ទន្សោងជាប្រភេទជីវៈចម្រុះកម្រ និងជាប្រភេទ ជិតផុតពូជលើពិភពលោក ហើយបានចុះក្នុងបញ្ជីក្រហម របស់អង្គការ IUCN។ អ្នកនាំពាក្យក្រសួងបរិស្ថាន លោក ខ្វៃ អាទិត្យា  បានចាត់ទុកថា នេះជាលទ្ធផល ជោគជ័យមួយ ក្នុងការអភិរក្សសត្វព្រៃ និងធនធានធម្មជាតិនៅកម្ពុជា។

លោកសំណូមពរឱ្យអ្នកពាក់ព័ន្អ អាជ្ញាធរមូលដ្ឋាន និងប្រជាពលរដ្ឋនៅតាមសហគមន៍ ចូលរួមប្រសើរថែមទៀត ការពារថែរក្សាសម្បត្តិធនធានធម្មជាតិ កម្រលើពិភពលោកនេះ ឱ្យបានគង់វង្សសម្រាប់ប្រព័ន្ធអេកូឡូស៊ី និងសម្រាប់បម្រើ ដល់គោលដៅលំហែបៃតង ដើម្បីរួមចំណែកដល់ការបង្កើន ជីវភាពសហគមន៍មូលដ្ឋានផ្ទាល់។

គួរបញ្ជាក់ថាទន្សោង មានវត្តមាននៅតាម​តំបន់ព្រៃ ក្នុងភូមិភាគឦសាន និរតី និង ភាគខាងជើងប្រទេសកម្ពុជា ដោយរស់នៅជាហ្វូង អាចលាយឡំជាមួយ គោព្រៃ ប្រើស ខ្ទីងជាដើម ភាគច្រើននៅតំបន់ព្រៃរបោះ មានអូរ ស្ទឹង ត្រពាំង ថ្លុកដែលមានស្មៅ ស្បូវ ព្រេច ឬស្សី ឈ្នះ រុក្ខជាតិ គម្ពោតព្រៃ ទឹកជប់ ដីច្រាបជាដើម។

ទន្សោងមានមាឌ រូបរាង និងក្រចកជើងចំពាម ដូច​គោស្រុក​ដែរ តែខុសត្រង់ គ្មានបូកលើខ្នង និងបួរក​ធ្លាក់ចុះក្រោមដូចគោស្រុក ទន្សោងមាន​សម្បុរក្រហម​ត្នោតស្រាល និងប្រែទៅជាពណ៌ក្រហមត្នោត ឬ ក្រហមត្នោតចាស់ នៅពេលវាមានវ័យចំណាស់បន្តិច ហើយជើងទាំងបួនចាប់ពីជង្គង់ចុះក្រោមមានពណ៌ស ដូចខ្ទីង និងគោព្រៃដែរ ប៉ុន្តែខុសគ្នាត្រង់វាមានពណ៌ស នៅផ្នែកក្រោយ​ត្រង់កំពែងគូទ រីឯស្នែងវាមានរាងមូលជាងស្នែងខ្ទីង ពណ៌លឿងចាស់ភ្លឺរលោង ចាប់ពីពាក់កណ្តាលស្នែងចុះក្រោម និងចុងស្នែងមានពណ៌ខ្មៅ។  បន្ទាប់ពីពពោះរយៈពេល ប្រមាណជា ១០ខែ ទន្សោងអាចបង្កើតកូនបាន១-២ក្បាល និងអាចដោយឈ្មោលម្ដងទៀត ក្រោយពីកើតកូនបាន២ខែ៕

គួរបញ្ជាក់ថាយោងអនុក្រឹត្យរបស់រាជរដ្ឋាភិបាលលេខ១៧៦អនក្រ.បក ចុះថ្ងៃទី១៧ ខែកក្កដា ឆ្នាំ២០២៣ ដែនជម្រកសត្វព្រៃភ្នំត្នោត-ភ្នំពក មានផ្ទៃដីចំនួន ៥១ ៧៣០ហិកតា ស្ថិតក្នុងភូមិសាស្ត្រខេត្តព្រះវិហារ និងខេត្តសៀមរាប៕

The post អ្នកអភិរក្សប្រទះឃើញសត្វទន្សោងមួយហ្វូង នៅដែនជម្រកសត្វព្រៃភ្នំត្នោត ក្នុងភូមិសាស្រ្តខេត្តព្រះវិហារ appeared first on Kampuchea Thmey Daily.

