សូត្រ ប៊ុនធី Archives - Kampuchea Thmey Daily

សូត្រ ប៊ុនធី មិនច្រណែនអ្វីនោះទេពេលឃើញក្លឹបប្រដាល់ថ្មីៗមានម្ចាស់ឧបត្ថម្ភរាប់រយលានរៀលនោះ

Sina Noun — Thu, 04 Jun 2026 04:11:56 +0000

កីឡាករ សូត្រ ប៊ុនធី និងជាអ្នកកាន់ក្លឹបប្រដាល់បក្សីស្លាបដែក ថាមិនច្រណែនអ្វីនោះទេចំពោះក្លឹបថ្មីៗដែលទទួលបានការឧបត្ថម្ភ (Sponsor) រាប់រយលានរៀលដើម្បីអភិវឌ្ឍន៍ ឬដើម្បីបណ្ដុះធនធាន ព្រោះធ្វើម៉េចក្លឹបទាំងនោះល្បីៗមានសិស្សប្រកួតច្រើន។

ទិដ្ឋភាពក្លឹប

ជុំវិញសំនួរថាយល់យ៉ាងណាដែរនៅពេលឃើញក្លឹបថ្មីៗទើបបង្កើតតែមានការឧបត្ថម្ភថវិកាច្រើន(Sponsor) ស្របពេលក្លឹបបក្សីស្លាបដែកជាក្លឹបចាស់បែរជាមិនមានការជួយជ្រោមជ្រែងបែបនេះ? សូត្រ ប៊ុនធី ឆ្លើយតបថា មិនមានច្រណែនអ្វីនោះទេ ព្រោះក្លឹបទាំងនោះពិតជាល្បីឈ្មោះ និងមានសិស្សច្រើននៅក្នុងវិស័យប្រដាល់នេះមែន។ បើអ្នកម្ចាស់ឧបត្ថម្ភបច្ចុប្បន្ននេះគឺផ្ដោតតែលើក្លឹបល្បីៗបែបនោះរូបគេឃើញហើយក៏មិនមានអ្វីលើកឡើងច្រើនពាក់ព័ន្ធរឿងនេះដែរ។

សមិទ្ធផលក្លឹប

សិស្សច្បងនៃត្រកូល សូត្រ រូបនេះបន្ថែមទៀតថា ក្លឹបបក្សីស្លាបដែករបស់ខ្លួនគឺមានកីឡាករតែ ៤នាក់បងប្អូននេះទេ ដូច្នេះបន្តតាមដំណើរ ឬតាមលទ្ធភាពរបស់ខ្លួនដដែល។ តទៅមុខទៀតបើមានខាងណាឧបត្ថម្ភដើម្បីជួលជុលក្លឹប ឬជួយជាសម្ភារក៏ទទួលយក និងបន្តអភិវឌ្ឍន៍ជាងនេះ។ ប៉ុន្តែបើមិនមានទេក៏ធ្វើតាមធម្មតា ព្រោះពីមុនមកលំបាកយូរណាស់ហើយលំបាកតទៅទៀតមិនថ្វីដែរ។

ទីតាំងក្លឹបបក្សីស្លាបដែកដែលជួលនៅក្បែរ CTN

បញ្ជាក់ដែរថា ក្លឹបប្រដាល់បក្សីស្លាបដែកជាក្លឹបប្រដាល់មានអាយុកាល ២០-៣០ឆ្នាំមកហើយ និងបង្កើតឡើងដោយលោក សួន ប៊ុនសូត្រ ដែលជាគ្រូផង និងជាមន្ត្រីចៅក្រម អាជ្ញាកណ្ដាលផង។ បន្ទាប់ពីលោក សួន ប៊ុនសូត្រ ទទួលមរណៈភាពទៅគឺកីឡាករ សូត្រ ប៊ុនធី ជាអ្នកមើលការខុសត្រូវបន្ត។ វិស័យប្រដាល់មានភាពរីកចម្រើនមកដល់ពេលនេះក៏មានការរួមចំណែកធំពីក្លឹបប្រដាល់បក្សីស្លាបដែកដែលមានត្រកូល សូត្រ នេះផងដែរ។ រយៈពេលប៉ុន្មានឆ្នាំចុងក្រោយនេះក្លឹបប្រដាល់ថ្មីៗជាច្រើនបានទទួលការឧបត្ថម្ភរាប់រយលានរៀលលើការបណ្ដុះធនធានកីឡាករ និងអភិវឌ្ឍន៍ក្លឹប៕

បងប្អូនត្រកូល សូត្រ

អត្ថបទដោយ៖ នួន ស៊ីណា

The post សូត្រ ប៊ុនធី មិនច្រណែនអ្វីនោះទេពេលឃើញក្លឹបប្រដាល់ថ្មីៗមានម្ចាស់ឧបត្ថម្ភរាប់រយលានរៀលនោះ appeared first on Kampuchea Thmey Daily.

