កីឡាការិនីឆ្នើមប្រចាំលីគនារី ម៉ៃសំ ប្តេជ្ញាខំប្រឹងដើម្បីជាប់ជម្រើសជាតិ

chean virakbot — Tue, 11 Feb 2025 07:00:00 +0000

កីឡាការិនី សឹម ម៉ៃសំ ដែលបានឈ្នះពានកីឡាការិនីឆ្នើម និងពានស្បែកជើងមាស ប្រចាំព្រឹត្តិការណ៍បាល់ទាត់លីគនារីកម្ពុជារដូវកាល២០២៤-២៥ បានប្តេជ្ញាខិតខំប្រឹងប្រែងដើម្បីឱកាសជាប់ជម្រើសជាតិនារីកម្ពុជានាពេលខាងមុខ។

សឹម ម៉ៃសំ បានរៀបរាប់ថា ៖«ខ្ញុំធ្លាប់លេងបាល់ទាត់តាំងពីរៀនបឋមសិក្សា តែក្រោយមកខ្ញុំក៏ឈប់លេងម្តង។ ខ្ញុំទើបចាប់ផ្តើមលេងបាល់ទាត់វិញនៅឆ្នាំ២០២០។ ខ្ញុំចង់បោះបង់ចោលហើយ តែពេលឃើញគេលេង ក៏នៅតែមានអារម្មណ៍ចង់លេងវិញ។ ខ្ញុំបានលេងក្រុមខេត្តកំពង់ឆ្នាំងក្នុងឆ្នាំ២០២១ តែក្រោយមកបានចូលរួមជាមួយក្រុមនារីសៀមរាប។ ឆ្នាំ២០២៤ ខ្ញុំបានចូលក្រុមនារីវិសាខា។ កាលពីឆ្នាំ២០២១ ខ្ញុំលេងឲ្យក្រុមនារីសៀមរាបទទួលបានលេខ៣ក្នុងលីគនារីកម្ពុជា»។

សម្រាប់ការចូលរួមជាមួយក្រុមនារីវិសាខាកាលពីឆ្នាំ២០២៤ កីឡាការិនី សឹម ម៉ៃសំ បានជួយឲ្យក្រុមទទួលបានចំណាត់ថ្នាក់លេខ២ក្នុងលីគ ប៉ុន្តែកញ្ញាបានឈ្នះពានឯកត្តជន២ម្នាក់ឯង។ កញ្ញាបាននិយាយថា ៖«ពេលខ្ញុំចូលរួមជាមួយ ក្រុមនារីវិសាខា ផ្តោតទាំងឈ្នះជើងឯក និងពានឯកត្តជន តែចុងក្រោយយើងបានត្រឹមលេខ២ ហើយខ្ញុំបានឈ្នះពានឯកត្តជន២»។

ម្ចាស់ស្បែកជើងមាសក្នុងនាមជាកីឡាការិនីរកបានគ្រាប់បាល់ច្រើនជាងគេបានបន្តថា ៖«ឆ្នាំនេះយើងបានប៉ុណ្ណឹង ពេញចិត្តហើយ តែសង្ឃឹមថា ឆ្នាំក្រោយយើងនឹងធ្វើឲ្យបានល្អជាងនេះទៀត ពីព្រោះយើងទើបតែចាប់ផ្តើម។ ក្រុមយើងនៅមានអារម្មណ៍ភ័យ និងលេងអត់សូវយល់ចិត្តគ្នា។ ពេលយើងប៉ះក្រុមល្មមៗ ក្រុមយើងអត់ភ័យទេ តែពេលប៉ះក្រុមគេខ្លាំង យើងមានអារម្មណ៍ភ័យ»។

សមិទ្ធផលខាងលើនេះបានក្លាយជាសញ្ញាដែលអាចបើកផ្លូវឲ្យ សឹម ម៉ៃសំ ជាប់ក្នុងក្រុមបាល់ទាត់នារីជម្រើសជាតិកម្ពុជា ប៉ុន្តែកញ្ញាមិនសង្ឃឹមច្រើនទេ ពីព្រោះធ្លាប់ធ្វើតេស្តមិនបានជោគជ័យកន្លងមក។

កញ្ញា ម៉ៃសំ បានប្រាប់ថា ៖«ការខិតខំប្រឹងប្រែងតាំងពីដើមមក ទទួលបានសមិទ្ធផលផ្ទាល់ខ្លួននេះ ខ្ញុំសប្បាយចិត្ត។ ខ្ញុំអត់ធ្លាប់ជាប់ជម្រើសជាតិ តែធ្លាប់បានធ្វើតេស្តដែរ។ ខ្ញុំអាចលេងនៅក្លិបល្អ តែខ្ញុំអាចមិនល្អនៅជម្រើសជាតិ។ ខ្ញុំសង្ឃឹមជាប់ជម្រើសជាតិតែ៥០%ទេ តែខ្ញុំនឹងខិតខំប្រឹងប្រែងឲ្យល្អជាងនេះដើម្បីទទួលបានឱកាសជាប់ជម្រើសជាតិ»។

កីឡាការិនីដែលមកពីខេត្តបន្ទាយជ័យបានចេះលេងបាល់ទាត់តាំងពីរៀនសាលាបឋមសិក្សា ប៉ុន្តែក៏ឈប់មួយរយៈពេលវិញ។ នៅឆ្នាំ២០២០ កញ្ញាបានចូលរួមលេងឲ្យក្រុមសាលាវិញ មុនពេលទទួលបានឱកាសកាន់តែច្រើនរហូតបានចូលក្លិបបាល់ទាត់អាជីព៕

អត្ថបទ៖ វីរបុត្រ

The post កីឡាការិនីឆ្នើមប្រចាំលីគនារី ម៉ៃសំ ប្តេជ្ញាខំប្រឹងដើម្បីជាប់ជម្រើសជាតិ appeared first on Kampuchea Thmey Daily.

សឹម ម៉ៃសំ Archives - Kampuchea Thmey Daily

កីឡាការិនី​ឆ្នើម​ប្រចាំ​លីគ​នារី ម៉ៃសំ ប្តេជ្ញា​ខំ​ប្រឹង​​ដើម្បីជាប់​ជម្រើស​ជាតិ

កីឡាការិនីឆ្នើមប្រចាំលីគនារី ម៉ៃសំ ប្តេជ្ញាខំប្រឹងដើម្បីជាប់ជម្រើសជាតិ