គួរឱ្យដឹងថា កាលពីពេលថ្មីៗនេះ មន្រ្តីខណ្ឌរដ្ឋបាលព្រៃឈើសៀមរាប បានព្យាយាមសង្រ្គោះ និងព្យាបាលបឋមចំពោះសត្វទន្សោងចំនួន១ ក្បាល ដែលរបួសជើងមុខខាងស្តាំធ្ងន់ធ្ងរដោយសារជាប់អន្ទាក់ ក្នុងសហគមន៍ព្រៃឈើឆក់បាស់។ អំឡុងពេលព្យាបាល មន្ត្រីបានប្រើប្រាស់ ថ្នាំសណ្តំរួចដឹកយកមកព្យាបាលមួយរយៈនៅក្នុងចម្ការពូជឈើគ្រញូង ស្ថិតនៅភូមិត្រពាំងថ្ម ឃុំឃុនរាម ស្រុកបន្ទាយ ស្រី ខេត្តសៀមរាប។

ប៉ុន្តែនៅថ្ងៃទី១៥ ខែកុម្ភៈ ឆ្នាំ២០២៤នេះ សត្វទន្សោង ត្រូវបានបាត់បង់ជីវិតដោយសាររបួសធ្ងន់ពេកមិនអាចជួយសង្គ្រោះបាន។ យ៉ាងណាមន្ត្រីជំនាញរដ្ឋបាលព្រៃឈើនៅតំបន់នោះ បានយកសពសត្វទន្សោងនោះយកទៅកប់ក្នុងរណ្ដៅរួចរាល់ហើយ៕

អត្ថបទៈ ជុន កុសល

The post សត្វទន្សោង ១ក្បាល ស្លាប់ ក្រោយជាប់អន្ទាក់បង្កជារបួសធ្ងន់ធ្ងរ appeared first on Kampuchea Thmey Daily.

ក្រុមមន្ត្រីសហគមន៍ការពារព្រៃឈើប្រាំមុំ ស្ថិតភូមិត្រពាំងក្រើញ ឃុំប្រាំបីមុំ ស្រុកថ្ពង ខេត្តកំពង់ស្ពឺ បានឱ្យដឹង នៅថ្ងៃទី០៨ ខែតុលា ឆ្នាំ២០២៣ នេះថា សត្វទន្សោងមួយក្បាលបានស្លាប់ កាលពីថ្ងៃទី០៧ ខែតុលា ឆ្នាំ២០២៣ ម្សិលមិញនេះ ដោយសារជាប់អន្ទាក់ព្រាន។ មន្ត្រីសហគមន៍ដដែលបានបន្តទៀតថា ក្រុមការងារបានរៀបចំធ្វើការដុតសពសត្វទន្សោងកំទេចចោល ដោយមិនអនុញ្ញាតឱ្យនណាម្នាក់ប្រលះយកសាច់ទៅបរិភោគឡើយ។

តាមក្រុមសហគមន៍ព្រៃឈើប្រាំបីមុំ បានឱ្យដឹងថា សត្វទន្សោងមួយក្បាលនេះ ត្រូវបានប្រទះឃើញដេកដួលដោយជើងទាំងសងខាងមានជាប់ខ្សែអន្ទាក់ នៅថ្ងៃទី០៤ ខែតុលាកន្លងទៅ ហើយក្រុមមន្ត្រីជំនាញអង្គការសម្ព័ន្ធមិត្តសត្វព្រៃបានយកចំណីឱ្យស៊ី និងដាក់ថ្នាំព្យាបាលដែរ ប៉ុន្តែមិនអាចជួយសង្គ្រោះបាន ព្រោះស្ថានភាពវាធ្ងន់ធ្ងរពេក ទើបនៅថ្ងៃទី០៧ ខែតុលានេះ វាក៏ស្លាប់តែម្តង។

