វេចនំអន្សម Archives - Kampuchea Thmey Daily

នំអន្សមពងទាប្រៃ រសជាតិថ្មីប្លែកទទួលការគាំទ្រពីពលរដ្ឋក្នុងខេត្តស្ទឹងត្រែង រហូតដល់ទីក្រុងភ្នំពេញ

Dy Bunnara — Mon, 23 Mar 2026 01:45:00 +0000

ក្រៅពីសក្ដានុពលអេកូទេសចរណ៍ ខេត្តស្ទឹងត្រែងក៏ល្បីអាហារដ៏សំបូរបែប។ ក្នុងដំណើរទស្សនកិច្ចផ្សព្វផ្សាយពីសក្ដានុពលក្នុងខេត្តស្ទឹងត្រែងកាលពីសប្ដាហ៍មុននេះ ក្រុមអ្នកសារព័ត៌មានចាប់អារម្មណ៍ទៅការកែច្នៃនំអន្សមខ្មែរពីពងទាប្រៃ ដែលបង្កើតរសជាតិថ្មីប្លែកទទួលការគាំទ្រទាំងពលរដ្ឋក្នុងខេត្ត និងការកុម្ម៉ង់ជាហូរហែមកលក់ដល់ទីក្រុងភ្នំពេញថែមទៀត។

អ្នកស្រី ធាន សុភី ពលរដ្ឋរស់នៅក្នុងក្រុងស្ទឹងត្រែងបានប្រាប់ថា ការកើតគំនិតធ្វើនំអន្សមពងទាប្រៃនេះ ក្រោយពេលអ្នកស្រីបានទៅលេងនៅទឹកដីកម្ពុជាក្រោម ហើយឃើញមានការកែច្នៃនំអន្សមខ្មែរពីពងទាប្រៃមានរសជាតិឆ្ងាញ់គួរឲ្យចាប់អារម្មណ៍។

អ្នកស្រីបន្តថា ក្រោយឃើញការកែច្នៃនំអន្សមខ្មែរពីពងទាប្រៃទទួលការគាំទ្រច្រើន និងណាមួយគិតថាប្លែកផងនោះ អ្នកស្រីក៏សម្រេចចិត្តច្នៃធ្វើដោយខ្លួនឯង ដោយប្តូរពីការប្រើស្លឹកងប់មកប្រើស្លឹកតើយវិញដើម្បីឱ្យមានក្លិនឈ្ងុយ និងប្លែកពីគេ។

ជាមធ្យមអ្នកស្រី សុភី អាចវេចបានប្រហែល ១៥០ នំក្នុងមួយថ្ងៃ។ នំទាំងនេះត្រូវបានលក់នៅនៅក្នុងខេត្តផង និងផ្ញើទៅឱ្យម៉ូយនៅភ្នំពេញផង។

អ្នកស្រី សុភី បានរៀបរាប់ពីវត្ថុធាតុដើមសម្រាប់ធ្វើនំអន្សមពងទាប្រៃ គឺប្រើប្រាស់វត្ថុធាតុដើមនៅក្នុងស្រុកទាំងស្រុងរួមមាន អង្ករដំណើប ពងទាប្រៃ និងស្លឹកតើយ។

ពាក់ព័ន្ធតម្លៃវិញអ្នកស្រី សុភី បានបញ្ជាក់ថា មានទៅតាមខ្នាតតូចធំ ឬការកុម្ម៉ង់របស់អតិថជន។ សម្រាប់ខ្នាតធម្មតាតម្លៃមាន ១០ ០០០ រៀល និងខ្នាតធំតាមការកុម្ម៉ង់ផ្សេងៗ តម្លៃមានចាប់ពី ១២ ០០០ ដល់ ២០ ០០០ រៀល។

របរធ្វើនំអន្សមពងទាប្រៃ អ្នកស្រី សុភី ចាប់ផ្តើមដំណើរការអស់រយៈពេល ១០ ឆ្នាំមកហើយ និងទទួលបានជោគជ័យខ្លាំង។

បើតាមអ្នកស្រី សុភី កាលពីចាប់ផ្តើមធ្វើដំបូង មិនសូវមានអ្នកធ្វើនំប្រភេទនេះទេ ប៉ុន្តែក្រោយមកទើបឃើញមានអ្នកធ្វើតាមនៅតំបន់ផ្សេងៗទៀតដូចជានៅខេត្តបាត់ដំបង និងភ្នំពេញ៕

The post នំអន្សមពងទាប្រៃ រសជាតិថ្មីប្លែកទទួលការគាំទ្រពីពលរដ្ឋក្នុងខេត្តស្ទឹងត្រែង រហូតដល់ទីក្រុងភ្នំពេញ appeared first on Kampuchea Thmey Daily.

