ល្ងាចនេះ វ៉ាន វ៉ុន ប្រកួតកីឡាប៉ារ៉ាឡាំពិកនៅប្រទេសបារាំង

chean virakbot — Wed, 04 Sep 2024 02:18:11 +0000

កីឡាករជនមានពិការភាពជម្រើសជាតិកម្ពុជា វ៉ាន វ៉ុន នឹងប្រកួតអត្តពលកម្មលើវិញ្ញាសាប្រណាំងរទេះចម្ងាយ១០០ម៉ែត្រ (T54) ក្នុងព្រឹត្តិការណ៍កីឡាប៉ារ៉ាឡាំពិក ក្នុងទីក្រុងបារីស ប្រទេសបារាំង។

តាមកាលវិភាគ វ៉ាន វ៉ុន ដែលជាអត្តពលិកពិការភាពកម្ពុជាតែម្នាក់គត់ទទួលបានសិទ្ធិចូលរួមប្រកួតក្នុងព្រឹត្តិការណ៍លំដាប់ពិភពលោកនេះត្រូវប្រកួតវេលាម៉ោង១១:៥២នាទី ត្រូវនឹងម៉ោង៤:៥០នាទីល្ងាចនៅកម្ពុជា ថ្ងៃទី៤ ខែកញ្ញា ឆ្នាំ២០២៤។

វ៉ាន វ៉ុន ស្ថិតនៅក្នុងក្រុមទី១ (Heat 1) ជាមួយកីឡាករមកពីប្រទេស ម៉ិកស៊ិក ចិន អូស្ត្រាលី ហ្គំប៊ី អាមេនី និងថៃ ខណៈក្រុមទី២មានកីឡាករ៧រូបផ្សេងទៀត។ កីឡាករទាំង១៤រូបត្រូវប្រកួតជម្រុះជុំទី១ដើម្បីជ្រើសរើសយក៨រូបចុងក្រោយបន្តទៅវគ្គផ្តាច់ព្រ័ត្រគឺ កីឡាករលំដាប់កំពូល៣រូបនៃ Heats ទាំងពីរ និងកីឡាករ២រូបទៀតដែលមានថិរវេលាល្អបំផុត។

នៅក្នុង Heat ជាមួយ វ៉ាន វ៉ុន មានកីឡាករថៃ Athiwat Paeng-Nea ជាអ្នកកាន់កំណត់ត្រាថិរវេលាលឿនបំផុតពិភពលោកគឺរូបគេធ្វើបានថិរវេលា១៣.៦៣វិនាទី កាលពីថ្ងៃទី៩ ខែឧសភា ឆ្នាំ២០២៤។ រូបគេជាម្ចាស់មេដាយមាសប៉ារ៉ាឡាំពិកកាលពីឆ្នាំ២០២០ នៅជប៉ុន លើវិញ្ញាសា១០០ម៉ែត្រនេះ ដូច្នេះរូបគេត្រូវការពារតំណែងមេដាយមាសរបស់ខ្លួន។

វ៉ាន វ៉ុន ធ្លាប់បានចូលរួមប្រកួតកីឡាប៉ារ៉ាឡាំពិកចំនួន៣លើកហើយគិតទាំងឆ្នាំ២០២៤នេះ បន្ទាប់ពីធ្លាប់ចូលរួមកាលពីឆ្នាំ២០២០ និង២០១៦។ កាលពីឆ្នាំ0២០២០ នៅទីក្រុងតូក្យូ ប្រទេសជប៉ុន រូបគេទទួលបានចំណាត់ថ្នាក់លេខ៧ ក្នុងចំណោមអត្តពលិកជាច្រើន៕

អត្ថបទ៖ វីរបុត្រ

The post ល្ងាចនេះ វ៉ាន វ៉ុន ប្រកួតកីឡាប៉ារ៉ាឡាំពិកនៅប្រទេសបារាំង appeared first on Kampuchea Thmey Daily.