ហ្វូងសត្វទន្សោងដែលកំពុងរស់នៅក្នុងព្រៃសហគមន៍ប្រាំបីមុំ តែងតែរងការគំរាមកំហែងពីសំណាក់ក្រុមព្រានព្រៃលួចចូលបបាញ់ពេលយប់ៗតាមតំបន់មួយចំនួន នៃក្រុមហ៊ុនដំណាំចំការអំពៅ និងមានអន្ទាក់រាប់ពាន់តាមព្រៃ ធ្វើក្រុមល្បាតព្រៃរបស់សហគមន៍េពិបាកដោះឱ្យអស់។

គួរបញ្ជាក់ថា បច្ចុប្បន្ន សត្វទន្សោងដែលកំពុងរសនៅក្នុងសហគមន៍ប្រាំ ស្ថិតនៅភូមិត្រពាំងក្រើញ ឃុំប្រាំបីមុម ស្រុកថ្ពង ខេត្តកំពង់ស្ពឺ មានប្រមាណពីជាង ៥០ក្បាលប៉ុណ្ណោះ ដែលប្រជាសហគមន៍ប្រឹងប្រែងថែរក្សា ប៉ុន្តែការពារសឹងតែមិនឈ្នះនឹងក្រុមព្រានព្រៃ៕

អត្ថបទ៖ ភួង រដ្ឋា

The post សត្វទន្សោងជិតផុតពូជមួយក្បាល ជាប់អន្ទាក់ព្រាន រងរបួសធ្ងន់ រហូតដល់ស្លាប់ appeared first on Kampuchea Thmey Daily.

លោក នេត ភក្រ្តា រដ្ឋលេខាធិការ និងជាអ្នកនាំពាក្យ ក្រសួងបរិស្ថាន បានឱ្យដឹងថា តាមការសិក្សា ចំនួនសត្វទន្សោងបានថយចុះយ៉ាងច្រើនក្នុងរយៈពេលពីរបីទសវត្សរ៍ចុងក្រោយនេះ ដោយសារការបាត់បង់ទីជម្រក និងការបរបាញ់យកសាច់ និងស្នែង។ សត្វទន្សោង គេឃើញវារស់នៅរាយប៉ាយស្ទើរគ្រប់ទីកន្លែងមានដូចជា តំបន់ភូមិភាគឦសាន និរតី និងភាគខាងជើង នៃប្រទេសកម្ពុជា។ សត្វប្រភេទនេះក៏មានផងដែរនៅប្រទេស ភូមា ឡាវ ម៉ាឡេស៊ី វៀតណាម និងថៃ។ សត្វប្រភេទនេះ ត្រូវបានគេកត់ត្រាក្នុងបញ្ជីក្រហមរបស់អង្គការ IUCN ជាប្រភេទជិតពូជនៅលើពិភពលោក។

សត្វទន្សោងចូលចិត្តរស់នៅតំបន់ព្រៃល្បោះ វាលស្មៅ ព្រៃគម្ពោតជាដើម និងចូលចិត្តរកស៊ីនៅតាមមាត់អូរ និងមិនសូវរស់នៅតំបន់មានទីជម្រាលប៉ុន្មាននោះទេ។ សត្វប្រភេទនេះចូលចិត្តរស់នៅជាហ្វូងៗ ឬនៅជាមួយគោព្រៃ ប្រើស ខ្ទីងជាដើម។ ជាធម្មតា ទន្សោងមេចាស់ជាងគេ តែងតែជាអ្នកដឹកនាំហ្វូង និងចេញរកស៊ីនៅពេលព្រលឹម និងពេលព្រលប់។