ប្រជាពលរដ្ឋនៅក្នុងក្រុងសៀមរាប រួមគ្នាវេចនំអន្សម ផ្ដល់ជូនកងទ័ពឈរជើងនៅតាមបន្ទាត់ព្រំដែន

Kang Tola — Wed, 09 Jul 2025 15:13:37 +0000

សៀមរាប ៖ ក្នុងស្មារតីខ្មែររួបរួមសាមគ្គីគ្នា លើកទឹកចិត្តដល់បងប្អូនកងទ័ពដែលកំពុងឈរជើងតាមបន្ទាត់ព្រំដែន នៅថ្ងៃទី០៩ ខែកក្កដា ឆ្នាំ២០២៥នេះ បងប្អូនប្រជាពលរដ្ឋមួយចំនួននៅក្នុងក្រុងសៀមរាប បានរួមគ្នាវេចនំអន្សមចំនួន ៥០០នំ ដើម្បីយកទៅជូនដល់បងប្អូនកងទ័ពដែលកំពុងបំពេញភារកិច្ច ការពារបូរណភាពទឹកដី នៅតាមខ្សែបន្ទាត់ព្រំដែនក្នុងភូមិសាស្ត្រខេត្តឧត្ដរមានជ័យ។

លោកស្រី ឈន សុគន្ធា តំណាងប្រជាពលរដ្ឋ បានឱ្យដឹងថា ការដែលពួកគាត់រួមគ្នាវេចនំអន្សមនេះឡើង គឺដើម្បីបង្ហាញនូវទឹកចិត្ត ក្នុងស្មារតីខ្មែររួបរួមសាមគ្គីគ្នាលើកទឹកចិត្តដល់បងប្អូនកងទ័ពយើង ដែលកំពុងឈរជើងការពារបូរណភាពទឹកដីពីការឈ្លានពានពីប្រទេសជិតខាង ហើយក៏ដូចជាបញ្ជាក់ពីទឹកចិត្តរបស់ជនរួមជាតិ ខ្មែរជួយខ្មែរ ដែលជាការចូលរួមចំណែកលើកម្លាំងចិត្តក្នុងការការពារទឹកដី និងជាតិមាតុភូមិ។

លោកស្រី ឈន សុគន្ធា បានឱ្យដឹងទៀតថា ក្រៅពីនំអន្សម ៥០០នំ យើងក៏មានគ្រឿងឧបភោគបរិភោគមួយចំនួនទៀត ដូចជាសាច់ជ្រូក ទឹកសុទ្ធ៣០០យួរ កាហ្វេ៣កេះ បន្លែគ្រប់មុខ និងថវិកាមួយចំនួន ដែលបានពីការឧបត្ថម្ភរបស់ ឧកញ៉ា លៀង ផន និងក្រុមគ្រួសារ ដែលនឹងយកទៅជូនបងប្អូនកងទ័ពយើង ដែលឈរជើងនៅតាមបន្ទាត់ព្រំដែនក្នុងភូមិសាស្ត្រខេត្តឧត្ដរមានជ័យ នៅថ្ងៃទី១០ ខែកក្កដា ឆ្នាំ២០២៥នេះ៕

ដោយ ៖ កុសល

The post ប្រជាពលរដ្ឋនៅក្នុងក្រុងសៀមរាប រួមគ្នាវេចនំអន្សម ផ្ដល់ជូនកងទ័ពឈរជើងនៅតាមបន្ទាត់ព្រំដែន appeared first on Kampuchea Thmey Daily.

នាយ ពាក់មី រៀបចំកម្មវិធីវេចនំអន្សមជាង ២ពាន់នំ ដោយមានអ្នកភូមិចូលរួមប្រមាណជា ៥០០នាក់

Chan Sotheavy — Mon, 30 Sep 2024 03:04:07 +0000

នៅថ្ងៃនេះ នាយ ពាក់មី បានចូលរួមលើកតម្កើងនំខ្មែរ ដោយរៀបចំកម្មវិធីវេចនំអន្សមតាមគ្រោងទុកសរុប ២០២៤ ដែលត្រូវនឹងភ្ជុំបិណ្ឌឆ្នាំ ២០២៤ ដោយមានញាតិមិត្តចាស់ក្មេង ក្នុងភូមិស្រុករបស់ខ្លួនផ្ទាល់ អាចច្រេីនជាង ៥០០នាក់ ។ នេះបើតាមការអះអាងរបស់ លោក ចែម ចាន់រ៉ា ហៅ នាយពាក់មី បានបញ្ជាក់មុននេះ។

