ស្វាយខ្ទិះខ្មែរគឺជាប្រភេទស្វាយម្យ៉ាងនៅក្នុងចំណោមស្វាយជាច្រើនរបស់ខ្មែរ ដែលមានទំហំផ្លែតូចៗហើយមានរសជាតិផ្អែមឆ្ងាញ់ពិសា ខុសពីស្វាយខ្ទិះធំៗដែលនាំចូលពីក្រៅប្រទេស ហើយប្រភេទស្វាយនេះបើយើងដើររកនៅតាមភូមិឃុំនានា ក្នុងខេត្តបាត់ដំបង គឺពិតជាពិបាករកដើមវាណាស់ដោយសារតែវាមិនសូវមានអ្នកដាំបន្តទៀតនោះឡើយ។

លោក រុន សាវ៉េត ជាប្រជាកសិកររស់នៅឃុំអូរដំបង២ ស្រុកសង្កែ ខេត្តបាត់ដំបង បានរៀបរាប់ថា ពូជស្វាយខ្ទិះរបស់ខ្មែរយើងនេះពិបាកស្វែងរកណាស់ ដោយសព្វថ្ងៃលោកនៅសល់ប៉ុន្មានដើមនៅក្នុងចម្ការ ឱ្យតែដល់រដូវផ្លែគឺលោកតែងតែបេះយកមកលក់ អមជាមួយផ្លែស្វាយដទៃទៀត នៅតាមផ្សារក្នុងក្រុងបាត់ដំបង ដើម្បីបានកម្រៃខ្លះ។

លោកបានបន្ថែមថា ឆ្នាំនេះស្វាយខ្ទិះលក់បានតម្លៃត្រឹមតែ ៤.៥០០ រៀលប៉ុណ្ណោះក្នុងមួយគីឡូក្រាម ហើយក៏សម្បូរអតិថិជនដែលនិយមចូលចិត្តពិសារច្រើនណាស់ដែរ ដោយសារតែម្យ៉ាងស្វាយខ្ទិះនេះជាពូជរបស់ខ្មែរតាំងពីដើមមកម្ល៉េះ ហើយម្យ៉ាងទៀតរសជាតិក៏ឆ្ងាញ់ពិសារផងដែរ រួមជាមួយនឹងផ្លែស្វាយនេះកម្រមានថែមទៀត ទើបសម្បូរអ្នកទិញយកទៅទទួលទាន ពិសេសការតាំងផ្លែឈើថ្វាយទេវតាឆ្នាំថ្មីក៏មានអ្នកទិញយកទៅរៀបចំតាមរានទេវតាផងដែរ៕

អត្ថបទ៖ សោ និយមរ័ត្ន

The post ស្វាយខ្ទិះខ្មែរ ស្ទើរដាច់ពូជហើយនាពេលបច្ចុប្បន្ន appeared first on Kampuchea Thmey Daily.

បច្ចុប្បន្នគេសង្កេតឃើញថា ដើមស្វាយខ្ទិះនៅតាមភូមិស្ទើរតែផុតពូជទៅហើយ ព្រោះកម្រឃើញគេដាំបន្តទៀតណាស់ ប៉ុន្តែនៅរដូវនេះ ខណៈពេលដែលស្វាយខ្ទិះកំពុងហុចផលដំបូងក៏ស្រាប់តែបានតម្លៃខ្ពស់នៅលើទីផ្សារ ព្រោះវាជាស្វាយមួយប្រភេទដែលកម្រ និងស្ទើរបាត់បង់ទៅហើយ។

អ្នកស្រី ផល្លា ជាប្រជាពលរដ្ឋរស់នៅសង្កាត់អូរម៉ាល់ ក្រុងបាត់ដំបង បានរៀបរាប់ថា សព្វថ្ងៃអ្នកស្រីប្រកបមុខរបរលក់ផ្លែឈើបន្តិចបន្តួចនៅផ្សារ ដោយនៅក្នុងភូមិរបស់អ្នកស្រី មានដើមស្វាយខ្ទិះនៅសេសសល់ហើយក៏កំពុងចេញផ្លែដែរនោះអ្នកស្រីក៏បានទិញបន្តពីម្ចាស់ស្វាយយកមកលក់គ្រាន់បានកម្រៃខ្លះ។

អ្នកស្រីបន្ថែមថា សព្វថ្ងៃតម្លៃផ្លែស្វាយខ្ទិះដែលអ្នកស្រីយកមកលក់នៅលើទីផ្សារ គឺអាចបានដល់ទៅ ៨ពាន់រៀល ក្នុងមួយគីឡូក្រាម គឺតម្លៃនេះជាតម្លៃខ្ពស់ណាស់ទៅហើយ ដោយសារតែនៅតាមភូមិគេមិនសូវឃើញមានដើមស្វាយខ្ទិះសោះឡើយ ដូច្នេះហើយទើបតម្លៃលក់បានខ្ពស់ ហើយម្យ៉ាងទៀតវាផ្លែដើមដៃផង។

អ្នកស្រី ផល្លា បន្តថា រាល់ថ្ងៃក្នុងការទិញស្វាយខ្ទិះយកមកលក់នៅលើទីផ្សារ គឺក្នុងមួយថ្ងៃអាចលក់បានពី ១៥ទៅ ២៥ គីឡូក្រាម ប៉ុន្តែអ្នកស្រីទាយថា នៅថ្ងៃចូលឆ្នាំខាងមុខនេះ តម្លៃស្វាយខ្ទិះអាចនឹងធ្លាក់ចុះមកវិញ ដោយសារតែដើមដែលនៅសេសសល់ផ្សេងៗទៀត វាក៏ចេញផ្លែដូចគ្នា ដូច្នេះវាមិនអាចបានតម្លៃដូចថ្ងៃនេះនោះឡើយ។ បើទោះបីជាស្វាយខ្ទិះមានតម្លៃខ្ពស់នៅលើទីផ្សារក៏ដោយ ក៏គេសង្កេតឃើញថា ប្រជាពលរដ្ឋហាក់ដូចជាមិនសូវយកចិត្តទុកដាក់ដាំដូចស្វាយកែវល្មៀតនោះឡើយ គេមិនដឹងថានេះដោយសារតែកង្វះខាតពូជឬយ៉ាងណានោះទេ៕

អត្ថបទ៖ សោ និយមរ័ត្ន

The post ស្វាយខ្ទិះដែលស្ទើរផុតពូជកំពុងលក់បានថ្លៃលើទីផ្សារ appeared first on Kampuchea Thmey Daily.