គួរបញ្ជាក់ថា​​ សត្វទន្សោងវ័យក្មេងមានសម្បុរក្រហមត្នោតស្រាល វាប្រែប្រួលទៅជាពណ៌ក្រហមត្នោតប្រផេះ ឬក្រហមត្នោតចាស់នៅពេលវាចំណាស់បន្តិច។ ជើងទាំងបួនខាងក្រោមជង្គង់មានពណ៌សដូចខ្ទីង និងគោព្រៃដែរ ប៉ុន្តែវាមានចំនុចមួយដែលប្លែកពីគេគឺ ពណ៌សនៅផ្នែកខាងក្រោយត្រង់កំប៉េះគូទ។ ស្នែងទន្សោងមានរាងមូលជាងស្នែងខ្ទីង មានពណ៌លឿងស្រគាំ នៅផ្នែកពាក់កណ្តាលចុះក្រោម ហើយចុងស្នែងពណ៌ខ្នៅ។

សត្វទន្សោងបន្តពូជ នៅខែឧសភា ដល់ ខែមិថុនា និងអាចបង្កើតកូនបាន ១ ទៅ ២ក្បាល បន្ទាប់ពីពពោះរយៈពេល ១០ខែ ហើយមេអាចដោយឈ្មោលម្ដងទៀត ក្រោយពេលកើតកូនបាន ២ខែ៕

The post ទោះបីទន្សោងនៅកម្ពុជាមានការធ្លាក់ចុះ ប៉ុន្តែមានចំនួនច្រើនជាងគេលើលោក appeared first on Kampuchea Thmey Daily.

នៅពេលប៉ុន្មានថ្ងៃចុងក្រោយនេះ ប្រជាពលរដ្ឋដែលជាកសិកររស់នៅក្នុងស្រុកគាស់ក្រឡ បានប្រទះឃើញហ្វូងសត្វទន្សោងពីរហ្វូង កំពុងដេញគ្នានៅក្នុងភូមិសាស្ត្រ ភូមិអូរទ្រូងអណ្តើក ឃុំឆ្នាល់មាន់ ស្រុកគាស់ក្រឡ ខេត្តបាត់ដំបង។

តាមការអះអាងរបស់កសិករឈ្មោះ សេង ហៃ បានបញ្ជាក់ថា សត្វទន្សោងដែលអ្នកភូមិប្រទះឃើញទាំងអស់នេះ វាតែងតែចល័តទៅមកដើម្បីស្វែងរកចំណី និងទៅផឹកទឹកនៅទីទំនាបក្បែរទីកន្លែងដែលពួកវារស់នៅ គឺនៅលើភ្នំអូរទ្រូងអណ្តើក និងភ្នំស្អាងនុម ដោយនៅពេលព្រឹកស្រាងៗ វាចាប់ផ្តើមចុះពីលើភ្នំ និងពេលល្ងាចវាឡើងភ្នំវិញទៅកាន់ទីជម្រករបស់ពួកវា។

ជុំវិញការប្រទះឃើញក្រុមសត្វដ៏កម្រដែលមករកសុីក្នុងស្រុកវិញនេះ លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង បានប្រាប់អ្នកសារព័ត៌មានក្នុងស្រុកកាលពីថ្ងៃទី២២ ខែឧសភា ឆ្នាំ២០២៣ ថា ប្រជាពលរដ្ឋដែលមានដីចម្ការ ស្ថិតនៅក្នុងភូមិអូរទ្រូងអណ្តើក ឃុំឈ្នាល់មាន់ បានប្រទះឃើញហ្វូងសត្វទន្សោងជាច្រើនក្បាល និងជាលើកដំបូងនៅក្នុងភូមិសាស្រ្ត ដែលការប្រទះឃើញនេះគឺចាប់តាំងពីដើមខែឧសភា មកម្ល៉េះ រហូតមកទល់បច្ចុប្បន្ន ។