តាមរយៈហ្វេសប៊ុកផេកផ្លូវការរបស់តារាកំប្លែងរូបនេះ បានបញ្ជាក់ដែរថា ការវេចនំ នឹងចាប់ផ្តើមនៅម៉ោង ១១ថ្ងៃត្រង់នេះ ពោលគឺថ្ងៃទី៣០ ខែកញ្ញា ឆ្នាំ២០២៤ ពោលគឺត្រូវនឹងថ្ងៃកាន់បិណ្ឌទី១៣ ។ សម្រាប់ការរៀបចំកម្មវិធីវេចនំដែរ គឺរៀបចំឡើងនៅផ្ទះឯស្រុកកំណើតរបស់នាយ ពាក់មី ផ្ទាល់ ដែលស្ថិតក្នុងខេត្តស្វាយរៀង។

ជាមួយនឹងការផ្តួចផ្តើមនេះ លោកក៏ទទួលបានការគាំទ្រ និងកោតសរសើរចំពោះសកម្មភាពរបស់តារាកំប្លែងល្បីឈ្មោះរូបនេះផងដែរ ដោយយល់ឃើញថា អ្វីដែលលោកធ្វើ មិនត្រឹមតែជាការបង្ហាញពីផ្នែកមួយប្រពៃណីធ្វើនំរបស់ខ្មែរនោះទេ ក៏ជាការរួមចំណែករក្សាប្រពៃណីទំនៀមទម្លាប់ខ្មែរ ដល់អ្នកជំនាន់ក្រោយផងដែរ។

គួរជម្រាបថា នំអន្សមគឺជានំមួយប្រភេទដែលមានឈ្មោះល្បីល្បាញតាំងពីយូរ ជាទូទៅគេធ្វើដើម្បីថ្វាយជាទីសក្ការៈ ឬដល់ជីដូនជីតានៅថ្ងៃបុណ្យភ្ជុំបិណ្ឌ សម្រាប់ហូប ឬលក់ដូរជាដើម។ យ៉ាងណាមិញនំអន្សមខ្មែរ មានច្រើនប្រភេទដូចជា៖ នំអន្សមចេក នំអន្សមជ្រូក នំអន្សមដូង នំគម។ល។

ចំពោះអត្ថន័យរបស់ «នំអន្សម»
វចនានុក្រមសម្ដេចសង្ឃ ជួន ណាត បានពន្យល់ថា ជាឈ្មោះនំ ធ្វើដោយអង្ករដំណើបខ្ចប់វេចដោយស្លឹកស្រស់ (តាមធម្មតាច្រើនប្រើស្លឹកចេក) មានរាងមូលស្មើចុងស្មើដើម ចម្អិនដោយស្ងោរ ឬអាំងក៏មាន។ អន្សម មានច្រើនប្រភេទ គឺអន្សមចេក (អន្សមដាក់ចេកណាំវ៉ាទុំទាំងមូលជាស្នួល) , អន្សមជ្រូក (អន្សមដាក់សាច់ជ្រូកជាស្នូល), អន្សមដូង ,អន្សមដាក់ខ្ទិះដូង ឬសាច់ដូងទុំកោសលាយ និងអន្សមអាំង អន្សមដែលចម្អិនដោយអាំង នំអន្សមទាំងនេះគឺអាស្រ័យតាមការចំណូល និងការចូលចិត្តរបស់បងប្អូន ដែលពេញនិយមប៉ុណ្ណោះ ។

ជំនឿតាមបែបសាសនា
មូលហេតុដែលប្រជាជនខ្មែរនាំគ្នាវេចនំអន្សម តាមជំនឿសាសនា ដោយយោងតាម (Nom Ansom) ឯកសារមួយចំនួនបានឲ្យដឹងថា ក្នុងសម័យព្រះបាទជ័យវរន្ម័ទី៧ ប្រទេសកម្ពុជាប្រកាន់សាសនាព្រាហ្មណ៍ ហើយរបស់ប្រើប្រាស់ និងសម្ភារភាគច្រើនតែមានទំនាក់ទំនងនឹងសាសនា តួយ៉ាងនំអន្សមនេះជាដើម ។ ក្នុងសាសនាព្រាហ្មណ៍ នំអន្សមគឺតំណាងឲ្យលិង្គព្រះឥសូរ ចំណែកឯនំគមវិញ គឺតំណាងឲ្យយោនី នាងឧមា ដែលជាព្រះមហេសីរបស់ព្រះឥសូរ ។ ម្ល៉ោះហើយទើបយើងតែងតែឃើញនំប្រភេទនេះ មានក្នុងពិធីបុណ្យទាន អមជាមួយនឹង នំគម ដែលជានំប្រពៃណីខ្មែរផងដែរ ។

