ជា​ការ​ពិត​រហូត​មក​ទល់​ពេលនេះ អស់​រយៈពេល​យូរ​ឆ្នាំ​កន្លង​ផុត​ទៅ​ហើយ​ដែល​អ្នកនាង សាន ស្រីឡៃ បាន​បាត់​បង់ជីវិត​ដោយសារ​ប្តី​បាញ់សម្លាប់​គួរ​ឲ្យ​រន្ធត់​បំផុត។ យ៉ាងណាមិញ​គេ​ក៏​សង្កេត​ឃើញ​ថា សម្រាប់​តារា​ស្រី​រូបនេះ​នៅតែ​រក្សា​បាន​កេរ្តិ៍ឈ្មោះ និង​ការ​នឹក​អាល័យ​ពី​ទស្សនិកជន ក្រោយ​ពេល​បាត់បង់​ជីវិត​ដោយ​គ្មាន​ថ្ងៃ​វិលត្រឡប់​វិញ​ទេ។

អ្វី​ដែល​ធ្វើ​ឲ្យ​មហាជន និង​អ្នកគាំទ្រ ចាប់​អារម្មណ៍ ស្រាប់តែ​កាលពី​ល្ងាច​ថ្ងៃ​ទី ១៤ ខែ​ឧសភា ម្សិលមិញ នៅ​លើ​ទំព័រ​ហ្វេស​ប៊ុក​របស់ សាន ស្រីឡៃ បាន​បង្ហោះ​រូបភាព​អម​ជាមួយ​ខ្លឹមសារ​ខ្លី​មក​ថា «ត្រឹម​នឹកនា​បន្តិច​ក៏បាន ប្រាប់​ថា​នឹក​នៅ​ខាងក្រោម​នេះ​មក»។ តាមរយៈ​នេះ​មាន​បញ្ចេញ​សារ​ពី​អ្នក​គាំទ្រ​នៅតែ​នឹក​អាល័យ​ចំពោះ​អ្នកនាង សាន ស្រីឡៃ ស្ទើរ​គ្រប់គ្នា ខណៈ​មាន​ការ​លើកឡើង​ថា«​ឈឺចាប់ ២ ដង​បាន​ហើយ ជា​បទ​នៅ​ក្នុង​បេះដូង ហើយ​ក៏​នឹក​ម្ចាស់​បទ​ខ្លាំងៗ​ដែរ»។

គួរ​រម្លឹក​ថា តារា​ចម្រៀង​ស្រី​ផលិតកម្ម​ហង្ស​មាស និង​ជា​អតីត​បេក្ខភាព​កម្មវិធី «The Voice Cambodia» រដូវ​កាល​ទី ២ សាន ស្រីឡៃ ត្រូវ​បាន​ប្តី​បាញ់សម្លាប់​គួរ​ឲ្យ​រន្ធត់​នៅ​ក្នុង​គ្លីនិក​មួយ​កន្លែង ក្នុង​សង្កាត់​បឹង​កេងកង​ទី ១ ខណ្ឌ​ចំការមន រាជធានី​ភ្នំពេញ កាលពី​ថ្ងៃ​ទី ១៦ ខែ​តុលា ឆ្នាំ ២០១៧ កន្លងទៅ៕

អត្ថបទ ៖ ចាន់រ៉ា

The post ភ្ញាក់ផ្អើលក្រោយឃើញ Facebook សាន ស្រីឡៃ បង្ហោះសារយ៉ាងរំជួលចិត្ត ធ្វើឲ្យអ្នកគាំទ្រនឹកគ្រប់គ្នា appeared first on Kampuchea Thmey Daily.