យ៉ាង​ណា​មិញ​ មន្រ្តី​វៀតណាម​នៅ​តែ​ជឿថា​ វៀតណាម​នៅ​តែ​អាច​សម្រេច​បាន​នូវគោលដៅ​រក​ចំណូល​ ៤ ប៊ីលាន​ដុល្លារ​ ពី​ការ​នាំ​ចេញ​នូវ​ផលិតផល​សិប្បកម្ម​នៅឆ្នាំ​ ២០២៥​។ នេះ​បើតាម​ការ​ចុះ​ផ្សាយ​របស់​កាសែត​ Viet Nam News។

ផលិតផល​សិប្បកម្ម​វៀតណាម​​​មានទីផ្សារ​ចំនួន​ ១៦៣ ប្រទេស​ ​និងដែនដី ដែល​គ្រប់​ដណ្ដប់​ជិត​ ១០ ភាគរយ​ នៃ​តម្រូវ​ការ​​ទីផ្សារ​របស់​ពិភព​លោក​សរុប​។ ចន្លោះពី​ឆ្នាំ​ ២០១៥-២០១៩ ​តម្លៃនៃការនាំចេញរបស់ឧស្សាហកម្ម​នេះ​ បាន​កើន​ឡើងជាមធ្យម ៩,៥ ភាគរយ​ /ឆ្នាំ​ ដោយ​កើនឡើងពី ១,៦២ ប៊ីលាន​ដុល្លារ​នៅឆ្នាំ​ ២០១៥ ដល់​ ២,២៣ ប៊ីលាន​ដុល្លារ​នៅឆ្នាំ​ ២០១៩ ខណៈ​វៀតណាម​ដាក់​គោលដៅ​ ៤ ប៊ីលាន​ដុល្លារ​ នៅឆ្នាំ​ ២០២៥​។ ​

ទោះយ៉ាងណាក៏ដោយ ​អនុប្រធានសមាគមសេរ៉ាមិចវៀតណាម​ Binh Dương លោក Vương Siêu Tín បាន​ថ្លែង​ថា​ ចំនួនកន្លែងផលិតសេរ៉ាមិចនៅខេត្ត​ Binh Dương បានថយចុះពី ៧៩-៨០ ភាគរយ បើធៀបនឹងកម្រិតកំពូល ដោយកម្លាំងពលកម្មនៅតាមរោងចក្រនីមួយៗក៏ថយចុះគួរឱ្យកត់សម្គាល់ផងដែរ។ ឧស្សាហកម្មនេះ កំពុងប្រឈម​មុខនឹងបញ្ហាប្រឈមជាច្រើន រួមទាំងតម្រូវការទីផ្សារទាប កង្វះកម្លាំងពលកម្ម និងកង្វះសម្ភារៈដើម​ផលិត។

លោក Tín បាននិយាយថា​៖ «តម្លៃដឹកជញ្ជូនអន្តរជាតិបានកើនឡើង ថ្លៃដើមផលិតកម្មកើនឡើង ហើយតម្រូវការទីផ្សារមានកម្រិតទាប ដែលបណ្តាលឱ្យការលក់សេរ៉ាមិចនៅតាមកន្លែងជាច្រើនធ្លាក់ចុះ ៥០ ភាគរយ​ បើប្រៀបធៀបទៅនឹងរយៈពេលមុន»។

លោកបានបន្ថែមថា ទោះបីជាតម្រូវការទីផ្សារអាចមានភាពប្រសើរឡើងនាពេលអនាគតក៏ដោយ ឧស្សាហកម្មសេរ៉ាមិចនៅ​ Binh Dương នៅតែ​​ងាយ​រង​គ្រោះ​ក្នុង​​ការ​រក្សាការប្រកួតប្រជែងរបស់ខ្លួន ​គួប​ផ្សំ​នឹង​បញ្ហាប្រឈមជាបន្តបន្ទាប់ដោយគ្មានដំណោះស្រាយរយៈពេលវែងសម្រាប់កម្លាំងពលកម្ម និងវត្ថុធាតុដើម៕

The post វៀតណាមរំពឹងកើប​ចំណូល​​ ២ ប៊ីលាន​ដុល្លារ​ ពី​ការ​នាំ​ចេញ​ផលិតផល​សិប្បកម្ម​ ​នៅឆ្នាំ ២០២៤ appeared first on Kampuchea Thmey Daily.