ដោយសារជំនឿសាសនាព្រាហ្មណ៍ ត្រូវបានដក់ជាប់ក្នុងផ្នត់គំនិតខ្មែរគ្រប់គ្នាទៅហើយនោះ (បើតាមសាសនាព្រះពុទ្ធ ពុំមានយកនំទៅបោះបាច ឬសែនដូច្នេះទេ មានតែសាសនាព្រាហ្មណ៍តែមួយប៉ុណ្ណោះ) ទើបខ្មែរយកនំអន្សមជ្រូក អន្សមចេក នំគម នំបត់ទាំងនេះទៅប្រគេនព្រះសង្ឃវិញ ដែលធ្វើឲ្យសាសនាទាំងពីរលាយឡំគ្នាដូចយើងឃើញសព្វថ្ងៃនេះ ។

«នំអន្សម» មានដើមកំណើតតាំងពីបរមបុរាណកាលមក ក្នុងប្រវត្តិនំប្រពៃណីខ្មែរ និងត្រូវបានគេឃើញវត្តមាននំមួយប្រភេទនេះនៅក្នុងពិធីបុណ្យ ប្រពៃណីខ្មែរ ដូចជាបុណ្យចូលឆ្នាំ បុណ្យភ្ជុំបិណ្ឌ ក្នុងពិធីរៀបអាពាហ៍ពិពាហ៍ និងពិធីបុណ្យសាសនាមួយចំនួនទៀត ។ ការដែលយកនំទាំងអស់នេះទៅវត្តនៅថ្ងៃភ្ជុំបិណ្ឌមកពីបុណ្យនេះក៏ដូចជា បុណ្យផ្សេងទៀត ជាប់ពាក់ព័ន្ធនឹងព្រហ្មញ្ញសាសនា ។ បើយើងមើលទៅផ្នែកសឹកសង្គ្រាមនាសម័យដើមនោះ នំអន្សម គឺជាស្បៀងបម្រុងមួយដ៏សំខាន់ក្នុងការផ្គត់ផ្គង់កងទ័ព ក្នុងពេលជាប់ដៃគ្នាប្រយុទ្ធជាមួយសត្រូវទៀតផង ៕

The post នាយ ពាក់មី រៀបចំកម្មវិធីវេចនំអន្សមជាង ២ពាន់នំ ដោយមានអ្នកភូមិចូលរួមប្រមាណជា ៥០០នាក់ appeared first on Kampuchea Thmey Daily.

ស.ស.យ.ក ខេត្តសៀមរាប រៀបចំកម្មវិធីវេចនំអន្សមមហាគ្រួសារខ្មែរលើទឹកដីអង្គរ

Thoeun Vansong — Sat, 28 Sep 2024 07:36:00 +0000

នាព្រឹកថ្ងៃទី២៨ ខែកញ្ញា ឆ្នាំ២០២៤នេះ សហភាពសហព័ន្ធយុវជនកម្ពុជាខេត្តសៀមរាប (ស.ស.យ.ក) បានសហការជាមួយសមាគមចុងភៅកម្ពុជា ក្រោមការដឹកនាំរបស់លោក ប្រាក់ សោភ័ណ ប្រធាន ស.ស.យ.ក ខេត្ត និងជាអភិបាលខេត្តសៀមរាប បានរៀបចំកម្មវិធីវេចនំអន្សមមហាគ្រួសារ នៅសួនច្បារព្រះអង្គចេកព្រះអង្គចម ក្នុងក្រុងសៀមរាប។

កម្មវិធីវេចនំអន្សមមហាគ្រួសារនេះ មានការចូលរួមពីថ្នាក់ដឹកនាំខេត្ត មន្ទីរ អង្គភាព កងកម្លាំងទាំងបី មន្ត្រីរាជការ និងសមាជិកសមាជិកាសហភាពសហព័ន្ធកម្ពុជាខេត្តសៀមរាបជាច្រើនរូប។

នំអន្សម ជានំដែលប្រជាពលរដ្ឋខ្មែរស្ទើរគ្រប់ក្រុមគ្រួសារ តែងតែរៀបចំវេចនំអន្សមជារៀងរាល់ឆ្នាំ មិនដែលខានក្នុងរដូវបុណ្យចូលឆ្នាំខ្មែរ ក៏ដូចជារដូវបុណ្យភ្ជុំបិណ្ឌ ក្រៅពីពិធីបុណ្យទាំងពីរនេះ ក៏មានពិធីមង្គលការក៏គេតែងឃើញមានវេចនំអន្សមផងដែរ។ តាមការកត់សម្គាល់ មុនថ្ងៃភ្ជុំបិណ្ឌ មួយ ឬពីរថ្ងៃ ប្រជាពលរដ្ឋខ្មែរតែងញាប់ដៃញាប់ជើង រៀបចំវេចនំអន្សម ដើម្បីទុកចូលរួមក្នុងឱកាសភ្ជុំបិណ្ឌ។