ប្រវត្តិជូរចត់ វ៉ាន វ៉ុន និងម្ចាស់មេដាយមាសប៉ារ៉ាឡាំពិក Athiwat មុនប៉ះគ្នានៅអាស៊ានប៉ារ៉ាហ្គេម

chean virakbot — Wed, 31 May 2023 04:39:41 +0000

ក្រុមអត្តពលកម្មពិការរទេះកម្ពុជានឹងត្រូវប្រឈមជាមួយក្រុមខ្លាំងលំដាប់ពិភពលោករបស់ថៃនៅក្នុងព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ចាប់ពីថ្ងៃទី៣ ដល់ទី៩ ខែមិថុនា ឆ្នាំ២០២៣ នៅប្រទេសកម្ពុជា។

ក្រុមកម្ពុជាមានកីឡាករ វ៉ាន វ៉ុន, ហេង សាវឿន, ជុន ពន់ និង ហៀ ហុក ធ្លាប់ប្រជែងជាមួយក្រុមអត្តពលកម្មពិការរទេះថៃដែលមានកីឡាករ PONGSAKORN PAEYO, PHIPHATPHONG SIANGLAM, SAICHON KONJEN និង ATHIWAT PAENG-NUEA ជាច្រើនលើកមកហើយទាំងការប្រកួតកីឡាជនពិការកម្រិតអាស៊ាន និងអូឡាំពិក។

ជួបគ្នាលើកចុងក្រោយក្នុងអាស៊ានប៉ារ៉ាហ្គេម ឆ្នាំ២០២២ នៅប្រទេសឥណ្ឌូណេស៊ី វិញ្ញាសាប្រណាំងរទេះបណ្តាក់១០០ម៉ែត្រ x ៤ មានតែ២ប្រទេសប៉ុណ្ណោះចូលរួមប្រកួតគឺកម្ពុជា និងថៃ។ ជាលទ្ធផល ក្រុមកម្ពុជាបានឈ្នះមេដាយមាស ខណៈថៃមិនទទួលបានមេដាយឡើយដោយសារមានពីរប្រទេសមិនតម្រូវឲ្យទទួលបានមេដាយប្រាក់ ឬសំរិទ្ធ។

ក្នុងអាស៊ានប៉ារ៉ាហ្គេមនៅឥណ្ឌូណេស៊ីដដែល វិញ្ញាសាប្រណាំងរទេះចម្ងាយ១០០ម៉ែត្រ កីឡាករថៃ ATHIWAT PAENG-NUEA បានឈ្នះមេដាយមាសដោយប្រើថិរវេលា១៤.២៩វិនាទី តាមរយៈការយកឈ្នះលើកីឡាករកម្ពុជា វ៉ាន វ៉ុន ដែលទទួលបានមេដាយប្រាក់ សម្រាប់ការប្រើថិរវេលា១៤.៥៥វិនាទី។

កីឡាករ វ៉ាន វ៉ាន់ និងកីឡាករថៃ ATHIWAT PAENG-NUEA ក៏ធ្លាប់មានប្រវត្តិជួបគ្នាក្នុងព្រឹត្តិការណ៍កីឡាប៉ារ៉ាឡាំពិក ឆ្នាំ២០២០ នៅប្រទេសជប៉ុន។ សម្រាប់វិញ្ញាសាប្រណាំងរទេះចម្ងាយ១០០ម៉ែត្រ នៅទីក្រុងតូក្យូ វគ្គជម្រុះជុំដំបូង កីឡាករទាំងពីរនៅ Heat ជាមួយគ្នា ហើយកីឡាករថៃ Athiwat បានបញ្ចប់ទីមុនគេឈរចំណាត់ថ្នាក់លេខ១ដោយប្រើពេល១៤វិនាទីគត់ ហើយកីឡាករកម្ពុជា វ៉ាន វ៉ុន ស្ថិតនៅលេខ២ដោយប្រើថិរវេលា១៤.៣៩វិនាទីក្នុងចំណោមបេក្ខភាព៦រូប ដូច្នេះអ្នកទាំងពីរបានឡើងទៅវគ្គផ្តាច់ព្រ័ត្រ។

នៅវគ្គផ្តាច់ព្រ័ត្រមានបេក្ខភាព៨រូបដែលសុទ្ធតែជើងខ្លាំងជាប់មកពីវគ្គជម្រុះ។ កីឡាករថៃ Athiwat រឹតតែធ្វើបានល្អជាងវគ្គជម្រុះថែមទៀតដោយប្រើថិរវេលាត្រឹមតែ១៣.៧៦វិនាទីប៉ុណ្ណោះដើម្បីឈរចំណាត់ថ្នាក់លេខ១ទទួលបានមេដាយមាសកម្រិតពិភពលោក ខណៈកីឡាករកម្ពុជា វ៉ាន វ៉ុន ស្ថិតនៅចំណាត់ថ្នាក់លេខ៧ដោយប្រើថិរវេលា១៤.២១វិនាទី ប៉ុន្តែបាននៅពីលើកីឡាករហុល្លង់។

