កៅអីចាស់ដកចេញពីស្តាតអូឡាំពិក ក្លិបនីមួយៗទទួលបានជិត២ពាន់

Pha Rothana — Wed, 10 Apr 2024 04:21:11 +0000

ក្រោយការបំពាក់កៅអីថ្មីមានខ្នងបង្អែករួចរាល់ សហព័ន្ធកីឡាបាល់ទាត់កម្ពុជា និងសហព័ន្ធកីឡាបាល់ទាត់អាស៊ាន បានធ្វើពីធីប្រគល់-ទទួលកៅអីថ្មី កាលពីថ្ងៃទី៩ ខែមេសា ឆ្នាំ២០២៤ ជូនទៅក្រសួងអប់រំ យុវជន និងកីឡាជាអ្នកគ្រប់គ្រង។

តាមការឲ្យដឹងពីគណៈអធិបតីក្នុងពិធីប្រគល់-ទទួលកៅអីថ្មីកាលពីព្រឹកថ្ងៃទី៩ ខែមេសា ឆ្នាំ២០២៤ថា កៅអីចាស់គ្មានខ្នងបង្អែកចំនួន ២១,៦៦១ ត្រូវបានដកចេញ និងរក្សាទុកយ៉ាងល្អ ដើម្បីធានាបាននូវគុណភាព សម្រាប់ការយកទៅប្រើប្រាស់បន្ត ពីព្រោះកៅអីទាំងនេះទើបត្រូវបានដាក់កាលពីដើមឆ្នាំ២០២៣ មុនពេលកីឡាស៊ីហ្គេមលើកទី៣២។ តាមការឯកភាពពីក្រសួងអប់រំ យុវជន និងកីឡា កៅអីទាំងនេះនឹងត្រូវបែងចែកទៅក្លិប-សមាគមបាល់ទាត់ជាសមាជិកក្នុងខេមបូឌានព្រីមៀរលីគចំនួន១០។ មួយក្លិបនឹងទទួលបានចំនួន១៩៦០កៅអី ដើម្បីយកទៅបំពាក់ក្នុងកីឡដ្ឋានរបស់ពួកគេ។

ទិដ្ឋភាពកៅអីចាស់ដែលត្រូវបានដាក់ពេលស៊ីហ្គេម

ការបែងចែកកៅអីដល់ក្លិបទាំងនេះគឺជាការរួមចំណែកអភិវឌ្ឍបាល់ទាត់នៅកម្ពុជា ហើយក៏ជួយសម្រួលបន្ទុកចំណាយមួយផ្នែកដល់ក្រុមទាំងអស់នៅក្នុងលីគកំពូលកម្ពុជា។ ចំពោះសហព័ន្ធបាល់ទាត់កម្ពុជា និងក្រុមហ៊ុនខេមបូឌានព្រីមៀរលីគ បានដាក់ផែនការធំបំផុតគឺ ខេត្ត១ ត្រូវមានក្លិបបាល់ទាត់អាជីព១ និងកីឡដ្ឋានស្តង់ដា១ ដែលជាចំណែកជួយពង្រឹងក្រុមបាល់ទាត់ជម្រើសជាតិកម្ពុជាឈានទៅដល់ជុំចុងក្រោយជើងឯកពិភពលោកឆ្នាំ២០៣៨។

ទិដ្ឋភាពកៅអីចាស់ដែលត្រូវបានដាក់ពេលស៊ីហ្គេម

ប្រសិនបើកម្ពុជាអាចធ្វើបានតាមផែនការនេះគឺនឹងមានក្លិបបាល់ទាត់អាជីព២៥ ឬស្មើ២៥ខេត្ត-ក្រុងដែលអាចលេងក្នុងក្របខណ្ឌលីគកំពូលកម្ពុជា លីគទី២ ពានរង្វាន់សម្តេចតេជោ ហ៊ុន សែន និងពានរង្វាន់ផ្សេងៗទៀត។

សូមបញ្ជាក់ថា បច្ចុប្បន្ននេះ ពហុកីឡដ្ឋានជាតិអូឡាំពិកអាចផ្ទុកអ្នកទស្សនាផ្ទាល់បានប្រមាណ៣ម៉ឺននាក់ប៉ុណ្ណោះ បន្ទាប់ពីត្រូវបានដាក់កៅអីមានខ្នងបង្អែកថ្មីគឺ ផ្នែកខាងជើង ខាងកើត និងខាងត្បូង មានប្រមាណ២៥០០០កៅអី និងកន្លែងមានដំបូល៥០០០កៅអី៕

កៅអីមានខ្នងបង្អែកទើបដាក់ចុងក្រោយបំផុត

អត្ថបទ៖ ផា រតនា

The post កៅអីចាស់ដកចេញពីស្តាតអូឡាំពិក ក្លិបនីមួយៗទទួលបានជិត២ពាន់ appeared first on Kampuchea Thmey Daily.

