ស្ថិតនៅក្នុងវ័យ ៤០ឆ្នាំ អ្នកស្រី សោម ចំណាប់ ជាម្ចាស់សិប្បកម្ម VC សាច់ក្រកឆ្ងាញ់បាត់ដំបង ប្រាប់ កម្ពុជាថ្មី ថា សិប្បកម្មផលិតសាច់ក្រកនេះ បានបើកដំណើរការតាំងពីចុងឆ្នាំ ២០២២មក។ អ្នកស្រី បន្តថា មុខរបរធ្វើសាច់ក្រកនេះ គឺជារបរមួយដែលបានបន្សល់ទុកតាំងពីជំនាន់ដូនតាអ្នកស្រីមកម្ល៉េះ។

ដោយមានឈាមជ័រជាអ្នកផលិតសាច់ក្រកបន្តមកពីជំនាន់ដូនតា ទើបបណ្ដាលឱ្យអ្នកស្រី សោម ចំណាប់ បានចាប់ផ្ដើមស្វែងរកគំនិតកែច្នៃ និងវេចខ្ជប់ ប្រភេទអាហារក្រៀមនេះឡើងមក។ ជាក់ស្ដែង សិប្បកម្មរបស់អ្នកស្រីបច្ចុប្បន្ន មានអាហារកែច្នៃជាច្រើនប្រភេទដូចជា៖​ សាច់ក្រកជ្រូកឆ្អិន សាច់ក្រកត្រីងៀត សាច់ក្រករសជាតិប្រហុកខ្ទិះ និងបុកកន្ទុយហេស ដែលភាគច្រើនជាអាហារទាំងនេះ អាចទុកដាក់បានក្នុងរយៈពេល ៦ខែ។

ស្របពេលប្រជាជនខ្មែរពហិការផលិតផលថៃ សិប្បកម្មរបស់ អ្នកស្រី សោម ចំណាប់ បានកើនឡើងនូវតម្រូវការខ្ពស់ ខុសពីពេលសព្វមួយដង។ ម្ចាស់សិប្បកម្មរូបនេះ បញ្ជាក់ថា «រយៈពេល១ខែ ចុងក្រោយនេះ សិប្បកម្មបានជួយទិញសាច់ជ្រូកពីកសិករ និងកសិដ្ឋានក្នុងស្រុកចំនួន ប្រមាណ២ពាន់គីឡូក្រាម ក្នុងមួយខែ ដើម្បីផលិតចេញជាសាច់ក្រក ដាក់លក់នៅទីផ្សារ»។

មិនត្រឹមតែប្រជាជនខ្មែរក្នុងស្រុក ដែលនាំគ្នាគាំទ្រផលិតផលសាច់ក្រករបស់អ្នកស្រី សោម ចំណាប់។ ផ្ទុយទៅវិញ ក៏មានពលរដ្ឋខ្មែររស់នៅក្រៅប្រទេសដូចជាប្រទេសកូរ៉េ ក៏បានជួយគាំទ្រផលិតផលក្នុងស្រុក ដោយបានបញ្ជាទិញប្រភេទអាហារក្រៀមទាំងអស់នេះ ទៅដាក់លក់នៅលើទីផ្សារប្រទេសកូរ៉េ ផងដែរ។

ជាចុក្ខវិស័យទៅថ្ងៃអនាគត ម្ចាស់សិប្បកម្មរូបនេះ ក៏មានគោលដៅក្នុងការពង្រីកសិប្បកម្មរបស់ខ្លួន ឱ្យក្លាយទៅជាសហគ្រាសខ្នាតមធ្យមក្នុងស្រុកមួយ ដើម្បីងាយស្រួលឆ្លើយតបទៅនឹងតម្រូវការទីផ្សារប្រចាំថថ្ងៃផងដែរ។

សិប្បកម្មផលិតសាច់ក្រករបស់ អ្នកស្រី សោម ចំណាប់ ជាសិប្បកម្មលក្ខណៈគ្រួសារមួយ ដែលមានទីតាំងស្ថិតនៅក្នុងភូមិជ្រៃកោង សង្កាត់ស្លាកែត ក្រុងបាត់ដំបង ខេត្តបាត់ដំបង៕

អត្ថបទ ៖ សួស សិត

The post អ្នកបាត់ដំបង ច្នៃសាច់ជ្រូកធ្វើសាច់ក្រកឆ្អិន កំពុងទទួលបានការគាំទ្រពីសំណាក់ប្រជាជនខ្មែរ appeared first on Kampuchea Thmey Daily.

អគ្គស្នងការអង្គភាពការពារអ្នកប្រើប្រាស់ (CPPD) លោក Anan Nanasombat និងតំណាងរដ្ឋបាលចំណីអាហារ និងឱសថ នៅថ្ងៃព្រហស្បតិ៍ទី៣ខែកុម្ភៈនេះ បានប្រកាសពីការរឹបអូសផលិតផលពីរោងចក្រនេះ។

ស្របពេលជាមួយគ្នានោះ លោក Nethi Wongkularb ប្រធានអនុផ្នែកទី៤នៃ CPPD បាននិយាយថា ការវាយឆ្មក់នេះធ្វើឡើងតាមព័ត៌មានពី FDA ដែលថា កុមារចំនួន៩នាក់នៅ Chiang Mai, Saraburi, Phetchaburi, Trang និង Kanchanaburi ត្រូវបានបញ្ជូនទៅមន្ទីរពេទ្យបន្ទាប់ពីញ៉ាំសាច់ក្រក។

ពួកគេត្រូវបានគេធ្វើរោគវិនិច្ឆ័យឃើញថាមាន Methemoglobinemia (ជំងឺឈាមដែលបណ្តាលមកពីការកើនឡើងនៃទម្រង់អេម៉ូក្លូប៊ីន)។

ប៉ូលិស មន្ត្រី FDA និងមន្ត្រីសុខាភិបាលក្នុងខេត្ត Chon Buri បានរួមគ្នាត្រួតពិនិត្យរោងចក្រ ហើយបាននិយាយជាមួយស្ត្រីម្នាក់ជាម្ចាស់។ នាងសារភាពថា ​បាន​ផលិត​ផលិតផល​សាច់ក្រក​ដោយ​គ្មាន​ការ​អនុញ្ញាត​ត្រឹមត្រូវ​រយៈពេល​ប្រហែល៥ឆ្នាំ​មក​ហើយ។

ស្លាកផលិតផលមួយចំនួននៅទីនោះត្រូវគ្នានឹងអាហារដែលសិស្សញ៉ាំ ហើយធ្លាក់ខ្លួនឈឺ។ ផលិតផលទាំងនោះមិនមានការយល់ព្រមពី FDA ទេ ហើយរោងចក្រក៏​មិន​បាន​ឆ្លង​កាត់​ស្តង់ដារ​ផលិត​កម្ម​ល្អ (GMP)ដែរ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ វីដេអូស្ដែងៗ បុរស ថៃ លលេងជាមួយពស់វែក ១០ គីឡូក្រាម ប៊ិះភ្នាត់ស្នៀត

The post ប៉ូលិសថៃ ឆ្មក់ចូលរោងចក្រសាច់ក្រក ក្រោយកុមារ៩នាក់ធ្លាក់ខ្លួនឈឺ ដេកពេទ្យ  appeared first on Kampuchea Thmey Daily.