តាមការបញ្ជាក់របស់លោក សំកុល សុចិត្រា អនុប្រធានសហភាពសហព័ន្ធយុវជនកម្ពុជាខេត្ត និងជាអភិបាលរងខេត្ត ការវេចអន្សម មហាគ្រួសារមន្ត្រីរាជការ សហភាពសហព័ន្ធយុវជនកម្ពុជា នាំគ្នាវេចនោះមាននំអន្សមជ្រូក នំអន្សមចេក , នំបត់ និងនំគម ជាដើម។ ម៉្យាងទៀត ការវេចនំអន្សមនៅថ្ងៃនេះ គឺបានបង្ហាញនូវភាពសាមគ្គីគ្នានៃមហាគ្រួសារខ្មែរយើង ព្រមទាំងទាក់ទាញដល់ភ្ញៀវទេសចរណ៍ ដែលបានចូលមកកម្សាន្តនៅលើទឹកដីប្រវត្តិសាស្ត្រអង្គរនេះ បានភ្លក់នូវរសជាតិ នូវនំអន្សមកូនខ្មែរខេត្តសៀមរាប។

លោក បានបន្តថា ការវេចនំអន្សមនេះ គឺជារដូវកាលដែលប្រជាពុទ្ធបរិស័ទខ្មែរកាន់សាសនាព្រះពុទ្ធ តែងបានគោរពប្រតិបត្តិនៅពេលរដូវបុណ្យភ្ជុំបិណ្ឌ ក៏ដូចជាពិធីបុណ្យចូលឆ្នាំខ្មែរផងដែរ។ ចំពោះអន្សមដែលបានពីការចូលរួមគ្នាវេចនៅពេលនេះ និងយកទៅធ្វើការឧបត្ថម្ភដល់មណ្ឌលកុមារកំព្រា និងមន្ទីរពេទ្យកុមារជាដើម។

ចំពោះអត្ថន័យរបស់នំអន្សម «អន្សម» តាមវចនានុក្រមសម្ដេចសង្ឃ ជួន ណាត បានពន្យល់ថា ជាឈ្មោះ នំធ្វើដោយអង្ករដំណើបខ្ចប់ដោយស្លឹកស្រស់ (តាមធម្មតាច្រើនប្រើស្លឹកចេក) មានរាងមូលស្មើចុងស្មើដើម ចម្អិនដោយស្ងោរ ឬអាំងក៏មាន គឺអន្សមចេក អន្សមជ្រូក អន្សមដូង អន្សមអាំង។ យោងតាមឯកសារមួយចំនួនបានឲ្យដឹងថា សម័យព្រះបាទ ជ័យវរន្ម័ទី៧ ប្រទេសកម្ពុជាប្រកាន់សាសនាព្រាហ្មណ៍ ហើយរបស់ប្រើប្រាស់ និងសម្ភារភាគច្រើនមានទំនាក់ទំនងនឹងសាសនា តួយ៉ាងនំអន្សមនេះជាដើម ដែលជាស្បៀងបម្រុងនៅពេលចេញទៅធ្វើសឹកសង្គ្រាម។

ម៉្យាងវិញទៀត ក្នុងសាសនាព្រាហ្មណ៍ នំអន្សម គឺតំណាងឲ្យលិង្គព្រះឥសូរ ចំណែកឯនំគមវិញ គឺតំណាងយោនីនាង ឧមា ដែលជាព្រះមហេសីរបស់ព្រះឥសូរ។ ម៉្លេះហើយទើបយើងតែងតែឃើញនំប្រភេទនេះក្នុងពិធីបុណ្យទានអមជាមួយ នឹង «នំគម» ដែលជានំប្រពៃណីខ្មែរផងដែរ។ «នំអន្សម» មានដើមកំណើតតាំងពីបរមបុរាណកាលក្នុងប្រវត្តិនំប្រពៃណីខ្មែរ និងត្រូវបានគេឃើញវត្តមាននំមួយប្រភេទនេះនៅក្នុងពិធីបុណ្យប្រពៃណីខ្មែរ ដូចជាបុណ្យចូលឆ្នាំ បុណ្យភ្ជុំបិណ្ឌ ក្នុងពិធីរៀបអាពាហ៍ពិពាហ៍ និងពិធីបុណ្យសាសនាមួយចំនួនទៀត៕

អត្ថបទ៖ គឿន វេត

The post ស.ស.យ.ក ខេត្តសៀមរាប រៀបចំកម្មវិធីវេចនំអន្សមមហាគ្រួសារខ្មែរលើទឹកដីអង្គរ appeared first on Kampuchea Thmey Daily.