ដូច្នេះកម្ពុជាមានតែកីឡាករ វ៉ាន វ៉ុន ម្នាក់គត់ធ្វើបានល្អបំផុតក្នុងព្រឹត្តិការណ៍កីឡាប៉ារ៉ាឡាំពិក បន្ទាប់ពីធ្លាប់ចូលរួមប្រកួតជាច្រើនលើកកន្លងមក។ បើទោះបីជាមិនអាចដណ្ដើមមេដាយជូនជាតិ ក៏កីឡាករកម្ពុជារូបនេះបានបង្កើតកំណត់ត្រាផ្ទាល់ខ្លួន ឈានដល់វគ្គផ្ដាច់ព្រ័ត្រក្នុងព្រឹត្តិការណ៍ពិភពលោក ៤ឆ្នាំម្ដងនេះ។

ក្រុមអត្តពលកម្មពិការរទេះកម្ពុជានឹងប្រកួតលើប្រភេទពិការ T53 និង T54 សម្រាប់វិញ្ញាសាប្រណាំងរទេះចម្ងាយ១០០ម៉ែត្រ ២០០ម៉ែត្រ ៤០០ម៉ែត្រ និងបណ្តាក់១០០ម៉ែត្រ x ៤ សម្រាប់កីឡាអាស៊ានប៉ារ៉ាហ្គេម លើកទី១២ ឆ្នាំ២០២៣។ ការជួបដៃគូដូចជាក្រុមអត្តពលកម្មរទេះថៃអាចនឹងកាន់តែមានការប្រកួតប្រជែងស្វិតស្វាញជាងមុនៗ។

វ៉ាន វ៉ុន បានប្រាប់ថា ៖«ក្រុមយើងទាំងអស់បានហ្វឹកហាត់ត្រៀមអាស៊ានប៉ារ៉ាហ្គេម លើកទី១២នេះ គឺល្អជាងមុន ដោយសារពួកយើងទទួលបានរទេះថ្មីដែលឯកឧត្តម ហ៊ុន ម៉ានី បានជួយទិញថ្មីទាំង៥គ្រឿងពីប្រទេសជប៉ុន។ យើងធ្លាប់ប្រជែងជាមួយមេដាយមាសអូឡាំពិក ហើយលើកនេះ យើងមានរទេះថ្មី ដូច្នេះយើងអាចប្រជែងជាមួយគេកាន់តែល្អជាងមុន»។

«បើប្រៀបធៀបថិរវេលារបស់យើងក្នុងការហ្វឹកហាត់ទៅនឹងការប្រកួតនៅប្រទេសឥណ្ឌូណេស៊ី ឆ្នាំ២០២២ គឺយើងធ្វើបានល្អជាង។ មិនត្រឹមតែរទេះថ្មីទេ សូម្បីតែសម្ភារៈផ្សេងៗដូចជាសំបកកងជាដើមក៏ថ្មីដែរ អីចឹងការហ្វឹកហាត់របស់យើងគឺមានកម្លាំងចិត្ត និងសប្បាយរីករាយក្នុងការហ្វឹកហាត់ជាងមុន ជាពិសេសយើងជាម្ចាស់ផ្ទះថែមទៀត»។ វ៉ាន វ៉ុនបានបន្ថែម។

កីឡាអាស៊ានប៉ារ៉ាហ្គេម លើកទី១២ ដែលមាន១៣ប្រភេទកីឡានឹងចាប់បើកពីថ្ងៃទី៣ ដល់ទី៩ ខែមិថុនា ឆ្នាំ២០២៣ ដែលមានអត្តពលិក និងប្រតិភូប្រទេសអាស៊ានទាំង១១ជាង២ពាន់នាក់ចូលរួម៕

អត្ថបទ៖ វីរបុត្រ

The post ប្រវត្តិជូរចត់ វ៉ាន វ៉ុន និងម្ចាស់មេដាយមាសប៉ារ៉ាឡាំពិក Athiwat មុនប៉ះគ្នានៅអាស៊ានប៉ារ៉ាហ្គេម appeared first on Kampuchea Thmey Daily.

វ៉ាន វ៉ុន Archives - Kampuchea Thmey Daily

ល្ងាចនេះ វ៉ាន វ៉ុន ប្រកួត​កីឡា​ប៉ារ៉ាឡាំពិក​នៅប្រទេសបារាំង

ល្ងាចនេះ វ៉ាន វ៉ុន ប្រកួតកីឡាប៉ារ៉ាឡាំពិកនៅប្រទេសបារាំង