លោកប្រធានមន្ទីរកសិកម្មខេត្តបាត់ដំបង បានបន្តថា ហ្វូងសត្វទន្សោងជាប្រភេទសត្វកម្រជិតផុតពូជទៅហើយ ដែលពួកវាហាក់មិនសូវខ្លាចរអាអ្នកស្រុកឡើយ ជាក់ស្តែងនៅថ្ងៃទី២៤ ឧសភា ចុងក្រោយនេះ ពួកគាត់បានឃើញសត្វទន្សោងចំនួន២ហ្វូង ដោយក្នុងមួយហ្វូងៗមានសត្វទន្សោងប្រមាណជា១២ក្បាល ចំណែកមួយហ្វូងទៀតមានចំនួនចន្លោះពី១៥ ទៅ២០ក្បាលឯណោះ។

ជាមួយគ្នានេះដែរ មន្ត្រីជំនាញបានចុះពិនិត្យ និងសិក្សា ព្រមទាំងបានអំពាវនាវកុំអោយកងកម្លាំង ប្រដាប់អាវុធ ពិសេសបងប្អូនប្រជាពលរដ្ឋដែលរស់នៅតំបន់ក្បែរៗនោះជៀសវាងការបរបាញ់ ដាក់អន្ទាក់ និងការបាញ់សម្លាប់ នាំអោយផ្អើលដល់ហ្វូងសត្វទន្សោង ឬសត្វព្រៃផ្សេងៗជាច្រើនទៀតដែលជាធនធានធម្មជាតិដ៏កម្រហើយពួកវាបានផ្តល់នូវសារ:ប្រយោជន៍យ៉ាងសំខាន់សម្រាប់ជាតិទាំងមូល និងរួមចំណែកទាក់ទាញភ្ញៀវទេសចរណ៍ឲ្យចាប់អារម្មណ៍ខ្លាំងថែមទៀតបានគយគន់ និងទស្សនា៕

អត្ថបទ៖ សោ និយមរ័ត្ន

The post សត្វទន្សោងដ៏កម្រកំពុងបង្ហាញខ្លួនលើដីចម្ការតាមទីជនបទក្នុងខេត្តបាត់ដំបង appeared first on Kampuchea Thmey Daily.

លោក នេត្រ ភក្ត្រា បានលើកឡើងថា សត្វទន្សោង គឺជាប្រភេទសត្វកម្រ ដែលទទួលរងនូវការគំរាមកំហែងខ្លាំងពីការបរបាញ់ខុសច្បាប់ យកសាច់ និងស្នែងរបស់ទៅលក់វា ហើយប្រទេសដែលធ្លាប់តែមានវត្តមានសត្វទន្សោងរស់នៅ ក៏ស្ទើរតែផុតពូជអស់ដូចគ្នា។

លោកបានបន្តថា សត្វទន្សោងត្រូវបានរស់នៅរាយប៉ាយនៅក្នុងប្រទេសកម្ពុជាដូចជានៅតំបន់ ភូមិភាគឦសាន ភាគនិរតី និងភាគខាងជើងនៃប្រទេសផងដែរ។ សូម្បីតែប្រទេសឡាវ ប្រទេស​ថៃ មីយ៉ាន់ម៉ា ម៉ាឡេស៊ី និងវៀតណាម ក៏មានសត្វទន្សោងនេះរស់នៅដូចគ្នា។

ជាមួយគ្នានេះ សត្វទន្សោងបានថយចុះយ៉ាងខ្លាំងក្នុងរយៈពេល ៣ទសវត្សរ៍ ដោយសារបាត់បង់ជម្រក និងការបរបាញ់ដោយខុសច្បាប់។ សត្វទន្សោង ក៏ត្រូវបានគេកត់ត្រាក្នុងបញ្ជីក្រហមរបស់អង្គការ IUCN ដែលជាប្រភេទសត្វប្រឈមនឹងការផុតពូជ។