និស្សិតអាហារូបករណ៍ អ.ម.ត ចូលរួមវេចនំអន្សមក្នុងឱកាសបុណ្យភ្ជុំបិណ្ឌ ដើម្បីថែរក្សាប្រពៃណីជាតិ

Ngoeul Narath — Fri, 27 Sep 2024 12:11:53 +0000

នាថ្ងៃទី២៦ ខែកញ្ញា ឆ្នាំ២០២៤ និស្សិតអាហារូបករណ៍ អ.ម.ត បានចូលរួមជាមួយចាស់ទុំនៅក្នុងភូមិ ធ្វើការវេចនំអន្សមជ្រូក នំអន្សមចេក នំគម និងនំបត់ ជាដើម សម្រាប់ចែកចាយដល់ញាតិសណ្តាន និងប្រគេនព្រះសង្ឃគង់ទីវត្តអារាម និងទុកបរិភោគ នៅក្នុងឱកាសនៃពិធីបុណ្យភ្ជុំបិណ្ឌប្រពៃណីជាតិខ្មែរ ។

ជាការពិតណាស់ ប្រពៃណីវេចនំអន្សមក្នុងឱកាសបុណ្យភ្ជុំបិណ្ឌនេះត្រូវបានថែរក្សាយ៉ាងខ្ជាប់ខ្ជួនពីមួយជំនាន់ទៅមួយជំនាន់ ហើយចំណេះដឹងនៃការវេចនំអន្សមនេះក៏ត្រូវបានផ្ទេរពីមួយជំនាន់ទៅមួយជំនាន់ផងដែររហូតមកដល់ពេលបច្ចុប្បន្ន។

ក្រៅពីឱកាសនៃបុណ្យភ្ជុំបិណ្ឌ ដូនតាខ្មែរក៏មានប្រពៃណីវេចនំអន្សមនៅក្នុងឱកាសនៃពិធិបុណ្យចូលឆ្នាំថ្មី ពិធីមង្គលការ និងពិធីបុណ្យទានផ្សេងៗទៀត ហើយនំអន្សមមានដើមកំណើតតាំងពីបរមបុរាណកាល យូរលង់ណាស់មកហើយ ៕

The post និស្សិតអាហារូបករណ៍ អ.ម.ត ចូលរួមវេចនំអន្សមក្នុងឱកាសបុណ្យភ្ជុំបិណ្ឌ ដើម្បីថែរក្សាប្រពៃណីជាតិ appeared first on Kampuchea Thmey Daily.

នំអន្សមរសជាតិឆ្ងាញ់បង្ហាញខ្លួននៅស្ទឹងត្រែង

deth leng — Sat, 02 Sep 2023 04:24:14 +0000

អ្នកទេសចរទាំងឡាយបើបានធ្វ្វើដំណើរឆ្លងកាត់ខេត្តស្ទឹងត្រែងច្បាស់ជាមិនភ្លេចចូលទិញនំចំណីរឬម្ហូបអាហា ផ្ញើជូនក្រុមគ្រួសារឡើយ។ នៅខេត្តស្ទឹងត្រែងវិញមាននំអន្សមឈ្ងុយឆ្ងាញ់មាននៅភូមិព្រែកសង្កាត់ក្រុងស្ទឹងត្រែង។

អ្នកស្រី សុភា ជាអ្នកប្រកបរមុខរបរវេចនំអន្សមជ្រូកពិសេសប្រចាំនៅភូមិព្រែកសង្កត់ក្រុងស្ទឹងត្រែង បាននាំយកនំអន្សមពិសេសដាក់បង្ហាញក្នុងសិក្ខាសាលាមួយដើម្បីផ្សព្វផ្សាយស្ដីពីការចងក្រងសមាជិកចលនា ភូមិ១មានផលិតផល១ នៅសាលាខេត្តស្ទឹងត្រែង។

អ្នកស្រីបញ្ជាក់ថា ពេលទទួលបានវិញ្ញាបនបត្រទទួលស្គាល់ ភូមិមួ១ ផលិតផល១ ក្នុងនាមម្ចាស់ផលិតអ្នកស្រីបានបង្កើនភាច្នៃប្រឌិតផលិតផលមួយនេះកាន់តែមានគុណភាព និងបរិមាណសម្រាប់បំពេញសេចក្តីត្រូវការជូនអតិថិជន។