សូត្រ ប៊ុនធី បន្តធ្វើតាមបណ្ដាំឪពុកកាន់ក្លឹបប្រដាល់បក្សីស្លាបដែក និងរក្សាត្រកូល «សូត្រ» ក្នុងគុនខ្មែរ

Sina Noun — Tue, 02 Jun 2026 02:02:56 +0000

កីឡាករ សូត្រ ប៊ុនធី ថាមុនលោកឪពុកទទួលមរណៈភាពទៅគឺផ្ដាំឲ្យរូបគេមើលការខុសត្រូវ និងកាន់ក្លឹបបក្សីស្លាបដែកនេះបន្តពីលោក និងថែរក្សាវង្សត្រកូល «សូត្រ» ដែលបានសាងកេរ្តិ៍ឈ្មោះក្នុងវិស័យប្រដាល់ ២០-៣០ឆ្នាំឲ្យនៅមានក្នុងវិស័យប្រដាល់គុនខ្មែរ។

ក្លឹបប្រដាល់បច្ចុប្បន្ននៅ CTN

អ្នកប្រដាល់ចាស់វស្សា សូត្រ ប៊ុនធី បានឲ្យដឹងថា បន្ទាប់ពីលោកឪពុក សួន ប៊ុនសូត្រ ទទួលមរណៈភាពអំឡុងឆ្នាំ២០២២ មកដល់ពេលនេះគឺរូបគេជាអ្នកមើលការខុសត្រូវការងារក្លឹបប្រដាល់បក្សីស្លាបដែកបន្តរហូតមកដល់ពេលបច្ចុប្បន្ននេះ។

កីឡាករល្អកែងរូបនេះបន្ថែមទៀតថា បើទោះជាខ្លួនមិនសូវមានលទ្ធភាពយ៉ាងណាក្ដី ប៉ុន្តែរូបគេនៅតែព្យាយាមកាន់ក្លឹបប្រដាល់បក្សីស្លាបដែកនេះឲ្យនៅមានឈ្មោះ និងបន្តក្នុងវិស័យប្រដាល់គុនខ្មែរឲ្យបាន។ ដោយសារតែនេះជាបណ្ដាំឪពុកឲ្យមើលការខុសត្រូវក្លឹបបន្តផង និងមិនចង់ឲ្យកេរ្តិ៍តំណែលឪពុកដែលខ្ញុំសាងក្នុងវិស័យប្រដាល់គុនខ្មែរ ២០-៣០ឆ្នាំនេះត្រូវបាត់បង់ទៅវិញនោះឡើយ។

សូត្រ ប៊ុនធី និងប្អូនៗ

អ្នកលេងគុនខ្មែរមិនសូវបានវោហាខាងលើនេះបន្ថែមទៀតថា ក្លឹបឥលូវនេះគឺដំណើរការទៅមុខតាមលទ្ធភាពរបស់ខ្លួនគឺជួលដីម្ដុំស្ថានីយទូរទស្សន៍ CTN ធ្វើជាទីតាំងបន្តហ្វឹកហាត់ក្នុងមួយខែជាង ២០០ដុល្លារ និងមានសម្ភារហ្វឹកហាត់មួយចំនួនតូច។ ចំពោះកីឡាករគឺមានតែ ៥-៦នាក់បងប្អូន និងសិស្សប៉ុណ្ណោះ ព្រោះមិនមានលទ្ធភាពអាចពង្រីក ឬទទួលសិស្សថ្មីឲ្យមានច្រើនដូចបណ្ដាក្លឹបផ្សេងៗឡើយ។ ការបើកទទួលសិស្សច្រើនការចំណាយក៏ត្រូវការច្រើនដូចគ្នាលើការហូបចុកស្នាក់នៅ ដូច្នេះរូបគេពុំមានថវិកានោះទេមានតែបន្តធ្វើតាមដំណើរតែប៉ុណ្ណោះមានគ្នាប៉ុន្មាននាក់ប្រកួតប៉ុណ្ណឹង។

សូត្រ ប៊ុនធី និងប្អូនៗ

បញ្ជាក់ដែរថា សូត្រ ប៊ុនធី ជាកីឡាករជើងចាស់ប្រចាំក្លឹបប្រដាល់បក្សីស្លាបដែកដែលសាធារណៈជនក្នុងវិស័យប្រដាល់ស្គាល់ថាត្រកូល «សូត្រ»។ បន្ទាប់ពីលោក សួន ប៊ុនសូត្រ ដែលជាឪពុកទទួលមរណៈភាពទៅអំឡុងចុងឆ្នាំ២០២២ នេះទៅគឺរូបគេ សូត្រ ប៊ុនធី ជាអ្នកមើលការខុសត្រូវក្លឹបបន្ត និងជួយបង្ហាត់ប្អូនៗត្រៀមឡើងប្រកួត និងបង់ថ្លែជួលដី ថ្លៃទឹកភ្លើងផងដែរ៕

កីឡាករ សូត្រ ប៊ុនធី

អត្ថបទដោយ៖ នួន ស៊ីណា

The post សូត្រ ប៊ុនធី បន្តធ្វើតាមបណ្ដាំឪពុកកាន់ក្លឹបប្រដាល់បក្សីស្លាបដែក និងរក្សាត្រកូល «សូត្រ» ក្នុងគុនខ្មែរ appeared first on Kampuchea Thmey Daily.