លោក នេត្រ ភក្ត្រា បានបញ្ជាក់ថា សត្វទន្សោង ជាពពួកសត្វដែលចូលចិត្តរស់នៅជាហ្វូងៗ។ ពួកវាក៏ចូលចិត្តរស់នៅតំបន់ព្រៃល្បោះ វាលស្មៅ ព្រៃគម្ពោត និងចូលចិត្តរកស៊ីនៅតាមមាត់អូរ ដោយចេញរកចំណីនៅពេលព្រលឹម និងពេលព្រលប់។

ក៏ប៉ុន្តែ សត្វទន្សោង មិនសូវរស់នៅតំបន់មានទីជម្រាលប៉ុន្មានឡើយ។ សត្វទន្សោង អាចបង្កើតកូនបានតែ ១ ទៅ២ក្បាលប៉ុណ្ណោះ បន្ទាប់ពីពួកវាបានពរពោះរយៈពេល ១០ខែ៕

ដោយ៖ អុន ស្រីមាន

The post លោក នេត្រ ភក្ត្រា៖ កម្ពុជានៅតែជាកន្លែងមានសត្វទន្សោងច្រើនជាងគេនៅលើពិភពលោក appeared first on Kampuchea Thmey Daily.

​សកម្មភាព​ក្រុម​ព្រានព្រៃ​ដាក់​អន្ទាក់ និង​បរបាញ់​សត្វព្រៃ​ដោយ​ខុសច្បាប់​នេះ បាន​គំរាមកំហែង​យ៉ាង​ធ្ងន់ធ្ងរ​ចំពោះ​សត្វព្រៃ​ដ៏​កម្រ​របស់​កម្ពុជា​យើង ដើម្បី​ទប់ស្កាត់ ថែរក្សា​សត្វព្រៃ​បាន​គង់​វង់ លុះត្រាតែ​មានការ​ចូលរួម​ទាំងអស់គ្នា ទាំង​ប្រជាពលរដ្ឋ អាជ្ញាធរ​មូលដ្ឋាន ស្ថាប័នរដ្ឋ​ដែល​ពាក់ព័ន្ធ និង​អង្គការ​ការពារ​សត្វព្រៃ​ផងដែរ ។

​មន្ត្រី​សហគមន៍​ព្រៃឈើ​ប្រាំបី​មុំ បាន​ប្រាប់​ឲ្យ​ដឹងថា កាលពី​ថ្ងៃទី​១៤ ខែ​កុ​ម្ភៈ ឆ្នាំ​២០២២ កន្លងមក​ថ្មីៗ​នេះ ក្រុមមន្ត្រី​សហគមន៍​រួមសហការ​ជាមួយ​អង្គការ​សម្ព័ន្ធមិត្ត​សត្វព្រៃ​កម្ពុជា បាន​ចុះ​ល្បាត​ព្រៃ​ដើម្បី​ពិនិត្យមើល​សត្វ​ទន្សោង​ដែល​កំពុង​រសនៅក្នុង​សហគមន៍​ព្រៃឈើ​ប្រាំបី​មុំ ដោយ​បង្ហោះ​ត្រូន​ប្រទះឃើញ​សត្វ​ទន្សោង​មួយ​ហ្វូង​តូច​មាន​ចំនួន​ប្រមាណ ២០​ក្បាល។ មន្ត្រី​សហគមន៍ បាន​បន្តទៀតថា សត្វ​ទន្សោង​ទាំងនេះ ពួកវា​ចូលចិត្ត​រស់នៅ​ជា​ហ្វូងៗ​បែបនេះ ដែល​ក្នុង​មួយ​ហ្វូង​មាន​ចាប់ពី​ ១៥​ ក្បាល​ទៅជា​ង​ ៣០​ ក្បាល​តាម​ហ្វូង​តូច និង​ហ្វូង​ធំ ។