ដោយឡែកលោក ផលសុជាតិអគ្គលេខាធិការភូមិ១ផលិតផល១ ប្រាប់ឲ្យដឹងថា ភូមិ១មានផលិតផល១ ប្រៀបបានជាកត្តាលីករដ៏សំខាន់មួយក្នុងការជំរុញឲ្យកំណើនសេដ្ឋកិច្ចជាតិតាមរយៈការលើកកម្ពស់ជីវភាពរស់នៅរបស់ប្រជាជនតាមមូលដ្ឋានឱ្យប្រសើរឡើង។

លោកបន្តថាកត្តាសំខាន់ចំពោះកិច្ចការនេះអ្នកពាក់ព័ន្ធទាំងអស់ត្រូវដឹងនិងជំរុញការគិតជាសកលជំរុញឲ្យមានការផលិតប្រកបដោយភាពច្នៃប្រឌិតខ្ពស់ និងជំរុញឲ្យមានការអភិវឌ្ឍន៍ធនធានមនុស្សថែមទៀត។

លោកបង្ហើបបន្តថា ពេលខ្ញុំមកដល់ខេត្តស្ទឹងត្រែងខ្ញុំសង្ឃឹមថា យើងនឹងធ្វើឲ្យមានភាពប្រែប្រួលជាវិជ្ជមានក្នុងកម្រិតណាមួយទៅលើការជំរុញចលនាភូមិ១ ផលិតផល១នៅខេត្តស្ទឹងត្រែងរបស់យើងនេះ៕

អត្ថបទ៖ រុងរឿង

The post នំអន្សមរសជាតិឆ្ងាញ់បង្ហាញខ្លួននៅស្ទឹងត្រែង appeared first on Kampuchea Thmey Daily.

រដ្ឋបាលខេត្តកំពត បង្កើតកម្មវិធីវេចនំអន្សមសាមគ្គី ដើម្បីរួមចំណែកអភិរក្ស និងបង្កើនភាពស្និទ្ធស្នាល ក្នុងពិធីបុណ្យភ្ជុំបិណ្ឌ

Sorn Phanith — Sun, 18 Sep 2022 03:31:15 +0000

ឯកឧត្តម ម៉ៅ ធនិន អភិបាលខេត្តកំពត បានផ្តួចផ្តើមរៀបចំកម្មវិធីវេចនំអន្សមសាមគ្គី ដើម្បីចូលរួមអភិរក្សនិងបង្កើនភាពស្និទ្ធស្នាល ក្នុងឱកាសពិធីបុណ្យភ្ជុំបិណ្ឌ ដែលមានការចូលរួមពីថ្នាក់ដឹកនាំខេត្ត មន្ត្រីរាជការនៃបណ្ដាមន្ទីរអង្គភាពជុំវិញខេត្ត និងយុវជនយុវតីប្រជាពលរដ្ឋជាច្រើនរយនាក់ កាលពីថ្ងៃទី ១៧ ខែកញ្ញា ឆ្នាំ ២០២២ ។

នៅក្នុងឱកាសនៃកម្មវិធីវេចនំអន្សមសាមគ្គី ដែលរដ្ឋបាលខេត្តកំពត បានរៀបចំឡើងកាលពីថ្ងៃទី ១៧ ខែកញ្ញា ឆ្នាំ ២០២២ ប្រជាពលរដ្ឋក៏ដូចជាអ្នកចូលរួម បានបង្ហាញអារម្មណ៍ដោយចាត់ទុកកម្មវិធីនេះ ពិតជាល្អណាស់ សម្រាប់មនុស្សទូទៅ ព្រោះបានបង្កឱកាសឲ្យបានមកជួបជុំគ្នា សំណេះសំណាល សួរសុខទុក្ខគ្នា ស្និទ្ធស្នាលគ្នា និងបង្កើតបរិយាកាសសប្បាយរីករាយជាមួយគ្នា ក្នុងឱកាសបុណ្យភ្ជុំបិណ្ឌ ដែលជាប្រពៃណីទំនៀមទម្លាប់របស់ដូនតាខ្មែរ តែងធ្វើជារៀងរាល់ឆ្នាំរហូតមក។ ម្យ៉ាងទៀតពិធីនេះបើកឱកាសឲ្យអ្នកជំនាន់មុន ចែករំលែកនូវបទពិសោធន៍នៃរបៀបរៀបចំផ្សំគ្រឿង និងការវេចនំអន្សមព្រមទាំងនំប្រពៃណីផ្សេងៗ ដល់ក្មេងជំនាន់ក្រោយផងដែរ។

