លោក ស៊ីម គង់ អភិបាលស្រុកស្រីសន្ធរ ខេត្តកំពង់ចាម បានមានប្រសាសន៍ប្រាប់ កម្ពុជាថ្មី នៅថ្ងៃទី៣១ ខែមករា ឆ្នាំ២០២៤ នេះ ថា ប្រជាកសិករ រស់នៅក្នុងស្រុកស្រីសន្ធរ ដែលមានចំនួន ៧ ឃុំ-សង្កាត់ បានសម្ដែងការរីករាយសប្បាយចិត្តនៅពេលដែលរាជរដ្ឋាភិបាល បានដាក់ចេញនូវគោលនយោបាយបង្កើតប្រព័ន្ធធារាសាស្រ្ដ សម្រាប់ជួយសម្រួលដល់ការធ្វើស្រែចំការ របស់បងប្អូនប្រជាកសិករ បានគ្រប់រដូវ មិនថា រដូវវស្សា និង រដូវប្រាំង នោះឡើយ។ លោក អភិបាលស្រុក បន្ថែមទៀតថា ប្រជាសិករដែលប្រើប្រាស់ប្រព័ន្ធទឹករបស់រដ្ឋ ចំនួន៧ ឃុំ រួមមាន៖ ឃុំព្រែកពោធិ៍ ឃុំប្រាំយ៉ាម ឃុំខ្នារស ឃុំទងត្រឡាច ឃុំផ្ទះកណ្ដាល ឃុំស្វាយពោធិ៍ និង ឃុំជីបាល ដោយឡែក ២ ឃុំ-សង្កាត់ គឺ ឃុំជ័យធំ និងឃុំរកាជន្លឹង ដែលស្ថិតនៅស្រុកខ្សាច់កណ្ដាល ក៏បានប្រើប្រាស់ប្រព័ន្ធធារាសាស្រ្ដនេះ ផងដែរ។

លោក ស៊ីម គង់ មានប្រសាសន៍បន្តថា សម្រាប់ប្រព័ន្ធធារាសាស្រ្ដដែលមានលក្ខណៈទំនើបនេះ​ គឺកើតចេញពីគោលនយោបាយរបស់សម្ដេចតេជោ ហ៊ុន សែន អតីតនាយរដ្ឋមន្រ្ដីនៃកម្ពុជា និង​សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកកម្ពុជា តាមរយៈគម្រោងរបស់ក្រសួងធនធានទឹក និងឧតុនិយម ដែលបានជួយអភិវឌ្ឍប្រព័ន្ធធារាសាស្រ្ដ គ្រប់ដណ្ដប់ផ្ទៃដីជាង ៨ 000  ហិកតា នៃផ្ទៃដីសរុប ក្នុងភូមិសាស្រ្ដស្រុកស្រីសន្ធរ ដែលចំណាយថវិកាប្រមាណ ៣២ លានដុល្លារសហរដ្ឋអាមេរិក។

យ៉ាងណាមិញ លោក ស៊ីម គង់ ក៏បានផ្ដាំផ្ញើប្រជាកសិករទាំងអស់ សូមជួយថែរក្សាប្រព័ន្ធធារាសាស្ដ្រមួយនេះឱ្យបានគង់វង្សបន្ដទៅសម្រាប់ជាប្រយោជន៍រួមដល់ប្រជាសិករទាំងអស់ក្នុងស្រុកស្រីសន្ធរ បានធ្វើស្រែចំការប្រកបដោយក្ដីរំពឹងខ្ពស់ និងទទួលបានទិន្នផលល្អសម្រាប់ឆ្នាំបន្ដបន្ទាប់ទៀត៕

អត្ថបទ ៖ សួស សិត

The post ប្រជាកសិករស្រុកស្រីសន្ធរ ធ្វើស្រែមួយឆ្នាំ ៣ ដង ដោយសារមានទឹកស្រោចស្រពគ្រប់គ្រាន់ appeared first on Kampuchea Thmey Daily.