​មន្ត្រី​សហគមន៍​ព្រៃឈើ​ប្រាំបី​មុំ បាន​ប្រាប់ថា បច្ចុប្បន្ននេះ យើង​សង្កេតឃើញ​មាន​វត្តមាន​សត្វ​ទន្សោង​មាន​ចន្លោះ ១១០ ​ទៅ​ ១៣០ ​ក្បាល​កំពុង​រស់នៅក្នុង​ព្រៃ​សហគមន៍។ សត្វ​ទន្សោង​ទាំងនោះ ងាយ​រងគ្រោះ​បំផុត​ពេលដែល​ពួកវា​ចេញពី​ព្រៃ​សហគមន៍​ទៅរក​ចំណី និង​ទឹក​ផឹក​ក្នុង​ចម្ការ​អំពៅ ព្រោះ​នៅ​ទីនោះ​សម្បូរ​ទៅ​ដោយ​អន្ទាក់​របស់​ព្រានព្រៃ​ទើប​ជា​ញឹកញាប់​សត្វ​ទន្សោង​របស់​យើង​តែង​ទើ​បតែ​ជាប់អន្ទាក់​ខ្លះ​ក៏​ស្លាប់ និង​របួស ។

​មន្ត្រី​សហគម៍​ព្រៃឈើ បាន​បញ្ជាក់ថា សព្វថ្ងៃនេះ ព្រៃ​សហគមន៍​ប្រាំបី​មុំ ដែលជា​ជម្រក​សត្វព្រៃ​គ្រប់​ប្រភេទ​មាន​ទំហំ​ប្រមាណ​ជាង ១២០០​ ហិកតា ហើយ​ក្នុង​មួយ​សប្តាហ៍​មន្ត្រី​របស់​យើង​ចុះ​ល្បាត​ព្រៃ​បី​ទៅ​បួន​ដង​យ៉ាងតិច និង​បាន​ប្រទះឃើញ​អន្ទាក់​របស់​ព្រាន​ហើយ​ដោះយក​ចេញ​ជា​ហូរហែ​ ដើម្បី​ដុតបំផ្លាញ​ចោល ឬ​រក្សា​ទុកជា​ភស្តុតាង​ជាដើម ។

​ក្រុមមន្ត្រី​សហគមន៍ បាន​អំពាវនាវ​ដល់​ប្រជាពលរដ្ឋ​ចូលរួម​ជាមួយ​អាជ្ញាធរ ស្ថាប័ន​ជំនាញ​ពាក់ព័ន្ធ និង​អង្គការ​សម្ព័ន្ធមិត្ត​សត្វព្រៃ ដើម្បី​ការពារ និង​អភិរក្ស​សត្វព្រៃ​ដ៏​កម្រ​ទាំងនោះ​ឲ្យ​បាន​គង់​វង់ ត្រូវ​បញ្ឈប់​ការ​បរបាញ់​សត្វ ឬ​ដាក់​អន្ទាក់​ចាប់យក​សត្វព្រៃ​តទៅទៀត​ ព្រាះ​ពួកគេ​ស្ទើរ​តែ​ផុត​ពូជ​ទៅហើយ ។

​បច្ចុប្បន្ន ក្រុមមន្ត្រី​សហគមន៍​ព្រៃឈើ​ប្រាំ​មុំ មាន​លទ្ធ​ការពារ​សត្វព្រៃ​ក្នុង​សហគមន៍​បាន​ដោយសារ​មាន​ជំនួយ​គាំទ្រ​សប្បុរសជន អាជ្ញាធរ​មូលដ្ឋាន រដ្ឋបាលខេត្ត​កំពង់ស្ពឺ និង​អង្គការ​សម្ព័ន្ធមិត្ត​សត្វព្រៃ​កម្ពុជា​ផងដែរ ៕

អត្ថបទ៖ ​ភួង រដ្ឋា​

The post សត្វទន្សោង ក្នុងសហគមន៍ព្រៃឈើប្រាំបីមុំ នៅតែរងការគំរាមកំហែងពីព្រានព្រៃ appeared first on Kampuchea Thmey Daily.