ចំណែកក្រុមយុវជន ក៏បានបង្ហាញនូវភាពសប្បាយរីករាយ ក្នុងការចូលរួមពិធីវេចនំអន្សមសាមគ្គីនេះដែរថា ក្រៅពីបានជួបជុំមិត្តភក្ដិថ្មីៗ ពួកគេបានឃើញនូវសាមគ្គីភាព និងភាពស្និទ្ធស្នាលរបស់អ្នកចូលរួមយ៉ាងល្អប្រពៃ លើសពីនោះពួកគេបានរៀនសូត្រនូវបទពិសោធន៍ពីរបៀបធ្វើនំអន្សម ដែលជានំប្រពៃណីរបស់ខ្មែរដែលពួកគាត់មិនធ្លាប់ចេះធ្វើដោយផ្ទាល់ដៃពីមុនមកផងដែរ។

ចំណែកមន្ត្រីសាលាខេត្តកំពត ក៏បានចាត់ទុកកម្មវិធីនេះពិតជាល្អមែនទែន ហើយនេះគឺជាលើកទី ១ នៅក្នុងប្រវត្តិសាស្ត្ររបស់រដ្ឋបាលខេត្តកំពត ដែលបានជួបជុំគ្នាវេចនំអន្សមនៅសាលាខេត្ត ដើម្បីបំផុសស្មារតីថែរក្សា ចូលរួមអបអរ ក្នុងឱកាសបុណ្យកាន់បិណ្ឌ ភ្ជុំបិណ្ឌយ៉ាងសប្បាយរីករាយ។ ដូច្នេះហើយគាត់ចង់ឲ្យពិធីនេះធ្វើឡើងជារៀងរាល់ឆ្នាំ បើអាចធ្វើឲ្យបានកាន់តែធំជាងនេះ ក៏ល្អម្យ៉ាងដែរ ព្រោះពិធីនេះផ្តល់អត្ថប្រយោជន៍ច្រើនយ៉ាង ដូចជាផ្តល់ឱកាសជួបជុំ បង្កើនភាពស្និទ្ធស្នាលរវាងពលរដ្ឋចាស់ៗដែលមានបទពិសោធន៍ និងយុវជនព្រមទាំងមន្ត្រីរាជការ ថ្នាក់ដឹកនាំខេត្ត បង្កើនស្មារតីអភិរក្សទំនៀមទម្លាប់ប្រពៃណីខ្មែរ ពិសេសបង្រៀនរបៀបធ្វើនំអន្សមដល់ក្មេងៗជំនាន់ក្រោយ ។

ការចំណាយពេលក្នុងកម្មវិធីវេចនំអន្សម រួមនឹងអន្សមចេកដែលជាលក្ខណៈសាមគ្គីរបស់រដ្ឋបាលខេត្តកំពត ក្នុងឱកាសបុណ្យកាន់បិណ្ឌ ភ្ជុំបិណ្ឌនាពេលនេះ គឺជាគំនិតផ្តួចផ្តើមឡើងរបស់ឯកឧត្តម ម៉ៅ ធនិន អភិបាលខេត្តកំពត ក្រោមការដឹកនាំផ្ទាល់ពីសំណាក់លោកជំទាវ ហ៊ុន ចាន់ធី ម៉ៅ ធនិន និងលោកជំទាវ ថុង ធារី ជឹង ផល្លា ដោយបានប្រើប្រាស់អង្ករដំណើប ១ តោន សណ្តែក ៥០០ គីឡូ សាច់ខ្លាញ់ ជ្រូក ១៥០ គីឡូ ដូងទុំ ៤៨០ ផ្លែ ចេកទុំ ៧០ ស្និត ស្លឹកចេក ៣០០ គីឡូយកមកវេចនំអន្សម ទាំងអស់ធ្វើសម្រាប់ហូបជុំគ្នា និងការចែករំលែកគ្នាយកទៅវត្ត ឬផ្ញើទៅមិត្តភក្តិ ក្រុមគ្រួសារហូបផងដែរ៕

អត្ថបទ៖ សឹង រ៉ាត់

The post រដ្ឋបាលខេត្តកំពត បង្កើតកម្មវិធីវេចនំអន្សមសាមគ្គី ដើម្បីរួមចំណែកអភិរក្ស និងបង្កើនភាពស្និទ្ធស្នាល ក្នុងពិធីបុណ្យភ្ជុំបិណ្ឌ appeared first on Kampuchea Thmey Daily.