ទីភ្នាក់ងារសារព័ត៌មាន​រ៉យទ័រ​ បាន​ចុះ​ផ្សាយ​សម្ដី​របស់​លោក Virit ដែល​បាន​និយាយ​ប​ន្ថែម​ថា ផលិត​កម្ម​ដដែល​នឹង​កើន​ឡើង​វិញ​នៅ​ឆ្នាំ​ក្រោយ​ ដោយ​​ថៃ​​រំពឹង​ថា​នឹង​ផលិត​ស្ករ​ស​បាន​ចំនួន ១០,៣៩ លាន​តោន​ ​ដែល​ស្មើ​នឹង​កំណើន​ប្រមាណ​​​​ ១៨ ភាគរយ។

​ថៃ​ដែល​ជា​ប្រទេស​នាំ​ចេញ​ស្ករ​ស​ដ៏​កំពូល​​មួយ​របស់​ពិភព​លោក​ ត្រូវ​ផ្គត់​ផ្គង់​ស្ករស​ប្រមាណ​ ២,៥ លាន​តោន​ សម្រាប់​ការ​ប្រើ​ប្រាស់​ក្នុង​ស្រុក​ ខណៈ​នៅ​សល់​ប៉ុន្មាន​ត្រូវ​នាំ​ចេញ​។ ប្រទេស​នេះ​ឈរ​លើ​ចំណាត់​ថ្នាក់​លេខ​៣​ លើ​ការ​នាំ​ចេញ​ស្ករស​បន្ទាប់​ពី​ប្រេស៊ីល ដែល​ឈរ​លើ​កំពូល​តារាង​ និង​ឥណ្ឌា​។

គួ​រ​បញ្ជាក់​ថា​ កាល​ពី​ឆ្នាំ​មុន​ អង្គការស្ករសអន្តរជាតិ (ISO) បានប៉ាន់ស្មានថា​ ផលិតកម្មស្ករសសកលទំនងជានឹងធ្លាក់ចុះ ១,២១ ភាគរយ សម្រាប់​រដូវកាល​ប្រមូល​ផល​ ២០២៣-២០២៤ ដែល​ចាប់​ផ្ដើម​ពី​ខែ​តុលា ឆ្នាំ​មុន​ ​ខណៈ​ទីផ្សារសកល​រំពឹង​ថានឹងប្រឈមមុខនឹងឱនភាពនៃ​ការ​ផ្គត់​ផ្គង់​ប្រមាណ​ ២,១១៨ លាន​តោន ដោយសារ​ការ​ប្រើ​ប្រាស់​កើន​ឡើង​​។ ​

គេ​មើល​ឃើញ​ថា​ ការ​ធ្លាក់​ចុះ​នៃ​ផលិតកម្ម​ស្ករស​នៅ​ឆ្នាំ​ ២០២៣/២៤ បាន​ផ្សារ​​ភ្ជាប់​ទៅ​នឹង​កត្តា​ច្រើន​យ៉ាង​ មិន​ថា​នៅ​ក្នុង​ប្រទេស​ថៃ​ ឬ​ទូទាំង​ពិភព​លោក​នោះ​ទេ​។ យោង​តាម​របាយការណ៍​ទស្សនវិស័យ​ឧស្សាហកម្ម​ស្ករស​សម្រាប់​ឆ្នាំ​ ២០២៤-២០២៦ ដែល​ចេញ​ផ្សាយ​ដោយ​ស្ថាប័ន​ស្រាវជ្រាវ​ Krungsri Research នៃ​ធនាគារ​ពាណិជ្ជកម្ម​ថៃ​ Ayudhya ​ការ​ធ្លាក់​ចុះ​នេះ​ត្រូវ​បាន​​រួម​ចំណែក​មួយ​ភាគធំ​ដោយ​គ្រោះ​រាំង​ស្ងួត ​ដែល​បណ្ដាល​មក​ពី​បាតុភូតិ​អាកាសធាតុ​ អែលនីណូ។ យ៉ាង​ណា​មិញ​ ផលិតកម្ម​នឹង​ស្ទុះ​ងើប​ឡើង​វិញ​ នៅ​ឆ្នាំ​ផលិតកម្ម​បន្ទាប់​ នៅ​ពេល​ដែល​បាតុភូត​អាកាសធាតុ​ ឡា នីណា​ ចូល​មក​ដល់​ ដោយ​នាំ​មក​នូវ​ទឹក​ភ្លៀង​ដ៏​សម​ប្រកប​សម្រាប់​ប្រទេស​ដាំដុះ​អំពៅ​ជាច្រើន៕

The post ផលិតកម្មស្ករសថៃ​ ធ្លាក់​ចុះជាង​​ ២០ ភាគរយ ​ក្នុងឆ្នាំ​ប្រមូលផល​ ២០២៣ និង ២០២៤ appeared first on Kampuchea Thmey Daily.