ព័ត៌មានអន្ដរជាតិ

វៀតណាមរំពឹងកើបចំណូល ២ ប៊ីលានដុល្លារ ពីការនាំចេញផលិតផលសិប្បកម្ម នៅឆ្នាំ ២០២៤

បានផុស

២ years មុន

នៅ

ថ្ងៃចន្ទ ២៨ តុលា ២០២៤

ដោយ

មន្រ្តីក្រសួងកសិកម្ម និងអភិវឌ្ឍន៍ជនបទវៀតណាម បានព្យាករថា ការនាំចេញនូវផលិតផលសិប្បកម្មវៀតណាមប្រហែលនឹងកើបចំណូលបានត្រឹមតែ ២ ប៊ីលានដុល្លារប៉ុណ្ណោះ នៅឆ្នាំ ២០២៤ នេះ ដោយសារតែបញ្ហាប្រឈមនៃទីផ្សារខាងក្រៅ និងបញ្ហាក្នុងប្រទេសនៃឧស្សាហកម្មនេះផ្ទាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ មន្រ្តីវៀតណាមនៅតែជឿថា វៀតណាមនៅតែអាចសម្រេចបាននូវគោលដៅរកចំណូល ៤ ប៊ីលានដុល្លារ ពីការនាំចេញនូវផលិតផលសិប្បកម្មនៅឆ្នាំ ២០២៥។ នេះបើតាមការចុះផ្សាយរបស់កាសែត Viet Nam News។

ផលិតផលសិប្បកម្មវៀតណាមមានទីផ្សារចំនួន ១៦៣ ប្រទេស និងដែនដី ដែលគ្រប់ដណ្ដប់ជិត ១០ ភាគរយ នៃតម្រូវការទីផ្សាររបស់ពិភពលោកសរុប។ ចន្លោះពីឆ្នាំ ២០១៥-២០១៩ តម្លៃនៃការនាំចេញរបស់ឧស្សាហកម្មនេះ បានកើនឡើងជាមធ្យម ៩,៥ ភាគរយ /ឆ្នាំ ដោយកើនឡើងពី ១,៦២ ប៊ីលានដុល្លារនៅឆ្នាំ ២០១៥ ដល់ ២,២៣ ប៊ីលានដុល្លារនៅឆ្នាំ ២០១៩ ខណៈវៀតណាមដាក់គោលដៅ ៤ ប៊ីលានដុល្លារ នៅឆ្នាំ ២០២៥។

ទោះយ៉ាងណាក៏ដោយ អនុប្រធានសមាគមសេរ៉ាមិចវៀតណាម Binh Dương លោក Vương Siêu Tín បានថ្លែងថា ចំនួនកន្លែងផលិតសេរ៉ាមិចនៅខេត្ត Binh Dương បានថយចុះពី ៧៩-៨០ ភាគរយ បើធៀបនឹងកម្រិតកំពូល ដោយកម្លាំងពលកម្មនៅតាមរោងចក្រនីមួយៗក៏ថយចុះគួរឱ្យកត់សម្គាល់ផងដែរ។ ឧស្សាហកម្មនេះ កំពុងប្រឈមមុខនឹងបញ្ហាប្រឈមជាច្រើន រួមទាំងតម្រូវការទីផ្សារទាប កង្វះកម្លាំងពលកម្ម និងកង្វះសម្ភារៈដើមផលិត។

លោក Tín បាននិយាយថា៖ «តម្លៃដឹកជញ្ជូនអន្តរជាតិបានកើនឡើង ថ្លៃដើមផលិតកម្មកើនឡើង ហើយតម្រូវការទីផ្សារមានកម្រិតទាប ដែលបណ្តាលឱ្យការលក់សេរ៉ាមិចនៅតាមកន្លែងជាច្រើនធ្លាក់ចុះ ៥០ ភាគរយ បើប្រៀបធៀបទៅនឹងរយៈពេលមុន»។

លោកបានបន្ថែមថា ទោះបីជាតម្រូវការទីផ្សារអាចមានភាពប្រសើរឡើងនាពេលអនាគតក៏ដោយ ឧស្សាហកម្មសេរ៉ាមិចនៅ Binh Dương នៅតែងាយរងគ្រោះក្នុងការរក្សាការប្រកួតប្រជែងរបស់ខ្លួន គួបផ្សំនឹងបញ្ហាប្រឈមជាបន្តបន្ទាប់ដោយគ្មានដំណោះស្រាយរយៈពេលវែងសម្រាប់កម្លាំងពលកម្ម និងវត្ថុធាតុដើម៕