អានុទីន ដូចបាននិយាយថា៖«យើងយល់នូវអ្វីដែលប្រជាជនថៃត្រូវការ។ យើងយល់ដឹងពីរបៀបដោះស្រាយប្រព័ន្ធដែលដំណើរការក្នុងប្រទេសថៃ យើងមានអ្នកជំនាញច្រើនដែលចូលរួមជាមួយយើងដើម្បីនាំប្រទេសថៃឆ្ពោះទៅមុខទៀត»។

លទ្ធផលស្ទង់មតិចេញផ្សាយកាលពីចុងសប្តាហ៍ដោយវិទ្យាស្ថានអភិវឌ្ឍន៍រដ្ឋបាលជាតិ (NIDA) បានបង្ហាញថា ការគាំទ្រលើលោកអានុទីន មានត្រឹមតែប្រមាណ១០ភាគរយប៉ុណ្ណោះ ខណៈការគាំទ្រលើបេក្ខភាពមកពីគណបក្សប្រជាជនថៃ មានរហូតដល់ជាង២០ភាគរយ។

លោក អានុទីន ឆានវីរៈគុល ដឹកនាំគណបក្សភូមិចៃថៃទទួលបានការគាំទ្រលំដាប់លេខរៀងទី៣កាលពីការបោះឆ្នោតក្នុងខែឧសភាឆ្នាំ២០២៣ ប៉ុន្តែបានឱកាសឡើងកាន់កៅអីនាយករដ្ឋមន្ត្រីទី៣២របស់ប្រទេសថៃ បន្ទាប់ពីលោកបានដឹកនាំគណបក្សនេះចេញពីរដ្ឋាភិបាលចម្រុះដឹកនាំដោយលោកស្រី ផែថងថាន ស៊ីណាវ៉ាត្រ ដែលត្រូវបានតុលាការធម្មនុញ្ញបណ្តេញចេញពីអំណាចកាលចុងខែសីហាឆ្នាំ២០២៥ ដោយសារតែការរកឃើញរំលោភក្រមរដ្ឋធម្មនុញ្ញដែលតាក់តែងឡើងដោយរបបយោធាថៃនោះ។

លោក អានុទីន ដែលផ្តាច់ខ្លួនពីរដ្ឋាភិបាលចម្រុះដឹកនាំដោយគណបក្សភឿថៃ ហើយ ទៅចងសម្ព័ន្ធភាពរយៈពេលខ្លីជាមួយគណបក្សប្រជាជនថៃ ដើម្បីដឹកនាំរដ្ឋាភិបាលថៃរយៈពេលត្រឹមតែ៤ខែ សម្រាប់ដឹកនាំធ្វើវិសោធនកម្មរដ្ឋធម្មនុញ្ញថៃ និងធានាប្រក្រតីភាពរដ្ឋាភិបាល ក្រោយពីដកលោកស្រី ផែថងថាន ប៉ុន្តែក្រោយទទួលបានអំណាចក្នុងដៃ លោក អានុទីន មិនបានអនុវត្តតាមកិច្ចព្រមព្រៀងជាមួយគណបក្សប្រជាជនថៃទេ។

អំឡុងពេលវិបត្តិនយោបាយផ្ទៃក្នុងថៃនោះ លោក អានុទីន បែរជាទៅបង្កើតភាពតានតឹងជាមួយកម្ពុជា បង្កជម្លោះនៅតាមព្រំដែន ប្រកាសដកខ្លួនចេញពីការអនុវត្តកិច្ចព្រមព្រៀងសន្តិភាពដែលខ្លួនបានចុះហត្ថលេខានៅទីក្រុងកូឡាឡាំពូកាលថ្ងៃទី២៦ខែតុលាឆ្នាំ២០២៥ ដែលសម្របសម្រួលនិងធ្វើជាសាក្សីដោយនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ជាប្រធានអាស៊ាន និងប្រធានាធិបតី សហរដ្ឋអាមេរិក លោក ដូណល់ ត្រាំ។

នៅក្នុងលទ្ធផលស្ទង់មតិជាបន្តបន្ទាប់នៅមុនការបោះឆ្នោតផ្លូវការ បេក្ខភាពនាយករដ្ឋមន្ត្រីរបស់លោក អានុទីន និងគណបក្សភូមិចៃថៃរបស់លោក គ្មានប្រជាប្រិយភាពឈ្នះការបោះឆ្នោតនៅពេលខាងមុខនោះទេ ដោយនៅពីក្រោយឆ្ងាយគណបក្សប្រជាជនថៃដឹកនាំដោយក្រុមយុវជនកំណែទម្រង់ និងគណបក្សភឿថៃដឹកនាំដោយអ្នកស្និទ្ធនឹងអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រ ដែលកំពុងជាប់ពន្ធនាគារក្នុងទីក្រុងបាងកក ក្រោមបទចោទសូកប៉ាន់ប៉ូលិសកាលពីជាង១០ឆ្នាំមុន៕

រ៉ាន់ រើយ

The post ប្រឈមប្រជាប្រិយភាពដ៏អន់ លោក អានុទីន ថា លោក ស្គាល់ប្រព័ន្ធថៃ appeared first on Kampuchea Thmey Daily.

​វិបត្តិនយោបាយថៃ​ Archives - Kampuchea Thmey Daily

ភាពមិនប្រក្រតីជុំវិញការបោះឆ្នោតនៅថៃ​ ផ្ទុះ​ឡើង​ច្រើនខេត្ត ខណៈ អានុទីន​​ថា​ រួចរាល់​ជាង​៩០%​​

​​​​ប្រឈម​​​ប្រជាប្រិយភាព​ដ៏អន់​ លោក អានុទីន ថា ​លោក ស្គាល់​ប្រព័ន្ធថៃ​

វិបត្តិនយោបាយថៃ Archives - Kampuchea Thmey Daily

ភាពមិនប្រក្រតីជុំវិញការបោះឆ្នោតនៅថៃ ផ្ទុះឡើងច្រើនខេត្ត ខណៈ អានុទីនថា រួចរាល់ជាង៩០%

ប្រឈមប្រជាប្រិយភាពដ៏អន់ លោក អានុទីន ថា លោក ស្គាល់ប្រព័ន្ធថៃ