AFF បានចំណាយជិត៥០ម៉ឺនដុល្លារដាក់កៅអីថ្មី ពហុកីឡដ្ឋានជាតិអូឡាំពិក

Pha Rothana — Tue, 09 Apr 2024 08:45:05 +0000

គម្រោងបំពាក់កៅអីមានខ្នងបង្អែកនៅពហុកីឡដ្ឋានជាតិអូឡាំពិកបានបញ្ចប់រួចរាល់ហើយដែលជាការចំណាយទាំងស្រុងរបស់សហព័ន្ធកីឡាបាល់ទាត់អាស៊ាន (AFF)។

ដើម្បីស្របតាមស្ដង់របស់សហព័ន្ធកីឡាបាល់ទាត់អន្ដរជាតិ (FIFA) និងសហព័ន្ធបាល់ទាត់ទ្វីបអាស៊ី (AFC) សហព័ន្ធកីឡាបាល់ទាត់កម្ពុជា និងគណៈកម្មាធិការប្រតិបត្តិ បានសម្រេចផ្លាស់ប្ដូរកៅអីគ្មានខ្នងបង្អែកចេញដែលបានដាក់មុនពេលកីឡាស៊ីហ្គេម ឆ្នាំ២០២៣ និងត្រូវបានដាក់ជំនួសដោយកៅអីមានខ្នងបង្អែក។

ការបំពាក់កៅអីថ្មីគឺនៅផ្នែកខាងជើង ខាងកើត និង ខាងត្បូង នៃពហុកីឡដ្ឋានជាតិអូឡាំពិក សរុប២៥០០០កៅអី។ គម្រោងនេះជាការចំណាយទាំងស្រុងរបស់សហព័ន្ធកីឡាបាល់ទាត់អាស៊ានដែលសរុបអស់ប្រាក់ ៤៩៨,៧៥០ ដុល្លារ។ ការបំពាក់កៅអីថ្មីនេះបានចាប់ផ្តើមកាលពីដើមខែមករា និងបានបញ្ចប់ដើមខែមេសា។ បន្ទាប់ពីដាក់កៅអីរួចរាល់ ពហុកីឡដ្ឋានជាតិអូឡាំពិកអាចផ្ទុកអ្នកទស្សនាផ្ទាល់បានចំនួន៣ម៉ឺននាក់។

សមិទ្ធផលដ៏ជោគជ័យនេះកើតឡើងពីការខិតខំប្រឹងប្រែងរបស់លោក ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា និងជាប្រធាន សហព័ន្ធកីឡាបាល់ទាត់អាស៊ាន។ ក្នុងពិធីប្រគល់-ទទួលជាផ្លូវការនៅព្រឹកថ្ងៃទី៩ ខែមេសា ឆ្នាំ២០២៤ លោកមានប្រសាសន៍ ៖«ក្នុងនាមជាប្រធានសហព័ន្ធកីឡាបាល់ទាត់អាស៊ាន ខ្ញុំសូមចូលរួមអបអរសាទរ ចំពោះសមិទ្ធផលថ្មី ដែលសហព័ន្ធបាល់ទាត់កម្ពុជាទទួលបាន ដើម្បីបំពេញទៅតាមស្ដង់ដានៃបទបញ្ជាប្រកួតរបស់សហព័ន្ធបាល់ទាត់អន្តរជាតិ និងសហព័ន្ធបាល់ទាត់ទ្វីបអាស៊ី។ ពហុកីឡាដ្ឋាននេះនឹងបម្រីដល់ការប្រកួតជាច្រើនទៀត នាពេលខាងមុខ។ យើងមានការប្រកួតមិត្តភាព ជាពិសេសចុងឆ្នាំនេះមានការប្រកួតពានរង្វាន់ជើងឯកអាស៊ាន»៕

អត្ថបទ៖ ផា រតនា

The post AFF បានចំណាយជិត៥០ម៉ឺនដុល្លារដាក់កៅអីថ្មី ពហុកីឡដ្ឋានជាតិអូឡាំពិក appeared first on Kampuchea Thmey Daily.

សហព័ន្ធបាល់ទាត់អាស៊ាន Archives - Kampuchea Thmey Daily

កៅអីចាស់ដកចេញពីស្តាតអូឡាំពិក ក្លិបនីមួយៗទទួលបានជិត២ពាន់

AFF បានចំណាយជិត៥០ម៉ឺនដុល្លារដាក់កៅអីថ្មី​ ពហុកីឡដ្ឋានជាតិអូឡាំពិក

AFF បានចំណាយជិត៥០ម៉ឺនដុល្លារដាក់កៅអីថ្មី ពហុកីឡដ្ឋានជាតិអូឡាំពិក