ព័ត៌មានអន្ដរជាតិ

ផលិតកម្មស្ករសថៃ ធ្លាក់ចុះជាង ២០ ភាគរយ ក្នុងឆ្នាំប្រមូលផល ២០២៣ និង ២០២៤

បានផុស

៧ ខែ មុន

នៅ

ថ្ងៃអង្គារ ២៤ កញ្ញា ២០២៤

ដោយ

ផលិតកម្មស្ករសរបស់ប្រទេសថៃ បានធ្លាក់ចុះ ២០,៣៧ ភាគរយ ក្នុងឆ្នាំប្រមូលផល ២០២៣/២៤ មកនៅត្រឹម ៨,៨ លានតោន។ នេះបើតាមការឱ្យដឹងកាលពីថ្ងៃចន្ទរបស់លោក Virit Viseshsinth ដែលជាប្រធានការិយាល័យក្រុមប្រឹក្សាស្ករ និងអំពៅថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានរ៉យទ័រ បានចុះផ្សាយសម្ដីរបស់លោក Virit ដែលបាននិយាយបន្ថែមថា ផលិតកម្មដដែលនឹងកើនឡើងវិញនៅឆ្នាំក្រោយ ដោយថៃរំពឹងថានឹងផលិតស្ករសបានចំនួន ១០,៣៩ លានតោន ដែលស្មើនឹងកំណើនប្រមាណ ១៨ ភាគរយ។

ថៃដែលជាប្រទេសនាំចេញស្ករសដ៏កំពូលមួយរបស់ពិភពលោក ត្រូវផ្គត់ផ្គង់ស្ករសប្រមាណ ២,៥ លានតោន សម្រាប់ការប្រើប្រាស់ក្នុងស្រុក ខណៈនៅសល់ប៉ុន្មានត្រូវនាំចេញ។ ប្រទេសនេះឈរលើចំណាត់ថ្នាក់លេខ៣ លើការនាំចេញស្ករសបន្ទាប់ពីប្រេស៊ីល ដែលឈរលើកំពូលតារាង និងឥណ្ឌា។

គួរបញ្ជាក់ថា កាលពីឆ្នាំមុន អង្គការស្ករសអន្តរជាតិ (ISO) បានប៉ាន់ស្មានថា ផលិតកម្មស្ករសសកលទំនងជានឹងធ្លាក់ចុះ ១,២១ ភាគរយ សម្រាប់រដូវកាលប្រមូលផល ២០២៣-២០២៤ ដែលចាប់ផ្ដើមពីខែតុលា ឆ្នាំមុន ខណៈទីផ្សារសកលរំពឹងថានឹងប្រឈមមុខនឹងឱនភាពនៃការផ្គត់ផ្គង់ប្រមាណ ២,១១៨ លានតោន ដោយសារការប្រើប្រាស់កើនឡើង។

គេមើលឃើញថា ការធ្លាក់ចុះនៃផលិតកម្មស្ករសនៅឆ្នាំ ២០២៣/២៤ បានផ្សារភ្ជាប់ទៅនឹងកត្តាច្រើនយ៉ាង មិនថានៅក្នុងប្រទេសថៃ ឬទូទាំងពិភពលោកនោះទេ។ យោងតាមរបាយការណ៍ទស្សនវិស័យឧស្សាហកម្មស្ករសសម្រាប់ឆ្នាំ ២០២៤-២០២៦ ដែលចេញផ្សាយដោយស្ថាប័នស្រាវជ្រាវ Krungsri Research នៃធនាគារពាណិជ្ជកម្មថៃ Ayudhya ការធ្លាក់ចុះនេះត្រូវបានរួមចំណែកមួយភាគធំដោយគ្រោះរាំងស្ងួត ដែលបណ្ដាលមកពីបាតុភូតិអាកាសធាតុ អែលនីណូ។ យ៉ាងណាមិញ ផលិតកម្មនឹងស្ទុះងើបឡើងវិញ នៅឆ្នាំផលិតកម្មបន្ទាប់ នៅពេលដែលបាតុភូតអាកាសធាតុ ឡា នីណា ចូលមកដល់ ដោយនាំមកនូវទឹកភ្លៀងដ៏សមប្រកបសម្រាប់ប្រទេសដាំដុះអំពៅជាច្រើន៕